Ditɔnɔmii 30:1-20
30 “Te salalaŋ a sendila ya cho nya laŋ handɔɔ choo laŋ la huŋ yɔŋnuŋ pɛ a nya, nduyɛ mi la kɔ loonuŋ a laŋ o lɛŋii Chɛhowa Mɛlɛka nyaa cho nya sɛŋi niŋnde kpou,
2 okoŋ mi la muliŋ o Chɛhowa Mɛlɛka nyaa lo, mi nya a chuauwaa nyaa yaŋ nilaŋ o nyɛ o nyɛ ya cho nya hau dimullo a kɔl nyaa kpou vɛlɛ a yoomu* nyaa kpou,
3 Chɛhowa Mɛlɛka nyaa cho nya soli o chɛleŋ niŋ, mbo tuiinuŋ nya inyiɛɛ. Nduyɛ ba o ba nya wa a sɛŋiaŋ waŋnda tɛɛŋ, Chɛhowa Mɛlɛka nyaa cho nya miŋgi chuuŋgiaa naapilɛ.
4 O yɔŋ bɛɛ mi la wa a sɛŋiaŋ ba o ba fee o chieeŋndo choo, Chɛhowa Mɛlɛka nyaa cho nya chuuŋgiaa naapilɛ, mbo miŋgi nya o nya lo.
5 Chɛhowa Mɛlɛka nyaa cho nya miŋgi o lɛŋnde finyaa nyaa wa ichali leŋ nduyɛ mi la chal loŋ, mbo tosa mi nyɛ o nyɛ wa o kɛndɛ a nya, okoŋ mi la kui tau tau mbo hiou finyaa nyaa.
6 Chɛhowa Mɛlɛka nyaa cho kɔlta nyalaŋ dindi, a kɔlta chuauwaa nyaa, le halikpeŋ mi la kaala Chɛhowa Mɛlɛka nyaa a kɔl nyaa kpou vɛlɛ a yoomu* nyaa kpou, okoŋ mi la wa yoomu.
7 Nduyɛ, Chɛhowa Mɛlɛka nyaa cho sendilaŋ ndaŋ kpou tusi yaamɔɔwaa nyaa choo, a tul nya leyɛ ma tusi nya nyɛpalaa choo wa.
8 “La cho vɛlɛ Chɛhowa nilaŋ yaŋɔɔ, nduyɛ mi la diikuŋ sawala ndɔlaŋ kpou, la ya cho nya kioo paale hauleŋ ndeŋ ndaŋ.
9 Chɛhowa Mɛlɛka nyaa cho nya salaa dɔwɔɔ tau o nyɛ o nyɛ niŋ nya tosa, mbo tosa mi chuauwaa nyaa, a chɔluaa nyaa kui tau, nduyɛ mi tɔlɔɔla nyalaŋ la naŋ. Chɛhowa cho vɛlɛ wa a kɔl kɛndɛ le nya sɔɔŋ kɛndɔŋ tosallo, mɛɛ o wa a kɔl kɛndɛ le finyaa nyaa mamaa muŋ tosallo yɛ.
10 Okoŋ, la cho Chɛhowa Mɛlɛka nyaa nilaŋ yaŋɔɔ, nduyɛ mi la bii sawala ndɔla cho la poonyiaa o yau laSawaa hoo niŋndaŋ kpou, mi la miiŋgu Chɛhowa Mɛlɛka nyaa o ibuŋ a kɔl nyaa kpou vɛlɛ a yoomu* nyaa kpou.
11 “Sawala ya cho nya kioo paale hauleŋ ndeŋ ndaŋ, o cho sawala kendu biyɔɔ ɔɔ mi la bumba laŋ diikɔŋ te.*
12 O cho choo choo le la cho, okoŋ mi la dimi aa, ‘O nɛɛnɛ cho yɛ lakɔ choo choo mbo kɔ chuu naa laŋ, le miŋ tuei laŋ nduyɛ miŋ diikuŋ ndaŋ?’
13 La cho yɛ vɛlɛ o pee mɛŋma ihɛllo kɔɔli, le mi la dimi aa, ‘O nɛɛnɛ cho yɛ pee mɛŋma ihɛllo taŋɔɔ mbo chuu naa laŋ, le miŋ tuei laŋ nduyɛ miŋ diikuŋ ndaŋ?’
14 La cho nya ikɛi kpɛɛluŋ. La cho nya o sondo a o lakɔl, le halikpeŋ mi la diikuŋ ndaŋ.
15 “I simi nya hau yoomoo a suɛi kɛndɛi lachi, mi simi nya vɛlɛ piɔmndo a suɛi wɔɔŋndo lachi.
16 Te la yaŋ pɛ nilaŋ o sawala Chɛhowa Mɛlɛka nyaa, la ya cho nya kioo paale hauleŋ ndeŋ ndaŋ, mi la kaala Chɛhowa Mɛlɛka nyaa, mi la kuɛ o nɛila ndɔlaŋ choo, mi la bii sawala ndɔlaŋ, nduyɛ mi la tosa nyɛ o nyɛ o dimul nya, la cho wa yoomu, mi la kui tau tau, nduyɛ mi Chɛhowa Mɛlɛka nyaa dɔu nya sala o lɛŋnde nya cho kɔlaŋ challe leŋ niŋ.
17 “Kɛ te la mulul Mɛlɛka kɔɔ pɛ nduyɛ mi la tui ndu diom te, okoŋ mi waŋnda tosa mi la tunduŋ mɛlɛkaa cheleŋnda lachi mi la sooluu nda,
18 mi dimul nya paale hauleŋ kpendekele, la cho piɔmndo sɔla. La cho viouwɔɔ yoomu o lɛŋnde nya cho leŋ Chɔɔdaŋ ndaŋ taŋɔɔ le kɔlaŋ challe leŋ niŋ te.
19 I chua choo choo a lɛŋndeŋ maa seiya le nya paale hauleŋ ndeŋ, mi simi nya yoomoo a piɔmndo lachi, nduyɛ mi simi nya salaa a sendioo lachi. Lelaŋ nya a chuauwaa nyaa, la hɛli yoomoo le halikpeŋ mi la wa yoomu.
20 La kaala Chɛhowa Mɛlɛka nyaa, mi la tuei ndu diom, nduyɛ mi la holnuŋ ndu nyɛkɛndɛi. Kanifuule, Chɛhowa ke nya yoomoo ni, nduyɛ o nɔla mbo tosa mi la viou achal o lɛŋnde o chua buŋgɛi le finyaa nyaa mamaa Ebilaham, Aase, a Chekɔpu kioo leŋ niŋ.”
