Ditɔnɔmii 31:1-30
31 Okoŋ, mi Muuse fula mbo suaa diomndaŋ ndaŋ o Isɔluɛiya lo kpou.
2 Mbo dimul nda aa, “I cho niŋ hau wɔsilaŋ 120. I nɔla lɛ mi wa nya chilaŋ te.* Kanifuule, Chɛhowa dimul la aa, ‘A cho Chɔɔdaŋ ndaŋ maŋ taŋɔɔ le.’
3 Chɛhowa Mɛlɛka nyaa cho nya taŋɔɔ lachi, nduyɛ mi ndupila tɛɛmbuu kaala cho nya lachi laŋ, okoŋ mi la chua lɛŋii ndɛi. Chɔɔsuaa cho nya isisi lachi ni le taŋɔɔ, a mɛɛ Chɛhowa dimi yɛ.
4 Chɛhowa cho tosa a nda mɛɛ o tosa a masaa Amɔluaitiiya, Saihɔŋ a Ɔku vɛlɛ a lɛŋnde ndaleŋ yɛ, teleŋ o tɛɛmbuu nda wo.
5 Chɛhowa cho nda yomɔɔ le nya. Okoŋ, mi la tosa a nda mɛɛ sawala ya ke nya laŋ la dimi yɛ.
6 La nɔ kɔlta simulaalaŋ, mi la kendu ŋdial. La yɔŋ isiooŋ, ɔɔ mi la nyiiya le nda le. Kanifuule, Chɛhowa Mɛlɛka nyaa cho kɔlaŋ a nya latulu. O mel nya le, nduyɛ o feŋaŋ nya kɔɔli le.”
7 Okoŋ, mi Muuse veelu Chɔɔsuaa Isɔluɛiya kpou o hɔl, mbo dimul ndu aa: “Nɔ kɔl simulaa, ma kendu ŋdial. Kanifuule, num cho lakɔ a waŋnda haa o lɛŋnde Chɛhowa chuel finyaa ndaa mamaa buŋgɛi le nda kioo leŋ niŋ ni, nduyɛ ma ke nda leŋ mi le wa nyɛm kɛŋ nda.
8 Chɛhowa cho wa kɔlaŋ num lachi, nduyɛ o cho wa a num latulu. O mel num te, nduyɛ o feŋaŋ num kɔɔli le. Yɔŋ isiooŋ ɔɔ ma nyiiya le.”
9 Mi Muuse poonyiaa Sawaa hoo, mbo ke wanaa soliaa lasalaa fula o pulale Livai leŋ choo wa, a ndaa kua a kɔfu kpema Chɛhowa wo wa, vɛlɛ a waŋ banaa Isɔluɛi kpou.
10 Mi Muuse dimul nda aa: “O wɔsila ŋɔmmɛu kɛ kɛ mɛɛlulaŋ, a teleŋ kpeekpei nda mal waŋnda le kueelaŋ ndo, teleŋ Bɔŋaŋ laBafɛiyo,*
11 te Isɔluɛiya kpou chuuŋgiaŋ pɛ Chɛhowa Mɛlɛka nyaa lachi o fondaŋ o hɛli wo, la nɔ mi la veelu diomndaŋ o yau laSawaa hoo niŋ, le mi Isɔluɛiya kpou tuei.
12 La chuuŋgiaa waŋnda kpou naapilɛ, wana pɔnɔ ni, wana lanɔ ni, chuaambɔ ni, a mialaa cho nya tɛɛŋ o chieeŋ nyaŋ bɛndoŋ* niŋnda, le halikpeŋ ma tuei, nduyɛ ma pɛɛku a Chɛhowa Mɛlɛka nyaa okɔɔ, ma nɔ siooŋii nduɛi, okoŋ ma tosa nyɛ o nyɛ Sawaa hoo dimi.
13 Keŋ cho tosa mi chuauwaa ndaa sina a Sawaa hoo okɔɔ le wa tuei ndu, nduyɛ ma pɛɛku le siooŋnde nɔɔ le Chɛhowa Mɛlɛka nyaa, haaa a teleŋ nda cho wa yoomu o lɛŋnde nda cho Chɔɔdaŋ ndaŋ taŋɔɔ le kɔlaŋ challe leŋ niŋ.”
14 Okoŋ, mi Chɛhowa dimul Muuse aa: “Teleŋndo cho niŋ kpɛɛluŋ le ma sɔla piɔmndo. Lelaŋ, veelu Chɔɔsuaa, nduyɛ mi la kɔ sim nya ndu o tɛndii bɔŋaŋndo, le mi yulu ndu iso mbo wa waŋnda chilaŋ.” Mi Muuse nda Chɔɔsuaa kua ma kɔ sim o tɛndii bɔŋaŋndo.
15 Okoŋ, mi Chɛhowa chɔɔmuŋ nda o yumbu yumbu ikpuŋgbaa niŋ o tɛndii bɔŋaŋndo, nduyɛ mi yumbu yumbu ikpuŋgbaa chal o tɛndiiyo hɔlndɔ.
16 Mi Chɛhowa dimul Muuse aa: “A cho hunɔɔ piɔmndo sɔlaa.* Nduyɛ waŋnda haa cho ya malɔɔ, ma kandu mɛlɛkaa nda sina le wa sooluuwo o lɛŋnde nda cho kɔlaŋ ndeŋ niŋ. A cho ya faŋaŋ kɔɔli, ma tɛɛmbuu kpema ya yii a nda wo.
17 A teleŋ koŋ, I cho dɔɔnɔŋ tumbe a nda o kala kala, nduyɛ mi mal nda, okoŋ mi faŋa nda hɔlteŋ choo haaa ma sɔla tambei. Nduyɛ te kpundɛlaŋ a sɔɔŋ palaŋ bɔɔbɔɔ komal nda pɛ, a cho dimi aa, ‘Baa o cho le mɛɛ Mɛlɛka naa faŋa naa hɔlteŋ choo yɛ le kpundɛlaŋ ndaŋ la cho naa choo le?’
18 Kɛ a teleŋ koŋ, I cho nda hɔlteŋ faŋa choo, kanifuule le sɔɔŋ wɔɔŋ nda tosa ma muliŋ mɛlɛkaa cheleŋnda sooluuwo wo.
19 “Lelaŋ, la poonyiaa chondei hei le nyapila, nduyɛ mi la pɛɛku Isɔluɛiya ndi. La mala nda ma pɛɛku ndi,* le halikpeŋ mi chondei hei wa maa lesei naa waŋnda Isɔluɛi tɛɛŋ.
20 Te I kuɛ a nda pɛ o lɛŋnde ya chuel finyaa ndaa mamaa buŋgɛi leŋ niŋ, lɛŋnde milikiiyaŋ* a liaaŋ ma cho taaliaa leniŋ ndeŋ, ma de ma pim cha nduyɛ ma hini kɔl,* a cho muliŋ o mɛlɛkaa cheleŋnda lo ma sooluu nda, nduyɛ ma kɛɛ le ya bɛɛleŋ kioo, okoŋ ma tɛɛmbuu kpema ya yii a nda wo.
21 Te kpundɛlaŋ a sɔɔŋ palaŋ bɔɔbɔɔ komal nda pɛ, chondei hei cho wa maa lesei naa ndaa tɛɛŋ. Chuauwaa ndaa nɔ ma puɛɛnuŋ a ndi okɔɔ le. I sina niŋ yiyaŋnda ndalaŋ tuupa bɛɛ mi huŋ a nda o lɛŋnde ya chuel nda buŋgɛi leŋ niŋ.”
22 Lelaŋ, mi Muuse poonyiaa chondei hei o paale leŋ choo, nduyɛ mbo pɛɛku Isɔluɛiya ndi.
23 Okoŋ, mbo* yulu Chɔɔsuaa po Nuŋ ndo iso, le mbo wa waŋnda chilaŋ. Mbo dimul ndu aa: “Nɔ kɔl simulaa, ma kendu ŋdial. Kanifuule, num cho lakɔ a Isɔluɛiya o lɛŋnde ya chuel nda buŋgɛi leŋ niŋ ni. Nduyɛ, I cho wa a num latulu.”
24 Dimioo nuaa mi Muuse chii diomndaŋ ndaŋ poonyiaa kpou o yau laSawaa niŋ,
25 mi Muuse dimul Livaiya, a ndaa kua a kɔfu kpema Chɛhowa wo wa aa,
26 “La chua yau laSawaa hoo, mi la kɛsi ndu o kɔfu kpema Chɛhowa Mɛlɛka nyaa ikɛi, mbo wa maa lesei le nya.
27 Yapila sina kɛsɛ maa wanaa nilakaluaa nya cho ni, nduyɛ la dimuluŋ isɔɔ le. Naa nya tosallɔ Chɛhowa nilakalulaŋ teleŋ ya cho hoo yoomu wo, baa la hiu niŋ lachi a nilakalulaŋ tosaa te o yɔŋ pɛ mi vi le?
28 La chuuŋgiaa wanaa cho kaalaŋ bolle wa a wanaa nyaa banaa kpou naapilɛ, okoŋ mi dimul nda diomndaŋ ndaŋ le ma tuei, nduyɛ mi choo choo a lɛŋndeŋ le wa maa seiya naa ndaa tɛɛŋ.
29 Kanifuule, I sina kɛsɛ maa te I vi pɛ, la cho wa sɔɔŋ wɔɔŋndoŋ tosaa, mi la faŋaŋ o nɛi ya dimul nya le kɔlaŋ ndo choo. Nduyɛ sɔɔŋ palaŋ cho nya komal o chilaŋ niŋ, kanifuule la cho wa sɔɔŋ wɔɔŋndoŋ tosaa Chɛhowa Mɛlɛka o hɔl, okoŋ mi sɔɔŋ wɔɔŋ nya cho wa tosaa woŋ tɛɛmbuu ndu kɔllo.”
30 Okoŋ, mi Muuse miŋgi sondoo o diomnda cho o chondei hei niŋndaŋ choo, chɔŋ o kandɔŋndo mbo kɔ bii o mɛɛlulaŋ, nduyɛ mi Isɔluɛiya kpou tuɛi laŋ:
Tɛɛsiaalaŋ
^ Hibuluiye, “luɛiyɔɔ a fulaa.”
^ Ɔɔ “Bɔŋaŋ laYɛkpɔɔ.”
^ Hibuluiye, “diola kpakilaŋ.”
^ Hibuluiye, “hinilaŋ a finyaa numaa mamaa latulu.”
^ Hibuluiye, “wou nda ndi o sondo.”
^ Ɔɔ “nɔnɔɔ.”
^ Hibuluiye, “ma chelul.”
^ Naapum Mɛlɛka.
