Ditɔnɔmii 33:1-29
33 Tuupa mi Muuse, wana Mɛlɛka tonyaa wu, diomnda o dimi le Isɔluɛiya salaa dɔwɔɔ laŋ la cho laŋ ni.
2 Mbo dimi aa:
“Mi Chɛhowa chɔɔmuŋ Isɔluɛiya o Pembii Sanai Ve,
Nduyɛ mi paŋgele ndɔɔ tiu nda choo naa nda wa Sɛyaa wa.
Mi paŋgele ndɔɔ tiu silɔ o tanda ŋpemboo Paluaŋ.
Maalikɛiyaa nduaa waalaŋ o waalaŋ niŋ wa a ndu latulu,
Mi kuubaa nduaa chɔuwa wa isisi o ba ndɔ kɛndɔɔ choo.
3 Ndoo kaala wanaa nduaa.
Nduyɛ wanaa ndaa diandaa kpou, a cho num o ba.
A wa ichali num o peloŋ bɛŋgu,
Ma kandu nilaŋ yaŋɔɔ o nyɛ ŋ wa dimioo wo.
4 (Mi Muuse ke naa sawalaŋ,
Laŋ la cho nyɛm kɛŋ wanaa Chekɔpu wa ni.)
5 Mɛɛ wanaa cho waŋnda bolle wa chuuŋgiaŋ naapilɛ,
A kaala ndalaŋ Isɔluɛi kpou,
Mbo simnuŋ masaa o Chɛsulɔŋ* niŋ.
6 Maa Lubɛŋ wa yoomu, o wu le fɔ.
Nduyɛ maa puaa nduaa dɔɔnaŋ te fɔ.”
7 Mbo duau vɛlɛ Chuda sala aa:
“Oo Chɛhowa, maa tuei Chuda diom,
Ma miŋgi ndu o wanaa nduaa lo fɔ.
Mbo manda* nyɛm ndɔŋ a kpaaya ndɔɔ.
Maa mala ndu yaamɔɔwaa nduaa chɔulaba fɔ.”
8 Mbo dimi a Livai okɔɔ aa:
“Wana chɔm lo lechoo wo o numndo wo, wana ŋ tɔɔndaŋ Maasa wo,
Le ndu Tumim numndo* a Yuluim numndo cho ni.
Ma sɔŋga a ndu o mɛŋndaŋ Mɛluiba.
9 Po dimul finya ndɔ a kala ndɔ aa, ‘I nɔ lebɛɛ le nya le’ wo.
Bɛndaa nduaa a pɔmbuaa nduaa bɛɛ, o sina nda le.
Nduyɛ, mbo puɛɛnuŋ a puaa nduaa o velu wa.
Kanifuule, ma diikuŋ diom numndo,
Nduyɛ ma lo o kpema ŋ yii a nda wo choo.
10 Maa a pɛɛku Chekɔpu a yamaŋ numndoŋ okɔɔ,
Nduyɛ ma pɛɛku Isɔluɛi Sawa numndo fɔ.
Maa a lom nyɛm chuŋ kɛndɔŋ le num,*
Nduyɛ ma soli salaa kpou o bandu luamaa lasala numndo choo.
11 Oo Chɛhowa, dɔu ndu sala mbo sɔla kpaayaa,
Nduyɛ ma naŋ kɔl a walta o tosa laŋ.
Wanaa simul ndu wa, yimi nda peloŋ,*
Le halikpeŋ wanaa tul ndu leyɛ wa cheŋ ndɛ ma simul ndu le.”
12 Mbo dimi a Bɛŋjamiŋ okɔɔ aa:
“Maa wana Chɛhowa kaala wo wa o manda ndɔɔ bɛŋgu fɔ.
Nduyɛ boondii o cho wa ndu mandaa paaleŋ kpɛŋ ndo,
O cho ndu wa o lachoŋgu.”
13 Mbo dimi a Choosɛ okɔɔ aa:
“Maa Chɛhowa dɔu lɛŋnde ndɔleŋ sala
A nyɛm kɛndɔŋ o choo choo niŋ.
Maa o dɔu leŋ sala a mɔmndo vɛlɛ a mɛŋma fula lɛŋ ndaŋ fɔ.
14 Maa o dɔu leŋ sala a nyɛm kɛndɛŋ paaleŋ le tosa miŋ naŋ ndoŋ,
Nyɛm kɛndɛŋ kuam ipaŋgu o ipaŋgu woŋ.
15 Maa o dɔu leŋ sala a nyɛm kɛndɛŋ fula o pembuŋ bɛnduŋ paandoŋ ndoŋ,*
Nduyɛ a nyɛm kɛndɛŋ pembuŋ cho le fɛɛŋ a fɛɛŋ ndoŋ.
16 Maa o dɔu leŋ sala a nyɛm kɛndɛŋ cho ŋ piaa cha o lɛŋndeŋ choo woŋ,
Nduyɛ mi wana cho ichali o bɔɔ leyiŋndo niŋndo chɛl.
Maa salalaŋ ndaŋ la wa Choosɛ choo,
Wana nda hɛli bɛndaa nduaa a pɔmbɔ ndɔ tɛɛŋndo.
17 Naŋɔɔ ndɔɔ cho ko maa nau towa tase nda kom ndo,
Nduyɛ leela ndɔlaŋ maa leela chiiyo la cho ni.
A laŋ o cho waŋnda nyindɔɔ* ni,
Mbo kuɛ a nda o chieeŋndo mɛɛlulaŋ pɔ.
Puaa chɔuwaa Ifiluem nda cho waalaŋ o waalaŋ niŋ,
Nduyɛ puaa chɔuwaa Manaasɛ wa cho o waalaŋ niŋ.”
18 Mbo dimi a Sɛbulɔŋ okɔɔ aa:
“Oo Sɛbulɔŋ, maa dɔɔnuŋ nyaale te a fula pɛ,
Nduyɛ num Isaka, maa dɔɔnuŋ nyaale o tɛndiila numndaŋ niŋ.
19 A cho waŋnda veelu o pembei choo.
A cho salalaŋ soli o sandei choo.
Kanifuule, a cho sullo kɔndɔɔ* o pee mɛŋma ihɛllo niŋ,
A o nyɛm baa kalaŋ cho ŋ viaŋaa o siooŋnde niŋndoŋ.”
20 Mbo dimi a Kaadi okɔɔ aa:
“Salaa cho le wana chɔɔlu pɛŋgula Kaadi laŋ ndo.
Kaadi cho ko mɛɛ kpɔkuŋndo wa nuaa ihini,
Mbo wa o bɛɛndiaŋ le visioo sɛɛsiaa balaŋ a bolleŋ yɛ.
21 O cho hɛli lɛŋnde kɛndɛ leŋ le ndupila,
Mbo chua fondaŋ wa o kɛsiaa le wana yɔŋgu sawalaŋ ndo.
Te wanaa cho waŋnda bolle wa chuuŋgiaŋ pɛ naapilɛ,
O cho tosa nyɛ cho sakpo Chɛhowa o hɔllo,
Nduyɛ mbo diikuŋ sawala o ke Isɔluɛiya laŋ.”
22 Mbo dimi a Daŋ okɔɔ aa:
“Daŋ cho ko maa kpɔkuŋ chua.
O cho huulu naa o cho Baasiaŋ nda.”
23 Mbo dimi a Nafitalii okɔɔ aa:
“Nafitalii hini kɔl a kɛndɛi Chɛhowa tosal ndu ve,
Vɛlɛ a sala o dɔu ndu tau wo.
Chua fondaŋ cho ba paaleŋ le del lo a ba tou wo wo.”
24 Mbo dimi a Asia okɔɔ aa:
“Mɛlɛka dɔu Asia sala a chuauwa tau tau.
Maa bɛndaa nduaa a pɔmbuaa nduaa chɔ ndu nyina fɔ.
Maa o yiŋ* peluŋ ndɔŋ o chuɛiyaŋ niŋ fɔ.
25 Chiliŋnde a chiliŋii siaŋɛi ŋ cho wa diola kpakila numndaŋ kindaa ni.
Nduyɛ o yoomu numndo niŋ kpou, a cho waŋnɔŋ hɛnɛkɛ.
26 Mɛlɛka o mɛlɛka cho maa Mɛlɛka tonya Chɛsulɔŋ ndo le.
Mbo lo o choo choo niŋ mbo mala num.
Nduyɛ, o cho ichali o yumbu yumboo choo a naŋɔɔ ndɔ bɛndoo.
27 Chɔŋ o sindɔɔ niŋ, Mɛlɛka cho fondaŋ viaŋnaŋndo ni.
Bala ndɔla cho le fɛɛŋ a fɛɛŋ ndaŋ la cho num choo.
Nduyɛ o cho num yaamɔɔwa touwɔɔ lachi,
Mbo dimi aa, ‘Diu nda!’
28 Isɔluɛi cho waŋnɔŋ hɛnɛkɛ.
Sooŋ mamɛŋ Chekɔpu wo cho wa o mandaa bɛŋgu
O lɛŋnde nɔ kulloŋ a muɛima sɛnɛiyaŋ ndeŋ niŋ,
Nduyɛ mɔmndo wa niŋ chɔnɔŋndo o halaa niŋ, mbo chuchu.
29 Waŋnda Isɔluɛi, la dɔɔnuŋ nyaale!
Wanaa kuɛɛ cho yɛ maa nya,
A Chɛhowa cho piŋioo wa?
Ndu cho boo bɛndu manda nya wo ni,
A muɛi faŋii nyɛi bɛnduei.
Yaamɔɔwaa nyaa cho nya nyiiya lachi,
Nduyɛ mi la niɔu niɔu nda o lakɔɔ.”*
Tɛɛsiaalaŋ
^ Diolaŋ ndaŋ la sim, “Wana Sakpoo.” Diola lebɛɛla nda ke Isɔluɛi laŋ.
^ Ɔɔ “sɔŋga le.”
^ “Numndo,” “ŋ” a “ma” o sɔɔŋ 8 woŋ muŋ niŋ sim le Mɛlɛka.
^ Hibuluiye, “num o miliŋ.”
^ Ɔɔ “lɔlula tumndaŋ.”
^ Ɔɔ naapum, “pembuŋ bɛnduŋ cho ba paaleŋ le chaŋ ndo woŋ.”
^ Ɔɔ “kundɔɔ.”
^ Hibuluiye, “sɔɔsiaa.”
^ Ɔɔ “pulu.”
^ Ɔɔ naapum, “o fondaŋnda ndala fiilioŋndaŋ.”
