Ditɔnɔmii 4:1-49
4 “Nya waŋnda Isɔluɛi, la yaŋ niko nilaŋ o sawala ya cho nya kioo laŋ a nyɛ o nyɛ ya cho nya pɛɛkoo, nduyɛ mi la tosa ndu, le mi la wa yoomu, mi la kɔ chal o lɛŋnde Chɛhowa, Mɛlɛka finyaa nyaa mamaa cho nya kioo leŋ niŋ.
2 La handu nyɛ o nyɛ o sawala ya cho nya laŋ kioo laŋ choo le, nduyɛ la faŋa nyɛ o nyɛ le, le halikpeŋ mi la hiou lachi a sawala Chɛhowa Mɛlɛka nyaa diikɔŋndo, la ya cho nya laŋ kioo laŋ.
3 “Nyapila che a lehɔl pɛɛŋ nyɛ Chɛhowa tosal Baal, o wa Piɔɔ wo. Mi Chɛhowa Mɛlɛka nyaa tɛɛmbuu wana o wana wa nya tɛɛŋ, mbo sooluu Baal o wa Piɔɔ wo.
4 Kɛ nya cho hiouwɔ lachi a Chɛhowa Mɛlɛka nyaa loo kɔɔli wa, la cho wɔ hau yoomu.
5 I chii nya pɛɛku sawalaŋ, a nyɛ o nyɛ Chɛhowa Mɛlɛka nuu dimul la, le halikpeŋ mi la diikuŋ ndaŋ o lɛŋnde nya cho lakɔ ichali leŋ niŋ.
6 La tol sawalaŋ ndaŋ kɔɔli nyɛkɛndɛi. Keŋ cho tosa mi la chɔm maa la nɔ taasioo a sinapɛŋgoo. Nduyɛ wanaa cho tueiyɔɔ a sawalaŋ ndaŋ kpou okɔɔ wa cho dimi aa, ‘Waŋnda haa nɔ bɔɔ taasioo a sinapɛŋgoo.’
7 Kaale kɛ kɛ cho mi mɛlɛkaa ndaa sɔɔŋguu nda ikɛi kpɛɛluŋ, mɛɛ Chɛhowa Mɛlɛka naa sɔɔŋguu naa ikɛi kpɛɛluŋ te ŋ nyuna ndu pɛ le malaa yɛ le.
8 Nduyɛ kaale kuɛɛ le nɔ yɛ sawalaŋ mi la wa sakpo maa Sawala ya cho nya laŋ hau kpou kioo laŋ?
9 “Nyɛ nya nɔ le tosaa kinɛiyo cho ni maa, la nɔ mi la wa yekeŋ, nduyɛ mi la mandaŋ, yɔŋii nya puɛɛnuŋ sɔɔŋ nya che woŋ, nduyɛ mi kɔlta nyalaŋ la faŋaŋ o muŋ choo o yoomu nyaa niŋ kpou. La nɔ vɛlɛ mi la pɛɛku chuauwaa nyaa a chuauwaa nyaa mamaa sɔɔŋ muŋ.
10 Paale nya sim Chɛhowa Mɛlɛka nyaa lachi Holuɛɛbi leŋ, mi Chɛhowa dimul la aa, ‘Chuuŋgiaa waŋnda diompilɛ naa ya chua le ma tuei nyɛ ya nɔ le nda dimullo wo. Okoŋ, ma pɛɛku le ma nɔ siooŋii nii o yoomu ndaa niŋ kpou, nduyɛ mi nda pɛɛku chuauwaa ndaa.’
11 “Okoŋ mi la sɔɔŋguu kpɛɛluŋ, mi la sim o pembei bɛŋgu. Yiŋndeŋ le wa o pembei choo mi le fuuluu o choo choo niŋ dika, mi nyumndaŋ ma tual kpiŋgbi, nduyɛ mi yumbu yumboo o halaa niŋ piimiaa kpilo kpilo.
12 Mi Chɛhowa kandu suɛi o nya lo o yiŋnde leŋ niŋ. La wa diomndo tueiyɔɔ kɛ la chi wana wa suɛi yo le. Diomndo kinɛi nya wa tueiyɔɔ ni.
13 Mbo yii kpemaa a nya, nduyɛ mbo dimul nya le Sawala Tɔ Laŋ* biyɔɔ. Okoŋ kɔɔli, mbo poonyiaa laŋ o pouta yɛndɛla tiɔɔŋ ndaŋ choo.
14 A teleŋ koŋ, mi Chɛhowa dimul la le mi pɛɛku nya sawalaŋ, la nya nɔ mi la tol kɔɔli o lɛŋnde nya cho kɔlaŋ challe niŋ ndeŋ.
15 “Lelaŋ, la nɔ mi la mandaŋ, kanifuule paale Chɛhowa soo o nya lo o yiŋnde bɛŋndeŋ niŋ Holuɛɛbi leŋ, la chi wana o wana le.
16 Koŋ cho nya mala, la feŋaŋ Mɛlɛka kɔɔli mi la toosiaa piɔm kɛ kɛ le ndu sooluuwo, o wa velaŋ wana pɔnɔɔ ɔɔ velaŋ wana lanɔɔ,
17 nyɛ o nyɛ vel visiaa cho o chieeŋndo choo wa, ɔɔ nyɛ o nyɛ vel youwaa balu o choo choo niŋnda,
18 nyɛ o nyɛ vel nyaa yoomaa kua o demboo choo wa, ɔɔ nyɛ o nyɛ vel suuwaa cho o mɛŋndaŋ niŋ o chieeŋndo choo wa.
19 Nduyɛ te la nua pɛ choo choo mi la che paaleŋ, paŋgei, looŋ, a nyɛ o nyɛ cho o halaa niŋ, kɔl del nya pɛŋ mi la tunduŋ muŋ o labɛŋgu niŋ mi la sooluu muŋ te. Le wana o wana cho o lɛŋndeŋ choo Chɛhowa Mɛlɛka nyaa toosiaa nyɔɔŋ muŋ kpou ni.
20 Kɛ nya Chɛhowa chua ni, mbo soli nya o saŋga bɛndu nya wa niŋ Ichipi wo. O tosa hei, le mi la simnuŋ wanaa nduaa.* Nduyɛ, wanaa nduaa nya cho niŋ hau ni.
21 “Mi Chɛhowa tambu kɔl a ya le sabu nyaa, nduyɛ mbo mɛnaŋ maa I teŋ Chɔɔdaŋ ndaŋ, ɔɔ mi kuɛ o lɛŋnde kɛndɛle Chɛhowa Mɛlɛka nyaa cho nya kioo le mi le wa nyɛ nya leŋ niŋ te.
22 O lɛŋndeŋ ndeŋ niŋ ya cho wu ni, I cho taŋɔɔ Chɔɔdaŋ ndaŋ te. Kɛ nya cho maŋ taŋɔɔ mi la kɔ chal o lɛŋnde kɛndɛle leŋ niŋ.
23 La nɔ mi la wa yekeŋ yɔŋii nya puɛɛnuŋ kpema nya yii a Chɛhowa Mɛlɛka nyaa wo. Nduyɛ la toosiaa piɔmndo le ndu sooluuwo, ɔɔ nyɛ o nyɛ cheleŋ Chɛhowa Mɛlɛka nyaa kuuna nya tosaa wo le.
24 Kanifuule, Chɛhowa Mɛlɛka nyaa cho ko maa yiŋnde luam nyɛ o nyɛ leŋ, Mɛlɛka yeema naa miŋ piɛi ndu ndupilɛ kpe wo.
25 “Te la velu pɛ chuauwa mi la sɔla chuauwaa mamaa, nduyɛ mi la viou o lɛŋnde nya cho kɔlaŋ ndeŋ niŋ, mi la tosa sɔɔŋ bɛnda Chɛhowa Mɛlɛka nyaa o hɔl te woŋ, okoŋ mi la toosiaa piɔm kɛ kɛ le ndu kɔllo tɛɛmbuuwo pɛ,
26 I chua hau choo choo a lɛŋndeŋ maa seyaa ni, maa la cho keleŋa piɔmndo sɔla o lɛŋnde nya cho taŋɔɔ Chɔɔdaŋ ndaŋ le kɔlaŋ chuaa leŋ niŋ. La cho viouwɔɔ o lɛŋnde leŋ niŋ te. La cho tambei sɔla lefafɛɛŋ.
27 Chɛhowa cho tosa mi la saŋnuŋ waŋnda tɛɛŋ. Nduyɛ waŋnda nyɛɛmbɔ koni cho pioŋɔɔ sɔla nya tɛɛŋ ni, o lɛŋii Chɛhowa cho nya saŋɔɔ ve niŋ.
28 La cho lakɔ mɛlɛkaa waŋnda chieeya toosiaa a yɔmnde vɛlɛ a poutaŋ nda sooluu loŋ. Mɛlɛkaa haa chi le, a tui le, a di nyɛ le, nduyɛ a tui nyɛ chuŋ te.
29 “Te la nuuviaa Chɛhowa Mɛlɛka nyaa loŋ pɛ, nduyɛ mi la nyuna ndu le malaa a kɔl nyaa kpou vɛlɛ a yoomu nyaa kpou,* la cho ndu saalɔŋ.
30 Te sɔɔŋ muŋ kpou huŋ wa nya yɔŋnɔŋndo pɛ, nduyɛ mi la wa a kɔl tambɛi bɛndoo, la cho muliŋ o Chɛhowa Mɛlɛka nyaa lo, mi la yaŋ ndu nilaŋ.
31 Mɛlɛka inyiɛɛyo Chɛhowa Mɛlɛka nyaa cho ni. O mel nya mi la sɔla tambei le, nduyɛ o puɛɛnuŋ kpema o yii a finyaa nyaa mamaa wo le.
32 “La yiyaŋndɔ a sɔɔŋ yɔŋnuŋ o paandoo niŋndoŋ okɔɔ, chɔŋ a teleŋ Mɛlɛka toosiaa wanachioo o lɛŋndeŋ choo wo. La nyuuniaa wɔ o chieeŋndo choo kpou te suɛi bɛnduii waa nuaa i yɔŋnuŋ niŋ, ɔɔ te wana o wana tuei niŋ a suɛi waa nuaa okɔɔ.
33 Baa wanaa cheleŋ tuei niŋ pa Mɛlɛka suɛi o yiŋndeŋ niŋ, mɛɛ nya tuei ndu suɛi mi la wa wɔ hau yoomu yɛ?
34 Ɔɔ kani bɛɛ Mɛlɛka kindiŋ niŋ pa le wanaa cheleŋ hɛlioo o kaalaŋ tɛɛŋ le nda siiŋguuwo wanaa ndɔ? Baa Chɛhowa Mɛlɛka nyaa kilul niŋ pa waŋnda yamaŋ, mbo tosa kaamaa, sɔɔŋ kɔndɔfilloŋ, chɔuwo, nduyɛ mbo chɔm kpaaya ndɔ bɛndoo a sɔɔŋ ŋsiooŋndoŋ le wanaa cheleŋ, mɛɛ o tosa le nya Ichipi nya o hɔl kpendekele yɛ?
35 Mi nyapila cha sɔɔŋ muŋ kpou, le mi la sina maa Chɛhowa cho Mɛlɛka tonyaa ni, nduyɛ maa mɛlɛka o mɛlɛka cheleŋ cho o ndu kɔɔli le.
36 Mbo tosa mi la tuɛi ndu suɛi o choo choo niŋ, le nya chɔmndo nyɛ nya nɔ le tosaa wo. Mbo tosa mi la cha yiŋnde ndɔle bɛnduleŋ o lɛŋndeŋ choo, nduyɛ mi la tuɛi diom ndɔɔ o yiŋnde leŋ niŋ.
37 “Le mɛɛ o kaala finyaa nyaa mamaa, nduyɛ mbo hɛli nya chuauwaa ndaa mamaa* yɛ, lelaŋ o soli nya o Ichipi niŋ ni a kpaaya ndɔ bɛndoo.
38 Kayii ndii nɔ kpaayaa, mi i wa faŋga bɛndoo mi i hiau nya ve, mbo tuau ndi nya lachi, le mbo hiŋ a nya mbo ke nya lɛŋnde ndaleŋ mi la chal loŋ, mɛɛ i cho niŋ yɔŋnɔŋndo nuaa yɛ.
39 Lelaŋ la kɛsiŋ o kɔl maa, Chɛhowa cho Mɛlɛka tonyaa o choo choo niŋ a o lɛŋndeŋ choo ni. Mɛlɛka o mɛlɛka cheleŋ cho le.
40 La nɔ mi la hiou lachi a nyɛ o dimul nya wo tosaa vɛlɛ a sawala ndɔla ya cho nya hau kioo laŋ biyɔɔ, le halikpeŋ mi nyɛ o nyɛ wa o kɛndɛ a nya vɛlɛ a chuauwaa nyaa, nduyɛ mi la viou yoomu o lɛŋnde Chɛhowa Mɛlɛka nyaa cho nya kioo leŋ niŋ.”
41 A teleŋ koŋ, mi Muuse hɛli chieeŋ bɛndoŋ ŋgaa, kpeŋgii Chɔɔdaŋ ndaŋ ba paaleŋ le chaŋ ndo.
42 Wana o wana sulɛi hɛluŋ pɛ mbo dii waŋndo, nduyɛ maa ndoo tul wana koŋ leyɛ o paandoo niŋ te, o nɔ mbo nyaanuŋ o chieeŋ muŋ niŋ i pilɛ, mbo kɔ chal loŋ.
43 Chieeŋ muŋ cho muŋ ni: Bɛsa, chiee cho o pembei choo* o pollo niŋndo, le kaale Lubɛŋ ndeŋ, Luamɔti, chiee cho Kiliaadi wo, le kaale Kaadi leŋ, a Kolaŋ, chiee cho Baasiaŋ ndo, le kaale Manaasɛ leŋ.
44 Sawalaŋ ndaŋ Muuse ke waŋnda Isɔluɛi ni.
45 Loonɔŋndaŋ ndaŋ a sawalaŋ ndaŋ, Muuse ke Isɔluɛiya ni, mɛɛ nda fula Ichipi.
46 Teleŋ nda wa ichali o tanda Chɔɔdaŋ ndo niŋ o kpoloŋndo Bɛti-piɔɔ hɔlndɔ wo o ke nda sawalaŋ ndaŋ ni. Saihɔŋ, masa Amɔluaitiiya, o wa ichali Hɛsibɔŋ ndo ndoo nɔ lɛŋnde leŋ ni. Kɛ mi Muuse a Isɔluɛiya yam ndu mɛɛ nda fula Ichipi.
47 Okoŋ ma bii lɛŋnde ndɔleŋ a lɛŋnde Ɔku leŋ, masaa le Baasiaŋ. Chɔɔdaŋ ba paaleŋ le chaŋ ndo masaa ŋiɔɔŋaa Amɔluaitiiya haa wa ichali ni.
48 Tandaa hoo wa chɔŋ Aloya, chiee cho o Kpoloŋndo Anɔŋ ikɛiyo,* haaa kɔ o Pembei Siliɔŋ, koŋ cho ni, Hɛmɔŋ.
49 Mi tandaa hoo chua vɛlɛ Aluaba kpou o tanda Chɔɔdaŋ ndo niŋ ba paaleŋ le chaŋ ndo, haaa kɔ o Pee Mɛŋma Ihɛllo Aluaba,* o cho o lɛŋnde holnuŋ Pembei Pisika wo.
Tɛɛsiaalaŋ
^ Hibuluiye, “Diomnda Tɔ Laŋ.”
^ Ɔɔ “nyɛm kɛŋ ndɔŋ.”
^ Tofa Tɛɛsiaa.
^ Hibuluiye, “kulle.”
^ Ɔɔ “lɛŋnde dɛŋgbɛleŋ o pembei choo.”
^ Ɔɔ “fondaŋ mɛŋndaŋ ma piɔl o pollo niŋ Anɔŋ ndo.”
^ Koŋ cho ni, Pee Nyɛ Yoomaa Cho Leniŋ Te Wo.
