Ditɔnɔmii 5:1-33
5 Mi Muuse chuuŋgiaa Isɔluɛiya kpou naapilɛ, mbo dimul nda aa: “Nya waŋnda Isɔluɛi, la yaŋ nilaŋ o sawalaŋ a nyɛ o nyɛ ya cho nya hau dimullo. La pɛɛku laŋ, nduyɛ mi la tol taŋ kɔɔli nyɛkɛndɛi.
2 Mi Chɛhowa Mɛlɛka naa yii kpemaa a naa Holuɛɛbi.
3 Naŋ cho haa hau yoomu wa, a naa Chɛhowa yii kpemaa hoo ni, o cho a finyaa naa mamaa le.
4 Mi Chɛhowa suaa o nyalo sakpo* o pembei choo o yiŋndeŋ niŋ.
5 A teleŋ koŋ, mi sim nya tɛɛŋ a Chɛhowa, le mi dimul nya diom Chɛhowa wo, kanifuule siooŋnde wa nya le yiŋndeŋ nduyɛ la kue o pembei choo le. Mbo dimi aa:
6 “‘Ya cho Chɛhowa Mɛlɛka nyaa ni. Ya soli nya o chɛleŋ niŋ o lɛŋnde Ichipi leŋ niŋ ni.
7 La nɔ mi la piɛi mɛlɛkaa cheleŋ o ya kɔɔli le.
8 “‘La nɔ mi la sɛl piɔmndo ɔɔ velaŋ nyɛ o nyɛ waa o choo choo niŋ, o lɛŋndeŋ choo, ɔɔ nyɛ cho o mɛŋndaŋ bɛŋgu wo le.
9 La nɔ mi la beŋ muŋ wulaŋ, ɔɔ mi wana vɛɛlu nya le muŋ sooluuwo le. Kanifuule ya Chɛhowa Mɛlɛka nyaa, yapilɛ kpe nya nɔ ni mi la piɛi. Nduyɛ wanaa tul la leyɛ wa, I cho chuauwaa ndaa, chuauwaa ndaa mamaa, a chuauwaa mamaa o chuauwaa ndaa mamaa kɔɔli nyɛpalaa tusi choo, le hakila finyaa ndaa tosa laŋ.
10 Kɛ wanaa kaala ya nduyɛ ma bii sawala nilaŋ nda, I cho chuauwaa ndaa, a chuauwaa mamaa o chuauwaa ndaa mamaa kɔɔli kaala lo lechoo wo chɔm.
11 “‘La nɔ mi la tɛɛmbuu diola ya Chɛhowa Mɛlɛka nyaa labɛɛ le. Kanifuule wana o wana tɛɛmbuu pɛ diola nilaŋ labɛɛ, nyɛpalaa ya Chɛhowa tusi ndu choo ni.
12 “‘La loonuŋ a Paale Pɛŋgiaaleŋ, mi le wa le diandaa mɛɛ Chɛhowa Mɛlɛka nyaa dimul nya yɛ.
13 La nɔ mi la tosa walta nyalaŋ kpou o palɛi i ŋɔmpum bɛŋgu.
14 Kɛ paale ŋɔmmɛu leŋ, paale pɛŋgiaaleŋ le cho le Chɛhowa Mɛlɛka nyaa ni. Nya ni, puaa nyaa ni, chuauwaa nyaa laanduaa ni, buɛiyaa nyaa piaanduaa ni, buɛiyaa nyaa laanduaa ni, nau towa ni, sofɛlɛ ni, chɔluaa nyaa ni, a mialaa cho o chieeŋ nyaŋ bɛndoŋ* niŋnda kpou, la nɔ mi la tosa wali o wali o paale leŋ choo le, le halikpeŋ mi chiaa nyaa piaanduaa a chiaa nyaa laanduaa pɛŋgi maa nya.
15 La loonuŋ maa chiaa nya bɛɛ wa o lɛŋnde Ichipi leŋ niŋ, mi Chɛhowa Mɛlɛka nyaa soli nya loŋ a kpaaya ndɔ bɛndoo. Le sabu koŋ Chɛhowa Mɛlɛka nyaa dimul nya ni le mi la biilu Paale Pɛŋgiaaleŋ.
16 “‘Ke finya num a kala num bɛɛleŋ, mɛɛ ya Chɛhowa Mɛlɛka numndo dimul num yɛ, le halikpeŋ ma viou yoomu, nduyɛ mi nyɛ o nyɛ wa o kɛndɛ a num, o lɛŋnde ya Chɛhowa Mɛlɛka nyaa cho nya kioo leŋ niŋ.
17 “‘A nɔ ma dii wanachioo le.
18 “‘A nɔ ma suunda le.
19 “‘A nɔ ma yɔŋ levii le.
20 “‘A nɔ ma timbi seile lakafaleŋ a chaaŋ num wanachioo okɔɔ le.
21 “‘A nɔ ma luɛi lanɔɔ chaaŋ num wanachioo hɔlteŋ te. Chiɛi ndɔɔ ni, chiɛi nduɛi ni, buɛi ndɔ piaandoo ni, buɛi ndɔ laandoo ni, nau towa ndɔ ni, sofɛlɛ ndɔ ni, ɔɔ nyɛ o nyɛ cheleŋ o nɔ, a nɔ ma luɛi ndu hɔlteŋ te.’
22 “Sawalaŋ* ndaŋ Chɛhowa ke nya o pembei choo ni. Nya kpou wa a chuuŋgiaŋ naapilɛ, mi la tuɛi diom ndɔɔ choo choo kpeleŋ o yiŋndeŋ niŋ a o yumbu yumbu tiŋi bɛndoo niŋ. Nduyɛ o hendu lɛ nyɛ cheleŋ lechoo le. Okoŋ, mbo poonyiaa laŋ o pouta yɛndɛla tiɔɔŋ ndaŋ choo mbo ke ya.
23 “Kɛ dimioo nuaa mi la tuɛi diom ndɔɔ fulaa o yumbu yumbu tiŋi bɛndoo niŋ, mi yiŋndeŋ le wa sandei o pembei choo, mi wanaa cho kaalaŋ bolle wa a waŋ banaa kpou sɔɔŋguu naa ya chua.
24 Okoŋ ma dimul la aa, ‘Chɛhowa Mɛlɛka naa chɔm naa naŋɔɔ ndɔɔ a kpaaya ndɔ bɛndoo, nduyɛ miŋ tuɛi diom ndɔɔ o yiŋndeŋ niŋ. Ŋ che hau kpendekele maa Mɛlɛka nɔla mbo soo o wanachioo lo, nduyɛ mi wana koŋ hiou lachi a waa yoomu.
25 Kɛ yiŋnde bɛnduleŋ ndeŋ le nɔla mi le chii naa, nduyɛ ŋ yeema miŋ vi le. Te ŋ hiou pɛ lachi a Chɛhowa Mɛlɛka naa nilaŋ yaŋɔɔ, ŋ cho piɔmndo sɔla.
26 Nɛɛnɛ tuei yɛ niŋ Mɛlɛka cho yoomu wo suɛi o yiŋndeŋ niŋ mɛɛ naŋ tuei ndu yɛ, mbo hiau lachi a waa yoomu?
27 Lelaŋ numpila sɔɔŋguu kpɛɛluŋ ma tuei nyɛ o nyɛ Chɛhowa Mɛlɛka naa cho num dimullo, okoŋ ma dimul naa nyɛ o nyɛ Chɛhowa Mɛlɛka naa cho num dimul, nduyɛ miŋ yaŋ nilaŋ miŋ tosa nyɛ o dimi wo.’
28 “Mi Chɛhowa tuɛi nyɛ nya dimul la wo, okoŋ mi Chɛhowa dimul la aa, ‘I tuei nyɛ waŋnda haa dimul numndo. Nyɛ o nyɛ nda dimi, o bɛnda tau.
29 Te ndaa hiau niŋ pɛ lachi a siooŋnde nɔɔ le ya, nduyɛ ma bii sawala nilaŋ, nyɛ o nyɛ cho wa o kɛndɛ le nda a chuauwaa ndaa le fɛɛŋ a fɛɛŋ.
30 Kɔ ma dimul nda aa: “Wana o wana miiŋgu o tɛndii ndɔɔ niŋ.”
31 Kɛ num a nɔ ma lo naŋ a ya latulu, le mi chɔm num sawalaŋ, a nyɛ o nyɛ ŋ nɔ ma pɛɛku nda kpou. Laŋ nda nɔ ni ma tol kɔɔli o lɛŋnde ya cho nda kioo le ma kɔ chal leniŋ ndeŋ.’
32 La nɔ mi la tosa nyɛ o nyɛ Chɛhowa Mɛlɛka nyaa dimul nya le tosaa nyɛkɛndɛi. La nɔ mi la muliŋ o ba kɛndɔɔ choo ɔɔ o ba miallo choo le.
33 La nɔ mi la kuɛ o nɛi Chɛhowa Mɛlɛka nyaa dimul nya le mi la kuɛ choo wo, le halikpeŋ mi la wa yoomu, mi nyɛ o nyɛ wa o kɛndɛ a nya, nduyɛ mi la viou o lɛŋnde nya cho kɔlaŋ challe leŋ niŋ.
