Ditɔnɔmii 6:1-25
6 “Sawalaŋ ndaŋ, a nyɛ o nyɛ Chɛhowa Mɛlɛka nyaa yeema naa miŋ tosa o ke ya ni le nya pɛɛkoo. Te la taŋ pɛ o lɛŋnde nya nɔ le kɔlaŋ challe leŋ niŋ, la nɔ mi la diikuŋ ndaŋ,
2 le halikpeŋ mi nya, chuauwaa nyaa, a chuauwaa nyaa mamaa nɔ siooŋnde le Chɛhowa Mɛlɛka nyaa, mi la bii sawala ndɔlaŋ kpou, nduyɛ mi la tosa nyɛ o dimul nya wo o yoomu nyaa niŋ kpou, le mi la viou yoomu.
3 Nya waŋnda Isɔluɛi, la yaŋ nilaŋ nduyɛ mi la bii sawalaŋ ndaŋ, le halikpeŋ mi nyɛ o nyɛ wa o kɛndɛ a nya, nduyɛ mi la kui tau tau o lɛŋnde milikiiyaŋ* a liaaŋ ma cho taaliaa leniŋ ndeŋ, a mɛɛ Chɛhowa, Mɛlɛka finyaa nyaa mamaa chuel nya buŋgɛi yɛ.
4 “Nya waŋnda Isɔluɛi, la yaŋ nilaŋ. Chɛhowa Mɛlɛka naa, ndupilɛ kpe cho Chɛhowa ni.
5 La nɔ mi la kaala Chɛhowa Mɛlɛka nyaa a kɔl nyaa kpou, a yoomu* nyaa kpou, vɛlɛ a kpaaya nyaa kpou.
6 Sawala ya cho nya laŋ hau kioo laŋ, la nɔ mi la kɛsiŋ ndaŋ o lakɔl.
7 La nɔ mi la pɛɛku chuauwaa nyaa laŋ,* nduyɛ mi la wa suɛi o nda lo a laŋ okɔɔ, te la wa ichali o la nya lo chiɛiniŋ pɛ, te la wa kɔlaŋ o nɛi pɛ, te la wa hinilaŋ pɛ, nduyɛ te la chɛŋ pɛ.
8 La yiinuŋ ndaŋ o laba le loonɔŋndo a laŋ okɔɔ, nduyɛ mi la yiinuŋ ndaŋ o ŋtendu maa tamasi.
9 La poonyiaa laŋ o keedeŋ diola chiɛila nyalaŋ, a o diola kpakila nyalaŋ.
10 “Te Chɛhowa Mɛlɛka nyaa kuɛ pɛ a nya o lɛŋnde o chuel finyaa nyaa mamaa, Ebilaham, Aase, a Chekɔpu buŋgɛi le nya kioo leŋ niŋ, lɛŋnde nɔ chieeŋ bɛnduŋ kɛndɛ kɛndɛŋ nya teŋgul te woŋ,
11 chiɛila nya teŋgul te laŋ, mi la wa la piaa cha a nyɛm kɛndɛ kɛndɔŋ, sooŋnda mamɛŋnda nya tuu le laŋ, kpelela makilepiilaŋ a ɔlifiima nya tol te waŋ, okoŋ mi la wa diolaŋ mi la hini kɔl,
12 la mandaŋ, yɔŋii nya puɛɛnuŋ a Chɛhowa, o soli nya o chɛleŋ niŋ o lɛŋnde Ichipi leŋ niŋndo.
13 Chɛhowa Mɛlɛka nyaa nya nɔ ni mi la nɔ siooŋii nduɛi. Ndu nya nɔ ni mi la piɛi, nduyɛ o diola ndɔlaŋ niŋ nya nɔ ni mi la mɛnaŋ.
14 La sooluu mɛlɛka o mɛlɛka cheleŋ te. Mɛlɛkaa wanaa balu nya wa kpou, la sooluu nda le.
15 Kanifuule, Chɛhowa Mɛlɛka nyaa, o cho nya tɛɛŋ ndo, Mɛlɛka yeema miŋ piɛi ndu ndupilɛ kpe wo o cho ni. Te o cho koŋ te, Chɛhowa Mɛlɛka nyaa cho tumbe dɔɔnɔŋ a nya o kala kala, nduyɛ mbo basu nya tɛɛ o lɛŋndeŋ choo.
16 “La wou Chɛhowa Mɛlɛka nyaa o tɔɔndaŋndo niŋ, mɛɛ nya tɔɔndaŋ ndu Maasa yɛ le.
17 Sawalaŋ, loonɔŋndaŋ, a nyɛ o nyɛ Chɛhowa Mɛlɛka nyaa dimul nya le tosaa, la nɔ mi la bii laŋ nyɛkɛndɛi.
18 La nɔ mi la tosa nyɛ cho sakpo nduyɛ mbo bɛnda Chɛhowa o hɔllo, le halikpeŋ mi nyɛ o nyɛ wa o kɛndɛ a nya, nduyɛ mi la luɛi o lɛŋnde nya nɔ le kɔlaŋ challe leŋ niŋ, lɛŋnde Chɛhowa chuel finyaa nyaa mamaa buŋgɛi le nda kioo leŋ.
19 Chɛhowa cho nya yaamɔɔwaa nyaa touwɔɔ lachi mɛɛ o chua buŋgɛi yɛ.
20 “Te chuauwaa nyaa huŋ nyuna nya pɛ o chilaŋ niŋ aa, ‘Yɛɛnɛ loonɔŋndaŋ, sawalaŋ ndaŋ, a nyɛ o nyɛ Chɛhowa Mɛlɛka naa dimul nya le tosaa wo sim yɛ?’
21 la dimul nda aa, ‘Ŋ wa o chɛleŋ niŋ Felo o ba bɛŋgu o lɛŋnde Ichipi leŋ niŋ, kɛ mi Chɛhowa soli naa loŋ a kpaaya ndɔ bɛndoo.
22 Miŋ cha mi Chɛhowa tosa kaamaalaŋ a sɔɔŋ kɔndɔfiliŋ bɛndoŋ, miŋ saaŋgiaa waŋnda Ichipi, Felo, a wana o wana wa o yuŋgu ndɔɔ niŋ.
23 Mbo soli naa loŋ, mbo huŋ a naa nanuŋ, le naa lɛŋnde o chuel finyaa naa mamaa buŋgɛi leŋ kioo.
24 Okoŋ mi Chɛhowa dimul naa le miŋ tol sawala ndɔlaŋ ndaŋ kpou kɔɔli, nduyɛ miŋ nɔ siooŋnde le Chɛhowa Mɛlɛka naa, le mi nyɛ o nyɛ wa o kɛndɛ a naa le fɛɛŋ a fɛɛŋ, nduyɛ miŋ viou achal mɛɛ naŋ cho niŋ hau nuaa yɛ.
25 Nduyɛ, te ŋ diikuŋ pɛ sawala Chɛhowa Mɛlɛka naa ke naa laŋ ndaŋ nyɛkɛndɛi mɛɛ o dimul naa yɛ, ŋ cho simnɔŋ wanaa sakpuaa ndu o hɔl.’
Tɛɛsiaalaŋ
^ Ɔɔ “nɔnɔɔ.”
^ Tofa Tɛɛsiaa.
^ Ɔɔ “mi la wa chuauwaa nyaa laŋ miŋgioo pɛɛkoo, mi la kindilal chuauwaa nyaa laŋ.”
