Ditɔnɔmii 8:1-20
8 “Sawala ya cho nya kioo paale hauleŋ ndeŋ ndaŋ, la nɔ mi la wa yekeŋ nduyɛ mi la bii laŋ nyɛkɛndɛi, le halikpeŋ mi la kui mi la hiou lachi a waa yoomu, nduyɛ mi la kɔ chal o lɛŋnde Chɛhowa chuel finyaa nyaa mamaa buŋgɛi leŋ niŋ.
2 La loonuŋndɔ a tiŋ Chɛhowa Mɛlɛka nyaa tosa mi la buli le wɔsila 40 laŋ ndaŋ o pollo niŋndo. O tosa hei le mi la tusiŋ, nduyɛ mbo tofa nya le sinaa nyɛ cho nya o la kɔllo, te la bii niŋ pɛ sawala ndɔlaŋ ɔɔ la bii niŋ ndaŋ te.
3 Lelaŋ o tosa ni mi la tusiŋ, mi yiaaŋ ma nɛi nya, nduyɛ mbo ke nya manɛiyo mi la dia, nyɛdiaa nya a finyaa nyaa mamaa ndaa sina paandu le wo, le halikpeŋ mi la sina maa, o cho ko nyɛdiaa le tosa mi wana wa yoomu le. Kɛ diom o diom Chɛhowa dimi pɛ, o tosa mi wana wa yoomu.
4 O wɔsila 40 laŋ ndaŋ bɛŋgu, nyɛla nyalaŋ la siɔŋ te, nduyɛ peluŋ nyaŋ bɛɛ hiinduu le.
5 La sina o kɔlta nyalaŋ niŋ walaŋ maa, mɛɛ finyaa miŋgi nuaa po ndɔɔ o nɛi yɛ, lende Chɛhowa Mɛlɛka nyaa wa nya miŋgioo o nɛi ni.
6 “Lelaŋ, la bii niko sawala Chɛhowa Mɛlɛka nyaa, mi la kuɛ o nɛila ndɔlaŋ choo, nduyɛ mi la nɔ siooŋii nduɛi.
7 Kanifuule, Chɛhowa Mɛlɛka nyaa cho kɔlaŋ a nya o lɛŋnde kɛndɛleŋ niŋ, lɛŋnde nɔ peelaŋ,* sooŋnda mamɛŋndaŋ* a baltaŋ o kpoloŋndaŋ tɛɛŋ a o pembuŋ bɛndoŋ choo leŋ.
8 Lɛŋnde nɔ witiiyoŋ, baliiyoŋ, kilepiiyaŋ, yɔmii mafikiiye, pɔmɛkilanetiiyaŋ, chuɛima ɔlifiiyaŋ, a liaaŋ ndeŋ.
9 Nyɛdiaa lepɛŋ ve niŋ o lɛŋndeŋ ndeŋ niŋ te, nduyɛ la heu niŋ ba le nyɛ o nyɛ le. Le nɔ poutaŋ la piaa cha a chiliŋndoŋ leniŋ, nduyɛ la wa niŋ pembuŋ cho o lɛŋnde leŋ niŋndoŋ touwɔɔ le chiliŋuŋ siaŋaŋ.
10 “Te la de pɛ mi la pim cha, la saŋgala Chɛhowa Mɛlɛka nyaa le lɛŋnde kɛndɛle o ke nya leŋ.
11 La mandaŋ yɔŋii nya puɛɛnuŋ a Chɛhowa Mɛlɛka nyaa, mi la kɛɛ le sawala ndɔla ya cho nya hau kioo laŋ biyɔɔ, vɛlɛ a nyɛ o nyɛ o dimul nya le tosaa.
12 Te la de pɛ mi la pim cha, mi la taŋgul chiɛila kɛndɛ kɛndɛlaŋ mi la luɛi leniŋ,
13 mi chɔluaa nyaa kui, mi la sɔla kaniŋ humboŋ a kooliiyoŋ tau, nduyɛ mi nyɛ o nyɛ wa nya o ba tau tau,
14 la chɛl mi yoŋgaa luɛi nya o lakɔl, mi keŋ tosa mi la puɛɛnuŋ Chɛhowa Mɛlɛka nyaa, o soli nya o chɛleŋ niŋ o lɛŋnde Ichipi leŋ niŋndo le.
15 Ndu tosa ni mi la keeku o poli bɛndu wɔɔŋ wɔɔŋndo niŋ, o nɔ kɛuwaa wɔɔŋ wɔɔŋnda, ŋgeemaa, a lɛŋnde vesɛile bɛndule nɔ mamɛŋ te leŋ. Mbo tosa mi mɛŋndaŋ ma fula o pou kala kalaa niŋ.
16 Mbo ke nya manɛiyo o pollo niŋ mi la dia, nyɛdiaa finyaa nyaa ndaa sina paandu le wo. Mbo tosa mi la tusiŋ, nduyɛ mbo tofa nya, le halikpeŋ mi la huŋ sɔla tɔnɔɔ o chilaŋ niŋ.
17 Te la dimi pɛ o kɔlta nyalaŋ niŋ aa, ‘Kpaaya naa, a yoomuma naŋ ma tosa ni miŋ sul sullo hoo,’
18 la loonuŋ maa Chɛhowa Mɛlɛka nyaa ke nya kpaayaa ni mi la sul, le halikpeŋ mbo peelu kpema o yii a finyaa nyaa mamaa wo, mɛɛ i cho niŋ hau nuaa yɛ.
19 “Te la puɛɛnuŋ pɛ a Chɛhowa Mɛlɛka nyaa, mi la tol mɛlɛkaa cheleŋnda kɔɔli, nduyɛ mi la tunduŋ nda o labɛŋguniŋ le nda sooluuwo pɛ, mi dimul nya hau kpendekele, la cho piɔmndo sɔla.
20 Mɛɛ Chɛhowa cho kayii cho nya lachi ve tɛɛmbuuwo yɛ, lende Chɛhowa Mɛlɛka nyaa cho nya tɛɛmbuu ni, le mɛɛ nya kɛɛ le ndu nilaŋ yaŋɔɔ yɛ.
Tɛɛsiaalaŋ
^ Ɔɔ “fondaŋnda mɛŋndaŋ ma piɔl o pollo niŋndaŋ.”
^ Ɔɔ “fondaŋnda mɛŋndaŋ ma fula lɛŋ di laŋ.”
