Ditɔnɔmii 9:1-29
9 “Nya waŋnda Isɔluɛi, la yaŋ nilaŋ. La cho Chɔɔdaŋ ndaŋ taŋɔɔ, mi la wa kɔlaŋ kayii cho i bɛndu mi i hiau nya mayoomu ve touwɔɔ. Chieeŋ ndaŋ cho ŋ bɛndu, nduyɛ ŋ nɔ kpakila kala kalalaŋ la fuulaa o halaa niŋ di.*
2 Waŋnda haa nɔ kpaayaa, nduyɛ a bandu tau. Puaa Anakimnda nda cho ni, a nya sina nduyɛ mi la tuɛi a nda okɔɔ aa, ‘Nɛɛnɛ nɔla yɛ mbo simul puaa Anaki wa?’
3 Lelaŋ, la nɔ mi la sina paale hauleŋ ndeŋ maa Chɛhowa Mɛlɛka nyaa cho nya taŋɔɔ lachi. O cho ko maa yiŋnde luam nyɛ o nyɛ leŋ, nduyɛ o cho nda basɔɔ tɛɛ. La cho chɔ mbo mal nda nya o ba, mi la keleŋa nda touwɔɔ,* nduyɛ mi la tɛɛmbuu nda, a mɛɛ Chɛhowa chuel nya buŋgɛi yɛ.
4 “Te Chɛhowa Mɛlɛka nyaa tou pɛ kaalaŋ ndaŋ nya lachi, la dimiŋ o kɔl niŋ aa, ‘Le mɛɛ naŋ cho sakpo yɛ Chɛhowa hiŋ a naa o lɛŋndeŋ ndeŋ niŋ ni’ le. Kɛ, le dɛnɛ wɔɔŋ kaaye hei Chɛhowa cho nya nda touwɔɔ lachi ni.
5 O cho le mɛɛ nya cho wanaa sakpuaa, ɔɔ mi la sandu o kɔlta nyalaŋ niŋ yɛ le nya cho lakɔ ichali o lɛŋnde ndaleŋ niŋ te. Kɛ, le dɛnɛ wɔɔŋ kaaye hei Chɛhowa Mɛlɛka nyaa cho nya nda touwɔɔ lachi ni, le halikpeŋ mi Chɛhowa peelu buŋgɛi o chuel finyaa nyaa mamaa, Ebilaham, Aase, a Chekɔpu ve.
6 Lelaŋ la nɔ mi la sina maa, o cho le mɛɛ nya cho wanaa sakpuaa yɛ le Chɛhowa Mɛlɛka nyaa cho nya lɛŋnde kɛndɛleŋ ndeŋ kioo, le mi la chal leniŋ te. Kanifuule, wanaa bolii kalaa nya cho ni.
7 “La loonuŋ a mɛɛ nya tɛɛmbuu Chɛhowa Mɛlɛka nyaa kɔl o pollo niŋ yɛ. Chɔŋ a teleŋ nya mal o lɛŋnde Ichipi leŋ niŋndo haaa mi la fuuluu nanuŋ, la cho Chɛhowa simullo.
8 Teleŋ nya wa Holuɛɛbi wo bɛɛ, mi la tɛɛmbuu Chɛhowa kɔllo. Nduyɛ mi Chɛhowa duaunuŋ tumbe o kala kala a nya, mbo yeema pɛŋ le nya basɔɔ tɛɛ.
9 Mɛɛ ya hel o pembei choo le pouta yɛndɛlaŋ biyɔɔ, pouta Chɛhowa yii kpemaa a nya laŋ, I wa o pembii keŋ choo le palɛi 40 a nyumndaŋ 40. I di nyɛdiaa le, nduyɛ I kol mamɛŋ te.
10 Mi Chɛhowa ke ya pouta yɛndɛla tiɔɔŋnda ndupila poonyiaa lechoo a iso laŋ. Nduyɛ, nyɛ o nyɛ Chɛhowa dimul nya o pembei choo o yiŋndeŋ niŋ teleŋ nya chuuŋgiaŋ o pembei bɛŋgu wo, o wa o poonyiaa lechoo.
11 Mɛɛ palɛi hiou 40 a nyumndaŋ 40, mi Chɛhowa ke ya pouta yɛndɛla tiɔɔŋnda o yii kpemaa a nya laŋ.
12 Okoŋ mi Chɛhowa dimul la aa, ‘Chɔŋ ma tol chɔ chɔ, kanifuule wanaa num aa ŋ soli Ichipi wa a tosa yɔŋ wɔɔŋndo. A keleŋa bɔɔ faŋaŋ o nɛi ya dimul nda le kɔlaŋ lechoo wo. A toosiaa piɔmndo a chiliŋnde* le ndu sooluuwo.’
13 Mi Chɛhowa dimul la aa, ‘Mɛɛ ya che waŋnda haa yɛ, wanaa bolii kalaa pila nda cho ni.
14 Fula naa tɛɛŋ mi tɛɛmbuu nda, mi diola ndalaŋ la nyum pɔli o chieeŋndo choo. Okoŋ mi siiŋguu num kaale kpaayale bɛndu, mi le wa faŋga mbo hiou mɛɛ nda cho yɛ.’
15 “Okoŋ mi muliŋ mi tual pembei. Yiŋndeŋ le wa wɔ sandei o pembei choo, nduyɛ pouta yɛndɛla tiɔɔŋnda Mɛlɛka yii kpemaa a nya laŋ la wa ya o laba.
16 Mɛɛ ya tofa, mi cha maa la tosa hakioo a Chɛhowa Mɛlɛka nyaa! Mi la toosiaa nau fɔŋndɔɔ a chiliŋnde* le ndu sooluuwo, mi la keleŋa faŋaŋ o nɛi Chɛhowa dimul nya le mi la kuɛ lechoo wo.
17 Okoŋ, mi heelu pouta yɛndɛla tiɔɔŋnda wa ya o ba laŋ, mi viɔl taŋ lɛŋ nya o hɔl mi la saŋnuŋ.
18 Mi baŋ Chɛhowa wulaŋ lachi, mi tosa vɛlɛ palɛi 40 a nyumndaŋ 40 mɛɛ ya tosa o tasela ndɔ yɛ. I di nyɛdiaa le, I kol mamɛŋ te, le mɛɛ nya tosa dɛnɛ wɔɔŋndo, mi la tosa hakioo a Chɛhowa, nduyɛ mi la tɛɛmbuu ndu kɔllo yɛ.
19 Mɛɛ Chɛhowa dɔɔnuŋ tumbe a nya o kala kala mbo yeema le nya tɛɛmbuuwo, mi siooŋii bɛnduei bii ya. Kɛ, mi Chɛhowa yaŋ ya vɛlɛ nilaŋ a teleŋ koŋ.
20 “Mi Chɛhowa duaunuŋ tumbe o kala kala a Elɔŋ, mbo yeema pɛŋ le ndu diyɔɔ. Kɛ a teleŋ koŋ bɛɛ, mi nyɔɔlu ndu le Elɔŋ.
21 Okoŋ, mi chua nyɛ nda toosiaa koŋ maa nau fɔŋndɔ wo, o tosa mi la luɛi o hakioo niŋndo, mi luam ndu chilikɔ, mi lo ndu chuiyo haaa mbo simnuŋ maa chundu. Mi viau chundu koŋ o pee wa fulaa o pembei choo wo.
22 “O faŋaŋndɔ okoŋ kɔɔli, o Tabɛlua niŋ bɛɛ, Maasa, a Kibilɔti-hataava, mi la tɛɛmbuu Chɛhowa kɔl.
23 Teleŋ nya wa Kedɛsi-baniaa wo, mi Chɛhowa dimul nya aa, ‘La kɔ mi la kɔ chal o lɛŋnde ya cho nya kioo leŋ niŋ.’ Kɛ loŋ bɛɛ, mi la kɛɛ le tosaa nyɛ Chɛhowa Mɛlɛka nyaa dimul nya wo. La dou tiindaŋndo o ndu niŋ te, nduyɛ la diikuŋ ndu le.
24 Kani mi sina nya, wanaa simul Chɛhowa wa nya cho ni.
25 “I wa hiouwɔɔ lachi a Chɛhowa wulaŋ beŋndo le palɛi 40 a nyumndaŋ 40. I wa hei tosaa kanifuule, mi Chɛhowa dimi maa o cho nya basɔɔ tɛɛ.
26 Mi kandu Chɛhowa nyɔɔloo mi dimi aa, ‘Oo Chɛhowa, Mɛlɛka Kpuluŋguma Bɛndoo, yandii tɛɛmbuu wanaa numnda le! Nyɛm kɛŋ numndoŋ nda cho ni, wanaa ŋ piŋi o chɛleŋ niŋ Ichipi a kpaaya num bɛndoo wa.
27 Loonuŋ a buɛiyaa numnda, Ebilaham, Aase, a Chekɔpu. Handu kɔllo o bolle kalale waŋnda haa, dɛnɛ wɔɔŋ ndaa, a o haki ndaa choo le.
28 Te o cho koŋ te, wanaa cho o lɛŋnde ŋ soli naa leŋ niŋnda cho dimi aa, “Chɛhowa tiuba mbo kuɛ a nda o lɛŋnde o chuel nda buŋgɛi leŋ niŋ te. Nduyɛ, le mɛɛ o tul nda leyɛ yɛ o soli nda o lɛŋndeŋ ndeŋ niŋ ni, le mbo kɔ diu nda o pollo niŋ.”
29 Wanaa numnda a nyɛm kɛŋ numndoŋ nda cho ni, wanaa ŋ siɛndi ba numndo, ma piŋi nda a kpaaya num bɛndoo wa.’
Tɛɛsiaalaŋ
^ Koŋ cho ni, kpakila filioŋndaŋ.
^ Ɔɔ “faŋa o fondaŋnda ndalaŋ.”
^ Ɔɔ “chiliŋii teeŋgiɛi.”
^ Ɔɔ “chiliŋii teeŋgiɛi.”
