Emɔɔsi 1:1-15
1 Mi Emɔɔsi,* wana mandaa lasaa o pilɛ o Tɛkowa niŋ sɔla yooŋgoo o yilaŋnde niŋ a Isɔluɛi okɔɔ. A teleŋ Yusaya wa masaa le Chuda, nduyɛ mi Chɛlobowam, po Chowaasi wo wa masaa le Isɔluɛiyo o sɔla yooŋgoo hoo ni, wɔsilaŋ la tiɔɔŋ tuupa mi lɛŋndeŋ le nyiiya.
2 Mbo dimi aa:
“Chɛhowa cho pɛɛliaa o Saayɔŋ niŋ,Nduyɛ, o cho deŋi choo choo o Chulusalɛm niŋ.
Bil wanaa mandaa lasaa kua a saa ndaa le diolaŋ ndo cho vesa,Mi bil cho o pembii Kamɛɛ ve choo wo bɛɛ vesa.”
3 “Nyɛ Chɛhowa dimi wo cho hoo ni,‘“Waŋnda Damasikɔɔ tosa sɔɔŋ wɔɔŋndoŋ bɛmbɔɔ le yaa,* kɛlɛŋgaa le hiɔɔlu nda tosa muŋ ni. I mel nda le muŋ te.Kanifuule, a tosal waŋnda Kiliaadi yɔŋ wɔɔŋndo, ma fuli nda mɛɛ nda kei nuaa witiiyoŋ choo a chiliŋnde le muŋ nɛiyo yɛ.
4 Lelaŋ, I cho yiŋndeŋ yɔŋ o chiɛi Hasayɛɛ lo choo,Mi le kɔ tɛɛmbuu chiɛila choo choo la kala kalala Bɛŋ-hedadi laŋ.
5 I cho diola kpakilaŋ Damasikɔɔ pesi pesi,Mi tɛɛmbuu wanaa cho Bikati-evaŋ nda,A wana cho masaa* le Bɛti-idɛŋ ndo.Waŋnda Siiliaa cho lakɔ o biyɔɔ niŋ Kiaa.” Chɛhowa dimi lende ni.’
6 Nyɛ Chɛhowa dimi wo cho hoo ni,‘“Waŋnda Kaasa tosa sɔɔŋ wɔɔŋndoŋ bɛmbɔɔ le yaa, kɛlɛŋgaa le hiɔɔlu nda tosa muŋ ni. I mel nda le muŋ te.Kanifuule, a bii waŋnda kpou ma kua a nda o biyɔɔ niŋ, ma kɔ mal nda waŋnda Idɔm o ba.
7 Lelaŋ, I cho yiŋndeŋ yɔŋ o kpaki balu Kaasa wo choo,Mi le kɔ tɛɛmbuu chiɛila choo choo la kala kalala cho loŋ ndaŋ.
8 I cho wanaa cho Asidɔɔ wa tɛɛmbuu,A wana cho masaa* le Asikɛlɔŋ ndo.I cho waŋnda Ɛkulɔŋ nyɛpalaa tusi choo,Nduyɛ wanaa cho lo Filiitiaa wa kpou, a cho tambei sɔla.” Chɛhowa, Mɛlɛka Kpuluŋguma Bɛndoo dimi lende ni.’
9 Nyɛ Chɛhowa dimi wo cho hoo ni,‘Waŋnda Taaya tosa sɔɔŋ wɔɔŋndoŋ bɛmbɔɔ le yaa, kɛlɛŋgaa le hiɔɔlu nda tosa muŋ ni. I mel nda le muŋ te.Kanifuule, wanaa nda bii wa kpou, a mal nda waŋnda Idɔm o ba.A loonuŋ a kpema nda yii le waa pɔmbɔɔ a bɛndoo wo le.
10 Lelaŋ, I cho yiŋndeŋ yɔŋ o kpaki balu Taaya wo choo,Mi le kɔ tɛɛmbuu chiɛila choo choo la kala kalala cho loŋ ndaŋ.’
11 Nyɛ Chɛhowa dimi wo cho hoo ni,‘Waŋnda Idɔm tosa sɔɔŋ wɔɔŋndoŋ bɛmbɔɔ le yaa, kɛlɛŋgaa le hiɔɔlu nda tosa muŋ ni. I mel nda le muŋ te.Kanifuule, ma tisa pɔmbuaa ndaa kɔɔli a mɔɔŋ faŋndoŋ,Ma kɛɛ le nda nyiɛɛye tuiinɔŋndo.A tuulu kɔl a nda ma wa nda sɛɛsiaa.Le teleŋ o teleŋ a cho a kɔl tuuwo a nda.
12 Lelaŋ, I cho yiŋndeŋ yɔŋ Tɛmaŋ chiee,Mi le kɔ tɛɛmbuu chiɛila choo choo la kala kalala cho Bɔsilua laŋ.’
13 Nyɛ Chɛhowa dimi wo cho hoo ni,‘“Waŋnda Amɔŋ tosa sɔɔŋ wɔɔŋndoŋ bɛmbɔɔ le yaa, kɛlɛŋgaa le hiɔɔlu nda tosa muŋ ni. I mel nda le muŋ te.Kanifuule, ma tɛɛndiaa wanaa lafoliaa* wa Kiliaadi wa dembelaŋ, le halikpeŋ ma chɔɔlu tanda ndaa.
14 Lelaŋ, I cho kpaki balu Luaba wo malɔɔ o yiŋ,Mi yiŋnde leŋ le lom chiɛila choo choo la kala kalala cho loŋ ndaŋ.O paale leŋ choo, puaa chɔuwa cho yonda choo choo kpeleŋ le chɔuwo,Mi hueiyii bɛndu bɛnduei hɔŋ.
15 Nduyɛ masa ndaa a laŋgbaa nduaa kalla,* a cho lakɔ a nda o biyɔɔ niŋ.” Chɛhowa dimi lende ni.’
Tɛɛsiaalaŋ
^ Diolaŋ ndaŋ la sim, “Wolɔɔlaŋ” ɔɔ “Kɔlaŋ a Wolɔɔlaŋ.”
^ Ɔɔ “simul la bɛmbɔɔ le yaa.”
^ Hibuluiye, “wana bii tinda lemasaa o ba wo.”
^ Hibuluiye, “wana bii tinda lemasaa o ba wo.”
^ Ɔɔ “wanaa layolaa.”
^ Ɔɔ naapum, puaa nduaa.
