Emɔɔsi 2:1-16
2 “Nyɛ Chɛhowa dimi wo cho hoo ni,‘“Waŋnda Mowaabi tosa sɔɔŋ wɔɔŋndoŋ bɛmbɔɔ le yaa,* kɛlɛŋgaa pɛŋ le hiɔɔlu nda tosa muŋ ni. I mel nda le muŋ te.Kanifuule, ma luam paala masaa Idɔm chilikɔ, mi la simnuŋ pultaŋ.
2 Lelaŋ, I cho yiŋndeŋ yɔŋ Mowaabi, mi le kɔ tɛɛmbuu chiɛila choo choo la kala kalala cho Kiliɔɔti laŋ.Wooluŋ wooluŋ bɛndoo cho delɔɔ Mowaabi,Mi yonda chɔuwo a bulu chɔuwo soo, okoŋ mi Mowaabi sɔla tambei.
3 I cho masa* cho loŋ ndo faŋa,Nduyɛ mi dii ndu a laŋgbaa nduaa kalla* latulu.” Chɛhowa dimi lende ni.’
4 Nyɛ Chɛhowa dimi wo cho hoo ni,‘Waŋnda Chuda tosa sɔɔŋ wɔɔŋndoŋ bɛmbɔɔ le yaa,* kɛlɛŋgaa pɛŋ le hiɔɔlu nda tosa muŋ ni. Nduyɛ I mel nda le muŋ te.Kanifuule, a faŋaŋ o sawala ya Chɛhowa ke nda laŋ choo,Nduyɛ nyɛ o nyɛ ya dimul nda le tosaa, a tul ndu kɔɔli le.Kɛ choola finyaa ndaa mamaa wa tolɔɔ kɔɔli laŋ la faŋa nda o nɛi nuu choo ni.
5 Lelaŋ, I cho yiŋndeŋ yɔŋ Chuda,Mi le kɔ tɛɛmbuu chiɛila choo choo la kala kalala cho Chulusalɛm ndaŋ.’
6 Nyɛ Chɛhowa dimi wo cho hoo ni,‘Waŋnda Isɔluɛi tosa sɔɔŋ wɔɔŋndoŋ bɛmbɔɔ le yaa,* kɛlɛŋgaa pɛŋ le hiɔɔlu nda tosa ni. Nduyɛ I mel nda le muŋ te.Kanifuule, wanaa cho sakpo wa nda pisi ni le kaniŋ humboŋ,Nduyɛ ma pisi wanaa bala fonduaa le kɔwɛilaŋ.*
7 A bii pɛ a niɔu niɔu wanaa bala fonduaa bolle o chundoo niŋ.Nduyɛ, ma kɛɛ wanaa vi kɔltaŋ nda dila ndalaŋ kioo o sɔɔŋ niŋ.
Mi poleŋ a finyaa hini a wana lanɔ pilɔɔ,Le diola nila diandaalaŋ nɔɔliaa.
8 Domala nda bii waŋnda o ba o landei niŋ ndaŋ, laŋ nda pɛŋgɛliaa o bandu luamaa lasala suu o suu ikɛi ni, ma hiniŋ lechoo.Nduyɛ, muɛima nda kol o chiɛila* mɛlɛkaa ndaa laŋ bɛɛ, a tɔŋnda nda bii waŋnda o ba laŋ nda piandu maŋ ni.’
9 ‘Kɛ ya tɛɛmbuu Amɔluaitiiya ni, mi tosa ma faŋaŋ nda lachi.Waŋnda haa wa ko mɛɛ yɔmii sida ve i sim nuaa i vilɛi vilɛi yɛ, nduyɛ ndaa nɔ dialuŋ kalaŋ mɛɛ yɔmii oki ve i wa nuaa i kala kala yɛ.Mi tɛɛmbuu nda kpou mɛɛ waŋndo chiɛɛluu nuaa komɔɔ yɔmndo, nduyɛ mbo kili puunduŋ ndɔŋ yɛ.
10 Ya soli nya o lɛŋnde Ichipileŋ niŋ ni,Nduyɛ mi tosa mi la balu o pollo niŋ le wɔsilaŋ 40,Le halikpeŋ mi ke nya lɛŋnde Amɔluaitiiya.
11 Mi hɛli puaa nyaa apum le ma wa wanaa suaa le ya wa.Nduyɛ, mi hɛli chuauwaa nyaa piaanduaa apum le ma wa Naasaluɛiya.
Baa o cho lende le i cho le, waŋnda Isɔluɛi?’ Chɛhowa dimi lende ni.
12 ‘Kɛ mi la miiŋgu Naasaluɛiya muɛiyaŋ kioo le kolɔɔ.Nduyɛ, mi la dimul wanaa suaa le ya wa aa: “La dimi yooŋgu Mɛlɛkaa le.”
13 Lelaŋ, I cho nya chui o fondaŋnda nyalaŋ,Mɛɛ mɛɛ nyɛ viliaa lawolɔɔ nda deŋgeliaa a witiiyoŋ ndo, kei nuaa nyɔɔ choo mbo chui ndu yɛ.
14 Wana keleŋa keleŋa bɛndoo wo sɔla niŋ fonda le lakil te.Wana kpaaya bɛndoo, yoomuaŋ ma cho ndu chuwɔɔ fo.Nduyɛ, kuubanɔ kɛ kɛ nɔla niŋ mbo hɛluŋ te.
15 Wana chɔulaba a chiɔuwo wo nɔla niŋ mbo sim te.Wana nyaanaŋ bɛndoo nɔla niŋ mbo hɛluŋ te.Nduyɛ wana sɔŋga o soo choo wo bɛɛ nɔla niŋ mbo fula leniŋ te.
16 O paale leŋ choo, hali kuubanɔ hiou kuubaa kpou kɔl simulaa* wo,O cho nyaanɔŋ fondo.’ Chɛhowa dimi lende ni.”
Tɛɛsiaalaŋ
^ Ɔɔ “simul la bɛmbɔɔ le yaa.”
^ Hibuluiye, “wana kialaa ŋyamaa.”
^ Ɔɔ naapum, puaa nduaa.
^ Ɔɔ “simul la bɛmbɔɔ le yaa.”
^ Ɔɔ “simul la bɛmbɔɔ le yaa.”
^ Ɔɔ “samtalaŋ.”
^ Ɔɔ “maaŋnda.”
^ Ɔɔ “kɔl vesɛiyo.”
