Emɔɔsi 4:1-13
4 “La yaŋ nilaŋ, nya nauwa Baasiaŋ,Nya cho haa o pembii bɛnduei Sameeliaa choo wa.Nya waŋ laanduaa cho haa wanaa tusiaŋnda kafalaŋ tosallo, nduyɛ mi la wa wanaa bala fonduaa saaŋgiaa wa.Okoŋ mi la dimul piaandaa* nyaa aa, ‘La chuu naa muɛiyaŋ miŋ kol!’
2 Chɛhowa, Mɛlɛka Kpuluŋguma Bɛndoo, mɛnaŋ po* aa,‘“Teleŋ cho fuuluu ma huŋ soli nya nanuŋ a doluŋuŋ nda landu visioŋ ndoŋ.Nduyɛ nya a tuaa cho lo wa, a doluŋuŋ suuwa nda cho nya soli ni.
3 A cho nya hunɔɔ biyɔɔ, ma soli nya o tɛɛŋgula kpaki chioo. Wana o wana tɛɛŋgu cho num lachi wo, loŋ nda cho num soli ni.Nduyɛ ma chua nya, ma kɔ viou nya Haamɔŋ.” Chɛhowa dimi lende ni.’
4 ‘Lelaŋ, la huŋ Bɛtɛl mi la tosa yɔŋ wɔɔŋndo,*La huŋ Kikaa mi la chɔɔlu ndu tosa!
La huŋ a salala nyalaŋ idii,Nduyɛ mi la hiŋ a o tɔ ndɔɔ* o paale yaa ndɔ leŋ choo.
5 La lom sala balika melaa a beedii nɔ yiisiiyo* wo.Salala nyapila kɛɛsiaŋ o kɔl le yɔŋgoo laŋ, la fula mi la yonda a laŋ okɔɔ!
Kanifuule nya waŋnda Isɔluɛi, keŋ nya kaala tosaa ni.’ Chɛhowa, Mɛlɛka Kpuluŋguma Bɛndoo dimi lende ni.
6 ‘Mi tosa mi sondolaŋ la vesa nya sɛɛŋ a yiaaŋ* o chieeŋ nyaŋ bɛndoŋ niŋ,Nduyɛ mi nyɛdiaa* chuu o chiɛila nyalaŋ niŋ kpou.Kɛ a koŋ kpou, mi la kɛɛ le ya miiŋgoo o ibuŋ.’ Chɛhowa dimi lende ni.
7 ‘Mi tosa vɛlɛ mi piɔɔ kɛɛ le siaa le paŋgoŋ ŋgaa, tuupa mi teleŋ nya kuau chiɔɔŋ nyaŋ ndo fuuluu.Mi yaa tosa mi piɔɔ ndoo sia o chioo o pilɛ niŋ, kɛ o se o chioo o pilɔɔ niŋ te.
Mi piɔɔ ndoo sia vɛlɛ o buŋgɛi lelɛŋnde i pilɛ choo,Kɛ mi buŋgɛi cheleŋ piɔɔ kɛɛ le siaa ve ndii waŋnuŋ i vesɛi sɛɛŋ.
8 Mi waŋnda ndaa kɔnduŋ o chiooŋ ŋ muuŋ ɔɔ ŋgaa, okoŋ ma kuɛ a saŋgɛiya yɔkɔɔ o chioo o pilɛ le mɛŋndaŋ kolɔɔ.Kɛ ndaa kɔ bɛɛ a sɔla mɛɛ nda yeema yɛ le.A koŋ kpou, mi la kɛɛ le ya miiŋgoo o ibuŋ.’ Chɛhowa dimi lende ni.
9 ‘Mi tosa mi haŋgul tuuwo nyamaliaa tɔlɔɔla nyalaŋ, nduyɛ mi dɛluaa del o laŋ.
Mi la tosa kpelelaŋ tau, nduyɛ mi la tual kilepiiyaŋ ma hɔbɛi.Kɛ mi soonuaa ndaa tɛɛmbuu yɔmii nyɛi mafikiiye, a yɔmii nyɛi ma ɔlifiive.A koŋ kpou, mi la kɛɛ le ya miiŋgoo o ibuŋ.’ Chɛhowa dimi lende ni.
10 ‘Mi tosa mi naa ndoo del Ichipi wo del nya choo.
Mi diu diu chuauwaa nyaa piaanduaa a muɛi faŋnde, nduyɛ mi biu biu suaa nyaa.
Okoŋ, mi dɔɔŋgɔla nyalaŋ la fula chuŋ siouwo nya o la miliŋ a waŋvilɛiya.Kɛ a koŋ kpou, mi la kɛɛ le ya miiŋgoo o ibuŋ.’ Chɛhowa dimi lende ni.
11 ‘Mi tɛɛmbuu lɛŋnde nyaleŋ,Mɛɛ ya tɛɛmbuu Sodɔm a Komoolua yɛ.
Nduyɛ wanaa sɔla chindaa nya tɛɛŋ nda wa ko, mɛɛ nda soli nuaa kilioo o yiŋ yɛ.Kɛ a koŋ kpou, mi la kɛɛ le ya miiŋgoo o ibuŋ.’ Chɛhowa dimi lende ni.
12 Lelaŋ nya waŋnda Isɔluɛi, I cho nya vɛlɛ nyɛpalaa tusi choo.
Le mɛɛ ya kɛɛsiaŋ o kɔl le hei tosaa yɛ,La bɛɛndiaŋ mi la komal Mɛlɛka nyaa.
13 La cho sina maa ndu toosiaa pembuŋ bɛndoŋ a hueiye ni.Mbo chɔm wanachioo yiyaŋnda ndɔlaŋ.Mbo tosa mi paaleŋ le simnuŋ nyumndaŋ,Nduyɛ mbo kela o fondaŋnda filioŋ ndaŋ o lɛŋndeŋ choo.Diola ndɔlaŋ la cho Chɛhowa ni, Mɛlɛka puaa chɔuwa.*”
Tɛɛsiaalaŋ
^ Ɔɔ “masaa.”
^ Hibuluiye, “mɛnaŋ a diondɔɔ ndɔɔ.”
^ Ɔɔ “nila kalulaŋ.”
^ Ɔɔ “talama nyaa.”
^ Ɔɔ “bulu nɔ lɛvɛŋndo.”
^ Hibuluiye, “Mi dindi nya chiŋndoŋ.”
^ Hibuluiye, “beediiyo ɔɔ buloo.”
^ Koŋ cho ni, puaa chɔuwa o choo choo niŋ.
