Emɔɔsi 5:1-27
5 “Nya waŋnda Isɔluɛi, la yaŋ nilaŋ o nyɛ ya cho nya hoo dimul o chondii imɔnɛi niŋndo:
2 ‘Isɔluɛi cho hoo yufuaanɔɔ wo del fɔ.Nduyɛ, o nɔla lɛ mbo chɛŋ te.
A kɛɛ ndu o lɛŋnde ndɔleŋ niŋ.Wana o wana cho le ndu chua le.’
3 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
‘Chioo cho yɔŋ puaa chɔuwa waapilɛ o chɔuwo, kɛ ma lo kɛmɛ.Nduyɛ chiee cho yɔŋ puaa chɔuwa kɛmɛ wo, puaa tɔ kinɛi cho miiŋgu ni.
Lende i cho yɔŋnɔŋ a waŋnda Isɔluɛi ni.’
4 “Nyɛ Chɛhowa dimi a nya waŋnda Isɔluɛi okɔɔ wo cho hoo ni:
‘La nuuviaa ya, le mi la hiou lachi a waa yoomu.
5 La wa kɔlaŋ Bɛtɛl le sooluulaŋ te,Nduyɛ la kua Kikaa, ɔɔ mi la hiou loŋ choo mi la kuɛ Biaa-siɛba le.Kanifuule, waŋnda Kikaa cho hunɔɔ lakɔ o biyɔɔ niŋ,Mi Bɛtɛl bɛɛ huŋ sɔla tambei.*
6 La nuuviaa Chɛhowa, le mi la hiou lachi a waa yoomu,Yɔŋii o del chiɛi Choosɛ wo choo maa leyiŋ,Okoŋ, mi le kɔ lom Bɛtɛl, wana o wana ve le leŋ nyumi le.
7 La siiŋguu sandei yɔm lolɛiyo,*Nduyɛ, mi la kɛɛ le sɔɔŋ tosaa o nɛi sakpoo choo.
8 Lelaŋ, la nuuviaa wana toosiaa looŋ kundaŋ nda veelu aa Kima woŋ, a looŋ kundaŋ nda veelu aa Kɛsili woŋ.*Wana tosa mi nyumma kpiŋgbiaŋ ma simnuŋ nyɛ teŋgaa wo.Wana tosa mi paaleŋ le simnuŋ nyumndaŋ ndo.Wana nɔla mbo tosa mi mɛŋma cho o pee mɛŋma ihɛllo niŋndaŋ ma chuuŋgiaŋ naapilɛ,Okoŋ mi ma sia o chieeŋndo choo wo.Wana koŋ diola ndɔlaŋ la cho Chɛhowa ni.
9 O cho tosa mi wanaa nɔ dialuŋ kalaŋ nda sɔla tambei o lepilɛ niŋ kpe,Nduyɛ, mbo tɛɛmbuu fondaŋnda cho la taŋgulaa la kala kalalaŋ.
10 Waŋnda haa tul wanaa sila waŋnda o dio kpaki chioo wa leyɛ.Nduyɛ wanaa dimi tonyaa wa, a yeema bɛɛ pɛŋ ma che nda le.
11 La cho wanaa bala fonduaa paawaa* biyɔɔ o laba, le chiɔɔŋ nda tosa woŋ.Nduyɛ, nyɛ nda kuau wo koni nya poondiaa nda o laba ni le paawaa hoo malɔɔ.Lelaŋ, chiɛila kɛndɛla nya taŋgul a pouta sialaalaŋ ndaŋ, la cho mɛɛlu wa leniŋ te.Nduyɛ, muɛima nya sɔla o kpelela makilepiila kɛndɛ kɛndɛla nyalaŋ niŋndaŋ, bue bɛɛ la kol niŋ maŋ te.
12 Kanifuule, I sina sɔɔŋ wɔɔŋ nya cho tosaa woŋ kpou.*I sina vɛlɛ mɛɛ kpɛ hakila nyalaŋ la cho yɛ.La cho wanaa sandaa delɔɔ choo,Mi la wa vɛlɛ luɛiyɔɔla niŋndaŋ biyɔɔ.*Nduyɛ, la ke wanaa bala fonduaa dila ndalaŋ o dio kpaki chioo le.
13 Lelaŋ, wanaa kɔl kaluaa cho meinɔŋ doŋ a teleŋ koŋ,Kanifuule, teleŋ kpundɔɔ cho wa koŋ ni.
14 La tosa sɔɔŋ kɛndɔŋ, mi la mal sɔɔŋ wɔɔŋndoŋ.Hei tosa mi la hiou lachi a waa yoomu.
Okoŋ, Chɛhowa, Mɛlɛka puaa chɔuwa* cho wa a nya latulu,Mɛɛ nya dimi maa o cho a nya latulu yɛ.
15 La tul dɛnɛ wɔɔŋndo leyɛ, mi la kaala nyɛ cho o kɛndɔɔ wo.La wa yamaŋ kiolɔɔ o nɛi sakpoo choo o dio kpaki chioo.
Kɛlɛŋgaa dɔɔ mi Chɛhowa, Mɛlɛka puaa chɔuwa,Tuiinuŋ wanaa lo yoomu o chiɛi Choosɛ wo niŋnda inyiɛɛ.’
16 “Lelaŋ, nyɛ Chɛhowa, Mɛlɛka puaa chɔuwa dimi wo cho hoo ni. Chɛhowa dimi aa:
‘Chaŋndaŋ la cho hunɔɔ wa o luŋndaŋ kpou o chioo niŋ.O nɛilaŋ kpou, waŋnda cho wa balɔɔ a chaŋndo ma dimi aa, “Kpokoo naa, kpundɔɔ komal naa fɔ!”
A cho veelu wanaa tosa wali ichiɔɔ wa le ma huŋ mala nda mɔnɛi biyɔɔ.Nduyɛ, ma veelu wanaa chaa chaŋ imɔnɔɔ wa le ma huŋ mala nda chaŋndo.’
17 ‘O kpelela makilepiilaŋ niŋ kpou, chaŋndaŋ la cho wa,Kanifuule, I cho hunɔɔ nya keeku tɛɛŋ.’ Chɛhowa dimi lende ni.
18 ‘Kpundɔɔ cho wa le wanaa yeema le mi paale Chɛhowa leŋ le hiŋ nda!
Te paale Chɛhowa leŋ le hiŋ pɛ, vɛɛ sɔɔŋ wa yɛ niŋ a nya?
Nyumndaŋ ma cho tolɔɔ kpiŋgbi, nyɛ teŋgaa ve niŋ te.
19 Le wa niŋ ko mɛɛ waŋndo nyaanuŋ nuaa kpɔkuŋndo,* kɛ mi sulukoo kɔ chiŋalaŋ ndu yɛ.Nduyɛ mɛɛ o luɛi o ndu lo chiɛiniŋ, dimioo nuaa o saa chiɛiyo, mi kɛuwo lɔwa ndu.
20 O paale Chɛhowa leŋ choo, nyumndaŋ ma cho tolɔɔ, nyɛ teŋgaa ve niŋ te.Nyumma kpiŋgbima bɛnduaŋ ma cho wa ni, nyɛ wawoŋ bɛɛ ve niŋ te.
21 I tul bɔŋaŋnda nya bii laŋ leyɛ, nduyɛ I yeema mi che laŋ kposoŋ te.Bɔŋaŋnda teŋgeŋnda nya bii laŋ bɛɛ, I yeema mi tuei salala nya soli loŋ ndaŋ chuŋ te.
22 O yɔŋ bɛɛ mi la lom visioo kpou maa sala luamaa naa ya chua, a salala cheleŋndaŋ,I niŋ kɔl a laŋ te.Nduyɛ la dii bɛɛ chɔluaa chelulɛiyaa kɛndɛ kɛndiaa le salala kɔl nyulu laŋ solioo, I yeema a laŋ kposoŋ te.
23 I yeema lɛ mi tuei chonduŋ nya solul la woŋ te.Nduyɛ, la luaa lɛ towalaŋ* ya o lani le.
24 Kɛ nduyɛ, la tosa mi sandei wa o lɛŋndeŋ niŋ, mɛɛ mɛŋndaŋ ma hiau nuaa o peelo yɛ,Mi sakpoyɛi bɛɛ wa mɛɛ mɛŋndaŋ ma wa nuaa hiouwɔɔ o peelo teleŋ o teleŋ yɛ.
25 Nya waŋnda Isɔluɛi, wɔsila 40 nya chii laŋ o pollo niŋndaŋ,o cho o ya lo le nya wa salalaŋ solioo a kelaŋ yɔŋgoo le.
26 Lelaŋ la cho hunɔɔ chua Sakuti, piɔm nya toosiaa maa masa nya wo, a Kaiwaŋ* mi la kuɛ a nda.Piɔmnda haa nya toosiaa ni le mɛlɛka nya iloo sooluuwo.
27 I cho nya yɔŋ o biyɔɔ niŋ hiouwɔɔ Damasikɔɔ choo.’ Wana dimi lende wo nɔ diolaŋ ni aa Chɛhowa, Mɛlɛka puaa chɔuwa.”
Tɛɛsiaalaŋ
^ Ɔɔ naapum, “simnuŋ nyɛ wɔɔŋ wɔɔŋ bɛndu.”
^ Ɔɔ “nyɛ lolɛiyo.”
^ Looŋ kundaŋ muŋ, te wana wa pɛ o chieeŋndo choo ma tofa o halaa niŋ, ma che muŋ ŋ kilaŋ naŋ chaa visiaa ɔɔ nyɛm cheleŋndoŋ ni.
^ Ɔɔ “salaa.”
^ Ɔɔ “simul nya cho ya wo.”
^ Ɔɔ “kanioŋ biyɔɔ le ma kumbu nya.”
^ Koŋ cho ni, puaa chɔuwa o choo choo niŋ.
^ Ɔɔ “yalakanaa.”
^ Ɔɔ “nyɛm chaaŋ iyooŋ.”
^ Naapum piɔmnda haa ndaa sim le luei nda veelu aa Satɔŋ nde ni. Nduyɛ mi ndaa sooluu ndi maa mɛlɛka.
