Emɔɔsi 6:1-14
6 “Kpundɔɔ cho le wanaa dɔu tiindaŋndo o ndapila niŋ Saayɔŋ nda,Wanaa yiyaŋ haa maa a choŋnuŋ hɛnɛkɛ o pembii bɛnduei Sameeliaa wa,Wanaa pɛlnuŋ ladio o kaale fula leŋ tɔɔ leŋ niŋnda,Wanaa Isɔluɛiya huŋ o nda lo wa!
2 La kɔ Kaanɛ mi la kɔ chɔ.
Te la chɛŋ loŋ pɛ, la kuɛ Hamaati Bɛndoo.Okoŋ, la tuusu Kaati o lɛŋnde Filiitiaa leŋ niŋ.
Baa chiooŋ muŋ cho pa ŋ sɔvɛ miŋ hiau masɛi hei?*Baa lɛŋnde ndaleŋ le hiou pa lɛŋnde nyaleŋ?
3 Paale kpundɛ leŋ le cho hunɔɔ, kɛ la cho pɛŋ saalaŋ te.Nduyɛ, mi la wa wanaa bii waŋnda ŋuasu ŋuasu wa kɛsioo o lemasa.
4 La cho hiniŋndaŋ o kpelela nda toosiaa a chiŋuŋ kamaa laŋ choo, nduyɛ mi la siɛɛnduŋ o kpɛŋɛla kɛndɛ kɛndɛlaŋ niŋ.Okoŋ, mi la dia visiŋ saa konduaa nya diu wa, a visiŋ nauwaa chelulɛiya.*
5 Te la tuei pɛ ma wa towaa* lɔɔ, la chal chonduŋ sɛnɛiyoŋ kɛɛsiaa le miŋ chɛlaŋ a ndu.Nduyɛ maa Deeve, la tiuba mi la toosiaa nyɛm chaaŋ a ba nya.
6 O taalala bɛndulaŋ niŋ nya kol muɛiyaŋ ni.Nduyɛ, chuɛima chuŋ kɛndɛ kɛndiaŋ nya suiinuŋ ni.
Kɛ kpundɛ cho hunɔɔ o yuŋgu Choosɛ wo choo wo, la cho pɛŋ saalaŋ* a ndu le.
7 Lelaŋ, nya cho wa wanaa tasiaa ni le kɔlaŋ o biyɔɔ niŋ.Okoŋ, mi dunyaŋ wanaa siɛɛnduŋ kaŋ o kpɛŋɛlaŋ niŋnda ŋ mɛɛlu.
8 Chɛhowa, Mɛlɛka puaa chɔuwa dimi aa, ‘Ya Chɛhowa, Mɛlɛka Kpuluŋguma Bɛndoo, I mɛnaŋ po* aa:“I tul yoŋga Chekɔpu wo leyɛ.Nduyɛ chiɛila choo choo la kala kalala o taŋgul taŋ bɛɛ, I yeema mi che laŋ te.I cho chioo malɔɔ yaamɔɔwa o ba a nyɛ o nyɛ cho leniŋ.
9 “‘“Nduyɛ te o yɔŋ pɛ mi puaa tɔ huŋ lo o chiɛiyo o pilɛ niŋ, nda bɛɛ cho wu.
10 Okoŋ, mi wanayɛi ndɛi* kuɛ le dialuŋ ndaŋ solioo o bɛɛ, le mbo kɔ lom nda a pilɛŋ pilɛŋnda. Te o luɛi pɛ chiɛiniŋ le dialuŋ* ndaŋ chuaa, wana o wana o komal loŋ pɛ, o cho ndu nyuna aa, ‘O fulawɔ o num kɔɔli, baa wanaa cheleŋ cho pa naŋ?’ Okoŋ mi wana koŋ mulul ndu aa, ‘Wana cheleŋ cho naŋ te!’ Mi ndu bɛɛ mulul ndu aa, ‘Mɛɛ suaa lɛ hau le! Kanifuule, o cho teleŋ te cho hoo le ma pɛl diola Chɛhowa laŋ te.’”
11 Chɛhowa dimi ni maa,O cho hunɔɔ chiɛi tɔɔma bɛndoo piɔlɔɔ mbo simnuŋ bemboo.Nduyɛ, o cho chiɛi pɔmbɔɔ piɔlɔɔ mbo simnuŋ sallo.
12 Baa mi suaa nyaanuŋ pa o pou feke fekioo choo?Ɔɔ baa waŋndo nɔla pa mbo naŋgu nauwa waa loŋ?
La siiŋguu sandei tɔlɔɔ pɔsɔnioo,Nduyɛ mi la siiŋguu sakpoyɛi yɔm lolɛiyo.*
13 O sɔɔŋ fondoŋ choo nya duaunuŋ nyaale ni.Okoŋ mi la dimi aa, “Kpaaya naa tosa ni miŋ sɔla batiuwaa.”*
14 Nyɛ Chɛhowa, Mɛlɛka puaa chɔuwa dimi wo cho hoo ni: ‘Nya waŋnda Isɔluɛi, I cho tosa mi lɛŋnde cheleŋ le huŋ del nya choo.’‘A cho nya nyɛpalaa tusi choo chɔŋ Lɛbo-Hamaati* haaa mbo tuusu o Pee* cho o tanda Aluaba wo* niŋndo.’”
Tɛɛsiaalaŋ
^ Naapum masaleŋ Chuda a Isɔluɛi.
^ Ɔɔ “nauwaa fɔŋnduaa.”
^ Ɔɔ “nyɛchaa iyoo.”
^ Hibuluiye, “la nee pɛŋ.”
^ Ɔɔ “I mɛnaŋ po a yapila.”
^ Hibuluiye, “finya nda pɔmbɔ ɔɔ finya nda bɛndu.”
^ Hibuluiye, “paalaŋ.”
^ Ɔɔ “nyɛ lolɛiyo.”
^ Hibuluiye, “miŋ chua leelaŋ a ba naa.”
^ Ɔɔ “dioo le luɛiyɔɔ Hamaati.”
^ Tofa Tɛɛsiaa.
^ Ɔɔ “pollo.”
