Emɔɔsi 8:1-14
8 Nyɛ Chɛhowa, Mɛlɛka Kpuluŋguma Bɛndoo chɔm ya o yilaŋnde niŋndo cho hoo ni: Mi cha kambɛiyo a nyɛm kuamaŋ leniŋ.
2 Okoŋ mbo nyuna ya aa: “Emɔɔsi, yɛɛnɛ ŋ cho yɛ chɔɔ?” Mi muli aa: “Kambɛiyo a nyɛm kuamaŋ leniŋ ya cho chɔɔ ni.” Mi Chɛhowa dimul la aa: “Mɛɛlula wanaa niaa Isɔluɛi la fuuluu. Nduyɛ, I cho lɛ nda malɔɔ haki le.
3 Ya Chɛhowa, Mɛlɛka Kpuluŋguma Bɛndoo dimi aa: ‘O paale leŋ choo, chonduŋ waŋnda soli o chiɛi Mɛlɛkaa niŋndoŋ cho simnɔŋ chaŋ imɔnɔɔ. Waŋnda cho piɔmndaŋ sɔla, ma viou dialuŋ ndaŋ vilɛiyoŋ ba o ba fee. Okoŋ, mi nyɛ o nyɛ mei doŋ!’
4 La yaŋ nilaŋ, nya cho wanaa bala fonduaa niɔuwo,Nduyɛ, mi la wa wanaa vi kɔltaŋ o lɛŋndeŋ niŋnda nyɛpalaa tusioo choo wa.
5 La cho dimioo aa, ‘Teleŋ kuɛɛ bɔŋaŋ paŋgii sɛnɛiyo cho yɛ chuwɔɔ le miŋ pisi witiiŋ* naŋ?Teleŋ kuɛɛ Paale Pɛŋgiaaleŋ le cho yɛ hiouwɔɔ, le miŋ soli witiiŋ naŋ le pisioo?
Ŋ yeema niŋ mi le hiou le miŋ tosal waŋnda kafalaŋ o wɔŋgulaŋ niŋ,A nyɛm naŋ tuu woŋ,Le halikpeŋ miŋ yii sekeleila* naalaŋ le nda huiyo.
6 Ŋ yeema miŋ pendu wanaa cho o kuɛi niŋnda a kaniŋ humboŋ,Nduyɛ, miŋ yɔŋgu kɔvɛilaŋ* le wanaa bala fonduaa piondɔɔ.Le miŋ pisi vɛlɛ witiiŋ wɔɔŋndoŋ waŋnda o ba.’
7 Chɛhowa, Mɛlɛka tosa mi Chekɔpu fula tɔɔ wo mɛnaŋ po aa,‘Fɛɛŋ bɛɛ I puɛɛnuŋ a sɔɔŋ nda tosa woŋ te.
8 Le saboo hoo, lɛŋndeŋ* le cho hunɔɔ nyiiya,Mi wanaa cho leniŋnda kpou bii mɔnɛi.
Le cho yɔŋnɔŋ yokpaŋ yokpaŋ,Mɛɛ pioo Nail o Ichipi niŋ huŋ nuaa, mbo pɛ, okoŋ mbo tol vɛlɛ yɛ.’
9 Chɛhowa, Mɛlɛka Kpuluŋguma Bɛndoo dimi aa: ‘O paale leŋ choo,Paaleŋ le cho wa isisi o bolleŋ choo deŋ mi tosa mi le nyum pɔli.Nduyɛ, I cho tosa mi nyumndaŋ ma tol o lɛŋndeŋ niŋ ipala deŋ.
10 I cho tosa mi bɔŋaŋnda nya bii laŋ la simnuŋ biisilaŋ,Nduyɛ, mi chonduŋ kɔl kɛndɛŋ nya soli woŋ simnuŋ chonduŋ ŋmɔnɔŋ.
Wana o wana cho nyɛla labɛkilaŋ wounɔŋ, nduyɛ mbo sendi tembello.Paale leŋ le cho simnɔŋ mɛɛ waŋndo wa nuaa mɔnɛi biyɔɔ le pole ndɔ le vi leŋ yɛ.Nduyɛ haaa mi le chuu, le wa niŋ bɔɔ paale lolɛi bɛndu.’
11 Chɛhowa, Mɛlɛka Kpuluŋguma Bɛndoo dimi aa: ‘Teleŋ cho fuuluu,I cho tosa mi yiaaŋ ma del o lɛŋndeŋ niŋ.O cho yima nyɛdiaa ɔɔ le mɛŋma kolaa le,Kɛ le diom Chɛhowa wo tueiyɔɔ.
12 A cho wa heeloo a tuusoo, chɔŋ o pee mɛŋma ihɛllo mbo kuɛ o pee mɛŋma ihɛl cheleŋ.Nduyɛ, a cho wa fulaa ba luaŋ ndo ma kua ba paaleŋ le chaŋ ndo.
A cho wa kelaa ba o ba fee le diom Chɛhowa wo nuuviaa, kɛ a seeluŋ niŋ ndu le.
13 O paale leŋ choo, yufuaa naŋ naŋɔɔ bɛndoo wa,A chuaa piaanduaa cho wou kpandeŋ a kolɔɔ biyaa.
14 Nda cho mɛnaŋndo a haki Sameeliaa wo ni, ma wa dimioo aa,“Te mɛlɛka nya cho Daŋ ndo cho wɔ pɛ yoomu!”
Nduyɛ maa, “Te nɛi kuɛ Biaa-siɛba wo cho wɔ pɛ loŋ!”
A cho hunɔɔ delɔɔ, nduyɛ a nɔla lɛ niŋ ma chɛŋ te.’”
