Emɔɔsi 9:1-15
9 Mi cha Chɛhowa o bandu luamaa lasalaa choo, okoŋ mbo dimi aa: “Lɔɔ suŋgbuaŋ o bolle, le mi chiɛiyo kpou hiiluŋ. Kili maŋ o bolle, nduyɛ mi siou a cho lo wa diu a muɛi faŋnde. Wanaa nyaanuŋ nda, o pilɛ bɛɛ heluŋ niŋ te. Nduyɛ wana o wana kindiŋ pɛ le hiɔlɔŋndo, o sɔla niŋ batiuwaa le.
2 O yɔŋ bɛɛ ma tou Sɛiyo* ma luɛi lɛŋ di,I cho nda lakɔ kala loŋ po mi soli nda.Nduyɛ o yɔŋ bɛɛ ma hel choo choo,I cho lakɔ nda tusi lɛŋ.
3 Te o yɔŋ vɛlɛ pɛ ma kɔ vioŋnuŋ o pembii Kamɛɛ ve choo,Loŋ bɛɛ I cho lakɔ nda nuuviaa tɛɛ tɛɛ mi bii nda.
Te a veŋnuŋ ya vɛlɛ pɛ ma tol lɛŋ di o pee mɛŋma ihɛllo bɛŋgu,I cho kɛuwo yɔŋ mbo kɔ lɔuviaa nda loŋ.
4 Te o yɔŋ pɛ mi yaamɔɔwaa ndaa kuɛ a nda o biyɔɔ niŋ,Loŋ bɛɛ I cho muɛi faŋnde yɔŋ mi i diu diu nda kpou.I cho nda hɔlteŋ kɛsi choo le nda dɛnɛ palaa tusioo choo, kɛ o cho le dɛnɛ kɛndɛ le.
5 Kanifuule Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa cho hunɔɔ lɛŋndeŋ* pilaŋ,Le mi le teŋga, nduyɛ mi wanaa cho leniŋ nda kpou bii mɔnɛi.Le cho yɔŋnɔŋ yokpaŋ yokpaŋ,Mɛɛ pioo Nail o Ichipi niŋ huŋ nuaa, mbo pɛ, okoŋ mbo tol vɛlɛ yɛ.
6 ‘Ndu cho wana toosiaa nɛiyo le helɔɔ o choo choo niŋndo ni.Nduyɛ ndu pɛŋgɛla halaa o lɛŋndeŋ choo ni.Wana nɔla mbo tosa mi mɛŋndaŋ o pee mɛŋma ihɛllo niŋ ma chuuŋgiaŋ naapilɛ,Okoŋ mi ma sia o chieeŋndo choo wo.Wana koŋ, diola ndɔlaŋ la cho Chɛhowa ni.’
7 Chɛhowa dimi aa, ‘Nya waŋnda Isɔluɛi, mɛɛ waŋnda o lɛŋnde Kusi leŋ niŋ cho yɛ, baa o cho lende le nya cho ya o hɔl te?’
‘O cho ya le soli Isɔluɛiya o lɛŋnde Ichipi leŋ niŋ te?Nduyɛ, o cho ya le soli waŋnda Filiitiaa o lɛŋnde Kilɛti leŋ niŋ, mi soli vɛlɛ waŋnda Siiliaa o lɛŋnde Kiaa leŋ niŋ te?’
8 ‘Ya Chɛhowa, Mɛlɛka Kpuluŋguma Bɛndoo, I cho chɔɔ nyɛ o nyɛ masale dɛnɛ wɔɔŋndeŋ ndeŋ le cho tosaa.Nduyɛ I cho leŋ hunɔɔ tɛɛmbuu, mi wɔɔsuu leŋ o lɛŋndeŋ niŋ.
Kɛ o cho yuŋgu Chekɔpu wo kpou le ya cho hunɔɔ tɛɛmbuu le.’ Ya Chɛhowa dimi lende ni.
9 ‘I cho diomndeŋ yɔŋ,Nduyɛ mi kɔ hiiluu waŋnda Isɔluɛi o lɛŋnde niŋ kpou,Mɛɛ waŋndo hiiluu nuaa sikitɛiyo,*Pouwo o pilɛ bɛɛ del lɛŋ te yɛ.
10 Wanaa yɔŋ wɔɔŋnda wanaa niaa tɛɛŋ kpou, a cho nda diu diu a muɛi faŋnde,A cho kaŋ dimioo aa, “Kpundɛ o kpundɛ cho naa komal te” wa.’
11 ‘O paale leŋ choo, tɛndii* Deeve cho o delaa wo, I cho ndu miŋgi simi.I cho naa o* tɛɛndiaa wa miŋgi toosiaa,Mi miŋgi ndu o chiyii nduɛi choo.I cho ndu miŋgi taŋgul mɛɛ o wa kani masindɛ yɛ,
12 Le halikpeŋ ma yem wanaa lo o lɛŋnde Idɔm ndeŋ niŋnda,Nduyɛ ma bii lɛŋii diola nilaŋ la cho choo ve kpou.’ Chɛhowa dimi le suɛi hei tosaa ni.
13 Chɛhowa dimi aa, ‘Teleŋ cho fuuluu,Wanaa niaa cho lo chiɔɔŋ ndaŋ kouwɔɔ haaa ma kandu vɛlɛ waayiaalaŋ.Nduyɛ, a cho lo kilepiiyaŋ nɛiyo haaa ma kandu vɛlɛ kuluŋ cheleŋ tɔlɔɔ.Muɛima yeelɛiyaŋ ma cho wa taaliaa o pembuŋ bɛndoŋ choo,Okoŋ mi ma kua koŋgilaŋ o pembuŋ pɔmbɔŋ choo.*
14 Isɔluɛiyaa niaa nda kuɛ o biyɔɔ niŋnda, I cho nda miŋgi chuuŋgiaa.Nduyɛ, a cho hunɔɔ chieeŋ ndaŋ bɛnduŋ tambu woŋ miŋgi taŋgul, okoŋ ma wa loŋ.A cho kpelela makilepiilaŋ tosa, ma kol muɛima nduaŋ.Nduyɛ ma tosa vɛlɛ kpelela cheleŋ, ma de komɔɔla ndalaŋ.’
15 ‘I cho nda tɔlɔɔ o lɛŋnde ndaleŋ choo,Nduyɛ wana o wana nɔla lɛ niŋ nda suŋgɔɔ,O lɛŋnde ya ke nda leŋ niŋ te.’ Chɛhowa Mɛlɛka nyaa dimi lende ni.”
Tɛɛsiaalaŋ
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa
^ Ɔɔ “chieeŋndo.”
^ Ɔɔ “tɛmɔɔ.”
^ Ɔɔ “bafɛi, yɛkpɛ.”
^ Ɔɔ “la.”
^ Hibuluiye, “pembuŋ pɔmbɔŋ cho teŋga.”
