Filimɔŋ 1:1-25
1 Ya Pɔɔl cho hoo o biyɔɔ niŋ le Chiisu Kiliti wo, a Timoti puaapilɛnɔ naa cho yauwo hoo poonyiaa ni. Ŋ cho ndu poonyiaa naa num Filimɔŋ chua, chaaŋ naa kaalaa naŋ cho wallo latulu wo,
2 a Afiaa yema naa, a kunda wanaa laalaŋaa cho o numndo chiɛiniŋnda, a Akipɔɔ, o cho wana chɔuwo maa naa wo:
3 Maa Mɛlɛka Finya naa nda Masanɔɔ Chiisu Kiliti tosal nya kɛndɛi ndɛi bɛnduei, nduyɛ ma ke nya kɔl nyuloo fɔ!
4 Chaaŋ nuu Filimɔŋ, teleŋ o teleŋ ya loonuŋ pɛ a num okɔɔ o piɛileŋ niŋ, mi mel Mɛlɛka balikaa.
5 I cho tueiyɔɔ maa a dɔu tiindaŋndo o Masanɔɔ Chiisu niŋ, nduyɛ maa a kaala ndu a wanaa laalaŋnda* a kɔllo kpou.
6 I cho piɛileŋ maa laalaŋ ŋ nɔ hoo latulu a chaaŋaa num aa laalaŋnda wo, o tosa ma sina nyɛ o nyɛ kɛndɛ naŋ nɔ o Kiliti niŋ.
7 Chaaŋ nuu, mɛɛ ya tuei a kaala numndo hoo okɔɔ, mi duaunuŋ nyaale tau, nduyɛ mi sɔla kɔl dɛɛniaa. Kanifuule, a tosa mi wanaa laalaŋnda* kpou wa a kɔl kɛndɛ.
8 I nɔ kpaayaa tau le mi dimul num nyɛ bɛnda le tosaa wo le mɛɛ ya cho kiilanɔ Kiliti wo yɛ.
9 Kɛ le mɛɛ ŋ nɔ kaalaa yɛ, I cho tosa lende le. Kanifuule, ya Pɔɔl, I yuuwa niŋ, nduyɛ I cho o biyɔɔ niŋ le sabu Chiisu Kiliti wo.
10 O biyɔɔ nda bii ya hoo wo niŋ, Onisimɔɔ simnuŋ maa po ni. Lelaŋ, I cho num nyɔɔloo le ndu.
11 O paandoo niŋ, num oo nɔ tɔnɔ o tɔnɔ o ndu niŋ te. Kɛ suŋ suŋ niŋ, naa ŋiɔɔŋ kpou nɔ tɔnɔɔ o ndu niŋ.
12 I cho ndu miŋgioo pila naa num chua. Nduyɛ I kaala ndu a kɔl nuu kpou.
13 Yaa yeema mi ndoo wa wɔ ya o ba nanuŋ, le mbo mala ya o foofo numndo teleŋ ya cho hoo o biyɔɔ niŋ le yooŋgu kɛndɔɔ wo.
14 Kɛ I yeema mi tosa nyɛ o nyɛ mi kɛɛ num fɛlɛŋ nyuna le. Kanifuule, I yeema ma chɛl ndi a kɔl numndo kpou, o ve maa baŋɔɔ le ya baŋ num te.
15 Kɛlɛŋgaa lelaŋ bɛɛ o faŋaŋ num o ba ni le teleŋ biŋgi, le halikpeŋ mbo miiŋgu num o ba le fɛɛŋ a fɛɛŋ.
16 O cho lɛ ko wa maa chɛ le, kɛ puaapilɛnɔ naa kaalaa o cho niŋ ni, taama taama le ya. Kɛ num hiau ndu niŋ kaala, kanifuule o cho niŋ wa chɛ numndo a puaapilɛnɔ numndo o Masanɔɔ niŋ.
17 Te a chua ya pɛ maa chaaŋ num kpeekpeiyo ya cho ni, mɛɛ bii ndu nyɛkɛndɛi mɛɛ ŋ bii ya yɛ.
18 Te o tosal num pɛ suɛi wɔɔŋ ɔɔ mbo nɔ le num nyɛ paawa,* dɔu ya choo.
19 Ya Pɔɔl pila cho hei poonyiaa ni: I cho num paawa nyɛ o nyɛ Onisimɔɔ nɔ le num. Num bɛɛ sina maa kuee nuu cho num. Ndu cho yɛ yoomu numndo ni.
20 Lelaŋ chaaŋ nuu, tosal la hei le mɛɛ naŋ cho diompilɛ a Masanɔɔ yɛ. Nɛŋi ya kɔllo le sabu Kiliti wo.
21 I nɔ tiindaŋndo maa a cho tosa nyɛ ya dimul numndo. Nduyɛ I sina maa a cho tosa mbo hiou bɛɛ mɛɛ ya dimul num yɛ.
22 Okoŋ kɔɔli, I yeema vɛlɛ ma bɛɛndial la yiyaa. Kanifuule, I nɔ tiindaŋndo maa piɛile nyaleŋ le cho tosa mi miiŋgu vɛlɛ naa nya chua.
23 Ɛpafulɔɔ, chaaŋ ni naŋ cho o biyɔɔ niŋ le Chiisu Kiliti wo yil num lapi.
24 Maki, Aluitakɔɔ, Dimaasi, a Luku bɛɛ yil num. Naa ndaa cho wallo latulu ni.
25 Maa Masanɔɔ Chiisu Kiliti tosal nya kɛndɛi nduɛi bɛnduei le kaa nya cho chɔmndo wo fɔ!
