Kaleesiaŋnda 1:1-24
1 Ya kiilanɔɔ Pɔɔl cho nya yauwo hoo poonyiallo ni. O cho wanachiee le hɛli ya le waa kiilanɔɔ le, kɛ Chiisu Kiliti a Mɛlɛka Finya naa, o miŋgi Chiisu yoomu wo, nda hɛli ya ni.
2 Ya a puaapiliaa naŋ cho nanuŋ nda kpou cho kundalaŋ o Kaleesiaa niŋ yauwo hoo poonyiallo ni:
3 Maa Mɛlɛka Finya naa a Masanɔɔ Chiisu Kiliti tosal nya kɛndɛi ndɛi bɛnduei, okoŋ ma ke nya kɔl nyuloo fɔ!
4 Mbo chɛl mbo wu le hakila naalaŋ, le halikpeŋ mbo piŋi naa o chieeŋ dɛnɛ wɔɔŋndo hoo niŋ. Nduyɛ hɛnaŋ Mɛlɛka Finya naa o tosa koŋ ni.
5 Saŋgalaa cho le Mɛlɛka le fɛɛŋ a fɛɛŋ. Amiina.*
6 Kɔndɔfillo bii ya le mɛɛ nya keleŋa Mɛlɛka veelu nya wo kɔɔ mulul lɛ. Mɛlɛka tosal nya kɛndɛi nduɛi bɛnduei o Kiliti niŋndo, ndu nya cho kɔɔ mulullo le yooŋgu kɛndɛ cheleŋ ni.
7 Kɛ yooŋgu kɛndɛ cheleŋ cho le. Waŋnda apum cho nya tɛɛŋ ma wa nya bolle hiŋndo. Nduyɛ yooŋgu kɛndɛ cho a Kiliti okɔɔ wo nda yeema miŋgioo o hɔlaa wɔɔŋnda ni.
8 Te naapila, ɔɔ maalikɛinɔɔ fula pɛ choo choo mbo huŋ dimul nya yooŋgu kɛndɛ cheleŋ, o yooŋgu naŋ dimul nya wo kɔɔli, sendioo cho ndu choo.
9 I miŋgi wɔ vɛlɛ sondo o nyɛ naŋ dimi wo choo. Te wana o wana huŋ dimul nya pɛ yooŋgu kɛndɛ cheleŋ o yooŋgu nya chɛllo kɔɔli, sendioo cho ndu choo.
10 Baa waŋchieeya ya cho kindiŋndo le kɔllo nɛŋioo ni ɔɔ Mɛlɛka? Te o yɔŋ pɛ aa waŋchieeya, mɛɛ I cho buɛi Kiliti le.
11 Puaapiliaa, I hɛnaŋ mi la sina maa o cho wanachiee le kɛɛsiaa yooŋgu kɛndɛ ya cho nya hoo dimullo wo le.
12 O cho wanachiee le ke ya ndu le. Nduyɛ wanachiee pɛɛku ya ndu le. Kɛ Chiisu Kiliti pila chɔm ya ndu ni.
13 Teleŋ ya wa paandu o Piɛile Chuuwa niŋndo, mi la tuɛi mɛɛ yaa tosa a kundala wanaa laalaŋaa Mɛlɛkaa yɛ. I wa hiouwɔɔ lachi a nda nyɛpalaa tusioo choo vɛlɛ a nda tɛɛmbuuwo.
14 I wa hiouwɔɔ lachioo tosaa kpeekpei o Piɛile Chuuwa niŋ. I wa naamula finyaa naa mamaa pɛɛku naa laŋ tolɔɔ kɔɔli, mbo hiau chaaŋaa niaa bɔɔbɔɔ naŋ siimaŋ, nduyɛ miŋ wa kaale pilɛ leŋ nda.
15 Kɛ Mɛlɛka tosa mi kala nuu vialu ya wo, ndu tosal la kɛndɛi nduɛi bɛnduei ni. Mɛɛ o yiyaŋ a ya okɔɔ, mbo veelu ya.
16 Mbo chɔm ya Po ndɔɔ le mi dimul wanaa cho ŋChuu le wa yooŋgu kɛndɔɔ a ndu okɔɔ. A boondii keŋ, I nyuna wanachiee le sila le.
17 Wanaa wa Chulusalɛm ma simnuŋ kiilaa ya tase wa bɛɛ, I kue naa nda chua le ya sila le. Kɛ mi kua Alueebiaa sakpo. Okoŋ kɔɔli, mi miiŋgu Damasikɔɔ.
18 Wɔsilaŋ la yaa okoŋ kɔɔli, mi kua Sifaasi* yilɔɔ Chulusalɛm. I wa ndu o bɛŋgu choo le palɛi 15.
19 Kɛ kiilaa a piliaa opilɛ bɛɛ I chi le, mɛɛ Chemisi, pɔmbɔɔ Masanɔɔ.
20 Sɔɔŋ ya cho nya muŋ poonyiallo woŋ, Mɛlɛka cho lesei maa tonya kpeekpei ŋ cho ni.
21 Okoŋ kɔɔli, mi kua o tanda Siiliaa wo niŋ, a tanda Siliisiaa wo.
22 Kɛ buɛiyaa Kiliti wa, a wa o kundalaŋ niŋ Chudiaa wa ndaa sina ya le.
23 Tɔɔ koni ndaa tuɛi a ya okɔɔ ni aa: “Laŋunɔ ndoo simul piɛile naaleŋ, nduyɛ mbo wa naa nyɛpalaa tusioo choo wo bɛɛ cho niŋ yooŋgu kɛndɔɔ dimioo.”
24 Okoŋ ma kandu Mɛlɛka saŋgalaa le nyɛ yɔŋnuŋ ya wo.
