Kaleesiaŋnda 2:1-21
2 Mɛɛ wɔsilaŋ la hiou 14, miŋ miiŋgu Chulusalɛm naa Banabaa. Mɛɛ naŋ wa kɔlaŋ, miŋ kua latulu a Taitɔɔ.
2 Nyɛ ya che o yilaŋnde niŋndo tosa ni mi kua. Mɛɛ naŋ kuɛ, mi kɔ bii bɔŋaŋndo a laŋgbaa kalla kpeele. Okoŋ, mi dounuŋ nda kona a mɛɛ ya wa wanaa cho ŋChuu le wa yooŋgu kɛndɛ Mɛlɛkaa dimullo yɛ. I tosa hei le sinaa te fondo fuu wali ya tosa niŋndo, ɔɔ o ya cho tosaa wo cho ni.
3 Taitɔɔ, chaaŋ ni naŋ kuɛ wo, mi che bɛɛ Kilikiinɔɔ o wa ni, a beŋ ndu le mbo sɔla hivi chiɛi kɔɔli le.
4 Kɛ mi puaapiliaa lachoowaa luɛi naa tɛɛŋ o vioŋnɔŋndo niŋnda soli suɛi hei. Boondii naŋ ve o sina choo le ve nda luɛi naa tɛɛŋ ni. Ndaa hiŋ naa tɛɛŋ sɔɔsɔɔ le sinaa hɛnɛkɛyɛi naŋ cho tueiyɔɔ yeela o Chiisu Kiliti niŋnde, le halikpeŋ ma luei naa o chɛleŋ niŋ.
5 Kɛ nyɛɛmbɔ bɛɛ ŋ ke nda fonda le, kanifuule naŋ yeema mi tonya cho a yooŋgu kɛndɔɔ okɔɔ wo wa nya tɛɛŋ lɔɔlɔɔ.
6 Kɛ wanaa waŋnda yiyaŋ maa a cho wanaa sɔvɛ wa, mɛɛ mɛɛ nda wa, le ya, a cho nyɛ o nyɛ le. Kanifuule, Mɛlɛka o hɔl ndu, nyɔɔ opilɛ kpe naŋ cho ni.
7 O baa pilɔɔ choo, mi sɔla wallo le wanaa sɔla hivi chiɛi kɔɔli le wa yooŋgu kɛndɔɔ dimullo, mɛɛ Pitɛ bɛɛ wa wanaa sɔla hivi chiɛi kɔɔlioo wa yooŋgu kɛndɔɔ dimullo yɛ.
8 Wana ke Pitɛ kpaayaa le waa kiilanɔɔ le wanaa sɔla hivi chiɛi kɔɔlioo wa wo, ndu koni ke ya kpaayaa ni, le waa kiilanɔɔ le wanaa cho ŋChuu le wa.
9 Mɛɛ Chemisi, Sifaasi,* a Chɔŋ che kɛndɛi bɛnduii Mɛlɛka tosal la ve, ma yil naa a laba naa Banabaa. Laŋgbaa haa ndaa saa kunda wanaa laalaŋnda ni. Okoŋ miŋ chɛlaŋ le mi naŋ kuɛ o wanaa cho ŋChuu le wa lo, kɛ mi nda kuɛ o Chuuwa lo.
10 Nyɛ nda dimul naa le tosaa kinɛiyo cho ni maa, naŋ puɛɛnuŋ a puaapiliaa bala fonduaa le. Nduyɛ ya bɛɛ, wali ya hɛnaŋ tosaa wo kpeekpei cho koŋ ni.
11 Kɛ mɛɛ Sifaasi* hiŋ Aŋtiɔɔ mbo tosa suɛi niŋ kposoŋ te ve, mi sila ndu o kala kala.
12 Kanifuule, tuupa mi puaa pum chaŋ o Chemisi lo ma huŋ Aŋtiɔɔ, mi ndoo de nyɛdiaa nda wanaa cho ŋChuu le wa latulu. Kɛ mɛɛ nda hiŋ, mbo yɔŋ siooŋnde le wanaa sɔla hivi chiɛi kɔɔlioo wa. Okoŋ mbo kialu nyɛdiaa dioo a nda.
13 Mi Chuuwa a tuaa tual ndu kɔɔli a kaa mulu muluaŋ koŋ. Nduyɛ Banabaa bɛɛ mbo tual kaa nda koŋ kɔɔli.
14 Kɛ mɛɛ ya che maa a ve sɔɔŋ tosa mɛɛ yooŋgu Mɛlɛkaa dimi yɛ le, mi dimul Sifaasi* nda kpou o hɔl aa: “Te num cho Chuunɔɔ wo mal pɛ sɔɔŋ Chuuwa tosa woŋ tosaa, ma muliŋ sɔɔŋ wanaa cho ŋChuu le wa tosaa, vɛɛ ŋ mala yɛ niŋ wanaa cho ŋChuu le wa ma chua kaala maChuu laŋ?”
15 Chuuwa naŋ cho ni, nduyɛ ŋ cho maa wanaa cho ŋChuu le wa le. Kanifuule, ŋ chua nda maa wanaa yɔŋ wɔɔŋ.
16 Ŋ sina maa o cho nyɛ sawalaŋ* la dimi wo tosaa le siiŋguu waŋndo wana sakpoo Mɛlɛka o hɔl te, kɛ laalaŋndo dɔwɔɔ o Chiisu Kiliti niŋ. Lelaŋ naŋ dɔu laalaŋndo o Chiisu Kiliti niŋ ni, le miŋ wa wanaa sakpuaa o Kiliti niŋ, kɛ o cho le nyɛ sawalaŋ la dimi wo tosaa le. Kanifuule, wana o wana nɔla mbo simnuŋ wana sakpoo Mɛlɛka o hɔl o nyɛ sawaa dimi wo tosaa niŋ te.
17 Te naa bɛɛ ŋ simnuŋ pɛ wanaa lahakiaa o kindiŋ naŋ cho le waa wanaa sakpuaa o sabu Kiliti wo niŋ pɛ, baa koŋ chɔm ni maa Kiliti dɛɛniaa naa le hakioo tosaa ni? Sako bɛɛ!
18 Nyɛm ya chii niŋ tɛɛmbuu woŋ, te I miiŋgu muŋ pɛ toosiaa, mɛɛ I chɔm maa ya cho wana hakioo ni.
19 O sabu sawaa niŋ, mi sɔla piɔmndo le sawaa, kanifuule I yeema mi wa yoomu le Mɛlɛka.
20 Mi sɔla baŋɔɔ o yɔmndo choo a Kiliti latulu. Lelaŋ, o cho lɛ o kpaaya ni niŋ te ya cho yoomu le, kɛ o kpaaya Kiliti wo niŋ. O Po Mɛlɛkaa niŋ ya dɔu tiindaŋndo le waa yoomu ni, kanifuule ndu chɛl ni mbo wu le ya le mɛɛ o kaala ya yɛ.
21 I chue kɛndɛi bɛnduii Mɛlɛkɛi nyɛ fondoo fuu le. Te o yɔŋ pɛ aa sawaa tosa ni mi waŋndo wa sakpo Mɛlɛka o hɔl, mɛɛ fondo fuu Kiliti viŋnuŋ ni.
Tɛɛsiaalaŋ
^ Ndu nda veelu vɛlɛ ni aa Pitɛ.
^ Ndu nda veelu vɛlɛ ni aa Pitɛ.
^ Ndu nda veelu vɛlɛ ni aa Pitɛ.
^ Koŋ cho ni, Sawala Mɛlɛka ke Muuse laŋ.
