Kaleesiaŋnda 3:1-29
-
Teŋgeŋndo nyɛ Sawaa dimi wo tosaa tɛɛŋ a laalaŋndo (1-14)
-
Wana cho sakpo wo cho wa yoomu le laalaŋ ndɔɔ (11)
-
-
O cho a Sawaa le Mɛlɛka yii kpemaa a Ebilaham te (15-18)
-
Kiliti, po mama Ebilaham ndo (16)
-
-
Kandɔŋ Sawaa a sabu ndɔɔ (19-25)
-
Chuauwaa Mɛlɛkaa nya cho ni sanaa a laalaŋ nyaa o Kiliti niŋ (26-29)
-
Wanaa cho le Kiliti wa, chuauwaa mamaa Ebilaham nda nda cho ni (29)
-
3 Ee nya waŋnda Kaleesiaa, diɔmii maavɛɛ nya luɛi yɛ hei niŋ? Nɛɛnɛ hui yɛ nya mbo siŋga kɔlta nyalaŋ? A tɛɛsial nya niŋ kpendekele o paandoo niŋ a mɛɛ nda baŋ Chiisu Kiliti o yɔmndo choo yɛ.
2 I yeema mi nyuna nya isɔɔ: Baa le mɛɛ nya tosa nyɛ sawaa* dimi wo yɛ nya sɔla nyina diandaa ni, ɔɔ le mɛɛ nya laalaŋ nyɛ nya tueiyo yɛ?
3 Baa diɔmnda nya cho ni? Kandɔɔ nya kandu kɔlaŋ o nɛi nyina Mɛlɛkaa choo nyɛkɛndɛiyo, la yeema mi la siou ndu o nɛi iwana chieeyaa choo?
4 Baa mi saŋga nyaa simnuŋ nyɛ fondoo fuu? O bɛnda mbo simnuŋ nyɛ fondoo fuu le.
5 Wana tosa mi la sɔla nyina diandaa, nduyɛ mbo tosa walta kɔndɔfiltaŋ nya tɛɛŋndo, baa mbo wa maa le mɛɛ nya tosa nyɛ sawaa dimi wo yɛ, ɔɔ le mɛɛ nya laalaŋ nyɛ nya tueiyo yɛ o tosa keŋ ni?
6 La yiyaŋndɔ a Ebilaham okɔɔ. Mbo “duau laalaŋndo o Chɛhowa* niŋ. Le hei, mbo chua ndu maa wana sakpoo o cho ni.”
7 A tonya, la sina maa wanaa nɔ laalaŋndo wa cho chuauwaa Ebilaham nda ni.
8 Mi Yau Mɛlɛkaa dimi sindɛ niŋ pa maa, Mɛlɛka cho tosa mi wanaa cho ŋChuu le wa simnuŋ wanaa sakpuaa ndu o hɔl le laalaŋ ndaa. Mbo dimul vɛlɛ Ebilaham yooŋgu kɛndɔɔ sindɛ niŋ pa aa: “I cho hunɔɔ waŋnda o chieeŋndo niŋ kpou salaa dɔwɔɔ o sabu numndo niŋ.”
9 Lelaŋ, wanaa nɔ laalaŋndo wa cho salaa sɔla mɛɛ Ebilaham sɔla salaa le laalaŋ ndɔɔ yɛ.
10 Wanaa tiindaŋ o nyɛ sawaa dimi wo niŋnda, sendioo cho nda choo. Kanifuule, i cho i poonyiaa aa: “Wana o wana hiu lachi a tosaa nyɛ cho o poonyiaa o Yau Mɛlɛkaa niŋndo le, sendioo cho ndu choo.”
11 I cho kpendekele maa wana o wana nɔla mbo simnuŋ wana sakpoo Mɛlɛka o hɔl, o nyɛ sawaa dimi wo tosaa niŋ te. Kanifuule, i cho i poonyiaa aa, “Wana cho sakpo wo cho wa yoomu le laalaŋ ndɔɔ.”
12 Sawaa tolnuŋ o laalaŋndo choo le. Kɛ, “wana o wana tosa pɛ nyɛ sawalaŋ la dimi wo, la cho ndu mala mbo sɔla pioŋɔɔ.”
13 Ŋ wa o sendioo niŋ Sawaa o ba bɛŋgu, mi Kiliti piandu naa kpali, mi ndupila miiŋgu o sendi koŋ bɛŋgu le naa. Kanifuule i cho i poonyiaa aa: “Wana o wana nda baŋ pɛ o yɔmndo choo, sendioo cho ndu choo.”
14 Hei yɔŋnuŋ le halikpeŋ mi wanaa cho ŋChuu le wa sɔla sala Ebilaham ndo, o sabu Chiisu Kiliti wo niŋ. Okoŋ, mi naa kpou sɔla nyina diandaa Mɛlɛka mɛi lediom le naa kioo sanaa a laalaŋ naa wo.
15 Puaapiliaa, I chɔmndɔ nya a tamaselii naŋ sina wo okɔɔ: Te wanaa ŋiɔɔŋ chɛlaŋ pɛ o isɔɔ choo, nduyɛ ma yii kpemaa, wana o wana feŋa, ɔɔ mbo handu nyɛ cheleŋ lechoo le.
16 Mi Mɛlɛka chuel Ebilaham nda po ndɔ mamaa* buŋgɛi. O dimi nuaa aa, “chuauwaa num aa mamaa,”* mɛɛ wana yɔŋ aa waŋnda tau le. Kɛ nuaa o dimi ni aa, “po num mamaa,”* le chɔmndo maa waŋndo ndupilɛ. Ndu cho yɛ Kiliti ni.
17 I chɔɔlu wɔ nya ndi tɛɛsial: Kpemaa fɛlɛŋ Mɛlɛka yii. Wɔsilaŋ 430 okoŋ kɔɔli, mbo yɔŋgu Sawaa. Kɛ sawa koŋ tɛɛmbuu kpema Mɛlɛka yiiyo, ɔɔ buŋgɛi o chua ve le.
18 Te le nyɛ sawaa dimi wo tosaa Mɛlɛka ke waŋndo nyɛm kiɔɔŋ ni, mɛɛ o cho lɛ le buŋgɛi Mɛlɛka chua ve le o sɔla muŋ te. Kɛ mi Mɛlɛka ke Ebilaham nyɛm kiɔɔŋ le buŋgɛi o chuel ndu ve.
19 Mɛɛ le yɛɛnɛ Mɛlɛka yɔŋgu yɛ Sawaa? Mɛlɛka yɔŋgu Sawaa le yɔŋnda wɔɔŋndaŋ chɔɔmuuwo. Nduyɛ mbo lo haaa mi po mama* Mɛlɛka chua buŋgɛi le ndu wo huŋ. Mi Mɛlɛka ke maalikɛiya sawaa hoo, mi nda ke wana wa Mɛlɛka nda ŋwaŋnda chiee tɛɛŋndo.
20 Kɛ te waŋndo ndupilɛ wa pɛ buŋgɛi chuaa, wana cheleŋ yeemaŋ lɛ le mbo sim tɛɛŋ te. Lende koni i cho a Mɛlɛka ni. Ndupilɛ kpe wa ni, boondii o chua buŋgɛi keŋ ndo.
21 Mbo wa maa sɛɛŋgiaa Sawaa cho buŋgaŋ Mɛlɛka chua woŋ ni? Sako bɛɛ! Kanifuule, te sawa Mɛlɛka yɔŋgu wo ndoo ke pɛ wana yoomoo, mɛɛ o wa tosa mi waŋnda ndaa simnuŋ wanaa sakpuaa Mɛlɛka o hɔl.
22 Kɛ Yau Mɛlɛkaa dimi maa waŋchieeya wa hakioo o ba bɛŋgu. O hei niŋ, wanaa dɔu laalaŋndo o Chiisu Kiliti niŋnda, Mɛlɛka nɔla mbo ke nda nyɛm kɛndɛŋ o chuel nda buŋgɛi yoŋ.
23 Tuupa miŋ duau laalaŋndo o ndu niŋ, ŋ wa o sawaa bɛŋgu mɛɛ waŋndo wa nuaa o biyɔɔ niŋ yɛ. Ŋ wa chumndo boondii Mɛlɛka wa naa ndu chɔmnde.
24 Sawaa wa naa nɛiyo chɔmndo ni haaa mi Kiliti huŋ, le halikpeŋ miŋ simnuŋ wanaa sakpuaa Mɛlɛka o hɔl sanaa a laalaŋ naa.
25 Kɛ mɛɛ naŋ laalaŋ niŋ o ndu niŋ yɛ, ŋ cho lɛ o sawa bɛŋgu le naa nɛi chɔm te.
26 Nya kpou chuauwaa Mɛlɛkaa nya cho ni le mɛɛ nya laalaŋ o Chiisu Kiliti niŋ yɛ.
27 Kanifuule, nya wanaa sɔla yiŋɔɔ o Kiliti niŋnda kpou, la simnuŋ niŋ maa Kiliti.
28 Chuunɔ ni, Kilikiinɔ ni, chɛ ni, wana baŋaŋ ni, wana pɔnɔ ni, wana lanɔ ni, nya kpou nyɛpilɔɔ kpe nya cho o Chiisu Kiliti niŋ ni.
29 Nduyɛ te le Kiliti nya cho ni, mɛɛ chuauwaa mamaa* Ebilaham nda nya cho ni. Nya cho nyɛm kɛŋ Mɛlɛka chuel ndu buŋgɛi yoŋ sɔla ni.
Tɛɛsiaalaŋ
^ Koŋ cho ni, Sawala Mɛlɛka ke Muuse laŋ.
^ Tofa Tɛɛsiaa.
^ Kilikiiye, “kulle.”
^ Kilikiiye, “kulloŋ.”
^ Kilikiiye, “kulle.”
^ Kilikiiye, “kulle.”
^ Kilikiiye, “kulle.”
