Kaleesiaŋnda 5:1-26
5 Kiliti baŋa naa ni miŋ wa hɛnɛkɛ. Lelaŋ, la sim yi. Nduyɛ la miiŋgu lɛ o chɛleŋ niŋ te.
2 Ya Pɔɔl, I cho nya dimullo maa te la chɛl pɛ ma hivi nya o chiɛi kɔɔli, mɛɛ nyɛ o nyɛ Kiliti tosal nya, o simnuŋ nyɛ fondoo fuu.
3 I chɔɔlu wɔ vɛlɛ dimi. Wana pɔnɔ kɛ kɛ chɛl pɛ ma hivi ndu o chiɛi kɔɔli, mɛɛ o nɔ niko mbo tosa nyɛ o nyɛ Sawaa* dimi.
4 Te nya pumnda yiyaŋ pɛ maa la nɔla mi la simnuŋ wanaa sakpuaa Mɛlɛka o hɔl le mɛɛ nya cho sawaa biyɔɔ yɛ, mɛɛ Kiliti nya faŋaŋ koŋ o ibuŋ ni, okoŋ mi la kɛɛ kɛndɛi nduɛi bɛnduei.
5 Ŋ cho chumndo le miŋ simnuŋ wanaa sakpuaa Mɛlɛka o hɔl. Kɛ nyina diandaa a laalaŋ naa kinɛi nɔla hei tosaa ni.
6 Wanaa cho diompilɛ a Chiisu Kiliti wa nda, a sɔla hivi chiɛi kɔɔli, a sɔla hivi chiɛi kɔɔli le, koŋ cho nyɛ o nyɛ le. Kɛ laalaŋ nyindu waŋndo le kaalaa chɔmndo wo cho nyɛ kpeekpeiyo ni.
7 La wa tosaa* nyɛkɛndɛi o tonyaa niŋ. Nɛɛnɛ kuuna yɛ nya hiouwɔɔ lachi a pɛɛkula tonyalaŋ tolɔɔ kɔɔli?
8 O cho wana veelu nya wo o ba le pɛɛkula waa nuaa la fula le.
9 Yiisiiyo* nyɛɛmbɔ bɛɛ nɔla mbo tosa mi kpeyaŋ nda linda le beediiyo* wo kpou hindu pɔfuu.
10 I nɔ laalaŋndo maa nya cho o diompilɔɔ niŋ a Masanɔɔ wa, yiyaŋ pilɔɔ kpe naŋ nɔ ni. Kɛ wana cho nya paaliaŋndo wo, mɛɛ mɛɛ o wa, o cho hunɔɔ nyɛpalaa sɔla.
11 Puaapiliaa niaa, te yaa wa wɔ pɛ waŋnda pɛɛkoo a hivi chiɛi kɔɔlioo okɔɔ, mɛɛ le yɛɛnɛ nda cho yɛ ya nyɛpalaa tusioo choo? O hei niŋ, pɛɛku ya cho waŋnda a piɔm Chiisu sɔla o yɔm imɔnɔɔ* choo wo, ndoo tɛɛmbuu lɛ niŋ wana kɔl te.
12 Yaa yeema bɔɔ mi wanaa cho nya kaŋ paaliaŋndo wa vi la lɛmbɛ.*
13 Puaapiliaa, la sɔla veeloo le mi la wa hɛnɛkɛ. Kɛ la soliŋ hɛnɛkɛyɛi keŋ kpeku le yeemɛi ŋdialle tolɔɔ kɔɔli le. Kaalaa nyindu nya le mi la wa maaliaŋndo vellaa velle.
14 Sawalaŋ kpou, o sawa pilɔɔ hoo niŋ la fula ni. Ndu cho ni: “A nɔ ma kaala wana nya chiɛɛliaŋ ndo* mɛɛ ŋ kaala numpila yɛ.”
15 La mandaŋ, kanifuule te la wa pɛ kisi kisiaŋndo, nduyɛ mi la wa nyɛ nɛiyaa lueinaŋndo, mɛɛ tɛɛmbaŋndo nya cho vellaa velle ni.
16 Kɛ nyɛ ya cho nya dimullo wo cho ni maa, te la hiou pɛ lachi a nyɛ nyina Mɛlɛkaa chɔm nya wo tosaa, la tul lɛ yeemaŋ ŋdialloŋ kɔɔli le.
17 Kanifuule, chɛlaŋ cho yeemaŋ ŋdialloŋ tɛɛŋ a nyina Mɛlɛkaa le. Nduyɛ chɛlaŋ cho nyina Mɛlɛkaa tɛɛŋ a yeemaŋ ŋdialloŋ te. Nyɛm sala tiɔɔŋ ndoŋ muŋ niiŋaŋ kposoŋ te. Le hei, la nɔla mi la tosa nyɛ nya hɛnaŋ ndo le.
18 Kɛ te la chɛl pɛ nyɛ nyina Mɛlɛkaa chɔm nya le tosaa wo, mɛɛ la cho o sawa bɛŋgu le.
19 Walta ŋdial taŋ la cho kpendekele. Laŋ la cho ni: Kaa ihini nɔɔlɛiyo,* sɔɔŋ nɔɔlɛiyoŋ, kaa kɔl vesɛiyo,*
20 piɔmnda sooluuwo, walta nyinaa wɔɔŋnda,* nɛiyɔŋndaŋ, niilu latandaa, paŋaliaŋndaŋ, kɔl tuu bɛndoo, sɛɛŋgiaŋndaŋ, piɔuwaŋndaŋ, pɛɛkula waŋchieeya tolɔɔ kɔɔli,
21 hɔlteŋ, kolɔɔ bɛndoo, yelelaŋ bɛndoo, a sɔɔŋ waa nuaa. I cho nya pɔɔ sila a sɔɔŋ muŋ okɔɔ, mɛɛ yaa sila nya o paandoo niŋ yɛ, maa wanaa cho sɔɔŋ muŋ tosaa wa kinɛi, a luei niŋ o Masale Mɛlɛkaleŋ niŋ te.
22 O baa pilɔɔ choo, suliŋnda nyina Mɛlɛkaa la cho laŋ ni: Kaalaa, nyaaloo, kɔl nyuloo, biuwɔŋndo, kɛndɛi, waa wana kɛndɛ, laalaŋndo,
23 tusiŋndo, a kɔl numndo baa tiuwo. Sawa o sawa cho mbo kuuna suliŋndaŋ ndaŋ te.
24 Wanaa cho le Chiisu Kiliti wa chua yeemaŋ ndaŋ wɔɔŋndoŋ, ma dii* muŋ pɛ.
25 Te ŋ wa pɛ nyɛ nyina Mɛlɛkaa chɔm naa wo tosaa, mɛɛ ŋ hiounuŋ lachi a nyɛ nyina koŋ chɔm naa wo tosaa.
26 Ŋ waŋnuŋ wanaa yoŋga, miŋ tuuŋgaŋ a wana le. Nduyɛ, ŋ luɛinuŋ lehɔl o nyɛ pila le.
Tɛɛsiaalaŋ
^ Koŋ cho ni, Sawala Mɛlɛka ke Muuse laŋ.
^ Kilikiiye, “La wa kiltaŋ nyɛkɛndɛi.”
^ Ɔɔ “lɛvɛŋndo.”
^ Ɔɔ “buloo.”
^ Tofa Tɛɛsiaa.
^ Ɔɔ “pɛl ndapila boosilaŋ,” okoŋ a suliŋ lɛ le nyɛ sawaa dimi wo tosaa le.
^ Diom maKilikiiyo le “wana nya chiɛɛliaŋ ndo” sim le wanachiee kɛ kɛ.
^ Kilikiiye, pɔniaa. Tofa Tɛɛsiaa.
^ Ɔɔ “sɔɔŋ lasiɔmboŋ.” Kilikiiye, asɛlchiaa. Tofa Tɛɛsiaa.
^ Ɔɔ “piondɔŋndaŋ.”
^ Kilikiiye, “baŋɔɔ o yɔmndo choo.”
