Kaleesiaŋnda 6:1-18
6 Puaapiliaa, te la saaluŋ pɛ maa waŋndo kandu kɔlaŋ o nɛi wɔɔŋndo choo, kɛ mbo biiyɔ ndi bila le, nya nɔ suliŋnda nyina Mɛlɛkaa wa, la kindiŋ le ndu miŋgioo o nɛi o lebɛɛ niŋ. Nduyɛ nyapila bɛɛ la mandaŋ, yɔŋii nya del o tɔɔndaŋndo niŋ.
2 La hiou lachi a maaliaŋndo vellaa velle o dɛnɛla nyala palaalaŋ niŋ. Te la tosa lende pɛ, mɛɛ la cho tosaa nyɛ sawa Kiliti wo dimi wo.
3 Wana o wana yiyaŋ pɛ maa o cho o sɔvɛ, kɛ mbo ve wana sɔvɛ le, mɛɛ ndupila cho huinɔŋndo ni.
4 Wana o wana mɛɛndiaŋ kelala ndɔlaŋ nyɛkɛndɛi. Te la wa la kɛndɛ pɛ, ndupila cho dɔɔnɔŋ nyaale. O tuuŋgaŋ a wana cheleŋ te.
5 Kanifuule, wana o wana cho kalaŋndo o ndɔɔ siilɔŋ.
6 Wana nda cho diom Mɛlɛkaa pɛɛkoo wo, ndu bɛɛ nɔ mbo piɔu nyɛm kɛndɛŋ o nɔ woŋ nda wana cho ndu pɛɛkoo wo.
7 La hui nyapila le: Wana mem Mɛlɛka le. Kanifuule, nyɛ waŋndo saŋ ndo, ndu o kuau ni.
8 Wana saŋ pɛ yɛyii idialle, o cho hunɔɔ piɔmndo sɔla. Kɛ wana saŋ pɛ yɛyii nyina Mɛlɛkaa, o cho hunɔɔ yoomu fafɛɛŋndo sɔla.
9 Lelaŋ, ŋ wuŋnuŋ ŋdial le sɔɔŋ kɛndɔŋ tosaa le. Kanifuule, te ŋ vi ŋdial te, ŋ cho hunɔɔ tɔnɔɔ sɔla a teleŋ bɛnda wo.
10 Le hei, teleŋ naŋ nɔ wɔ hoo fondaa wo, ŋ tosaŋ sɔɔŋ kɛndɔŋ naa wana o wana chua, kɛ taama taama chaaŋaa naa laalaŋnda.
11 Poonyiaa ni ya pilaa cho hoo ni. Nyɛ koŋ o cho nuaa dokolo dokolo ni.
12 Wana o wana cho nya baŋɔɔ le mi la sɔla hivi chiɛi kɔɔlioo, a cho ndi tosaa le mi waŋnda che nda wanaa kɛndɛ. Nduyɛ a yeema mi waŋnda tusi nda nyɛpalaa choo le Kiliti* le.
13 Wanaa sɔla hivi chiɛi kɔɔlioo wa bɛɛ, ndapila cho Sawalaŋ* biyɔɔ kpou le. Kɛ a yeema mi la sɔla hivi chiɛi kɔɔlioo, le halikpeŋ ma kelu yoŋgaa le nyɛ yɔŋnuŋ dialuŋ nyaŋ ndo.
14 Kɛ ya, I kilu yoŋgaa o nyɛ o nyɛ niŋ te, mɛɛ a piɔm Masanɔ naa Chiisu Kiliti sɔla o yɔm imɔnɔɔ* choo wo okɔɔ. Piɔm o sɔla koŋ ndo tosa ni mi Mɛlɛka kilul chieeŋndo yamɛi le tambei sɔlaa. Nduyɛ, I nɔ lɛ kpeku o kpeku a chieeŋndo hoo le.
15 Wana sɔla hivi chiɛi kɔɔli, sɔla hivi chiɛi kɔɔli le, koŋ cho nyɛ o nyɛ le. Suɛi kpeekpeiye cho Mɛlɛka toosiaa naa a sɛnɛi ni.
16 Wana o wana cho kɔlaŋ o nɛi ya dimul nya hoo a ndu okɔɔ wo choo, nya Isɔluɛi Mɛlɛkaa, maa Mɛlɛka ke nya kɔl nyuloo, nduyɛ mbo tuiinuŋ nya inyiɛɛ fɔ!
17 Chɔŋ a hau mbo kuɛ kɛ, wana o wana chuu lɛ ya nyɛpalaa cheleŋ te. Kanifuule, I nɔ niŋ tindilaŋ lekɔɔ le chɔmndo maa chiɔɔ ya cho le Chiisu ni.
18 Puaapiliaa, maa Masanɔ naa Chiisu Kiliti tosal nya kɛndɛi nduɛi bɛnduei le kaa nya cho chɔmndo wo fɔ! Amiina.*
Tɛɛsiaalaŋ
^ Kilikiiye, “Le yɔm imɔnɔ Kiliti wo.”
^ Koŋ cho ni, Sawala Mɛlɛka ke Muuse laŋ.
^ Tofa Tɛɛsiaa.
^ Koŋ cho ni, i yɔŋnuŋ lende fɔ.
