Koloosiaŋnda 1:1-29
1 Ya Pɔɔl, kiilanɔ Chiisu Kiliti wo o hɛnaŋ Mɛlɛkaa niŋ, I cho latulu a puaapilɛnɔ naa Timoti.
2 I cho yauwo hoo poonyiaa le nya wanaa laalaŋnda* a puaapiliaa cho diompilɛ a Kiliti o Koloose niŋnda:
Maa Mɛlɛka Finya naa tosal nya kɛndɛi nduɛi bɛnduei, nduyɛ mbo ke nya kɔl nyuloo fɔ!
3 Lɔɔlɔɔ naŋ wa pɛ piɛileŋ le nya, miŋ mel Mɛlɛka balikaa, o cho Finyaa le Masanɔɔ Chiisu Kiliti wo.
4 Kanifuule, ŋ tuei a laalaŋ nya nɔ o Chiisu Kiliti niŋndo okɔɔ, nduyɛ a kaala nya nɔ le wanaa laalaŋnda wo.
5 La tosa hei le tiindaŋ nya nɔ le nyɛ Mɛlɛka kɛsul nya o choo choo niŋndo. La tuei niŋ paandu a tiindaŋndo hoo okɔɔ o yooŋgu tonyaa niŋ. Ndu cho yɛ yooŋgu kɛndɛ Mɛlɛkaa ni,
6 o nda dimul nya wo. Nduyɛ yooŋgu kɛndɔɔ hoo cho hiouwɔɔ lachi a pɛŋgɛlaŋndo ba o ba fee o chieeŋndo niŋ. Nya bɛɛ, chɔŋ a paale nya tuei ndu, nduyɛ mi la sina kɛndɛi bɛnduii Mɛlɛkɛi nyɛkɛndɛ walaŋ nde, o cho hiouwɔɔ lachi a pɛŋgɛlaŋndo nya tɛɛŋ.
7 Chaaŋ naa kaalaa Ɛpafulɔɔ pɛɛku nya a kɛndɛi bɛnduei hei okɔɔ ni. Naa ndaa cho wallo latulu le Kiliti ni, nduyɛ o foofo naa o cho wallo le nya ni.
8 Mbo dounuŋ naa vɛlɛ kona a mɛɛ nyina Mɛlɛkaa mala nya le kaalaa chɔmndo yɛ.
9 Lelaŋ, kani miŋ tuɛi konaa hoo, ŋ pɛŋgi wɔ piɛileŋ le nya le. Ŋ cho piɛileŋ maa Mɛlɛka tosa mi la sɔla kɔl kalu kpeekpeiyo a hɛnaŋ ndɔɔ okɔɔ, nduyɛ mi la sɔla taasioo a sinapɛŋgoo le sɔɔŋ ndɔŋ biyɔɔ bila.
10 Hei mala nya mi kelala nyalaŋ la wa maa wanaa Chɛhowa* wa, nduyɛ mi la tosa sɔɔŋ nɛŋi ndu kɔllo woŋ. Okoŋ mi la hiou lachi a kɔl kalu kpeekpeiyo sɔlaa a Mɛlɛka okɔɔ.
11 Ŋ cho vɛlɛ piɛileŋ maa Mɛlɛka luei nya yoomuaŋ a kpaaya ndɔ bɛndoo, le halikpeŋ mi la biunuŋ nyɛ o nyɛ, nduyɛ mi la wa a nyaale.
12 La mel Mɛlɛka Finya naa balikaa, kanifuule ndu bɛɛndiaa nya ni, le mi la sɔla nyɛm kɛŋ cho le wanaa laalaŋaa* cho o nyɛ teŋgaa niŋnda.
13 Ndu soli naa o kpaaya manyumndo bɛŋgu ni, okoŋ mbo huŋ a naa o masale Po ndɔ kaalaa niŋ.
14 Po ndɔɔ hoo baŋa naa ni, okoŋ miŋ sɔla malɔɔ hakioo le yɔŋnda naala wɔɔŋndaŋ.
15 Ndu cho velaŋ Mɛlɛkaa ni. Ndu fɛlɛŋ Mɛlɛka toosiaa* a nyɛ o nyɛ fee.
16 Ndu Mɛlɛka soliŋ kpeku ni le nyɛm cheleŋndoŋ kpou toosiaa. Muŋ o choo choo niŋ, a muŋ o lɛŋndeŋ choo, kɔ bii a nyɛm naŋ cha woŋ, a ŋ naŋ chi le woŋ, o wa kpaayalaŋ, masɛi, ɔɔ simlachiaa. O ndu niŋ sanaa nyɛm cheleŋndoŋ kpou toosiaŋ ni, nduyɛ le ndu ŋ cho ni.
17 Ndu fɛlɛŋ Mɛlɛka toosiaa a nyɛ o nyɛ fee. Nduyɛ o ndu niŋ sanaa nyɛm cheleŋndoŋ kpou toosiaŋ ni.
18 Ndu cho dialloŋ bolleŋ ni. Dialuŋ muŋ cho yɛ kundaa ni. Ndu cho kandɔŋndo ni, nduyɛ ndu fɛlɛŋ miiŋgu yoomu, le halikpeŋ mbo simnuŋ wana tasoo o nyɛ o nyɛ niŋ.
19 Kanifuule, Mɛlɛka ndoo hɛnaŋ mi suliŋnda ndɔlaŋ kpou laa cheŋnuŋ walaŋ o Chiisu niŋ.
20 Nduyɛ, o sabu Chiisu wo niŋ diompilɔɔ miiŋgu Mɛlɛka tɛɛŋ a nyɛm cheleŋndoŋ kpou ni, kɔ bii a nyɛm waa o lɛŋndeŋ choo, a muŋ o choo choo niŋ. Kooma o tala o yɔm imɔnɔɔ* choo waŋ ma tosa ni mi hei yɔŋnuŋ.
21 La wa paandu Mɛlɛka levil, nduyɛ yaamɔɔwaa nduaa nya wa ni. Kanifuule, o sɔɔŋ dɛnɛ wɔɔŋndoŋ choo koni kɔlta nyalaŋ la wa ni.
22 Kɛ piɔm Chiisu wo tosa mi la miiŋgu diompilɛ a Mɛlɛka. O tosa hei le mi la wa a diandaa ndu o hɔl, la nɔ sɔŋ te, nduyɛ tɔɔyaŋ o tɔɔyaŋ ve nya choo le.
23 Kɛ mɛɛ mi la hiou lachi a simndaŋ o laalaŋ nyaa choo yi. Nduyɛ tiindaŋ nya sɔla o yooŋgu kɛndɛ nya tueiyo niŋndo, la mal ndu le. Yooŋgoo hoo dimiŋ niŋ ba o ba fee o chieeŋndo choo. Ya Pɔɔl bɛɛ simnuŋ niŋ wana dimiaa yooŋgu kɛndɔɔ hoo.
24 Suŋ suŋ niŋ, I cho a nyaale le nyɛpalaa ya cho sɔlaa le nya wo. Nduyɛ, I cho saŋgaa maa Kiliti. Kɛ I nɔ mi hiou lachi a saŋgaa le dialuŋ ndɔŋ. Dialuŋ muŋ cho yɛ kundaa ni.
25 I cho wallo le wanaa Mɛlɛkaa, kanifuule ndu hɛli ya ni le ndu tosaa. Nduyɛ le tɔnɔ nyaa hei cho ni. Le sabu koŋ ya dimi yooŋgu kɛndɛ Mɛlɛkaa a kɔllo kpou ni.
26 Yooŋgu koŋ cho suɛi Mɛlɛka viŋ waŋchieeya kani masindɛ ve ni. Kɛ suŋ suŋ niŋ, mbo chɔɔmuu ndi o wanaa laalaŋaa* nduaa lo.
27 Mɛlɛka wa a kɔl kɛndɛ le waŋnda o kaalaŋ niŋ kpou suɛi viaŋnaŋii bɛnduei hei chɔmndo. Suɛi keŋ cho ni maa, Kiliti cho diompilɛ a nya, nduyɛ maa la nɔ tiindaŋndo le waa o Masale ndɔleŋ niŋ.
28 A ndu okɔɔ naŋ cho waŋnda dimullo ni. Nduyɛ ŋ cho waŋnda silaa, a nda taasi kpeekpeiyo pɛɛkoo, le halikpeŋ mi wanaa cho diompilɛ a Kiliti wa simnuŋ kaasoŋnda o Mɛlɛka piɛiyo niŋ, okoŋ miŋ chua nda chɔ miŋ ke Mɛlɛka.
29 Lelaŋ, I cho wallo kalaŋ, nduyɛ mi wa kindiŋndo kpeekpei a kpaaya ndɔ cho wallo o ya niŋndo.
Tɛɛsiaalaŋ
^ Kilikiiye, “wanaa diandaa.”
^ Tofa Tɛɛsiaa.
^ Kilikiiye, “wanaa diandaa.”
^ Koŋ cho ni, po tasoo.
^ Tofa Tɛɛsiaa.
^ Kilikiiye, “wanaa diandaa.”
