Koloosiaŋnda 2:1-23
2 I yeema mi la sina mɛɛ ya cho fafalaa le nya, haa Lawodisiaa, a wanaa chi wɔ ya le wa kpou yɛ.
2 I cho hei tosaa le ma sɔla kɔl dɛɛniaa, ma wa diompilɛ o kaalaa niŋ, nduyɛ ma sɔla tɔnɔ o tɔnɔ cho o sinapɛŋgu nda sɔla hoo wo niŋ. Okoŋ, a nɔla ma sina suɛi viaŋnaŋii Mɛlɛkɛi nyɛkɛndɛi. Ndi cho yɛ Kiliti ni.
3 O Chiisu niŋ kɔl kaloo a taasioo kpou veŋnuŋ ni.
4 I cho hei dimioo yɔŋii nda hiŋ nya hɔlla a sondo nda yeelɛiyo.
5 Mi che bɛɛ I cho loŋ a nya le, kɛ yiyaŋ nuu cho a nya latulu. Nyɔɔ cho ya hɛnaŋndo le nya chɔɔ sɔɔŋ tosaa kpɛ kpɛ, nduyɛ mi la sim nyɛkɛndɛ yi o laalaŋ nya nɔ o Kiliti niŋndo choo.
6 Lelaŋ, mɛɛ nya chii Masanɔɔ Chiisu Kiliti chɛlɔɔ yɛ, la hiou niko lachi a waa maa ndu.
7 A mɛɛ nya pɛɛku yɛ, laalaŋ nyaa o Chiisu niŋ nɔ mbo luɛi puundoŋ, mɛɛ yɔmndo luei nuaa puunduŋ ndɔŋ lɛŋ landaŋ yɛ. Nduyɛ la wa Mɛlɛka balikaa mello lɔɔlɔɔ.
8 La mandaŋ yɔŋii waŋnda bii nya ma siiŋguu nya chiaa a taasi chieeŋndo hoo, okoŋ ma hui nya a sɔɔŋ ndaŋ lachoowaŋ. O naamula waŋchieeya a o yiyaŋnda chieeŋndo choo sɔɔŋ muŋ tɔlnuŋ ni, kɛ ŋ fula o pɛɛkula Kiliti laŋ niŋ te.
9 Kanifuule, suliŋnda Mɛlɛkalaŋ la cho la piaa cha o ndu niŋ.
10 Nya bɛɛ chii nyɛ o nyɛ sɔla o Chiisu niŋ. Ndu cho bolleŋ le masɛi a kpaayalaŋ kpou ni.
11 Le mɛɛ nya cho diompilɛ a ndu yɛ, la chii niŋ hivi chiɛi kɔɔlioo sɔla, kɛ ndu ve maa hivi chiɛi kɔɔli idiallo le. La mal kaala wɔɔŋnda dialuŋ nyaŋ hakioŋ wa tosaa laŋ. Hivi chiɛi kɔɔlioo hoo wanaa Kiliti wa sɔla ni.
12 Teleŋ nya sɔla yiŋɔɔ maa ndu wo, mi la sɔla kumbɔɔ a ndu latulu. Nduyɛ le mɛɛ nya cho diompilɛ a ndu yɛ, mi la miiŋgu yoomu a ndu latulu. Hei yɔŋnuŋ le mɛɛ nya dɔu laalaŋndo o kpaaya Mɛlɛka miŋgi ndu yoomu wo niŋ yɛ.
13 La wa paandu a vilɛi le yɔŋnda nyala wɔɔŋndaŋ, a le mɛɛ nyaa sɔla wɔ hivi chiɛi kɔɔli le yɛ. Kɛ mi Mɛlɛka miŋgi nya yoomu le mi la wa diompilɛ a Chiisu. Mbo mal naa haki le yɔŋnda naala wɔɔŋndaŋ kpou.
14 Mbo wɔɔsuu sawala wa la poonyiaalaŋ. Sawalaŋ ndaŋ laa simul naa ni. Mi Mɛlɛka faŋa laŋ a baŋɔɔ nda baŋ Chiisu o yɔm imɔnɔɔ* choo wo.
15 Mbo yuŋga masɛi a kpaayalaŋ. Mbo siiŋguu nda chiaa, okoŋ mbo soli nda faŋgaa lachi deŋ le mi wana o wana che nda, ma sina maa Chiisu yem nda o chɔuwo.
16 Lelaŋ, la chɛl mi wana o wana kilul nya yamɛi le nyɛ nya dia wo, nyɛ nya kol lo, dunyaŋ o wɔsioo niŋ biiloo, paŋgii sɛnɛiye, ɔɔ paale pɛŋgiaaleŋ te.
17 Kanifuule, nyɔɔŋ muŋ kpou, ŋ cho ko maa lewundu le nyɛm cho hunɔɔ yɔŋnɔŋndo woŋ. Kɛ Kiliti cho nyɛ kpeekpeiyo ni.
18 La mandaŋ a wanaa handuŋ o hɔl maa a tusiŋ nda, a wanaa piɛi maa maalikɛiya wa. Kanifuule, a nɔla ma kuuna nya fanda nyaa sɔlaa. Wanaa waa nuaa, nyɛ nda cha wo, ndu koni nda laalaŋ ni. Nduyɛ ma kelu yoŋga fondoo o yiyaŋnda ndala iwana chieeya laŋ niŋ.
19 Wanaa waa nuaa, a cho a mɔɔsaŋ a bolleŋ* te. Bolleŋ ndeŋ yɛ, leŋ le yɔŋgu dialloŋ nyɛdiaa ni, nduyɛ mi le tosa mi boondoŋ a nyɛsuaŋ kpou o dialloŋ niŋ wa ŋ chiiŋiaa. Okoŋ mi dialloŋ hindu mɛɛ Mɛlɛka yeema muŋ miŋ hindu yɛ.
20 Te o yɔŋ pɛ maa la vi niŋ nya Kiliti waa latulu, nduyɛ mi la mal yiyaŋnda chieeŋndo hoo, mɛɛ le yɛɛnɛ nya cho yɛ sɔɔŋ tosaa mɛɛ wana yɔŋ aa la cho wɔ le chieeŋndo hoo? Sawala dimi aa:
21 “La chua le, la dembi le, la pilaŋ te” laŋ, le yɛɛnɛ nya cho yɛ wɔ laŋ biyɔɔ?
22 Te waŋndo de dɔɔ pɛ nyɔɔŋ muŋ, ŋ simnuŋ nyɛ fondoo fuu. Nduyɛ waŋchieeya kɛsi sawalaŋ ndaŋ ni, ma wa waŋnda laŋ pɛɛkoo.
23 Mi che bɛɛ mi wana yiyaŋ maa taasioo cho o sawalaŋ ndaŋ niŋ, kɛ la mala waŋnda le yeemɛi ŋdialle chɔulabaa le. Nduyɛ mi ndapila bii sawalaŋ ndaŋ, kanifuule a yeema ma tosa chuaŋ chuaa a ba nda a mɛɛ wana piɛi Mɛlɛka yɛ. A cho dialuŋ ndaŋ saaŋgiaa, kanifuule a yeema mi waŋnda che nda maa a tusiŋ.
