Koloosiaŋnda 4:1-18
4 Nya nɔ chiaa wa, la bii nda nyɛkɛndɛi, nduyɛ mi la tosal nda nyɛ cho sakpo wo. La sina pɛŋgu maa nya bɛɛ nɔ Masanɔɔ o choo choo niŋ.
2 La lambaŋ piɛileŋ. La wa lahɔl, nduyɛ mi la wa Mɛlɛka balikaa mello o piɛileŋ niŋ.
3 La wa vɛlɛ piɛileŋ le naa, le halikpeŋ mi Mɛlɛka kumbul naa dioo le miŋ dimi yooŋgu ndɔɔ, okoŋ miŋ soo a sɔɔŋ viaŋnaŋ cho a Kiliti okɔɔ woŋ. Nduyɛ, le sɔɔŋ muŋ ya cho o biyɔɔ niŋ ni.
4 La piɛi le ya le mi dimul waŋnda yooŋgoo hoo walaŋ, mɛɛ ya nɔ le ndu dimioo yɛ.
5 La kela wanaa cho wanaa laalaŋ te wa tɛɛŋ a taasi, nduyɛ mi la soliŋ teleŋ nyaa kpeku nyɛkɛndɛi.
6 Diomnda nyalaŋ la nɔ mi la yeela lɔɔlɔɔ mɛɛ hɛlle tosa nuaa mi nyɛdiaa yeela yɛ. Keŋ tosa mi la sina mɛɛ nya muli wana o wana diom yɛ.
7 Tichikɔɔ cho nya lakɔ kona dounɔŋ kpou a ya okɔɔ. Puaapilɛnɔ ni kaalaa o cho ni, nduyɛ o cho wana wali kɛndɛ. Naa ndaa cho wali Masanɔɔ tosaa latulu ni.
8 I cho ndu viomɔɔ naa nya chua le halikpeŋ mi la sina la waa naŋ a naa okɔɔ, nduyɛ mbo dɛɛniaa nya kɔltaŋ.
9 Nda Onisimɔɔ cho lakɔ ni. Wana waa loŋ o cho ni. Ndu bɛɛ cho wana wali kɛndɛ, nduyɛ puaapilɛnɔ ni kaalaa o cho ni. A cho nya lakɔ kona dounɔŋ a nyɛ o nyɛ cho yɔŋnɔŋndo nanuŋ.
10 Aluitakɔɔ, chaaŋ ni naŋ cho o biyɔɔ niŋndo yil nya tau. Maki, wanayɛi Banabaa ve bɛɛ yil nya (a ndu okɔɔ naŋ poonyial nya ni maa te o kuɛ pɛ o nya lo, la bii ndu nyɛkɛndɛi).
11 Chiisu, o nda veelu aa Chɔsitɔɔ wo bɛɛ yil nya. O wanaa sɔla hivi chiɛi kɔɔlioo wa choo o fula ni. Haa kinɛi cho wallo a ya latulu ni le Masale Mɛlɛkaleŋ. Nduyɛ a luei ya niŋ yoomuaŋ tau.
12 Ɛpafulɔɔ, o fula o nya lo wo yil nya. Buɛi Chiisu Kiliti wo o cho ni. Teleŋ o teleŋ o cho piɛileŋ kpeekpei le nya, le halikpeŋ mi la sim yi, nduyɛ kiisaŋ o kiisaŋ ve nya a nyɛ Mɛlɛka cho tosa wo le.
13 I cho lesei maa o cho saŋgaa kpeekpei le nya, a waŋnda Lawodisiaa, a haa Hayaluapɔlii.
14 Luku chaaŋ naa, o cho wana chiɔuwaa wo yil nya. Dimaasi bɛɛ yil nya.
15 La yil la puaapiliaa Lawodisiaa. Mi la yil la vɛlɛ yema Nimfa, a kunda chuuŋgiaŋ o ndu lo chiɛiniŋ ndo.
16 Te la veelu pɛ diomndaŋ o yauwo hoo niŋ, la tosa vɛlɛ mi kundaa Lawodisiaa bɛɛ veelu diomndaŋ leniŋ. Nduyɛ mi nya bɛɛ veelu diomndaŋ o yau ya poonyial nda wo niŋ.
17 La dimul vɛlɛ Akipɔɔ maa o handu kɔllo o wali Masanɔɔ ke ndu le tosaa wo choo, le mbo tosa ndu nyɛkɛndɛi.
18 Ya Pɔɔl cho niŋ yilɔɔ hoo poonyiaa ni. I yil nya lapi. La loonuŋ maa I cho o biyɔɔ niŋ. Maa kɛndɛi bɛnduii Mɛlɛkɛi wa nya choo fɔ!
