Lɛvitikɔɔ 1:1-17
-
Sala luamaa (1-17)
1 Mi Chɛhowa veelu Muuse, mbo suaa o ndu lo o tɛndii bɔŋaŋndo hɔlndɔ. Mbo dimul ndu aa:
2 “Dimul Isɔluɛiya* aa, ‘Te wana o wana o nya tɛɛŋ yeema pɛ le chɔloo salaa solioo o ya Chɛhowa lo, o nɔ mbo chua ndu nauwaa nduaa, chuiŋaa nduaa, ɔɔ saa nduaa tɛɛŋ, le salaa solioo.
3 “‘Te o yɔŋ pɛ maa nauwo o cho sala luamaa solioo ni, o nɔ mbo wa o piaandu kɛndɛ kɛndɔɔ. O nɔ mbo hiŋ a ndu o tɛndii bɔŋaŋndo hɔlndɔ, mbo yɔŋgu ndu o ya Chɛhowa lo a kɔl ndɔɔ kpou.
4 O nɔ mbo handu chɔlu o hiŋ le sala luamaa wo baa o lebol, le mi chɛl sala ndɔɔ, nduyɛ mi mal ndu haki.
5 “‘Okoŋ, a nɔ ma dii nau towa fɔŋndɔ koŋ ya Chɛhowa lachi, nduyɛ mi Elɔŋ, puaa nduaa wanaa soliaa lasalaa chua kooma maŋ, ma fasaŋiaa maŋ o bandu luamaa lasala cho o tɛndii bɔŋaŋndo hɔlndɔ wo balɔɔ silɔ.
6 Chɔlu nda cho koŋ sala luamaa solioo wo, la nɔ mi la soli ndu yauwo, mi la kili kili ndu a buŋgaŋ.
7 Elɔŋ, puaa nduaa wanaa soliaa lasalaa nɔ ma kiisuu yiŋndeŋ o bandu luamaa lasalaa choo, ma wou yɔmnde o yiŋ.
8 Okoŋ kɔɔli, ma chua buŋgaŋ nda kili kili muŋ ndoŋ, bolle chɔlu koŋ a chuɛima nduaŋ, ma hɛɛnduu o yɔmii cho o yiŋ o bandu luamaa lasalaa choo ve choo.
9 A nɔ ma tɔɔ puloŋ vɛlɛ a peluŋ ndɔŋ, mi wana soliaa lasalaa lom muŋ kpou sala luamaa o bandu luamaa lasalaa choo. Sala nda luam o yiŋ le mi chuŋ kɛndɔɔ komal ya Chɛhowa wo o cho ni.
10 “‘Te o yɔŋ pɛ maa saa fɔŋndɔɔ ɔɔ chuiŋndo o yeema sala luamaa solioo ni, o nɔ mbo yɔŋgu o piaandu kɛndɛ kɛndɔɔ.
11 A nɔ ma dii chɔlu koŋ o bandu luamaa lasalaa choo ya Chɛhowa lachi kpeŋgii ba luaŋ nde, nduyɛ mi Elɔŋ, puaa nduaa wanaa soliaa lasalaa fasaŋiaa kooma nduaŋ o bandu luamaa lasalaa balɔɔ silɔ.
12 A nɔ ma kili kili ndu a buŋgaŋ, nduyɛ mi wana soliaa lasalaa chua muŋ, bolle ndɔleŋ, a chuɛima nduaŋ, mbo hɛɛnduu muŋ o yɔmii cho o yiŋ o bandu luamaa lasalaa choo ve choo.
13 A nɔ ma tɔɔ puloŋ vɛlɛ a peluŋ ndɔŋ, mi wana soliaa lasalaa hiŋ a muŋ kpou, mbo lom muŋ o bandu luamaa lasalaa choo. Sala luamaa o cho ni, o nda luam o yiŋ le mi chuŋ kɛndɔɔ komal ya Chɛhowa wo.
14 “‘Kɛ te o yɔŋ pɛ maa youwo o yeema le sala luamaa solioo o ya Chɛhowa lo ni, o nɔ mbo yɔŋgu piiŋndo ɔɔ kaŋgbo fɔŋndɔɔ.
15 Wana soliaa lasalaa nɔ mbo kuɛ a ndu o bandu luamaa lasalaa, mbo kelu ndu bololaŋ, nduyɛ mbo soli ndu salaa o bandu luamaa lasalaa choo. Kɛ, o nɔ mbo taaliaa kooma nduaŋ o bandu luamaa lasalaa ikɛi.
16 O nɔ mbo faŋa kɔchɔɔ a bɔɔla ndɔlaŋ, mbo viou o bandu luamaa lasalaa ikɛi ba paaleŋ le chaŋ ndo, naa nda hulu pultaŋ nda.
17 O nɔ mbo tɛnda ndu tɛɛŋ, mi kumbaŋndo o pilɛ wa baa, mi o pilɔɔ wa baa. Kɛ o kialu ndu tɛɛŋ kpali le. Okoŋ, mi wana soliaa lasalaa lom ndu o yɔmii cho o yiŋ o bandu luamaa lasalaa choo ve choo. Sala luamaa o cho ni, o nda luam o yiŋ le mi chuŋ kɛndɔɔ komal ya Chɛhowa wo.
Tɛɛsiaalaŋ
^ Hibuluiye, “puaa Isɔluɛi ya.”
