Lɛvitikɔɔ 11:1-47
-
Visiaa diandaa a visiaa nɔɔlɛiya (1-47)
11 Okoŋ, mi Chɛhowa dimul Muuse nda Elɔŋ aa:
2 “La dimul Isɔluɛiya aa, ‘Nyaa yoomaa cho o lɛŋndeŋ choo wa, a nya nɔ mi la de wa cho haa ni:
3 Visi o visi nɔ pɛ buukoo o tɛndaa kpala nduyɛ mbo kpukula nyɛdiaa, la dia ndu.
4 “‘Kɛ visiaa nya nɔ mi la de le wa cho haa ni, mi che bɛɛ ma kpukula nyɛdiaa ɔɔ ma nɔ buukoo o tɛndaa: nyɔɔmiɔɔ, mbo kpukula nyɛdiaa kɛ buuku ndɔɔ cho o tɛndaa le. Visi nɔɔlɛiyo o cho le nya ni.
5 Saŋ bandilaa bɛɛ, mbo kpukula nyɛdiaa kɛ buuku ndɔɔ cho o tɛndaa le. Visi nɔɔlɛiyo o cho le nya ni.
6 Saŋndo bɛɛ, mbo kpukula nyɛdiaa kɛ buuku ndɔɔ cho o tɛndaa le. Visi nɔɔlɛiyo o cho le nya ni.
7 Peuwo ndu, o nɔ buukoo o tɛndaa kpala, kɛ o kpukula nyɛdiaa le. Visi nɔɔlɛiyo o cho le nya ni.
8 La nɔ mi la de nda le. Nduyɛ te a vi pɛ, la pilaŋ nda le. Visiaa nɔɔlɛiya nda cho le nya ni.
9 “‘Nyaa yoomaa cho o peelo wa kinɛi, a nya nɔ mi la de wa cho haa ni: Nyɛ o nyɛ yoomaa cho o peelo mbo nɔ pɛɛpɔŋ a kɛkɛulaŋ, o wa o pee mɛŋma ihɛllo ɔɔ o peela pɔmbɔlaŋ niŋ, la dia ndu.
10 Kɛ nyɛ o nyɛ yoomaa cho o pee mɛŋma ihɛllo, a o peela pɔmbɔlaŋ niŋ, mbo nɔ ŋpɛɛpɛ a lakɛkɛu le, nyaa yoomaa kela kunda wa ni, a nyɛ o nyɛ yoomaa cheleŋ cho o peelo, nyɛ nɔɔlɛi wɔɔŋ wɔɔŋndo o cho le nya ni.
11 La chua nda maa nyaa nɔɔlɛiyaa wɔɔŋ wɔɔŋnda nda cho le nya ni. La dia nda le. Nduyɛ te a vi pɛ, la pilaŋ nda le.
12 Nyɛ o nyɛ yoomaa cho o peelo mbo nɔ ŋpɛɛpɛ a lakɛkɛu le, nyɛ nɔɔlɛi wɔɔŋ wɔɔŋndo o cho le nya ni.
13 “‘Nyaa yoomaa balu choo choo wa bɛɛ, apum cho nda tɛɛŋ, la nɔ mi la che nda a nɔɔlɛi. La dia nda le. Kanifuule, nyaa nɔɔlɛiyaa wɔɔŋ wɔɔŋnda nda cho ni. Nda cho haa ni: kowɔɔ, you biyaa, duaa tiŋioo,
14 siaaŋ bɔɔla siaŋaa, siaaŋ tiŋi suu o suu,
15 basabasakuende suu o suu,
16 ɔsiluichiiyo, huoo, koyaŋndo, siŋgbi suu o suu,
17 hu pɔmbɔɔ, hɔlɔhɔlɔɔ, hu nila vilɛiyo,
18 suaŋndo, pɛlikaŋndo, duaa,
19 sitɔkiiyo, hɛlɔŋ suu o suu, hupoo, a tasaa.
20 Nyaa yoomaa nɔ bɔɔlaŋ, ma balu kunda, nduyɛ ma kua o peloŋ ŋhiɔɔlu choo wa, nyaa nɔɔlɛiyaa wɔɔŋ wɔɔŋnda nda cho le nya ni.
21 “‘O nyaa yoomaa nɔ bɔɔlaŋ, ma balu kunda, nduyɛ ma kua o peloŋ ŋhiɔɔlu choo wa tɛɛŋ, a nɔ kpasaŋ nduyɛ ma huulu lɛŋ nda kinɛi nya nɔ ni mi la de.
22 Nda cho haa ni: soonuaa yɛ yiaa balu wa, soonuaa cheleŋ bɛnda le dioo wa, paaleŋnda, a seleŋnda.
23 Nyaa yoomaa cheleŋ nɔ bɔɔlaŋ, ma balu kunda, nduyɛ ma kua o peloŋ ŋhiɔɔlu choo wa, nyaa nɔɔlɛiyaa wɔɔŋ wɔɔŋnda nda cho le nya ni.
24 Nyaa yoomaa haa tosa mi la simnuŋ a nɔɔlɛi. Nduyɛ te a vi pɛ mi wana o wana pilaŋ nda, wana koŋ cho wa o nɔɔlɛi haaa mi paaleŋ le del.
25 O pilɛ bɛɛ vi ni mi waŋndo chua ndu, wana koŋ nɔ mbo tɔɔ nyɛla ndɔlaŋ. Nduyɛ o cho wa o nɔɔlɛi haaa mi paaleŋ le del.
26 “‘Visi kɛ kɛ nɔ pɛ buukoo mbo ve o tɛndaa kpala le, nduyɛ mbo wa maa o kpukula nyɛdiaa le, visi nɔɔlɛiyo o cho le nya ni. Wana o wana pilaŋ visi waa lende pɛ, o simnuŋ o nɔɔlɛi.
27 Nyɛ o nyɛ yoomaa kua pɛ o peloŋ ŋhiɔɔlu choo, kɛ o nɔ la buuku le, nyɛ yoomaa nɔɔlɛiyo o cho le nya ni. Nduyɛ te a vi pɛ mi wana o wana pilaŋ nda, wana koŋ cho wa o nɔɔlɛi haaa mi paaleŋ le del.
28 O pilɛ bɛɛ vi ni mi waŋndo chua ndu, wana koŋ nɔ mbo tɔɔ nyɛla ndɔlaŋ. Nduyɛ o cho wa o nɔɔlɛi haaa mi paaleŋ le del. Nyaa yoomaa nɔɔlɛiya nda cho le nya ni.
29 “‘Nyaa yoomaa kela kunda o lɛŋndeŋ choo wa, a cho a nɔɔlɛi le nya wa cho haa ni: bɛlɛ suundoo, tombosiɔɔ, kpoosi suu o suu,
30 kpoosi pɔmbɔɔ,* kpoosi bɛndoo, leendo, kpoosi isiooŋndo, a nyaŋgafeloo.
31 Nyaa yoomaa cho a nɔɔlɛi le nya wa nda cho ni. Nduyɛ te a vi pɛ mi wana o wana pilaŋ nda, wana koŋ cho wa o nɔɔlɛi haaa mi paaleŋ le del.
32 “‘Nyaa yoomaa haa o kɛ kɛ vi pɛ mbo del o nyɛ choo, nyɛ koŋ simnuŋ o nɔɔlɛi. O wa nyɛi laandii nda toosiaa a yɔmndo ve, o wa doma, o wa yau visi, ɔɔ nyɛla labɛkilaŋ. Te nyɛi laandii nya soliŋ kpeku ve ni, la nɔ mi la wou ndi o mɛŋndaŋ niŋ, nduyɛ mi i lo i nɔɔlɛi haaa mi paaleŋ le del. Okoŋ, mi i simnuŋ i diandaa.
33 Te a del pɛ o nyɛi laandii nda toosiaa a puuloo ve niŋ, la nɔ mi la pɛl ndi. Nduyɛ nyɛ o nyɛ wa pɛ leniŋ, nyɛ koŋ simnuŋ o nɔɔlɛi.
34 Te mɛŋma wa o nyɛi laandii keŋ niŋ ndaŋ ma pilaŋ pɛ nyɛdiaa o nyɛdiaa, o simnuŋ o nɔɔlɛi. Nduyɛ mɛŋma kolaŋ bɛɛ ma wa pɛ o nyɛi laandii suu waa nuaa niŋ, ma simnuŋ ma nɔɔlɛi.
35 Te nyaa haa vi pɛ ma del o nyɛ o nyɛ choo, nyɛ koŋ simnuŋ o nɔɔlɛi. O wa nyɛ nda luam beediiyo leniŋ ndo ɔɔ o nda yau choo wo, la nɔ mi la pesi ndu wɔ wɔ. Nyɔɔŋ muŋ simnuŋ ŋ nɔɔlɛi, nduyɛ ŋ cho wa ŋ nɔɔlɛi le nya le teleŋ o teleŋ.
36 Te a vi pɛ ma del o peelo ɔɔ o nyɛ kɛsiaa mamɛŋndo niŋ, pee koŋ ɔɔ nyɛ koŋ simnuŋ o nɔɔlɛi le. Kɛ wana o wana pilaŋ nda pɛ, wana koŋ simnuŋ o nɔɔlɛi.
37 Te a vi pɛ ma del o kulii nda nɔ le tɔlɔɔ ve choo, i simnuŋ i nɔɔlɛi le.
38 Kɛ te la pɔɔla pɛ kulle o mɛŋndaŋ niŋ, okoŋ mi nyaa haa vi mi falii ndɛi del o mɛŋma maŋ niŋ, kulii keŋ simnuŋ i nɔɔlɛi le nya.
39 “‘Te visi nya dia wo vi pɛ mi wana o wana pilaŋ ndu, wana koŋ cho wa o nɔɔlɛi haaa mi paaleŋ le del.
40 Wana o wana de pɛ visiŋ ndɔŋ, o nɔ mbo tɔɔ nyɛla ndɔlaŋ, nduyɛ mbo wa o nɔɔlɛi haaa mi paaleŋ le del. Wana o wana chua visi vilɛi koŋ pɛ, o nɔ mbo tɔɔ nyɛla ndɔlaŋ, nduyɛ mbo wa o nɔɔlɛi haaa mi paaleŋ le del.
41 Nyaa yoomaa balu kunda o lɛŋndeŋ choo wa, nyaa nɔɔlɛiyaa wɔɔŋ wɔɔŋnda nda cho ni. La nɔ mi la de nda le.
42 Nyaa yoomaa kɛ kɛ kua o demboo choo, a kɛ kɛ kua o peloŋ ŋhiɔɔlu choo, ɔɔ nyɛ o nyɛ yoomaa balu kunda o lɛŋndeŋ choo ma nɔ peloŋ tau, la dia nda le. Nyaa nɔɔlɛiyaa wɔɔŋ wɔɔŋnda nda cho ni.
43 La tosa mi nyaa yoomaa balu haa kunda wa siiŋguu nya wanaa wɔɔŋ wɔɔŋ ya o hɔl te. La simnuŋ a nɔɔlɛi le nda le.
44 Ya cho Chɛhowa Mɛlɛka nyaa ni. La nɔ mi la wa teŋgeŋ, nduyɛ mi la wa a diandaa. Kanifuule, Mɛlɛka diandaa ya cho ni. Lelaŋ, la tosa mi nyaa yoomaa balu kunda o lɛŋndeŋ choo wa siiŋguu nya wanaa nɔɔlɛi le.
45 Ya cho Chɛhowa ni. Ya soli nya o lɛŋnde Ichipileŋ niŋ ni, le nya chɔmndo maa Mɛlɛka nyaa ya cho ni. Lelaŋ, la nɔ mi la wa a diandaa, kanifuule Mɛlɛka diandaa ya cho ni.
46 “‘Sawa cho a visiaa okɔɔ, nyaa yoomaa balu choo choo wa, nyaa yoomaa cho o peelo wa, a nyaa yoomaa balu kunda o lɛŋndeŋ choo wa okɔɔ wo choo hoo ni.
47 Sawaa hoo cho le nya teŋgeŋndo chɔmndo nyɛ nɔɔlɛiyo tɛɛŋ a nyɛ diandaa, vɛlɛ a nyaa yoomaa nya nɔ mi la de wa tɛɛŋ a nyaa yoomaa nya nɔ mi la de le wa.’”
Tɛɛsiaalaŋ
^ Kpoosiaa pɔmbuaa naŋ saaluŋ o la naa lo chiɛiniŋ nda.
