Lɛvitikɔɔ 17:1-16
17 Mi Chɛhowa dimul Muuse aa:
2 “Dimul Elɔŋ, puaa nduaa, a Isɔluɛiya kpou aa, ‘Nyɛ Chɛhowa dimi wo cho hoo ni:
3 “‘“Te Isɔluɛinɔ kɛ kɛ dii pɛ nauwo ɔɔ saa kondo fɔŋndɔɔ ɔɔ chuiŋndo o dɔɔŋgɔɔ niŋ, ɔɔ mbo soli ndu o dɔɔŋgɔɔ niŋ mbo dii,
4 mbo kɛɛ le hunɔɔ a ndu o tɛndii bɔŋaŋndo hɔlndɔ le salaa solioo o ya Chɛhowa lo, o tɛndii ya Chɛhowa wo lachi, wana koŋ tosa hakioo. O nɔ mbo sɔla piɔmndo, kanifuule o tɛɛmbuu koowaŋ.
5 Hei cho tosa Isɔluɛiya soli lɛ salala ndalaŋ yondoo niŋ te. A cho wa hunɔɔ a laŋ o wana soliaa lasalaa lo o tɛndii bɔŋaŋndo hɔlndɔ, le salaa solioo o ya Chɛhowa lo. A nɔ ma soli salala kɔl nyulu laŋ o ya Chɛhowa lo.
6 Wana soliaa lasalaa nɔ mbo fasaŋiaa koowaŋ o bandu luamaa lasala ya Chɛhowa wo choo, o cho o tɛndii bɔŋaŋndo hɔlndɔ wo, nduyɛ mbo lom chuɛima salala laŋ le mi chuŋ kɛndɔɔ komal ya Chɛhowa.
7 Hei cho tosa a soli lɛ salala ndalaŋ o nyinaa wɔɔŋaa cho maa ŋchuiŋ nda* lo le, a nda cho kaa ihini nɔɔlɛiyo tosaa a nda wa. Sawaa hoo cho wa le nya a le chuauwaa nyaa le fɛɛŋ a fɛɛŋ.”’
8 “A nɔ ma dimul nda aa, ‘Te Isɔluɛinɔ kɛ kɛ ɔɔ mial kɛ kɛ nya tɛɛŋ soli pɛ sala luamaa ɔɔ sala cheleŋ,
9 nduyɛ mbo kɛɛ le hunɔɔ a ndu o tɛndii bɔŋaŋndo hɔlndɔ le salaa solioo o ya Chɛhowa lo, o nɔ mbo sɔla piɔmndo.
10 “‘Te Isɔluɛinɔ kɛ kɛ ɔɔ mial kɛ kɛ nya tɛɛŋ de pɛ koowaŋ, I cho dɔɔnɔŋ tumbe o kala kala a wana de koŋ koowaŋ ndo. Nduyɛ, o nɔ mbo sɔla piɔmndo.
11 Kanifuule, o koowaŋ niŋ yoomoo cho ni. I ke nya maŋ le mi la tala maŋ o bandu luamaa lasalaa choo, mi la nyuna le malɔɔ hakioo le nyapila. Nduyɛ koowaŋ ma tosa ni mi la sɔla malɔɔ hakioo, kanifuule leniŋ yoomoo cho ni.
12 Lelaŋ ya dimul Isɔluɛiya ni aa: “Wana o wana nɔ mbo de koowaŋ te, nduyɛ mialaa cho nya tɛɛŋ nda bɛɛ, a nɔ ma de koowaŋ te.”
13 “‘Te Isɔluɛinɔɔ ɔɔ mialaa cho nya tɛɛŋ nda o kɛ kɛ wa pɛ doosuleŋ mbo bii visioo ɔɔ you wana dia wo, o nɔ mbo kelu ndu bololaŋ, nduyɛ mbo kumbu kooma nduaŋ a chundoo.
14 Kanifuule, wanachioo a nyaa yoomaa kɛ kɛ, o koowaŋ niŋ yoomula ndalaŋ la cho ni. Lelaŋ ya dimul Isɔluɛiya ni aa: “La nɔ mi la de koowaŋ te. Kanifuule, o koowaŋ niŋ yoomoo cho ni. Wana o wana de koowaŋ pɛ, o nɔ mbo sɔla piɔmndo.”
15 O wa Isɔluɛinɔɔ ɔɔ mialaa cho nya tɛɛŋ nda, wana o wana de pɛ visi o saaluŋ o vilɛiyo, o wa a ba ndɔ o vi ni ɔɔ visioo dii ndu ni, o nɔ mbo tɔɔ nyɛla ndɔlaŋ, mbo puluŋ, nduyɛ o cho wa o nɔɔlɛi haaa mi paaleŋ le del. Okoŋ, o simnuŋ o diandaa.
16 Kɛ te o too nyɛla ndɔlaŋ nduyɛ mbo puluŋ te, a nɔ ma tusi ndu nyɛpalaa choo.’”
Tɛɛsiaalaŋ
^ Hibuluiye, “chuiŋnda.”
