Lɛvitikɔɔ 24:1-23
24 Mi Chɛhowa suaa vɛlɛ o Muuse lo aa:
2 “Dimul Isɔluɛiya ma chuu num chuɛima ɔlifiima kɛndɛ kɛndiaŋ, le halikpeŋ mi lambuiilaŋ la hiou lachi a biyɔɔ teleŋ o teleŋ.
3 Kola bɛndu cho o kɔfu kpemaa ikɛi o tɛndii bɔŋaŋndo niŋndo, Elɔŋ nɔ mbo tosa kɛɛsiaa le mi lambuila cho o kola koŋ hɔlndɔ laŋ la wa biyɔɔ ya Chɛhowa lachi le teleŋ o teleŋ, chɔŋ ichɔl haaa mi paaleŋ le sɛ. Sawaa hoo cho wa le nya a le chuauwaa nyaa le fɛɛŋ a fɛɛŋ.
4 O nɔ mbo kɛsi lambuilaŋ o lepula o nyɛ kɛsiaa lambui nda toosiaa a kooliiye wo choo, le mi la wa ya Chɛhowa lachi le teleŋ o teleŋ.
5 “La nɔ mi la chua kpeyaŋ kɛndɛ kɛndɔɔ mi la toosiaa beedii* tiu tiu wo kpuŋgbaŋ 12. Kiloo le diiŋ le kpuŋgbɛi kɛ kɛ.
6 La nɔ mi la hɛɛnduu ndu pulaŋ ma miɔɔŋ o tibii* nda toosiaa a kooliiye wo choo ya Chɛhowa lachi. Lepula o lepula, kpuŋgbaŋ ŋɔmpum.
7 La nɔ mi la kɛsi filaŋkiŋsɛŋ kɛndɛ kɛndɔɔ o pulale kɛ kɛ choo. O cho wa maa tamasi le beedii nda luam o ya Chɛhowa lo wo.
8 O paale pɛŋgiaale kɛ kɛ choo, beediiyo nɔ mbo wa o kɛsiaa ya Chɛhowa lachi teleŋ o teleŋ. Kpemaa hoo cho le Isɔluɛiya le fɛɛŋ a fɛɛŋ.
9 Le Elɔŋ nda puaa nduaa beediiyo hoo cho ni. A nɔ ma de ndu o fondaŋ diandaa, kanifuule nyɛ hiou diondɔɔ o salala nda luam o ya Chɛhowa lo laŋ niŋndo o cho ni. Nduyɛ, le fɛɛŋ a fɛɛŋ sawaa hoo cho ni.”
10 Chua pilɛ wa o Isɔluɛi niŋ, mbo vialu poo nda po Ichipiaŋnɔɔ. Paale pilɛ, mi sɔŋgɔɔ del po chua Isɔluɛinɔɔ velu wo tɛɛŋ nda po Isɔluɛinɔɔ o dɔɔŋgɔɔ niŋ.
11 Mi po chua Isɔluɛinɔɔ velu wo kandu diola Mɛlɛka laŋ* bɛɛlaŋ tɛɛmbuuwo, nduyɛ mbo yei Mɛlɛka.* Okoŋ ma huŋ a ndu naa Muuse chua. Kala ndɔ ndoo nɔ diolaŋ ni aa Siɛlomiti, chua Dibilui wo, fulaa o kaale Daŋ ndeŋ choo.
12 Ma kɛsi ndu o biyɔɔ niŋ haaa mi Chɛhowa chɔm nda nyɛ nda nɔ ma tosa wo.
13 Okoŋ mi Chɛhowa dimul Muuse aa:
14 “Soli wana yeiyo o dɔɔŋgɔɔ niŋ, nduyɛ mi wanaa tuei ndu yeiyo wa kpou handu ndu balaŋ o lebol, okoŋ mi waŋnda kpou vii vii ndu a poutaŋ.
15 Dimul Isɔluɛiya aa: ‘Te waŋndo yei pɛ Mɛlɛka ndɔɔ a nɔ ma tusi ndu nyɛpalaa choo.
16 Lelaŋ, ya Chɛhowa, wana tɛɛmbuu diola nilaŋ labɛɛ wo nɔ mbo sɔla piɔmndo. Waŋnda kpou nɔ ma vii vii ndu a poutaŋ. O wa mialaa cho nya tɛɛŋnda, o wa Isɔluɛinɔɔ, o nɔ mbo sɔla piɔmndo le mɛɛ o tɛɛmbuu diola nilaŋ labɛɛ yɛ.
17 “‘Te waŋndo dii pɛ wanachioo, o nɔ mbo sɔla piɔmndo.
18 Wana o wana dii pɛ chɔloo, o nɔ mbo paawa nyɛ le chɔlu koŋ. Yoomoo le yoomoo.
19 Te waŋndo yɔŋul pɛ chaaŋ ndɔ wanachioo, a nɔ ma tosal ndu mɛɛ o tosal chaaŋ ndɔ yɛ.
20 Woosaa le woosa, hɔlteŋ le hɔlteŋ, nduyɛ chiŋnde le chiŋnde. Mɛɛ o yɔŋul chaaŋ ndɔ yɛ, ndu bɛɛ a yɔŋul ndu lende.
21 Te waŋndo dii pɛ chɔloo, o nɔ mbo paawa le chɔlu koŋ. Kɛ te waŋndo dii pɛ wanachioo, o nɔ mbo sɔla piɔmndo.
22 “‘O wa mialaa cho nya tɛɛŋnda ɔɔ Isɔluɛinɔɔ, yamɛi pilɛi kpe nya nɔ ni mi la kelu. Kanifuule, ya cho Chɛhowa Mɛlɛka nyaa ni.’”
23 Okoŋ mi Muuse dimul Isɔluɛiya ma soli wana yei Mɛlɛka wo o dɔɔŋgɔɔ niŋ, ma vii vii ndu a poutaŋ. Nduyɛ, mi Isɔluɛiya tosa mɛɛ Chɛhowa dimul Muuse yɛ.
Tɛɛsiaalaŋ
^ Ɔɔ “bulu.”
^ Ɔɔ “tabali.”
^ Koŋ cho ni, Chɛhowa, a mɛɛ sɔɔŋ 15 a 16 dimi yɛ.
^ Ɔɔ “dimi sɔɔŋ wɔɔŋndoŋ a Mɛlɛka okɔɔ.”
