Lɛvitikɔɔ 26:1-46
26 “‘La nɔ mi la toosiaa mɛlɛkaa, mi la sɛl piɔmndo, ɔɔ mi la toosiaa suŋgbuleŋ le nyapila le. Nduyɛ, la nɔ mi la toosiaa pouwo o lɛŋnde nyaleŋ niŋ le ndu sooluuwo le. Kanifuule, ya cho Chɛhowa Mɛlɛka nyaa ni.
2 La nɔ mi la biilu palɛi nii pɛŋgiɛi, nduyɛ mi la nɔ bɛɛleŋ* le chiɛi nuu. Ya cho Chɛhowa ni.
3 “‘Te la hiou pɛ lachi a kɔlaŋ o sawala nilaŋ choo, nduyɛ mi la tosa nyɛ la dimi wo,
4 I cho tosa mi la sɔla piɔɔ a teleŋ nya nɔ le ndu sɔlaa wo. Nduyɛ mi tɔlɔɔlaŋ la naŋ tau o lɛŋndeŋ niŋ, okoŋ mi yɔmii cho o yondolaŋ niŋnde bɛɛ yɔŋgu kɔmndeŋ.
5 La cho lo witiiŋ nyaŋ lɔɔ haaa mi teleŋ kendiaa makilepiiyo fuuluu, nduyɛ mi la lo kilepiima nyaŋ kendioo haaa mi teleŋ tualaa fuuluu. La cho nyɛdiaa* dio haaa mi la hini kɔl, nduyɛ mi la waŋnuŋ hɛnɛkɛ o lɛŋnde nyaleŋ niŋ.
6 I cho tosa mi kɔl nyuloo wa o lɛŋndeŋ niŋ. Te la hini pɛ, wana o wana luei niŋ nya isiooŋ te. I cho soli visiaa biyaa o lɛŋnde nyaleŋ niŋ, nduyɛ wana hiŋ lɛ niŋ a chɔu o lɛŋnde nyaleŋ niŋ te.
7 La cho yaamɔɔwaa nyaa tisa kɔɔli, nduyɛ mi la diu diu nda a muɛi faŋnde.
8 Wanaa ŋuɛɛnu o nya tɛɛŋ cho yaamɔɔwa 100 tisa kɔɔli, nduyɛ mi ŋwaŋ 100 o nya tɛɛŋ tisa yaamɔɔwa 10,000 kɔɔli, mi la diu diu nda a muɛi faŋnde.
9 “‘I cho nya hɔlla mulul, nduyɛ mi dɔu nya sala mi la kui tau tau. I cho lo o kpema ya yii a nya wo choo.
10 La cho lo kuluŋ paanduŋ nya kou o chiɔɔŋ nyaŋ niŋndoŋ dioo haaa mi la kou ŋ sɛnɛiyoŋ. Nduyɛ mɛɛ mi la viou kuluŋ paandoŋ, le mi la sɔla fondaa le ŋ sɛnɛiyoŋ kɛsioo.
11 I cho tɛndii nuu kɛsi nya tɛɛŋ, nduyɛ I cho nya kɛɛ le.
12 I cho nya wa balɔɔ tɛɛŋ mi wa Mɛlɛka nyaa, nduyɛ mi nya wa wanaa niaa.
13 Ya cho Chɛhowa Mɛlɛka nyaa ni, Mɛlɛka soli nya o lɛŋnde Ichipi leŋ niŋ o chɛleŋ niŋndo. Ya soli nya o saŋga nya wa niŋndo ni, nduyɛ mi tosa mi la waŋnuŋ hɛnɛkɛ.*
14 “‘Kɛ te la kɛɛ pɛ le ya diomndo tueiyɔɔ, ɔɔ mi la kɛɛ sawalaŋ ndaŋ kpou biyɔɔ,
15 te koŋ te mi la kɛɛ sawala nilaŋ a nyɛ o nyɛ ya dimul nya le tosaa, nduyɛ mi la tɛɛmbuu kpema ya yii a nya wo,
16 sɔɔŋ ya cho nya tosal loŋ cho muŋ ni: I cho nya nyɛpalaa tusi choo. I cho tosa mi naa soliŋii vesɛiyo a dialuŋ tuu kala kalaŋ bii nya. Naalaŋ ndaŋ la cho tosa la chi lɛ lapi le, nduyɛ mi yoomuaŋ ma chuu nya fo. La saŋ bɛɛ kuluŋ nyaŋ, la sɔla niŋ tɔnɔ le, kanifuule yaamɔɔwaa nyaa cho muŋ dio ni.
17 I cho nya hɔlte nileŋ faŋa choo, nduyɛ mi yaamɔɔwaa nyaa yem nya. Wanaa tul nya leyɛ wa cho nya niɔu niɔu. La cho wa nyaanɔŋndo wana o wana ve niŋ nya touwɔɔ le.
18 “‘Kɛ te sɔɔŋ muŋ kpou yɔŋnuŋ nya pɛ mi la kɛɛ le ya nilaŋ yaŋɔɔ, I cho nya chɔɔlu nyɛpalaa tusi choo bɛmbɔɔ le ŋɔmmɛu le hakila nyalaŋ.
19 I cho tosa mi la mal yoŋgaa, nduyɛ mi kinda choo choo piɔɔ se lɛ le,* nduyɛ mi tosa mi tɔlɔɔlaŋ la kɛɛ naŋɔɔ o lɛŋndeŋ choo.*
20 La cho saŋgaŋ fondo fuu kanifuule, tɔlɔɔlaŋ la cho lɛ wa naŋɔɔ o lɛŋnde nyaleŋ niŋ te, nduyɛ yɔmnde bɛɛ kum niŋ te.
21 “‘Te la hiou pɛ lachi a ya simullo nduyɛ mi la kɛɛ le ya nilaŋ yaŋɔɔ, I cho nya chɔɔlu nyɛpalaa tusi choo bɛmbɔɔ le ŋɔmmɛu le hakila nyalaŋ.
22 I cho nya visiaa biyaa yɔŋ tɛɛŋ, ma diu diu chuauwaa nyaa a chɔluaa nyaa, nduyɛ la lo niŋ a bɔɔ le. Wanaa bɔɔ ve niŋ keilaŋ o nɛila nyalaŋ choo le.
23 “‘Te sɔɔŋ muŋ kpou keeku nya choo pɛ, mi la kɛɛ sila nuu, okoŋ mi la hiou lachi a ya simullo,
24 ya bɛɛ cho nya simul, mi tusi nya nyɛpalaa choo bɛmbɔɔ le ŋɔmmɛu le hakila nyalaŋ.
25 Le mɛɛ nya tɛɛmbuu kpema ya yii a nya wo yɛ, I cho tosa mi yaamɔɔwaa nyaa huŋ chiŋalaŋ nya a muɛi faŋnde, ma tusi nya nyɛpalaa choo. Te la chuuŋgiaŋ pɛ o chieeŋ nyaŋ bɛndoŋ niŋ, I cho tosa mi naa del nya tɛɛŋ, nduyɛ mi mal nya yaamɔɔwaa nyaa o ba.
26 Te I tosa pɛ mi la ve lɛ nyɛdiaa* bɔɔ sɔla le, waŋ laanduaa tɔ wa niŋ beedii nyaa lomɔɔ o nyɛ luamaa beediiyo o pilɛ niŋ ni. Nduyɛ, a cho wa beediiyo tuuwo le nya ndu piɔuwo. La cho ndu wa dioo kɛ la pim niŋ te.
27 “‘Te sɔɔŋ muŋ kpou keeku nya choo pɛ mi la kɛɛ le ya nilaŋ yaŋɔɔ, okoŋ mi la hiou lachi a ya simullo,
28 I cho tumbe dɔɔnɔŋ o kala kala a nya, nduyɛ mi tusi nya nyɛpalaa choo bɛmbɔɔ le ŋɔmmɛu le hakila nyalaŋ.
29 Te keŋ yɔŋnuŋ pɛ, la cho dialuŋ puaa nyaa a chuauwaa nyaa laanduaa dio.
30 Fondaŋnda nyala filioŋnda lasooluulaŋ, I cho laŋ tɛɛmbuu, nduyɛ mi tɛɛmbuu bandula nya luam nyɛm chuŋ kɛndɔŋ lechoo laŋ. I cho chua dialuŋ nyaŋ vilɛiyoŋ mi hɛɛnduu muŋ o piɔmaa nyaa nɔɔlɛiya* choo. I cho nya kɔɔ mulul, kanifuule I tul nya leyɛ.
31 I cho tosa mi chieeŋ nyaŋ bɛndoŋ sɔla tambei a muɛi faŋnde, nduyɛ mi tɛɛmbuu fondaŋnda nya sooluu mɛlɛkaa nyaa laŋ. Okoŋ salala nya soli o ya lo le mi chuŋ kɛndɔɔ komal la laŋ, I tui lɛ laŋ chuŋ te.
32 I cho tosa mi lɛŋnde nyaleŋ le lo pɔmndo, nduyɛ mi kɔndɔfillo bii yaamɔɔwaa nyaa cho loŋ nda a nyɛ nda cho chɔ wo.
33 I cho tosa mi la saŋnuŋ o lɛŋnde niŋ, mi yaamɔɔwaa nyaa huŋ chiŋalaŋ nya a muɛi faŋnde, mi lɛŋnde nyaleŋ le lo pɔmndo, nduyɛ ma tɛɛmbuu chieeŋ nyaŋ bɛndoŋ.
34 “‘Teleŋ nya cho wa o lɛŋnde yaamɔɔwaa nyaa niŋ mi lɛŋndeŋ le wa pɔm ndo, lɛŋndeŋ le cho wa pɛŋgioo, kanifuule le ve pɛŋgi le.
35 Teleŋ lɛŋndeŋ le cho wa pɔm ndo, lɛŋndeŋ le cho pɛŋgi. Kanifuule teleŋ nya wa loŋ ndo, le ve pɛŋgi le.
36 “‘Wanaa cho lo yoomu wa, I cho nda siooŋnde luei o kɔl naa nda cho wa o lɛŋii yaamɔɔwaa ndaa niŋnde. Nduyɛ te hueiye hɔŋ pɛ mi peeleŋ le hiiluŋ, a cho nyaanɔŋ naŋ chaa waŋndo cho nda touwɔɔ a muɛi faŋnde ni, okoŋ ma deli deli, kɛ wana o wana ve niŋ nda touwɔɔ le.
37 A cho wa deli deliaŋndo choo mɛɛ waŋnda wa nuaa chɔuwo nyaanɔŋndo yɛ, kɛ wana o wana ve niŋ nda touwɔɔ le. A nɔla lɛ niŋ ma simul yaamɔɔwaa ndaa le.
38 Nda a bɔɔbɔɔ cho piɔmndo sɔla o lɛŋnde yaamɔɔwaa ndaa niŋ, nduyɛ ma kumbu nda loŋ.
39 A cho lo yoomu o lɛŋii yaamɔɔwaa ndaa niŋnda cho saŋga le hakila ndalaŋ. A tonya, a cho saŋga le hakila finyaa ndaa.
40 A cho yɔŋnda wɔɔŋnda ndalaŋ chɔɔmuu, nduyɛ ma chɔɔmuu yɔŋnda wɔɔŋnda finyaa ndaa, okoŋ ma chɔm kpendekele maa nda a finyaa ndaa kɛɛ le lolechoo wo chɔmndo, ma simul la.
41 Nduyɛ ya bɛɛ cho dɔɔnɔŋ tumbe o kala kala a nda, mi kuɛ a nda o lɛŋnde yaamɔɔwaa ndaa niŋ.
“‘Naapum keŋ cho tosa ma tusiŋ, nduyɛ ma paawa* le hakila ndalaŋ.
42 I cho loonuŋ a kpema ya yii a Chekɔpu, Aase, a Ebilaham ndo, nduyɛ mi loonuŋ a lɛŋnde ya chuel nda buŋgɛi leŋ okɔɔ.
43 Teleŋ nda cho wa o lɛŋndeŋ niŋ te wo, lɛŋndeŋ le cho wa pɔmndo nduyɛ mi le pɛŋgi, kanifuule le ve pɛŋgi sɔla paandu le. Nduyɛ a cho wa paawaa le hakila ndalaŋ, le mɛɛ nda kɛɛ sawala nilaŋ a nyɛ o nyɛ ya dimul nda le tosaa wo yɛ.
44 A koŋ kpou, mi che bɛɛ a cho wa o lɛŋnde yaamɔɔwaa ndaa niŋ, kɛ I mel niŋ nda waŋ waŋ te, kɛlɛŋgaa niŋ te mi tɛɛmbuu nda kpou. Te keŋ yɔŋnuŋ pɛ, mɛɛ I tɛɛmbuu kpema ya yii a nda wo. Kanifuule, ya cho Chɛhowa Mɛlɛka ndaa ni.
45 Le sabu ndaa, I cho loonɔŋ a kpema ya yii a finyaa ndaa mamaa wo, a ya soli o lɛŋnde Ichipi leŋ niŋ, mi lɛŋnde kpou cha wo, le mi chɔm maa ya cho Mɛlɛka ndaa ni. Ya cho Chɛhowa ni.’”
46 Mi Chɛhowa ke Isɔluɛiya sawalaŋ ndaŋ, a nyɛ o nyɛ o dimul nda le tosaa o Pembii Sanai Ve choo sanaa a Muuse.
Tɛɛsiaalaŋ
^ Hibuluiye, “siooŋnde.”
^ Hibuluiye, “beediiyo ɔɔ buloo.”
^ Hibuluiye, “kɔlaŋ a hɔlla a heelaa.”
^ Hibuluiye, “mi tosa mi choo choo simnuŋ maa chiliŋnde.”
^ Hibuluiye, “mi tosa mi lɛŋndeŋ le simnuŋ maa chiliŋii siaŋɛi ɔɔ kapaa”
^ Hibuluiye, “beediiyo ɔɔ buloo.”
^ Diom maHibului nda soliŋ kpeku wo chiɛɛliaŋ lepum a “poolaŋ.” Nduyɛ ma soliŋ ndu kpeku le nyɔɔ pɛɛsaa.
^ Ɔɔ “sala.”
