Lɛvitikɔɔ 27:1-34
27 Mi Chɛhowa suaa vɛlɛ o Muuse lo aa:
2 “Dimul Isɔluɛiya aa, ‘Te waŋndo chua pɛ buŋgɛi teŋgeŋnde le kanii* baŋa wanachioo ve yɔŋgoo o ya Chɛhowa lo, nyɛ o nɔ mbo yɔŋgu wo cho hoo ni:
3 Te o yɔŋ pɛ aa wana pɔnɔ cho wɔsilaŋ chɔŋ 20 haaa 60 ndo, o nɔ mbo yɔŋgu siɛkɛlloŋ 50,* a mɛɛ nda tuu siɛkɛlloŋ o fondaŋ diandaa yɛ.
4 Kɛ te o yɔŋ pɛ aa wana lanɔɔ, siɛkɛlloŋ 30 wana koŋ nɔ ni mbo yɔŋgu.
5 Te o yɔŋ pɛ mbo wa chɔŋ wɔsilaŋ la 5 haaa kɔ 20, o nɔ mbo yɔŋgu siɛkɛlloŋ 20 le wana pɔnɔɔ nduyɛ mbo yɔŋgu siɛkɛlloŋ 10 le wana lanɔɔ.
6 Te o yɔŋ pɛ mbo wa paŋgei i pilɛ haaa wɔsilaŋ la ŋuɛɛnu, o nɔ mbo yɔŋgu siɛkɛlloŋ ŋuɛɛnu le wana pɔnɔɔ nduyɛ mbo yɔŋgu siɛkɛlloŋ ŋgaa le wana lanɔɔ
7 “‘Te o yɔŋ pɛ mbo wa wɔsilaŋ 60 ɔɔ mbo hiou lende, o nɔ mbo yɔŋgu siɛkɛlloŋ 15 le wana pɔnɔɔ, nduyɛ mbo yɔŋgu siɛkɛlloŋ 10 le wana lanɔɔ.
8 Kɛ te o yɔŋ pɛ mbo wa wana bala fondoo nduyɛ mbo nɔla kaniŋ muŋ sɔla le, o nɔ mbo kɔ sim wana soliaa lasalaa lachi, okoŋ mi wana soliaa lasalaa kilul ndu nyɛ o nɔ le paawaa* wo. Wana soliaa lasalaa nɔ mbo kilul wana chua koŋ buŋgɛiyo mɛɛ o nɔla sɔlaa yɛ.
9 “‘Te le chɔlu kɛndɛ kɛndɔɔ yɔŋgoo le salaa solioo o ya Chɛhowa lo o chua buŋgɛi ni, mɛɛ chɔlu kɛ kɛ o yɔŋgu pɛ o ya Chɛhowa lo, o cho simnuŋ o diandaa.
10 O nɔ mbo siŋga ndu a chɔlu cheleŋ te. Kɛ te o yɔŋ pɛ mbo hiŋ a chɔlu cheleŋ le ndu siŋgaa, chɔluaa ŋiɔɔŋaa kaŋ kpou cho simnɔŋ a diandaa.
11 Te o yɔŋ pɛ aa chɔlu nɔɔlɛiyo nduyɛ wana nɔla ndu soli salaa o ya Chɛhowa lo le, o nɔ mbo kuɛ a ndu mbo simi ndu wana soliaa lasalaa o hɔl.
12 Wana soliaa lasalaa nɔ mbo kelu chɔlu koŋ baa mɛɛ kpɛ o cho yɛ. Baa kɛ kɛ wana soliaa lasalaa kelu pɛ, baa koŋ lo lechoo ni.
13 Kɛ o yeema pɛ chɔlu koŋ miŋgioo piondɔɔ, te o nɔ pɛ le paawaa 100, o handu 20 lechoo.
14 “‘Te waŋndo yɔŋgu pɛ chiɛi ndɔɔ o ya Chɛhowa lo le mi chiɛi koŋ wa o diandaa, wana soliaa lasalaa nɔ mbo kelu chiɛi koŋ baa mɛɛ o cho yɛ. Baa kɛ kɛ wana soliaa lasalaa kelu pɛ, baa koŋ lo lechoo ni.
15 Kɛ wana yɔŋgu koŋ chiɛi ndɔɔ o ya Mɛlɛka lo wo yeema ndu pɛ miŋgioo piondɔɔ, te o nɔ pɛ le paawaa 100, o handu 20 lechoo, okoŋ mbo simnuŋ chiɛi ndɔɔ.
16 “‘Te waŋndo yeema pɛ yondo ndɔɔ o tiŋ yɔŋgoo o ya Chɛhowa lo, wana soliaa lasalaa nɔ mbo mɛɛndaŋ yondo koŋ mbo kelu ndu baa mɛɛ kpɛ kulloŋ yeemaŋ le saŋɔɔ o yondo koŋ niŋ yɛ. Fondaŋ nda saŋ pɛ baliiyoŋ hɔmɛiyo* cha, baa ndɔɔ nɔ mbo wa kaniŋ humboŋ siɛkɛlloŋ 50.
17 Te waŋndo yɔŋgu pɛ yondo ndɔɔ o ya Mɛlɛka lo a Wɔsi Baŋaŋndo, baa kɛ kɛ wanaa soliaa lasalaa kelu pɛ, baa koŋ lo lechoo ni.
18 Te Wɔsi Baŋaŋndo hiou pɛ mi waŋndo yɔŋgu yondo ndɔɔ o ya Mɛlɛka lo, wana soliaa lasalaa nɔ mbo tusi yondo koŋ baa. O nɔ mbo chɔm mɛɛ kpɛ wɔsilaŋ la lo tuupa mi Wɔsi Baŋaŋndo fuuluu yɛ, okoŋ mbo kelu ndu baa.
19 Kɛ wana yɔŋgu yondo koŋ o ya Mɛlɛka lo wo yeema pɛ mbo miŋgi ndu piondɔɔ, te o nɔ pɛ le paawaa 100, o handu 20 lechoo. Okoŋ mbo simnuŋ yondo ndɔɔ.
20 Te o miŋgi yondo koŋ piondɔɔ le nduyɛ ma pisi ndu wana cheleŋ o ba, o nɔ lɛ di mbo pendu ndu le.
21 Te wana pendu yondo koŋ ndo miŋgi pɛ yondo koŋ a Wɔsi Baŋaŋndo, o cho simnɔŋ nyɛ diandaa le ya Chɛhowa, mɛɛ yondoo wa nuaa o yɔŋgaŋ o ndu lo yɛ. Nduyɛ, le wanaa soliaa lasalaa o cho niŋ wa ni.
22 “‘Te waŋndo pendu pɛ yondoo, nduyɛ maa o cho nyɛm kɛŋ yuŋgu ndɔɔ le yondo o pendu koŋ ndo cho le, okoŋ mbo yɔŋgu ndu o ya Chɛhowa lo,
23 wana soliaa lasalaa cho yondo koŋ baa kiolɔɔ a mɛɛ wɔsilaŋ la lo tuupa mi Wɔsi Baŋaŋndo fuuluu yɛ. Nduyɛ baa kɛ kɛ o kelu pɛ, paaleleŋ wana koŋ nɔ ni mbo paawa ndu. Nyɛ cho o diandaa le ya Chɛhowa wo yondo koŋ cho ni.
24 A Wɔsi Baŋaŋndo, yondo o pendu koŋ ndo, o nɔ mbo miŋgi ndu wana nɔ ndu wo o ba.
25 “‘Baa kɛ kɛ wana soliaa lasalaa kelu pɛ, o nɔ mbo wa a mɛɛ nda tuu siɛkɛlloŋ o fondaŋ diandaa yɛ. Siɛkɛlle i pilɛ, lusul ndɔɔ wa le kɛluaa* woŋ 20.
26 “‘Wana o wana nɔ mbo yɔŋgu chɔluaa tasiaa chɔluaa nduaa kuam nda o ya lo le, kanifuule ya Chɛhowa nɔ chɔluaa tasiaa ni. O wa nau, o wa saa, le ya Chɛhowa nda cho niŋ ni.
27 Kɛ o yɔŋ pɛ aa chɔlu cho o nɔɔlɛiyo, o nɔ mbo baŋa ndu a mɛɛ wana soliaa lasalaa kelu baa yɛ. Nduyɛ te o nɔ pɛ le paawaa 100, o handu 20 lechoo. Kɛ te o miŋgi ndu piondɔɔ le, a nɔ ma pisi ndu a mɛɛ wana soliaa lasalaa kelu baa yɛ.
28 “‘Nyɛ o nyɛ waŋndo yɔŋgu pɛ o ya Chɛhowa lo lefafɛɛŋ,* o wa wanachioo ɔɔ chɔloo ɔɔ yondo o nɔ wo, o nɔ lɛ mbo pisi ɔɔ mbo miŋgi ndu piondɔɔ le. Nyɛ o nyɛ waŋndo yɔŋgu pɛ o ya Chɛhowa lo, nyɛ hiou diondɔɔ wo o cho ni.
29 Le handɔɔ lechoo, wana o wana nɔ pɛ le piɔmndo* sɔlaa, a nɔ ma baŋa ndu le. O nɔ mbo sɔla piɔmndo.
30 “‘O tɔ ndɔɔ o tɔlɔɔla nyalaŋ choo kpou, o wa o chiɔɔŋ nyaŋ niŋ, o wa o kɔmnde tɔlɔɔla nyalaŋ choo, le ya Chɛhowa o cho ni. Nyɛ cho o diandaa le ya Chɛhowa wo o cho ni.
31 Waŋndo yeema pɛ mbo miŋgi o tɔ ndɔ o yɔŋgu wo piondɔɔ, te o nɔ pɛ le paawaa 100, o handu 20 lechoo.
32 Chɔluaa kɛ kɛ nda manda pɛ, o wa saa, chuiŋnda, ɔɔ nauwa, o tɔ ndɔɔ* cho simnɔŋ nyɛ cho o diandaa le ya Chɛhowa wo.
33 O nɔ mbo mɛɛndaŋ ndu le sinaa te o kɛndɔɔ ɔɔ o wɔɔŋndo ni le, nduyɛ o nɔ mbo siŋga ndu le. Kɛ te o siŋga ndu pɛ, chɔluaa ŋiɔɔŋaa kaŋ kpou cho simnɔŋ a diandaa, o nɔ mbo miŋgi nda piondɔɔ le.’”
34 Sawalaŋ ndaŋ Chɛhowa ke Muuse le Isɔluɛiya o Pembii Sanai Ve choo ni.
Tɛɛsiaalaŋ
^ Ɔɔ “wolii.”
^ Tofa Tɛɛsiaa B14.
^ Ɔɔ “salaa.”
^ Hɔmɛiyo opilɛ chua litɛilaŋ 220. Tofa Tɛɛsiaa B14.
^ Tofa Tɛɛsiaa B14.
^ Ɔɔ “ le mbo sɔla tambei.”
^ Ɔɔ “tambei.”
^ Hibuluiye, “o lebollo.”
