Lɛvitikɔɔ 3:1-17
3 “‘Te waŋndo yeema pɛ sala kɔl nyuloo solioo, o wa nau piaandoo ɔɔ o laandoo, o nɔ mbo chua o kɛndɛ kɛndɔɔ, mbo hiŋ a ndu ya Chɛhowa lachi.
2 O nɔ mbo handu chɔlu o hiŋ koŋ le salaa solioo wo baa o lebol, okoŋ ma dii ndu o tɛndii bɔŋaŋndo hɔlndɔ. Nduyɛ mi Elɔŋ, puaa nduaa wanaa soliaa lasalaa fasaŋiaa kooma nduaŋ o bandu luamaa lasalaa balɔɔ silɔ.
3 O nɔ mbo faŋa faluŋ sala kɔl nyulu koŋ ŋ tiŋ, mbo lom muŋ o yiŋ o ya Chɛhowa lo: Chuɛima cho o puloŋ ikɛi yaŋ a ma balu puloŋ kpou waŋ,
4 kɔl keluŋ muuŋ ndoŋ a chuɛima balu muŋ ndaŋ. O nɔ vɛlɛ mbo faŋa yemii hɔlle a kɔl keluŋ muuŋ ndoŋ latulu.
5 Sala luamaa cho o yiŋ o yɔmii cho o bandu luamaa lasalaa choo ve, puaa Elɔŋ nda handu muŋ lechoo ma lom muŋ. Sala nda luam o yiŋ le mi chuŋ kɛndɔɔ komal ya Chɛhowa wo o cho ni.
6 “‘Te saa ɔɔ chuiŋndo o yeema sala kɔl nyuloo solioo o ya Chɛhowa lo ni, o wa o piaandoo ɔɔ o laandoo, o nɔ mbo yɔŋgu o kɛndɛ kɛndɔɔ.
7 Te saa fɔŋndɔɔ o yeema salaa solioo ni, o nɔ mbo hiŋ a ndu ya Chɛhowa lachi.
8 O nɔ mbo handu chɔlu o hiŋ le salaa solioo wo baa o lebol, nduyɛ ma dii ndu o tɛndii bɔŋaŋndo hɔlndɔ. Okoŋ, mi puaa Elɔŋ nda fasaŋiaa kooma nduaŋ o bandu luamaa lasalaa balɔɔ silɔ.
9 O nɔ mbo faŋa chuɛima sala kɔl nyulu koŋ, mbo lom maŋ o yiŋ o ya Chɛhowa lo. Nduyɛ mbo faŋa chuɛima cho o puiileŋ o paa kɔɔ ikɛi yaŋ, chuɛima cho o puloŋ ikɛi yaŋ a ma balu puloŋ kpou waŋ,
10 kɔl keluŋ muuŋ ndoŋ, a chuɛima balu muŋ ndaŋ. O nɔ vɛlɛ mbo faŋa yemii hɔlle a kɔl keluŋ muuŋ ndoŋ latulu.
11 Nyɛdiaa* o cho ni, nduyɛ wana soliaa lasalaa nɔ mbo lom ndu o bandu luamaa lasalaa choo. Sala nda luam o yiŋ o ya Chɛhowa lo wo o cho ni.
12 “‘Te chuiŋndo o yeema salaa solioo ni, o nɔ mbo hiŋ a ndu ya Chɛhowa lachi.
13 O nɔ mbo handu ndu baa o lebol, nduyɛ ma dii ndu o tɛndii bɔŋaŋndo hɔlndɔ. Okoŋ, mi puaa Elɔŋ nda fasaŋiaa kooma nduaŋ o bandu luamaa lasalaa balɔɔ silɔ.
14 Faluŋ o nɔ mbo faŋa le salaa solioo o yiŋ o ya Chɛhowa lo woŋ cho muŋ ni: Chuɛima cho o puloŋ ikɛi yaŋ a ma balu puloŋ kpou waŋ,
15 kɔl keluŋ muuŋ ndoŋ, a chuɛima balu muŋ ndaŋ. O nɔ vɛlɛ mbo faŋa yemii hɔlle a kɔl keluŋ muuŋ ndoŋ latulu.
16 Nyɛdiaa* o cho ni, nduyɛ wana soliaa lasalaa nɔ mbo lom ndu o bandu luamaa lasalaa choo. Sala nda luam o yiŋ le mi chuŋ kɛndɔɔ fula wo o cho ni. Chuɛiyaŋ kpou, ya Chɛhowa nɔ ni.
17 “‘Ba o ba nya wa pɛ, sawaa hoo cho wa le nya le fɛɛŋ a fɛɛŋ: La nɔ mi la de chuɛima visi kɛ kɛ ɔɔ kooma kɛ kɛ le.’”
Tɛɛsiaalaŋ
^ Hibuluiye, “beediiyo ɔɔ buloo.” Koŋ cho ni, sala kɔl nyulu cho le Mɛlɛka wo.
^ Hibuluiye, “beediiyo ɔɔ buloo.” Koŋ cho ni, sala kɔl nyulu cho le Mɛlɛka wo.
