Luomaŋnda 15:1-33
15 Naŋ cho a kala o laalaŋndo niŋnda, ŋ nɔ miŋ biunuŋ wanaa kindu o laalaŋndo niŋ te wa. O cho hɛnaŋ naa kinɛi le naŋ nɔ miŋ wa tosaa le.
2 Wana o wana kindiŋ mbo tosa nyɛ cho o kɛndɔɔ wo le wana nda chiɛɛliaŋ ndo* yoomuaŋ lueiyo.
3 Kanifuule, Kiliti bɛɛ tosa hɛnaŋ ndupilaa le. A mɛɛ Yau Mɛlɛkaa dimi yɛ aa: “Yioula waŋnda cho numndaŋ, ya bɛɛ laŋ koni nda cho ya ni.”
4 Nyɛ o nyɛ nda poonyiaa sindɛ o Yau Mɛlɛkaa niŋ, le naa pɛɛkoo nda poonyiaa ndu ni. O tosa miŋ biunuŋ, mbo dɛɛniaa naa kɔltaŋ, nduyɛ miŋ nɔ tiindaŋndo.
5 Maa Mɛlɛka dɛɛniaa nya kɔltaŋ nduyɛ mi la biunuŋ fɔ! I cho piɛileŋ le mbo tosa mi la nɔ kaa Chiisu Kiliti ndoo nɔ wo.
6 O hei niŋ, la nɔla mi la saŋgala Mɛlɛka diompilɛ, o cho Finyaa le Masanɔ naa Chiisu Kiliti wo.
7 Lelaŋ, la biyaŋ vellaa velle, mɛɛ Kiliti bɛɛ bii nya yɛ, le mi Mɛlɛka sɔla saŋgalaa.
8 I cho nya dimul maa mi Kiliti simnuŋ buɛiyo le wanaa sɔla hivi chiɛi kɔɔlioo wa. O tosa hei le mbo chɔm maa Mɛlɛka dimi lachoo le. Nduyɛ, le mbo chɔm maa Mɛlɛka cho peelu buŋgaŋ o chuel finyaa ndaa mamaa woŋ,
9 le mi wanaa cho ŋChuu le wa saŋgala Mɛlɛka le nyiɛɛyii o tuiinuŋ nda ve. A mɛɛ i cho i poonyiaa yɛ aa: “Le sabu koŋ ya cho waŋnda o kaalaŋ niŋ kpou dimul a num okɔɔ kpendekele ni, nduyɛ mi saŋgala diola numndaŋ o chondoŋ niŋ.”
10 Mi Mɛlɛka dimi vɛlɛ aa: “Nya waŋnda o kaalaŋ niŋ, la dɔɔnuŋ nyaale a wanaa Mɛlɛkaa latulu.”
11 Mbo dimi vɛlɛ aa: “Nya wanaa cho ŋChuu le wa kpou, la saŋgala Chɛhowa.* Nya waŋnda kpou, la saŋgala ndu.”
12 Mi Aisaya dimi vɛlɛ aa: “Waŋndo cho hunɔɔ fula o pulale Chɛɛseleŋ choo, mbo wa masaa wanaa cho ŋChuu le wa choo. O ndu niŋ wanaa cho ŋChuu le wa duau niŋ tiindaŋndo ni.”
13 Maa Mɛlɛka yɔŋgu tiindaŋndo wo tosa mi la wa a nyaale, nduyɛ mi la wa a kɔl nyulu le mɛɛ nya tiindaŋ ndu yɛ. Maa nyina diandaa tosa mi tiindaŋ nyaa chɔɔlu kalu fɔ!
14 Puaapiliaa, I laalaŋ a kɔl nuu kpou maa la cho wanaa kɛndɛ bɛndu, maa la nɔ kɔl kaloo, nduyɛ la nɔla mi la pɛɛkaŋ vellaa velle.
15 Kɛ, mi poonyial nya a sɔɔŋ pum okɔɔ o kala kala le nya yiyalaŋndo a kɛndɛi bɛnduii Mɛlɛka tosal la ve okɔɔ.
16 O hɛli ya le mi wa buɛi Chiisu Kiliti wo, le wanaa cho ŋChuu le wa yooŋgu kɛndɛ Mɛlɛkaa dimullo. I cho wali diandaa hoo tosaa le mi wanaa cho ŋChuu le wa simnuŋ sala Mɛlɛka chɛllo, o sɔla dindioo a nyina diandaa wo.
17 Lelaŋ, I cho a nyaale le waa buɛi Chiisu Kiliti wo a wali Mɛlɛkaa tosaa.
18 Nyɛ o nyɛ ya tosa a ba ni, I cho isɔɔ a ndu okɔɔ le. Kɛ nyɛ Kiliti tosa le ya, nduyɛ mbo dimul la le wanaa cho ŋChuu le wa malaa ma diikuŋ ndu wo, a ndu okɔɔ kinɛi ya cho isɔɔ ni.
19 Mɛɛ nda che kaamaalaŋ a walta kɔndɔfilta nyina diandaa Mɛlɛkaa tosa laŋ, ma laalaŋ. O hei niŋ, mi dimi yooŋgu kɛndɔɔ a Kiliti okɔɔ chɔŋ Chulusalɛm haaa mi huŋ o buŋgɛi Ililuikum nde niŋ.
20 Mi kɛɛsiaa maa I cho lɛ lakɔ yooŋgu kɛndɔɔ dimi o fondaŋnda yooŋgoo dimiŋ niŋ a Kiliti okɔɔ laŋ niŋ te, yɔŋii ya kɔ taŋgul o chiyii wana cheleŋ kila ve choo.
21 A mɛɛ i cho i poonyiaa yɛ aa: “Wanaa nda dimul lɔ a ndu okɔɔ le wa cho ndu chɔ. Nduyɛ wanaa tuiyɔ le wa cho ndi sina pɛŋgu.”
22 Hei wa ya kuunaa teleŋnda bɔɔbɔɔ le kɔlaŋ o nya lo ni.
23 Kɛ suŋ suŋ niŋ, I chii yooŋgu kɛndɔɔ dimi o tandalaŋ ndaŋ niŋ. Nduyɛ le wɔsila bɔɔbɔɔ niŋ yeemɛi cho ya le nya kɔlaŋ yilɔɔ.
24 Lelaŋ, te I wa pɛ kɔlaŋ Sipeŋ, I cho nya kei yilɔɔ. Te I soli pɛ yeemɛi, I yeema mi la liila ya le kɔlaŋ loŋ.
25 Kɛ le suŋ suŋndɔ, I cho laŋ Chulusalɛm le puaapiliaa* cho loŋ nda malaa.
26 Wanaa laalaŋnda Masidooniaa a haa Akeya chuuŋgiaa nyɔɔŋ a kɔl kɛndɛ, le wanaa bala fonduaa cho puaapiliaa* tɛɛŋ Chulusalɛm nda kioo.
27 A wa a kɔl kɛndɛ le ndi tosaa, kanifuule i wa nda kuee. Te wanaa cho ŋChuu le wa sɔla pɛ nyɛm cho a Mɛlɛka okɔɔ woŋ Chuuwa o ba, mɛɛ nda bɛɛ nɔ kuee ma mala Chuuwa a nyɛm nda nɔ woŋ.
28 Te I kɔ chii pɛ nda nyɛm nda chuuŋgiaa muŋ ndoŋ ke, I cho nya kei yilɔɔ te I wa pɛ kɔlaŋ Sipeŋ.
29 I sina maa te I wa kɔlaŋ pɛ, I cho nya chuu sala bɛndu Kiliti wo.
30 Puaapiliaa, I cho nya nyɔɔloo o Masanɔ naa Chiisu Kiliti niŋ a kaala fula nyina diandaa o ba wo, maa la mala ya miŋ piɛinuŋ Mɛlɛka kpeekpei.
31 La piɛi le mbo piŋi ya wanaa cho wanaa laalaŋ te wa Chudiaa o ba, le mi chuuŋgiaa ya cho hoo puaapiliaa* youwo Chulusalɛm ndo komal nda nyɛkɛndɛi.
32 O hei niŋ, te Mɛlɛka chɛl pɛ, I cho fuuluu o nya lo a nyaaloo. Okoŋ, miŋ dɛɛniaŋ kɔltaŋ vellaa velle.
33 Maa Mɛlɛka yɔŋgu kɔl nyuloo wo wa a nya latulu kpou. Amiina.*
Tɛɛsiaalaŋ
^ Diom maKilikiiyo le “wana nya chiɛɛliaŋ ndo” sim le wanachiee kɛ kɛ.
^ Tofa Tɛɛsiaa.
^ Kilikiiye, “wanaa diandaa.”
^ Kilikiiye, “wanaa diandaa.”
^ Kilikiiye, “wanaa diandaa.”
^ Koŋ cho ni, i yɔŋnuŋ lende fɔ.
