Luomaŋnda 3:1-31
3 Tɔnɔ yɛɛnɛ cho yɛ le waa Chuunɔɔ? Ɔɔ tɔnɔ yɛɛnɛ hivi chiɛi kɔɔlioo nɔ yɛ?
2 Tɔnɔlaŋ la cho tau. O tasoo, Chuuwa Mɛlɛka ke sawala ndɔla diandaalaŋ ni.
3 Kɛ te o wa yɛ mi apum kɛɛ laalaŋndo chɔmndo? Baa laalaŋ nda kɛɛ koŋ chɔmndo wo sim ni maa Mɛlɛka lo o lediom te?
4 Pɛ pɛ bɛɛ! O yɔŋ bɛɛ mi wana o wana simnuŋ wana lachoowaa, tonyaa Mɛlɛka dimi ni. Mi Yau Mɛlɛkaa dimi aa: “A cho chɔm maa wana tonyaa ŋ cho ni o nyɛ ŋ dimi wo niŋ, nduyɛ ma sɔla dioo te a kɔɔsa pɛ a num.”
5 Sandii nɛi lepɛŋnde chɔm sandii Mɛlɛkɛi kpendekele. Kɛ te Mɛlɛka dɔɔnuŋ pɛ tumbe, baa koŋ chɔm ni maa o sendu le? (I cho suɛi a mɛɛ waŋnda apum yiyaŋ yɛ.)
6 Sako bɛɛ! Mɛlɛka nɔ di. Te o cho yɛ koŋ te, vɛɛ o cho yɛ chieeŋndo yamɛi kilul?
7 Kɛ te I dimi pɛ choolaŋ, mi choola laŋ la chɔm maa nyɛ Mɛlɛka dimi wo cho tonya, nduyɛ mi waŋnda saŋgala ndu, le yɛɛnɛ Mɛlɛka cho yɛ ya veeloo aa wana hakioo?
8 Vɛ la dimi nuaa aa, “Ŋ tosaŋ sɔɔŋ wɔɔŋndoŋ le mi sɔɔŋ kɛndɔŋ hiŋ” te? Lende waŋnda apum cho keiyo choolaŋ dimioo a naa okɔɔ ni. Wanaa dimi sɔɔŋ muŋ nda, Mɛlɛka cho nda yamɛi kilul o sandei choo.
9 Baa naa Chuuwa ŋ cho a sɔvɛ mbo hiau wanaa cheleŋnda? Sako bɛɛ! Kanifuule, ŋ chii chɔm kpendekele maa Chuuwa ni, Kilikiiya ni, naa kpou wanaa lahakiaa naŋ cho ni.
10 A mɛɛ Yau Mɛlɛkaa dimi yɛ aa: “Wana sandaa cho le, opilɛ bɛɛ cho le.
11 Wana o wana cho mbo nɔ sinapɛŋgoo le. Wana o wana cho mbo wa Mɛlɛka nuuviaa le.
12 Waŋchieeya kpou mulul ndu kɔɔ. Nda kpou simnuŋ wanaa fondo fuu. Wana o wana cho mbo tosa suɛi kɛndɛ le, opilɛ bɛɛ cho le.”
13 “Diomnda diyaalaŋ la fula nda o lasondo ni. Ma soliŋ diɔɔmuii ndɛi kpeku le choolaŋ dimioo.” “Nyɛ fula nda o lasondo wo cho ko maa lolo kɛu wɔɔŋ wɔɔŋndo.”
14 “Mɛɛniaalaŋ a diomnda kɔl tuulaŋ la cho nda la piaa o lasondo cha.”
15 “Peluŋ ndaŋ cho chɔ chɔ le kɔlaŋ wanachioo diyɔɔ.”*
16 “Nyɛ o nyɛ nda tosa, kpundɛlaŋ a saŋgaa o chuu waŋnda ni.
17 A sina mɛɛ nda luei kɔl nyuloo waŋnda tɛɛŋ yɛ le.”
18 “A nɔ isiooŋ le Mɛlɛka le.”
19 Ŋ sina maa nyɛ o nyɛ Sawaa* dimi, le wanaa cho o Sawaa bɛŋgu wa o cho ni. O cho le nda kɛɛloo kafɛilaŋ yɔŋgoo, nduyɛ mi waŋnda o chieeŋndo choo kpou sina maa a kɔndu hakioo a Mɛlɛka. Nduyɛ maa a nɔ ma sɔla nyɛpalaa.
20 Lelaŋ, wana o wana nɔla mbo simnuŋ wana sakpoo Mɛlɛka o hɔl o nyɛ sawaa dimi wo tosaa niŋ te. O kpeekpei niŋ, sawaa tosa ni miŋ sina nyɛ cho hakioo wo nyɛkɛndɛi.
21 Kɛ suŋ suŋ niŋ, o cho lɛ o lasawa niŋ te Mɛlɛka chɔm sandii nduɛi le, a mɛɛ Sawaa a wanaa ndaa suaa le ndu wa dimi yɛ.
22 Wana o wana dɔu pɛ laalaŋndo o Chiisu Kiliti niŋ, o nɔla mbo che sandii Mɛlɛkɛi. Kanifuule, lekaa o lekaa cho mi le bɛnda mi le hiou kaale cheleŋ te.
23 Ŋwaŋnda chiee kpou tosa hakioo, ma fula o biilu Mɛlɛkaa bɛŋgu.
24 Mi Mɛlɛka tosal nda kɛndɛi nduɛi bɛnduei, mbo siiŋguu nda wanaa sakpo ndu o hɔl, a mɛɛ o yɔŋgu Chiisu Kiliti le nda baŋaa yɛ. A paawa* nyɛ o nyɛ le.
25 Mi Mɛlɛka yɔŋgu Chiisu maa sala le waŋchieeya baŋaa ma miiŋgu o kɔl nyulu niŋ a ndu Mɛlɛka. O tosa hei le sandii nduɛi chɔmndo. Mbo biunuŋ naa, nduyɛ mbo mal naa haki le yɔŋnda wɔɔŋnda naŋ tosa paandu laŋ.
26 Mbo chɔm naa vɛlɛ sandii nduɛi a mɛɛ o siiŋguu wanaa dɔu laalaŋndo o Chiisu niŋnda wanaa sakpo ndu o hɔl lɛ.
27 Sabu o sabu cho pa le miŋ kelu yoŋgaa? Pɛ pɛ bɛɛ. Baa ŋ nɔ pa miŋ kelu yoŋgaa le nyɛ sawaa dimi wo tolɔɔ kɔɔli? Sako bɛɛ. Mɛɛ le sawa cho a laalaŋndo okɔɔ wo.
28 Kanifuule, ŋ sina maa laalaŋndo chɔmndo tosa ni mi waŋndo simnuŋ wana sakpoo, kɛ o cho kindiŋ o wa le tosaa nyɛ sawaa dimi wo le.
29 Baa le Chuuwa kinɛi Mɛlɛka cho ni? Wanaa cho ŋChuu le wa yɛ, o cho Mɛlɛka nda le? A tonya, ndu cho Mɛlɛka le kaalaŋ kpou ni.
30 Mɛlɛka ndupilɛ kpe cho ni. Le hei, o cho wanaa sɔla hivi chiɛi kɔɔlioo wa, a wanaa sɔla hivi chiɛi kɔɔli le wa kpou siiŋguu wanaa sakpo le laalaŋ ndaa.
31 Baa ŋ nɔ niko miŋ che sawaa nyɛ fondoo le laalaŋ naa? Pɛ pɛ bɛɛ! Kɛ ŋ nɔ miŋ bii sawaa.