Luomaŋnda 5:1-21
5 Lelaŋ, mɛɛ naŋ simnuŋ niŋ wanaa sakpuaa le laalaŋ naa yɛ, ŋ hiounuŋ lachi a waa o kɔl nyulu niŋ a Mɛlɛka sanaa o Masanɔ naa Chiisu Kiliti niŋ.
2 Laalaŋ naŋ nɔ o Chiisu niŋndo tosa ni miŋ sɔla dioo le suɛi o Mɛlɛka lo, nduyɛ miŋ wa kɛndɛi nduɛi bɛnduei tueiyɔɔ yeela. La ŋ waŋnuŋ a nyaale, kanifuule ŋ nɔ tiindaŋndo maa Mɛlɛka cho naa ke foofo filioŋndo.
3 O cho ko keŋ te, kɛ ŋ nɔla miŋ wa a nyaale o nyɛpalaa niŋ, kanifuule ŋ sina maa nyɛpalaa mala naa miŋ biunuŋ.
4 Biuwɔŋndo tosa mi Mɛlɛka hini kɔl a naa. Te Mɛlɛka hini pɛ kɔl a naa, koŋ ke naa tiindaŋndo.
5 Nduyɛ tiindaŋ naa hui naa le. Kanifuule, nyina diandaa Mɛlɛka ke naa wo tosa ni mi kaala naŋ nɔ le Mɛlɛka wo pia naa o lakɔl cha.
6 Boondii naŋ nɔ wɔ mayoomu le ve, mi Kiliti wu le wanaa yɔɔŋ wɔɔŋnda a boondii Mɛlɛka pila kɛɛsiaa ve.
7 O kendu le mi waŋndo vi le wana sakpoo. Kɛ naapum mi waŋndo yɔŋguŋ le mbo vi le wana kɛndɔɔ.
8 Mɛlɛka chɔm naa kaala ndɔɔ, kanifuule teleŋ naŋ wa wanaa lahakiaa wo, mi Kiliti wu le naa.
9 Le mɛɛ kooma Chiisuaŋ ma tosa miŋ simnuŋ wanaa sakpuaa yɛ, ŋ chɔɔlu tiindaŋndo sɔla maa ŋ cho pioŋɔɔ sɔla o paale kɔl tuule Mɛlɛkaleŋ choo.
10 Mi che bɛɛ yaamɔɔwaa Mɛlɛkaa naŋ wa ni, kɛ piɔm Po ndɔɔ tosa miŋ miiŋgu o diompilɔɔ niŋ a ndu. Hei tosa miŋ chɔɔlu laalaŋ maa ŋ cho pioŋɔɔ sɔla sanaa o Po ndɔɔ niŋ, kanifuule ŋ cho niŋ o diompilɔɔ niŋ a Mɛlɛka.
11 Nyɛ Mɛlɛka tosa o sabu Masanɔ naa Chiisu Kiliti niŋndo tosa miŋ wa a nyaale, kanifuule o ndu niŋ naŋ miiŋgu o diompilɔɔ niŋ a Mɛlɛka ni.
12 Waŋndo ndupilɛ kpe tosa ni mi hakioo huŋ o chieeŋndo choo, nduyɛ mi hakioo huŋ a piɔmndo. Le hei, mi piɔmndo tiu ŋwaŋnda chiee choo kpou, kanifuule nda kpou tosa hakioo—.
13 Hakioo wa niŋ o chieeŋndo choo tuupa mi Sawaa* huŋ. Kɛ te sawa ve le, a bii wana o wana maa o tosa hakioo le.
14 Chɔŋ a teleŋ Adam ndo haaa a teleŋ Muuse wo, piɔmndo wa waŋchieeya choo masa. Nduyɛ wanaa tosa haki maa Adam te wa bɛɛ, o wa nda choo masa. Adam wa velaŋ wana wa hunɔɔ o chilaŋ niŋndo ni.
15 Ke Mɛlɛkaa cho maa haki Adam ndo le. Le haki wana pilɔɔ hoo kpe wanaa bɔɔbɔɔ cho hau piɔmndo sɔlaa ni. Kɛ kɛndɛi bɛnduii Mɛlɛkɛi a ke naŋ paawa* nyɛ o nyɛ le wo hiou poloŋ. O kɛndɛi bɛnduii Chiisu Kiliti ve niŋ naŋ sɔla kioo hoo ni. O ndi niŋ wanaa bɔɔbɔɔ cho tɔnɔɔ sɔla ni.
16 Ke Mɛlɛkaa a haki wana pilɔɔ, teŋgeŋndo cho nda tɛɛŋ o nɛiyo hoo choo: Mɛɛ wana pilɔɔ tosa hakioo, mi Mɛlɛka kilul ndu yamɛi le piɔmndo sɔlaa. Kɛ mɛɛ wanaa bɔɔbɔɔ tosa hakioo, mi ke Mɛlɛkaa tosa ma simnuŋ wanaa sakpuaa.
17 Le haki wana pilɛ koŋ piɔmndo cho masaa ŋwaŋnda chiee choo ni. Kɛ wanaa sɔla kɛndɛi bɛnduii Mɛlɛkɛi tau, nduyɛ ma sɔla kioo le waa wanaa sakpuaa wa cho wa yoomu, ma wa masaa o sabu wana pilɔɔ niŋ, Chiisu Kiliti.
18 Mɛɛ haki wana pilɔɔ tosa mi waŋchieeya suu o suu wa piɔmndo sɔlaa yɛ, lende koni waŋnda suu o suu cho simnɔŋ wanaa sakpuaa le waa yoomu ni, le mɛɛ wana pilɛ tosa nyɛ cho sakpo wo yɛ.
19 Le mɛɛ wana pilɛ kɛɛ Mɛlɛka diikɔŋndo yɛ, mi wanaa bɔɔbɔɔ simnuŋ wanaa lahakiaa. Lende koni, le mɛɛ wana pilɛ diikuŋ Mɛlɛka yɛ, wanaa bɔɔbɔɔ cho simnɔŋ wanaa sakpuaa.
20 Mɛlɛka ke waŋchieeya Sawaa le chɔmndo mɛɛ kpɛ nda nɔ hakioo yɛ. Kɛ mɛɛ hakila waŋchieeya la chɔɔlu kui, mi Mɛlɛka chɔɔlu nda kɛndɛi nduɛi bɛnduei.
21 Le sabu yɛɛ? Mɛɛ hakioo a piɔmndo cho masaa waŋchieeya choo yɛ, lende koni kɛndɛi bɛnduii Mɛlɛkɛi cho masaa waŋchieeya choo ni le ma simnuŋ wanaa sakpuaa. Hei cho tosa ma sɔla yoomu fafɛɛŋndo o sabu Masanɔ naa Chiisu Kiliti wo niŋ.
