Nɔmbaa 11:1-35
11 Mi waŋnda kandu ŋɔɔchiaŋndo tau tau a Chɛhowa. Mɛɛ Chɛhowa tuei hei, mbo duaunuŋ tumbe o kala kala. Le hei, mi Chɛhowa yɔŋ yiŋndeŋ mi le luam waŋnda apum a wa o dɔɔŋgɔɔ balɔɔ chɛ chɛ wa.
2 Mɛɛ waŋnda kandu chaŋndo naa Muuse chua, mbo nyɔɔlu Chɛhowa, nduyɛ mi yiŋndeŋ le nyum.
3 Okoŋ, ma ke fondaŋ koŋ diolaŋ aa Tabɛlua,* kanifuule loŋ Chɛhowa yɔŋ waŋnda yiŋndeŋ choo ni.
4 Mi waŋnda suu o suu* o faŋga bɛndu koŋ tɛɛŋ kandu ŋɔɔchiaŋndo kpeekpei le nyɛdiaa. Nduyɛ mi Isɔluɛiya bɛɛ kandu chaŋndo, ma dimi aa: “O nɛɛnɛ cho yɛ naa visioŋ ke miŋ de?
5 Te ŋ yiyaŋ pɛ a teleŋ naŋ wa Ichipi wo, suuwaa naŋ dia wa ni, kɔkumbɛilaŋ, watamelɛɛlaŋ,* yaawaŋ, a kalikiiyoŋ,* naŋ pindu le.
6 Kɛ nuawɔ niko mɛɛ naŋ cho nyɔfɔliaa nanuŋ yɛ! Wana chi nyɛ o nyɛ cheleŋ te, mɛɛ manɛiyo hoo.”
7 Nduyɛ manɛiyo hoo yɛ, o wa ko maa kulu tɔlɔɔ koliyaŋnda wo, nduyɛ wanaa che ndu pɛ aa tande yɔm dɛliɔm ndo ni.
8 Mi waŋnda ndaa fula ma kɔ kɔndu ndu, ma chuii ndu o pou nda chuii nyɔɔŋ a laba wo choo, ɔɔ ma chu ndu o chiei niŋ. Okoŋ kɔɔli ma yau ndu, ɔɔ ma toosiaa beedii* tiu tiuwo a ndu. Nduyɛ yeela ndɔɔ wa maa kato nda toosiaa a chuɛiyaŋ ndo.
9 Te mɔmndo ndoo wa pɛ tolɔɔ o dɔɔŋgɔɔ niŋ ichɔl, mi manɛiyo bɛɛ ndoo tol a ndu latulu.
10 Mi Muuse tuɛi yuŋgu o yuŋgu chaŋndo, wana o wana o tɛndii ndɔɔ sondoo. Mi Chɛhowa duaunuŋ tumbe tau tau, nduyɛ mi Muuse bɛɛ tambu kɔllo tau.
11 Mi Muuse nyuna Chɛhowa aa: “Le yɛɛnɛ ŋ tusi yɛ ya buɛi numndo nyɛpalaa choo? Yɛɛnɛ ya tosa yɛ a tuiinuŋ ya inyiɛɛ le, ma handu ya kalaŋ waŋnda haa kpou o lebol?
12 Baa ya chua foli* waŋnda haa kpou ni? Baa ya velu nda ni le ma dimul la aa, ‘Bii nda o ibuŋ mɛɛ buɛiyo bii nuaa chɛlɛkpɔɔ yɛ,’ le kɔlaŋ a nda o lɛŋnde ŋ chuel finyaa ndaa mamaa buŋgɛi le nda kioo leŋ niŋ?
13 Kuɛɛnɛ ya cho yɛ visioŋ sɔla le mi ke waŋnda haa kpou? Kanifuule a cho tuŋ chaŋndo ya o lani, ma dimi aa, ‘Ke naa visioŋ miŋ de.’
14 I nɔla kalaŋ waŋnda haa kpou ya pilɛ le. O hiou ya mayoomu.
15 Te nuaa ŋ cho ya wa biyɔɔ ni, mɛɛ yandii dii ya lepilɛ kpe. Te I cho pɛ wana sɔvɛ num o hɔl, mɛɛ chɛllɛ ya mi che nyɛpalaa cheleŋ te.”
16 Mi Chɛhowa dimul Muuse aa: “Chuuŋgiaa puaa 70 o waŋ banaa Isɔluɛiya tɛɛŋ, a ŋ sina maa a suliŋ le waa waŋ banaa waŋnda choo wa, okoŋ ma kuɛ a nda o tɛndii bɔŋaŋndo, mi la kɔ sim loŋ nya ndaa.
17 I cho tolɔɔ naa num chua loŋ mi soo o numndo, nduyɛ mi chua nyina ni diandaa cho num choo wo o tiŋ mi handu nda choo, le ma mala num kalaŋ waŋnda haa chua, yɔŋii o wa num choo numpilɛ kpe.
18 Dimul waŋnda aa, ‘La dindi nyapila, kanifuule siɔdii la cho visioŋ dio. La chaŋ Chɛhowa o lani, mi la dimi aa: “Nɛɛnɛ cho yɛ naa visioŋ ke miŋ de? Naa naŋ waŋnuŋ Ichipi wa cho fisa.” Chɛhowa cho nya visioŋ ke mi la de.
19 O cho paale pilɛ, ɔɔ palɛi 2, ɔɔ palɛi 5, ɔɔ palɛi 10, ɔɔ palɛi 20 te nya cho muŋ dio le.
20 Kɛ la cho muŋ dio le paŋgei kpulukuu, haaa mi la saŋga,* nduyɛ miŋ fula nya chuŋ wɔɔŋndo o lamiliŋ. Kanifuule la kɛɛ Chɛhowa cho nya tɛɛŋ ndo mi la wa chaŋndo naa ndu chua aa: “Le yɛɛnɛ naŋ faŋaŋ yɛ Ichipi?”’”
21 Mi Muuse dimi aa: “Wanaa ya cho tɛɛŋ nda, puaa chɔuwa kinɛi a cho 600,000. Nda ŋ dimi ni aa, ‘I cho nda visioŋ ke tau ma de muŋ le paŋgei kpulukuu’?
22 O yɔŋ bɛɛ miŋ diu chɔluaa kpou, baa visiŋ muŋ wa niŋ pa letuu le nda? O yɔŋ bɛɛ miŋ bii suuwa o pee mɛŋma ihɛllo niŋ kpou, baa suuwaa kaŋ wa niŋ pa letuu le nda?”
23 Mi Chɛhowa nyuna Muuse aa: “Baa nyɛ cho pa mi ya Chɛhowa bumba ndu tosa? Numpila cho chɔ te nyɛ ya dimi wo cho yɔŋnɔŋ ɔɔ o cho yɔŋnɔŋ te.”
24 Okoŋ, mi Muuse kɔ dimul waŋnda nyɛ Chɛhowa dimi wo. Mbo hɛli puaa 70 o waŋ banaa Isɔluɛiya tɛɛŋ, mbo simi nda o tɛndii bɔŋaŋndo ikɛi.
25 Mi Chɛhowa tual o yumbu yumboo niŋ, mbo suaa naa Muuse chua. Mbo faŋa nyina diandaa wa ndu choo wo o tiŋ, mbo handu ndu waŋ banaa 70 wa choo. Dimioo nuaa ma sɔla nyina diandaa, ma kandu sɔɔŋ tosaa maa wanaa suaa le Mɛlɛka wa.* Kɛ a tosa lɛ ndi okoŋ kɔɔli le.
26 Nduyɛ, puaa nda poonyiaa diolaŋ nda a ŋiɔɔŋ wa wɔ o dɔɔŋgɔɔ niŋ. Diola ndalaŋ aa Ɛlidadi a Midadi. Le mɛɛ nda wa o wanaa nda poonyiaa diolaŋ nda tɛɛŋ yɛ, nda bɛɛ ma sɔla nyina diandaa, mi che bɛɛ a kue o tɛndiiyo le. Le hei, ma kandu sɔɔŋ tosaa maa wanaa suaa le Mɛlɛka wa.
27 Mi po feleŋgɔnɔ pilɛ nyaanuŋ mbo kɔ dimul Muuse aa: “Ɛlidadi nda Midadi cho sɔɔŋ tosaa o dɔɔŋgɔɔ niŋ maa wanaa suaa le Mɛlɛka wa!”
28 Okoŋ mi Chɔɔsuaa, po Nuŋ ndo, wana wa Muuse malaa chɔŋ o feleŋgɔyɛi nduɛi niŋndo dimi aa: “Masanɔ nuu Muuse, kpaa nda!”
29 Kɛ mi Muuse dimul ndu aa: “Baa paŋalaa ŋ cho le ya ni? Yeemɛi nii cho ni, le mi Chɛhowa ke wanaa nduaa nyina ndɔ diandaa, nduyɛ mi nda kpou simnuŋ wanaa suaa le Chɛhowa wa!”
30 Okoŋ kɔɔli, mi Muuse miiŋgu o dɔɔŋgɔɔ niŋ nda waŋ banaa Isɔluɛiya latulu.
31 Mi Chɛhowa tosa mi hueiyii bɛnduei kandu hɔŋndo, mi i kuandu wɔlla o pee mɛŋma ihɛllo, ma huŋ tol o dɔɔŋgɔ Isɔluɛiya balɔɔ silɔ. A wa a kuaŋnaŋ kɛ kɛ le tiŋ kɔla paale pilɛ. Nduyɛ, a wa toolo toolo a lɛŋndeŋ helɔɔ le nɛiyo le yaa.
32 Mi waŋnda niilu nda biyɔɔ kpɛŋ ma lɔl pii. Diimandɔɔ bɛɛ, ma niilu nda biyɔɔ kpɛŋ. Wana o wana wɔlaa o bii ya, ndaa wa le hɔmɛilaŋ* tɔ. Ma tiu nda o dɔɔŋgɔɔ niŋ ba o ba fee le ndapila.
33 Kɛ tuupa mi waŋnda haa chii visiŋ muŋ dio, mi Chɛhowa tuulu kɔl a nda o kala kala. Okoŋ, mi Chɛhowa kandu nda diuwo tau tau.
34 Okoŋ kɔɔli, ma ke fondaŋ koŋ diolaŋ aa Kibilɔti-hataava.* Kanifuule loŋ nda kumbu wanaa ŋɔɔchiaŋ le nyɛdiaa wa ni.
35 Mɛɛ nda chɛŋ Kibilɔti-hataava, ma kua Hasɛlɔti, nduyɛ ma chal loŋ.
Tɛɛsiaalaŋ
^ O sim, “Ŋɔɔ.” Koŋ cho ni, sandei wule wule.
^ Naapum wanaa ve Isɔluɛiyaa le wa.
^ Ɔɔ “pasitɛkiilaŋ.”
^ Ɔɔ “laiyoŋ.”
^ Ɔɔ “bulu.”
^ Ɔɔ “yol.”
^ Ɔɔ “miŋ fula nya o lamiliŋ.”
^ Ɔɔ “ma kandu sɔɔŋ waa lachioŋ dimioo.”
^ Hɔmɛiyo chua litɛilaŋ 220. Tofa Tɛɛsiaa B14.
^ O sim, “Fondaŋnda Nda Kumbu Wanaa Ŋɔɔchiaŋ le Nyɛdiaa Wa.”
