Nɔmbaa 12:1-16
12 Okoŋ, mi Meeliam nda Elɔŋ kandu sɔɔŋ wɔɔŋndoŋ dimioo a Muuse okɔɔ, le mɛɛ o chua wana lanɔ Kusaitiinɔɔ o nɔɔ niŋ yɛ.
2 A wa dimioo aa: “Baa o Muuse lo koni Chɛhowa suaa ni? Baa naa bɛɛ o suu o naa lo le?” Nduyɛ Chɛhowa wa nilaŋ yaŋɔɔ.
3 Muuse ndoo hiou wa wana tusiaŋ* a wana o wana wa o lɛŋndeŋ choo.
4 O lepilɛ niŋ kpe, mi Chɛhowa dimul Muuse, Elɔŋ, a Meeliam aa: “Nya yaa kpou la fula mi la kuɛ o tɛndii bɔŋaŋndo.” Okoŋ, mi nda kpou fula ma kua.
5 Mi Chɛhowa tual o yumbu yumbu ikpuŋgbaa niŋ, mbo sim o tɛndiiyo sondoo, mbo veelu Elɔŋ nda Meeliam. Mi nda ŋiɔɔŋ kpou sɔɔŋguu.
6 Mbo dimul nda aa: “A yandii, la yaŋ ya nilaŋ. Te ndoo yɔŋ pɛ maa wana suaa le ya Chɛhowa wo cho nya tɛɛŋ, I wa ndu chɔɔmɔŋ o yilaŋnde niŋ, mi yaa soo o ndu lo o lɔma sɔlaŋ niŋ.
7 Kɛ o cho lende le i cho a Muuse buɛi ni le! Ndu ya mal chiɛi nuu kpou o ba ni.*
8 O cho o latale niŋ te ya suaa o ndu lo le, kɛ hɔlla a hɔlla,* nduyɛ kpendekele. Mi ya Chɛhowa fula ndu o hɔl. Le yɛɛnɛ la yɔŋ isiooŋ le sɔɔŋ wɔɔŋndoŋ dimioo a buɛi nuu Muuse okɔɔ le?”
9 Mi Chɛhowa duaunuŋ tumbe o kala kala a nda, okoŋ mbo mɛi nda loŋ mbo kuaŋnuŋ.
10 Mi yumbu yumboo faŋaŋ o tɛndiiyo choo, okoŋ mi Mɛlɛka duau Meeliam lɛlɔŋ choo, ŋ humbu fo fo maa mɔm ikpuŋgba. Mɛɛ Elɔŋ muliŋ mbo tofa Meeliam, mbo cha maa Mɛlɛka dɔu ndu lɛlɔŋ choo.
11 O lepilɛ niŋ kpe, mi Elɔŋ dimul Muuse aa: “A yandii masanɔ nuu, I nyɔɔlu num! Chɛl naa miŋ sɔla nyɛpalaa le suɛi naŋ tosa hei ve le. Diɔmii fonduei fuu naŋ tosa hei ni.
12 Yandii, chɛl ndu mbo hiou lachi a waa mɛɛ nda vialu nuaa chɛlɛkpɔɔ o vilɛi, mi dialuŋ ndɔŋ wa ŋ diaŋnaŋ kpeŋgei i pilɛ yɛ le.”
13 Okoŋ mi Muuse kandu chaŋndo o Chɛhowa lo. Mbo dimi aa: “Oo Mɛlɛka, a yandii siŋgi ndu!”
14 Mi Chɛhowa dimul Muuse aa: “Te finya ndɔ tufu ndu pɛ lɔluaŋ o hɔl, baa o cho siɔmbulaŋ te o tusi ndu laŋ le palɛi i ŋɔmmɛu le? La soli ndu o dɔɔŋgɔɔ niŋ mi la kɛsi ndu naa yololiaa le palɛi i ŋɔmmɛu. Okoŋ kɔɔli, la nɔla mi la miŋgi ndu o dɔɔŋgɔɔ niŋ.”
15 Okoŋ, ma soli Meeliam o dɔɔŋgɔɔ niŋ, ma kɔ kɛsi ndu naa yololiaa le palɛi i ŋɔmmɛu. Haaa mi Meeliam miiŋgu o dɔɔŋgɔɔ niŋ, Isɔluɛiya feŋaŋ le kɔlaŋ naa cheleŋ te.
16 Okoŋ kɔɔli, mi waŋnda faŋaŋ Hasɛlɔti, ma kɔ kila dɔɔŋgɔɔ o pollo niŋ Paluaŋ.
Tɛɛsiaalaŋ
^ Ɔɔ “wana kɔl vilɛi.”
^ Hibuluiye, “o chiɛi nuu niŋ kpou, o cho chɔmndo maa o cho wana wana tiindaŋ.”
^ Hibuluiye, “sondoo a sondoo.”