Nɔmbaa 13:1-33
13 Mi Chɛhowa dimul Muuse aa:
2 “Viom puaa ma kɔ mɛɛndaŋ lɛŋnde Kenaŋ ndeŋ, lɛŋnde ya cho Isɔluɛiya ke leŋ. O kaale kɛ kɛ niŋ, hɛli waŋndo o pilɛ o yuŋgula ndala leboltaŋ choo, ma vem nda.”
3 Okoŋ mi Muuse viam nda. Ma mal o pollo niŋ Paluaŋ ma kua a mɛɛ Chɛhowa dimi yɛ. Nda kpou waŋ banaa nda wa Isɔluɛiya tɛɛŋ ni.
4 Diola ndalaŋ la cho laŋ ni: Siaamua, po Sakɔɔ wo, fulaa o kaale Lubɛŋ ndeŋ choo.
5 Siafati, po Hɔluaa wo, fulaa o kaale Simiɔŋ ndeŋ choo.
6 Kelɛbi, po Chɛfunɛ wo, fulaa o kaale Chuda leŋ choo.
7 Ika, po Choosɛ wo, fulaa o kaale Isaka leŋ choo.
8 Hoosiya, po Nuŋ ndo, fulaa o kaale Ifiluem ndeŋ choo.
9 Paati, po Luafu wo, fulaa o kaale Bɛŋjamiŋ ndeŋ choo.
10 Kaadiɛɛ, po Sodi wo, fulaa o kaale Sɛbulɔŋ ndeŋ choo.
11 Kaadai, po Susi wo, fulaa o kaale Choosɛ leŋ choo, sanaa a kaale Manaasɛ leŋ.
12 Amiɛɛ, po Kɛmaalai yo, fulaa o kaale Daŋ ndeŋ choo.
13 Sɛtɔ, po Maikɛɛ wo, fulaa o kaale Asia leŋ choo.
14 Naabai, po Vofisi wo, fulaa o kaale Nafitalii leŋ choo.
15 Kiwɛɛ, po Makai yo, fulaa o kaale Kaadi leŋ choo.
16 Puaa haa Muuse vem le lɛŋndeŋ mɛɛndaŋndo ni. Nduyɛ mi Muuse siŋga Hoosiya, po Nuŋ ndo diolaŋ. Mbo ke ndu diolaŋ aa Chɔɔsuaa.*
17 Mɛɛ Muuse wa nda viomɔɔ le kɔlaŋ lɛŋnde Kenaŋ ndeŋ mɛɛndaŋndo, mbo dimul nda aa: “La kɔ o Nɛkɛbi* niŋ, nduyɛ mi la kuɛ vɛlɛ o tanda ŋpemboo niŋ kpou.
18 La kɔ mɛɛndaŋ lɛŋndeŋ mi la che mɛɛ le cho yɛ, okoŋ mi la sina te wanaa cho leniŋ nda nɔ pɛ kpaayaa ɔɔ a nɔ kpaaya le, te a cho pɛ tau ɔɔ a cho a bɔɔ le,
19 te lɛŋnde ndaleŋ le naŋ ɔɔ le niŋ te, nduyɛ te chieeŋ bɛnduŋ nda cho leniŋ ndoŋ nɔ pɛ kpakila kala kalalaŋ ɔɔ ŋ nɔ lakpaki le.
20 La kɔ mɛɛndaŋ lɛŋndeŋ le sinaa te le naŋ pɛ nyɛ ɔɔ le niŋ nyɛ le, nduyɛ te le nɔ pɛ yɔmnde ɔɔ le nɔ iyɔm te. La nɔ kɔl simulaa, nduyɛ mi la kendi komɔɔla cho o lɛŋnde leŋ niŋndaŋ la tiŋ mi la hiŋ a laŋ.” A boondii keŋ kinɛi kilepiima tasiaŋ ma diu ni.
21 Okoŋ, ma kɔ mɛɛndaŋ lɛŋndeŋ chɔŋ o pollo niŋ Siŋ haaa Luihɔbi, Lɛbo-hamaati ikɛi.*
22 Mɛɛ nda keeku o Nɛkɛbi niŋ, ma kua Hɛbulɔŋ naa Anakimnda wa ichali wa. Nda cho yɛ Ahimaŋ, Sisai, a Talimai ni. Nduyɛ, Hɛbulɔŋ wa niŋ o taŋgulaa le wɔsilaŋ la ŋɔmmɛu tuupa ma taŋgul Sowaŋ o Ichipi niŋ.
23 Mɛɛ nda fuuluu o Kpoloŋndo Ɛsikɔɔ, ma kialu lɛuvii kpɔŋjɔ makilepiiyo a pɔmɛkilanetiiyaŋ ma tiŋ vɛlɛ a fikiiyaŋ, ma landu maŋ o yɔmndo, okoŋ mi wanaa ŋiɔɔŋ wa kɔlaŋ a maŋ.
24 Le mɛɛ Isɔluɛiya kelu lɛuvii kpɔŋjɔ makilepiiyo o fondaŋ koŋ yɛ, ma ke fondaŋ koŋ diolaŋ aa Kpoloŋndo Ɛsikɔɔ.*
25 Mɛɛ nda chii lɛŋndeŋ mɛɛndaŋ o palɛi 40 bɛŋgu, ma miiŋguŋ.
26 Okoŋ kɔɔli, ma kua Kedɛsi o pollo niŋ Paluaŋ, naa Muuse, Elɔŋ a waŋ banaa Isɔluɛi kpou chua. Ma kɔ dounuŋ Isɔluɛiya kpou kona, nduyɛ ma chɔm nda nyɛm kuamaŋ nda chɛŋ o lɛŋnde leŋ niŋndoŋ.
27 Kona nda dounuŋ Muuse wo cho hoo ni: “Ŋ kɔ balu o lɛŋnde ŋ vem naa leŋ niŋ. O kpeekpei niŋ, lɛŋnde milikiiyaŋ* a liaaŋ ma cho taaliaa leniŋ ndeŋ le cho ni. Nyɛm kuamaŋ muŋ naŋ chɛŋ loŋ ni.
28 Nduyɛ chieeŋ ndaŋ bɛndu bɛndoŋ cho o kpakila kala kalalaŋ niŋ. Miŋ cha vɛlɛ Anakimnda loŋ.
29 Amalɛkaitiiya cho o tanda Nɛkɛbi wo niŋ, mi Hitaitiiya, Chɛbusaitiiya, a Amɔluaitiiya wa o fondaŋ ŋpemboo. Nduyɛ, Kenanaitiiya cho o pee mɛŋma ihɛllo a o Chɔɔdaŋ ndaŋ holnɔŋndo.”
30 Okoŋ, mi Kelɛbi kindiŋ le wanaa wa isisi Muuse lachi wa kɔltaŋ pɔlullo. Mbo dimi aa: “La chɔŋ ŋ kɔŋnuŋ suŋ suŋ miŋ kɔ del lɛŋnde leŋ choo. Kanifuule, ŋ nɔ tiindaŋndo maa ŋ cho leŋ hiɔlɔɔ.”
31 Kɛ mi puaa nda kuɛ latulu wa dimi aa: “Ŋ nɔla miŋ kɔ chiŋalaŋ wanaa kaŋ te, kanifuule a hiou naa dialuŋ kalaŋ.”
32 Ma hiau lachi a Isɔluɛiya kona wɔɔŋndo dounɔŋndo a lɛŋnde nda kɔ mɛɛndaŋ ndeŋ okɔɔ. Ma wa dimioo aa: “Lɛŋnde naŋ kɔ mɛɛndaŋ ndeŋ, lɛŋnde tɛɛmbuu wanaa nduaa leŋ le cho ni. Nduyɛ puaa naŋ che o lɛŋnde leŋ niŋnda a cho a bɛndu heu.
33 Miŋ cha vɛlɛ Nɛfilimnda loŋ puaa Anaki wa, a fula o pulale Nɛfilimnda choo wa. Mɛɛ naŋ tuu nda a naa, miŋ chaŋnuŋ maa kamballa koni naŋ cho ni. Nduyɛ lende koni nda bɛɛ wa naa chɔɔ ni.”
Tɛɛsiaalaŋ
^ Ɔɔ “Chɛhosuaa.” Diolaŋ ndaŋ la sim, “Chɛhowa Cho Wana Piŋiaa Ni.”
^ Ɔɔ ““Lɛŋndeŋ Ba Tou Wo.”.”
^ Ɔɔ “le luɛiyɔɔ Hamaati.”
^ O sim, “Kpɔŋjɔ maKilepiiyo.”
^ Ɔɔ “nɔnɔɔ.”
