Nɔmbaa 14:1-45
14 Okoŋ mi Isɔluɛiya kandu chaŋndo choo choo kpeleŋ, nduyɛ ma lɔl chaŋndo ichɔl koŋ pii pii.
2 Mi nda kpou kandu ŋɔɔchiaŋndo a Muuse nda Elɔŋ. Ma wa nda dimullo aa: “Ndoo bɛnda bɔɔ mi naŋ vi o lɛŋnde Ichipi leŋ niŋ ɔɔ miŋ vi o pollo hoo niŋ!
3 Le yɛɛnɛ Chɛhowa hiŋ yɛ a naa o lɛŋndeŋ ndeŋ niŋ le ma diu diu naa a muɛi faŋnde? A cho laandaa naa a chuauwaa naa biu biu ma kuɛŋnuŋ a nda. Baa o bɛnda miŋ miiŋguŋ Ichipi le?”
4 A wa pɛŋ dimulaŋndo aa: “Ŋ hɛliŋ waŋndo mbo sim naa lachi miŋ miiŋguŋ Ichipi!”
5 Okoŋ mi Muuse nda Elɔŋ baŋ wulaŋ Isɔluɛiya kpou o hɔl, ma fuuluu hɔlla lɛŋ.
6 Mi Chɔɔsuaa, po Nuŋ ndo, a Kelɛbi, po Chɛfunɛ wo, a ndaa kuɛ lɛŋndeŋ mɛɛndaŋndo nda puaa a piliaa wa sɛɛsiaŋ nyɛlaŋ lekɔɔ.
7 Okoŋ ma dimul Isɔluɛiya kpou aa: “Lɛŋnde naŋ kɔ mɛɛndaŋ ndeŋ, lɛŋnde kɛndɛ kɛndɛ leŋ pila le cho ni.
8 Te Chɛhowa hini pɛ kɔl a naa, o cho lakɔ a naa o lɛŋnde leŋ niŋ, nduyɛ mbo ke naa leŋ. Lɛŋnde milikiiyaŋ* a liaaŋ ma cho taaliaa leniŋ ndeŋ.
9 La tosal Chɛhowa nila kalulaŋ te. La yɔŋ isiooŋ le wanaa cho o lɛŋnde leŋ niŋnda le, kanifuule ŋ cho nda tɛɛmbuu.* A nɔ lɛ nyɛ o nyɛ manda nda le, nduyɛ Chɛhowa cho a naa latulu. La yɔŋ isiooŋ le nda le.”
10 Mi waŋnda kpou wa dimioo le nda vii viiyo a poutaŋ. Kɛ mi Isɔluɛiya kpou cha paŋgele Chɛhowa wo o tɛndii bɔŋaŋndo choo.
11 Okoŋ mi Chɛhowa dimul Muuse aa: “A kaamaala ya tosa laŋ waŋnda haa tɛɛŋ ndaŋ kpou, lɔɔ kuɛɛ nda cho yɛ laalaŋndo dɔwɔɔ o ya niŋ? Nduyɛ, lɔɔ kuɛɛ nda cho yɛ ya bɛɛleŋ ke?
12 I tusi wɔɔ nda naa wɔɔŋ wɔɔŋndo choo, mi tɛɛmbuu nda, okoŋ mi siiŋguu num kaale kpaaya bɛndu mbo hiou nda.”
13 Kɛ mi Muuse dimul Chɛhowa aa: “Num soli waŋnda haa Ichipi a kpaaya num bɛndoo ni. Te a tosa keŋ pɛ mi waŋnda Ichipi tuei a ndi okɔɔ, vɛɛ nda cho yɛ dimi?
14 A cho waŋnda o lɛŋndeŋ ndeŋ niŋ dimul a ndi okɔɔ. Nduyɛ waŋnda haa bɛɛ tuei niŋ maa num Chɛhowa, a cho Isɔluɛiya tɛɛŋ nduyɛ ma chɔɔmuŋ nda kpendekele. Num cho Chɛhowa ni, nduyɛ yumbu yumbu numndo cho nda choo. Num sim nda lachi ipala o yumbu yumbu ikpuŋgbaa niŋ ni, nduyɛ Ichɔl ma sim nda lachi o paŋgele leyiŋndo niŋ.
15 Te a diu pɛ waŋnda haa o lepilɛ niŋ kpe,* kaala tuei a tɔɔ num bɛndoo okɔɔ laŋ la cho dimi aa:
16 ‘Chɛhowa tiuba mbo kuɛ a wanaa nduaa o lɛŋnde o chua buŋgɛi le nda kioo leŋ niŋ te. Lelaŋ o diu nda o pollo niŋ ni.’
17 A yandii Chɛhowa, chɔm kpaaya numndo sanaa a mɛɛ ŋ chua buŋgɛi yɛ. Ma dimi aa:
18 ‘Ya Chɛhowa, I cho wana dɔɔnuŋ tumbe chɔ chɔ le, nduyɛ kaala lo lechoo nuu cho bɔɔ. Mi mal waŋnda haki le biondɔŋnda ndalaŋ a le hakila ndalaŋ. Kɛ nduyɛ, wanaa dɛnɛ wɔɔŋnda nda, nyɛpalaa ya tusi nda choo ni. Nduyɛ mi tosa mi chuauwaa ndaa, chuauwaa ndaa mamaa, a chuauwaa mamaa o chuauwaa ndaa mamaa kɔɔli sɔla fulamakɔɔlila wɔɔŋndaŋ le hakila finyaa ndaa tosa laŋ.’
19 A yandii, mal waŋnda haa haki le hakila ndalaŋ, mɛɛ ŋ mal nda niŋ haki chɔŋ a teleŋ ŋ soli nda o lɛŋnde Ichipi leŋ niŋ haaa a paale hauleŋ ndeŋ yɛ. Kanifuule, kaala lo lechoo numndo cho bɔɔ.”
20 Okoŋ mi Chɛhowa dimi aa: “A mɛɛ ŋ dimi yɛ, I mal nda haki.
21 Kɛ o baa pilɔɔ choo, I mɛnaŋ po* maa, waŋnda o chieeŋndo choo kpou cho chɔ mɛɛ ya Chɛhowa cho wana tɔɔma bɛndu yɛ.
22 Kɛ puaa che tɔɔmayɛi nii, vɛlɛ a kaamaala ya tosa Ichipi a o pollo niŋndaŋ, a koŋ kpou ma hiau lachi a ya tɔɔndaŋndo bɛmbɔɔ tɔ, nduyɛ ma kɛɛ le ya nilaŋ yaŋɔɔ wa kinɛi,
23 o pilɛ bɛɛ chi niŋ lɛŋnde ya chuel finyaa ndaa buŋgɛi le nda kioo leŋ te. O wanaa kɛɛ haa le ya bɛɛleŋ kioo wa tɛɛŋ kinɛi, waŋndo o pilɛ bɛɛ chi leŋ te.
24 Kɛ Kelɛbi buɛi nuu ndu, kaa ndɔɔ waŋnuŋ teŋgeŋ, nduyɛ mbo diikuŋ ya a kɔl ndɔɔ kpou. I cho lakɔ a ndu o lɛŋnde o kuɛ leŋ niŋ, nduyɛ mi le wa le chuauwaa nduaa mamaa.
25 Le mɛɛ Amalɛkaitiiya a Kenanaitiiya cho o kpoloŋndo* niŋ yɛ, siɔdii la muliŋ, mi la kuɛ o pollo niŋ kpeŋgii Pee Siaŋa Mɛŋma Ihɛllo.”
26 Okoŋ mi Chɛhowa dimul Muuse nda Elɔŋ aa:
27 “I tuei Isɔluɛiya ŋɔɔchiaŋndo a ya. Nduyɛ, le vɛɛ kpɛ wanaa dɛnɛ wɔɔŋnda haa cho yɛ hiouwɔɔ lachi a ŋɔɔchiaŋndo a ya?
28 Dimul nda aa, ‘“I mɛnaŋ po* maa, nyɛ ya tuei nya dimioo wo, ndu ya cho nya tosal ni!” Ya Chɛhowa dimi lende ni.
29 “Wana o wana nda poonyiaa diolaŋ chɔŋ wɔsilaŋ 20 kɔ kɛ, nduyɛ ma ŋɔɔchiaŋ a ya wa, nda kpou o pollo niŋ nanuŋ nda cho wu ni.
30 Waŋndo o pilɛ bɛɛ o nya tɛɛŋ luei o lɛŋnde ya chua buŋgɛi le nya kioo leŋ niŋ te, mɛɛ Kelɛbi, po Chɛfunɛ wo a Chɔɔsuaa, po Nuŋ ndo.
31 “‘“Nduyɛ chuauwaa nya dimi maa a cho nda biu biu wa, I cho tosa ma luɛi o lɛŋnde nya kɛɛ leŋ niŋ, ma sina leŋ.
32 Kɛ nya nya, I cho tosa mi dialuŋ nyaŋ vilɛiyoŋ tiu silɔ o pollo hoo niŋ.
33 Le mɛɛ nya kɛɛ lo lechoo wo chɔmndo o ya lo* yɛ, chuauwaa nyaa cho wa wanaa mandaa lasaa o pollo hoo niŋ le wɔsilaŋ 40. Nduyɛ, a cho lo saŋgaa haaa mi wana mɛɛlaa o nya tɛɛŋ vi.
34 Mɛɛ nya tosa palɛi 40 le lɛŋndeŋ mɛɛndaŋndo yɛ, lende nya cho saŋga le hakila nyalaŋ ni, le wɔsilaŋ 40. Paale kɛ kɛ le sim le wɔsioo o pilɛ. La cho sina nyɛ o sim le ya simullo wo.*
35 “‘“Ya Chɛhowa soo ni. Nduyɛ, nyɛ ya cho wanaa dɛnɛ wɔɔŋnda haa kpou tosallo cho hoo ni, a chuuŋgiaŋ haa naapilɛ le ya simullo wa: O pollo hoo niŋ nda cho wu ni, nduyɛ nanuŋ nda cho mɛɛlu ni.
36 Puaa Muuse vem lɛŋndeŋ mɛɛndaŋndo nduyɛ ma huŋ a kona wɔɔŋndo a lɛŋndeŋ okɔɔ, okoŋ mi Isɔluɛiya kpou ŋɔɔchiaŋ a Muuse wa,
37 a tonya, puaa hiŋ a kona wɔɔŋndo a lɛŋndeŋ okɔɔ wa, ya Chɛhowa, I cho nda nyɛpalaa tusi choo ma vi.
38 Kɛ Chɔɔsuaa, po Nuŋ ndo, a Kelɛbi, po Chɛfunɛ wo, a wa puaa kuɛ lɛŋndeŋ mɛɛndaŋndo wa tɛɛŋ nda cho hiouwɔɔ lachi a waa yoomu.”’”
39 Mɛɛ Muuse dimul Isɔluɛiya kpou diomndaŋ ndaŋ, ma kandu chaŋndo tau tau.
40 Okoŋ kɔɔli, ma chaŋ idiiyo puŋ le kɔlaŋ o pembei tullo, ma dimi aa: “Ŋ tosa hakioo, kɛ ŋ cho niŋ a bɛɛndiaŋ le kɔlaŋ o fondaŋ Chɛhowa dimi le naa kioo wo.”
41 Kɛ mi Muuse dimi aa: “Le yɛɛnɛ nya cho yɛ kiɔɔ Chɛhowa diomndo tueiyɔɔ? La cho batiuwaa sɔla le.
42 La kua le, kanifuule Chɛhowa cho nya kɔɔli le. Te la kuɛ pɛ, yaamɔɔwaa nyaa cho nya yomɔɔ.
43 Kanifuule, Amalɛkaitiiya a Kenanaitiiya cho loŋ le nya simullo, nduyɛ ma diu diu nya a muɛi faŋnde. Le mɛɛ nya faŋaŋ Chɛhowa kɔɔli yɛ, Chɛhowa bɛɛ cho wa a nya latulu le.”
44 A koŋ kpou, ma kua o pembei choo a yoŋga. Kɛ kɔfu kpema Chɛhowa wo feŋaŋ o dɔɔŋgɔɔ tɛɛŋ te, nduyɛ Muuse bɛɛ kue le.
45 Okoŋ, mi Amalɛkaitiiya a Kenanaitiiyaa wa o pembii keŋ choo wa tual ma huŋ chiŋalaŋ nda a sɔŋgɔɔ, ma lo nda touwɔɔ haaa Hɔɔma.
Tɛɛsiaalaŋ
^ Ɔɔ “nɔnɔɔ.”
^ Hibuluiye, “‘beediiyo ɔɔ buloo’” nda cho le naa ni.”
^ Hibuluiye, “mɛɛ ŋ dii nuaa waŋndo o pilɛ yɛ.”
^ Ɔɔ “I mɛnaŋ po a yapila.”
^ Ɔɔ “lɛŋnde dɛŋgbɛleŋ.”
^ Ɔɔ “I mɛnaŋ po a yapila.”
^ Hibuluiye, “suunda.”
^ Ɔɔ “le ya chuaa maa yaamɔɔnɔ nya wo.”
