Nɔmbaa 15:1-41
15 Mi Chɛhowa dimul vɛlɛ Muuse aa:
2 “Dimul Isɔluɛiya aa, ‘Te la fuuluu pɛ o lɛŋnde ya cho nya ke le mi la chal leniŋ ndeŋ,
3 nduyɛ mi la yeema le nauwaa nyaa, saa nyaa, a chuiŋaa nyaa salaa solioo o ya Chɛhowa lo le mi chuŋ kɛndɔɔ komal ya Chɛhowa, o wa sala luamaa, o wa sala waŋndo chua buŋgɛi teŋgeŋnde le nyɛ tosa wo, o wa sala waŋndo kɛɛsiaŋ o kɔl le solioo wo, ɔɔ salala nya soli o bɔŋaŋnda nyala bɛndulaŋ choo laŋ,
4 wana cho salaa solioo wo nɔ mbo chua vɛlɛ kpeyaŋ kɛndɛ kɛndɔɔ le kiloo cha, mbo muuliaŋ ndu a chuɛiyaŋ litɛiyo o pilɛ, mbo soli sala ŋkullo o ya Chɛhowa lo.
5 O nɔ mbo chua muɛiyaŋ litɛiyo o pilɛ mbo soli sala mamuɛiyo latulu a sala luamaa, ɔɔ le saa fɔŋndɔ piaandu kɛ kɛ salaa solioo.
6 Le saa piaandoo salaa solioo, la nɔ mi la chua kpeyaŋ kɛndɛ kɛndɔɔ le kiloo le diiŋ, mi la muuliaŋ ndu a chuɛiyaŋ litɛiyo o pilɛ a nyɛ lechoo, le sala ŋkullo.
7 La nɔ mi la chua muɛiyaŋ litɛiyo o pilɛ a nyɛɛmbɔ mi la soli sala mamuɛiyo, le mi chuŋ kɛndɔɔ komal ya Chɛhowa.
8 “‘Kɛ te o yɔŋ pɛ ma yeema nau piaandoo sala luamaa solioo, ɔɔ salaa le buŋgɛi teŋgeŋ ŋ chua le nyɛ tosa wo, ɔɔ le salala kɔl nyulu laŋ solioo o ya Chɛhowa lo,
9 a nɔ vɛlɛ ma chua kpeyaŋ kɛndɛ kɛndɔɔ le kiloo le yaa a tɛndaa tɛɛŋ, ma muuliaŋ ndu a chuɛiyaŋ le litɛilaŋ la tiɔɔŋ, ma soli ndu sala ŋkullo latulu a nau koŋ.
10 A nɔ vɛlɛ ma chua muɛiyaŋ le litɛilaŋ la tiɔɔŋ, ma soli sala mamuɛiyo o yiŋ, le mi chuŋ kɛndɔɔ komal ya Chɛhowa.
11 Te la yeema pɛ nauwo, saa, saa fɔŋndɔ piaandoo ɔɔ chuiŋ kɛ kɛ salaa solioo, nyɛpilɔɔ hoo kpe nya nɔ ni mi la tosa.
12 Mɛɛ o mɛɛ nda wa kunda le salaa solioo, nyɛpilɔɔ hoo kpe nya nɔ ni mi la tosa le o kɛ kɛ.
13 Nuaa Isɔluɛinɔ kɛ kɛ nɔ ni mbo soli salaa o yiŋ, le mi chuŋ kɛndɔɔ komal ya Chɛhowa.
14 “‘Te mialaa cho nya o bɛŋgu choo wa ɔɔ a hiŋ niŋ nya tɛɛŋ le teleŋ vilɛiya bɛɛ yeema pɛ le salaa solioo o yiŋ le mi chuŋ kɛndɔɔ komal ya Chɛhowa, a nɔ ma tosa mɛɛ mɛɛ nya tosa yɛ.
15 Nya Isɔluɛiya ni, mialaa cho nya tɛɛŋ nda ni, sawa pilɔɔ kpe cho wa le nya ni. Sawaa hoo cho wa le nya a le chuauwaa nyaa mamaa o chilaŋ niŋ. Nduyɛ nya ni, mialaa cho nya tɛɛŋ nda ni, nyɛpilɔɔ kpe nya cho ya Chɛhowa o hɔl ni.
16 Sawa pilɔɔ kpe nya nɔ ni mi la nɔ, nduyɛ yamaŋ pilɔŋ kpe nya nɔ ni mi la kelu le nya a mialaa cho nya tɛɛŋ nda.’”
17 Mi Chɛhowa dimul vɛlɛ Muuse aa:
18 “Dimul Isɔluɛiya aa, ‘Te la fuuluu pɛ o lɛŋnde ya cho kɔlaŋ a nya leŋ niŋ,
19 nduyɛ mi la de nyɛdiaa* kɛ kɛ o lɛŋnde leŋ niŋ, la nɔ mi la yɔŋgu tooloo o ya Chɛhowa lo.
20 La nɔ mi la toosiaa kpeyaŋndo a kɔmnde taseleŋ o chiɔɔŋ nyaŋ niŋ, okoŋ mi la toosiaa beedii tiu tiuwo a ndu maa ikela, mi la yɔŋgu tooloo. Mɛɛ nya yɔŋgu tooloo a nyɛm nya luaa o yasaba woŋ yɛ, lende nya nɔ ni mi la yɔŋgu ndu.
21 Nya a chuauwaa nyaa mamaa cho hunɔɔ o chilaŋ niŋnda kpou, la nɔ mi la chua komɔɔla taselaŋ o chiɔɔŋ niŋ mi la toosiaa nyɛdiaa, mi la yɔŋgu tooloo o ya Chɛhowa lo.
22 “‘Kɛ mi i yɔŋnuŋ dɔɔ, mi la tosa biondɔŋndo, nduyɛ mi la puɛɛnuŋ le tosaa nyɛ sawala ya Chɛhowa ke Muuse laŋ kpou la dimi wo.
23 Sawalaŋ ndaŋ ya Chɛhowa yɔŋgu nya sanaa a Muuse ni. Nduyɛ, le nya a le chuauwaa nyaa mamaa o chilaŋ niŋ ya Chɛhowa yɔŋgu laŋ ni.
24 Te o yɔŋ pɛ maa wana o wana sina a biondɔŋ nya tosa hoo wo okɔɔ le, Isɔluɛiya kpou nɔ ma bii nau fɔŋndɔ piaandoo ma soli ndu sala luamaa, le mi chuŋ kɛndɔɔ komal ya Chɛhowa. A nɔ ma soli ndu salaa latulu a sala ndɔ ŋkullo, vɛlɛ a sala ndɔ mamuɛiyo a mɛɛ nda tosa paandu yɛ, nduyɛ ma soli chuiŋ fɔŋndɔɔ sala hakioo.
25 Okoŋ mi wana soliaa lasalaa soli sala malɔɔ lahakioo, le mi Isɔluɛiya kpou sɔla malɔɔ hakioo. Kanifuule, biondɔŋndo nda tosa ni, nduyɛ ma huŋ a sala nda kei o yiŋ ndo o ya Chɛhowa lo, vɛlɛ a sala hakioo ya Chɛhowa o hɔl le biondɔŋ ndaa.
26 Isɔluɛiya kpou a mialaa cho nda tɛɛŋ nda cho malɔɔ hakioo sɔla, kanifuule biondɔŋndo nda kpou tosa ni.
27 “‘Te o yɔŋ pɛ mi waŋndo tosa hakioo kɛ mbo ve o sina choo le, o nɔ mbo hiŋ a chuiŋ laandu chii wɔsioo o pilɛ wo le sala hakioo.
28 Nduyɛ, mi wana soliaa lasalaa soli sala malɔɔ lahakioo, le wana tosa hakioo ya Chɛhowa o hɔl lo. Okoŋ, mbo sɔla malɔɔ hakioo, kanifuule o cho a siɛlɛi fuu le o tosa ndu le.
29 Te waŋndo tosa pɛ hakioo mbo ve a siɛlɛi fuu le, o wa Isɔluɛinɔ ɔɔ mialaa cho nya tɛɛŋ nda, sawa pilɔɔ kpe cho wa le nya ni.
30 “‘Kɛ te Isɔluɛinɔɔ ɔɔ mialaa cho nya tɛɛŋ nda o pilɛ tosa pɛ hakioo a siɛlɛi fuu, mɛɛ o tɛɛmbuu diola ya Chɛhowa laŋ. A nɔ ma dii ndu
31 Le mɛɛ wana koŋ pɛɛsa nyɛ ya Chɛhowa dimi wo, nduyɛ mbo tɛɛmbuu sawa nuu yɛ, a nɔ ma dii ndu. Ndupila haki ndɔɔ cho o lebol ni.’”
32 Teleŋ Isɔluɛiya wa o pollo niŋndo, ma saaluŋ po pilɛ yɔmnde tiŋgɔɔ o paale pɛŋgiaaleŋ choo.
33 Mi wanaa saaluŋ ndu yɔmnde tiŋgɔɔ wa huŋ a ndu o Muuse, Elɔŋ a o waŋnda kpou lo.
34 Ma kɛsi ndu pɔɔ o biyɔɔ niŋ, kanifuule ndaa sina wɔ nyɛ kpeekpei nda nɔ ma tosa a ndu wo le.
35 Mi Chɛhowa dimul Muuse aa: “Po koŋ nɔ mbo sɔla piɔmndo. La nɔ mi la soli ndu o dɔɔŋgɔɔ niŋ, mi waŋnda kpou vii vii ndu a poutaŋ.”
36 Okoŋ mi waŋnda kpou soli ndu o dɔɔŋgɔɔ niŋ, ma lo ndu vii viiyo haaa mbo wu, a mɛɛ Chɛhowa dimul Muuse yɛ.
37 Mi Chɛhowa hiau lachi a suɛi naa Muuse chua aa:
38 “Dimul Isɔluɛiya maa nda ni, chuauwaa ndaa mamaa cho hunɔɔ o chilaŋ niŋnda ni, o kɛ kɛ nɔ mbo handu misalaŋ o bɔɔle doma ndɔɔ chɛ chɛ, nduyɛ mbo kei kɛi buliiyo o misala laŋ choo.
39 ‘Misalaŋ ndaŋ la nɔ mi la wa o domala nyalaŋ, okoŋ te la che laŋ pɛ, la loonuŋ a sawala ya Chɛhowa ke nya laŋ kpou, nduyɛ mi la tosa nyɛ la dimi wo. Nyɛ nya cha wo, a nyɛ kɔlta nyalaŋ la nyindu nya le tosaa wo, la nɔ mi la tol ndu kɔɔli le, yɔŋii nya muliŋ mɛlɛkaa cheleŋnda sooluuwo.*
40 Hei cho nya mala mi la loonuŋ nduyɛ mi la bii sawala nilaŋ kpou, okoŋ mi la wa a diandaa ya Mɛlɛka nyaa o hɔl.
41 Ya cho Chɛhowa Mɛlɛka nyaa ni. Ya soli nya o lɛŋnde Ichipi leŋ niŋ ni, le mi chɔm maa ya cho Mɛlɛka nyaa ni. Ya cho Chɛhowa Mɛlɛka nyaa ni.’”
