Nɔmbaa 20:1-29
20 O paŋgii tasei niŋ, mi Isɔluɛiya kpou huŋ o pollo niŋ Siŋ, ma chal Kedɛsi. Nduyɛ loŋ Meeliam vi ni ma kumbu ndu.
2 Kɛ nduyɛ, mɛŋma ve le Isɔluɛiya le. Le hei, ma chuuŋgiaŋ naapilɛ, ma chiŋalaŋ Muuse nda Elɔŋ.
3 Ma kandu ŋɔɔchiaŋndo a Muuse, ma dimi aa: “Ndoo bɛnda bɔɔ mi naŋ vi latulu a bɛndaa naa vɛlɛ a pɔmbuaa naa teleŋ nda vi Chɛhowa o hɔl lo!
4 Le yɛɛnɛ nya hiŋ yɛ a wanaa Chɛhowa wa o pollo hoo niŋ le mi naa a chɔluaa naa vi nanuŋ?
5 Nduyɛ, le yɛɛnɛ nya soli yɛ naa o lɛŋnde Ichipi leŋ niŋ mi la huŋ a naa o fondaŋ wɔɔŋndo hoo? O cho fondaŋ wana tɔl ŋkulu, mafikii, makilepii, ɔɔ ma pɔmɛkilanetii le. Nduyɛ mamɛŋ o mamɛŋ cho naŋ le kolɔɔ le.”
6 Okoŋ mi Muuse nda Elɔŋ faŋaŋ Isɔluɛiya o hɔl, ma kua o tɛndii bɔŋaŋndo sondoo, ma baŋ wulaŋ ma fuuluu hɔlla lɛŋ. Nduyɛ mi paŋgele Chɛhowa wo fula nda o hɔl.
7 Mi Chɛhowa dimul Muuse aa:
8 “Chua tindaa mi num a Elɔŋ chuuŋgiaa Isɔluɛiya kpou naapilɛ, okoŋ ma soo o pouwo lo nda o hɔl le mbo soli mɛŋndaŋ. A cho mɛŋndaŋ soli o pouwo le mi nda a chɔluaa ndaa kol.”
9 Mi Muuse chua tindaa Chɛhowa o hɔl, mɛɛ o dimul ndu yɛ.
10 Mi Muuse nda Elɔŋ chuuŋgiaa Isɔluɛiya naapilɛ pouwo lachi. Mbo dimul nda aa: “Nya wanaa nila kaluaa haa, la yaŋ ya nilaŋ! Baa ŋ solul nya mɛŋndaŋ o pouwo hoo?”
11 Le hei, mi Muuse heelu baa, mbo luaa pouwo a tinda ndɔɔ bɛmbɔɔ lediiŋ, mi mɛŋndaŋ ma buli bu. Okoŋ, mi Isɔluɛiya a chɔluaa ndaa kpou kol.
12 Okoŋ kɔɔli, mi Chɛhowa dimul Muuse nda Elɔŋ aa: “Le mɛɛ nya kɛɛ le laalaŋndo dɔwɔɔ o ya niŋ, nduyɛ mi la kɛɛ le ya saŋgalaa waŋnda Isɔluɛi o hɔl lɛ, la cho fuuluu a waŋnda haa o lɛŋnde ya dimi le nda kioo leŋ niŋ te.”
13 Mɛluiba* mɛŋndaŋ maŋ ma fula ni, naa Isɔluɛiya ŋɔɔchiaŋ a Chɛhowa wa. Loŋ o chɔm nda ni maa Mɛlɛka diandaa o cho ni.
14 Okoŋ mi Muuse soli waŋnda Kedɛsi, mbo viam nda naa masaa le Idɔm chua, le ma dimul ndu aa: “Nyɛ Isɔluɛi pɔmbɔ num dimi wo cho hoo ni, ‘Numpila sina sɔɔŋ palaŋ keeku naa choo woŋ kpou.
15 Mɛɛ finyaa naa mamaa kuɛ Ichipi, ma kɔ wa loŋ le wɔsila* bɔɔbɔɔ. Nduyɛ mi waŋnda Ichipi bii naa a finyaa naa mamaa biyɔɔ wɔɔŋndo.
16 O mɛɛlulaŋ kpɔŋ, miŋ koŋul o Chɛhowa lo, mbo yaŋ naa nilaŋ. Okoŋ, mbo yɔŋ maalikɛinɔ ndɔɔ, mbo soli naa o lɛŋnde Ichipi leŋ niŋ. Ŋ cho suŋ suŋ Kedɛsi, chiee bɛndu salu pɛŋgulaŋ a lɛŋnde numndeŋ ndo.
17 Lelaŋ a yandii, chɛl naa miŋ keeku o tanda numndo niŋ. Ŋ cho kei o chiɔɔŋ nyaŋ niŋ ɔɔ o kpelela nyala makilepiilaŋ niŋ te. Nduyɛ ŋ cho mamɛŋ kolɔɔ o sooŋ kɛ kɛ niŋ te. O Nɛi Bɛndoo* choo naŋ cho wa kɔlaŋ ni. Nduyɛ haaa miŋ fula o tanda numndo niŋ, ŋ cho sei o ba kɛndɛ choo ɔɔ o ba mial choo le.’”
18 Kɛ mi Idɔm dimul ndu aa: “A cho keeku o tanda nuu niŋ te. Te a tɔɔndaŋ pɛ, I cho num kuel a muɛi faŋnde.”
19 Okoŋ mi Isɔluɛiya dimul ndu aa: “A nɛi bɛndoo sanaa naŋ cho lakɔ ni. Nduyɛ, te o yɔŋ pɛ mi naa a chɔluaa naa kol mɛŋma numndaŋ, ŋ cho paawa.* Ŋ yeema num nyɛ o nyɛ cheleŋ o ba le, kɛ chɛl naa tuŋ miŋ keeku o tanda numndo niŋ.”
20 A koŋ kpou mbo dimi aa: “A cho keeku o tanda nuu niŋ te.” Le hei, mi Idɔm chua waŋnda faŋga bɛndoo a puaa chɔuwaa kpaaya bɛnduaa mbo kuel ndu.
21 Mi Idɔm kɛɛ kpooŋ le mi Isɔluɛi keeku o tanda ndɔɔ niŋ. Le hei, mi Isɔluɛi keekuŋ a nɛi cheleŋ.
22 Mi waŋnda Isɔluɛi, faŋga kaakuu koŋ kpou faŋaŋ Kedɛsi, ma kua o Pembii Hɔli ve.
23 A wa o Pembii Hɔli ve o pɛŋgulaŋ a lɛŋnde Idɔm ndeŋ, mi Chɛhowa dimul Muuse nda Elɔŋ aa:
24 “Elɔŋ cho wu, ma kumbu ndu maa finyaa nduaa mamaa. O cho luɛiyɔɔ o lɛŋnde ya cho Isɔluɛiya ke leŋ niŋ te, kanifuule nya ŋiɔɔŋ kpou, la tosa nyɛ ya dimul nya a mɛŋndaŋ Mɛluiba okɔɔ wo le.
25 Chua Elɔŋ nda Ɛlieesa po ndɔ, ma hel a nda o Pembii Hɔli Ve choo.
26 Soli Elɔŋ nyɛla ndɔla soliaa lasala laŋ lekɔɔ, ma wou Ɛlieesa po ndɔ. Nduyɛ, loŋ Elɔŋ cho wu ni.”*
27 Okoŋ mi Muuse tosa mɛɛ Chɛhowa dimul ndu yɛ. Ma hel o Pembii Hɔli Ve choo waŋnda Isɔluɛi kpou o hɔl.
28 Okoŋ, mi Muuse soli Elɔŋ nyɛla ndɔla soliaa lasala laŋ lekɔɔ, mbo wou Ɛlieesa po ndɔ. Okoŋ kɔɔli, mi Elɔŋ wu o pembii keŋ choo loŋ. Nduyɛ mi Muuse nda Ɛlieesa tual pembei.
29 Mɛɛ Isɔluɛiya che maa Elɔŋ vi, mi nda kpou chaŋ ndu le palɛi 30.
Tɛɛsiaalaŋ
^ O sim, “Ŋɔɔchiaŋndo.”
^ Hibuluiye, “palɛi.”
^ Hibuluiye, “Nɛi Masaa.”
^ Ɔɔ “sala.”
^ Hibuluiye, “loŋ o cho wu ni mbo kuɛ o finyaa nduaa mamaa lo.”
