Nɔmbaa 21:1-35
21 Mɛɛ masa Kenanaitiiya o Eluadi niŋ, o wa ichali Nɛkɛbi wo tuei maa Isɔluɛiya cho hunɔɔ a nɛi Ataluim ndo, mbo kɔ del nda choo a sɔŋgɔɔ, mbo bii apum mbo kuaŋnuŋ a nda o biyɔɔ niŋ.
2 Okoŋ mi Isɔluɛiya chuel Chɛhowa buŋgɛi aa: “Te a mal pɛ waŋnda haa naa o ba, ŋ cho chieeŋ ndaŋ bɛndoŋ delɔɔ choo, miŋ tɛɛmbuu muŋ.”
3 Mi Chɛhowa yaŋ Isɔluɛiya nilaŋ, mbo mal Kenanaitiiya nda o ba, ma kɔ del nda choo ma diu diu nda. Nduyɛ ma tɛɛmbuu chieeŋ ndaŋ bɛndoŋ. Okoŋ ma ke fondaŋ koŋ diolaŋ aa Hɔɔma.*
4 Mɛɛ nda chɛŋ o Pembii Hɔli Ve, ma hiau lachi a kɔlaŋ a nɛi kuɛ o Pee Siaŋa Mɛŋma Ihɛllo wo, le halikpeŋ ma pila pilaŋ lɛŋnde Idɔm ndeŋ. Le hei, mi waŋnda saŋga yɔkɔɔ a kɔlaŋ.
5 Mi waŋnda kandu vɛlɛ ŋɔɔchiaŋndo a Mɛlɛka nda Muuse aa: “Le yɛɛnɛ nya soli yɛ naa o Ichipi niŋ le miŋ huŋ wu o pollo hoo niŋ? Nyɛdiaa cho le, mɛŋma cho le, nduyɛ ŋ saŋga niŋ a nyɛdiaa* wɔɔŋndo hoo.”
6 Le hei, mi Chɛhowa yɔŋ kɛuwaa wɔɔŋ wɔɔŋnda waŋnda tɛɛŋ, ma kandu Isɔluɛiya lɔuviaa, nduyɛ mi a bɔɔbɔɔ wu.
7 Okoŋ kɔɔli, ma huŋ naa Muuse chua ma dimul ndu aa: “Ŋ tosa hakioo le mɛɛ naŋ ŋɔɔchiaŋ a Chɛhowa vɛlɛ a num yɛ. Lelaŋ soo o Chɛhowa lo le naa, le mbo soli kɛuwa haa naa tɛɛŋ.” Mi Muuse suaa le nda.
8 Okoŋ, mi Chɛhowa dimul Muuse aa: “Toosiaa velaŋ kɛu wɔɔŋ wɔɔŋndo, ma pinda pinda ndu o yɔm vilɛiyo choo. Nduyɛ wana o wana kɛuwo lɔwa pɛ, o nɔ mbo tofa kɛu koŋ, le halikpeŋ mbo lo yoomu.”
9 O le pilɛ niŋ kpe, mi Muuse toosiaa kɛuwo a chiliŋii siaŋɛi,* okoŋ mbo pinda pinda ndu o yɔm vilɛiyo. Nduyɛ, teleŋ o teleŋ kɛuwo ndoo lɔwa pɛ waŋndo mbo tofa kɛu chiliŋii siaŋa koŋ, ndoo vi lɛ le.
10 Okoŋ kɔɔli, mi Isɔluɛiya faŋaŋ loŋ ma kɔ kila dɔɔŋgɔɔ Obɔti.
11 Mɛɛ nda chɛŋ Obɔti, ma kɔ kila dɔɔŋgɔɔ Iya-baluim o pollo niŋ Mowaabi ikɛi, ba paaleŋ le chaŋ ndo.
12 Mɛɛ nda faŋaŋ loŋ, ma kɔ kila dɔɔŋgɔɔ o Kpoloŋndo Sɛluɛɛdi.
13 Faŋaŋndo loŋ, ma kɔ kila dɔɔŋgɔɔ o tanda Anɔŋ ndo niŋ o pollo niŋ. Pollo hoo cho o timbulaŋ a pɛŋgula Amɔluaitiiya. Anɔŋ salu pɛŋgulaŋ a Mowaabi ni. Nduyɛ, Mowaabi a Amɔŋ tɛɛŋ o cho ni.
14 Lelaŋ yau laChɔu Chɛhowa wo dimi ni aa: “Vahabi o Sufaa niŋ a kpoloŋndaŋ o Pioo Anɔŋ.
15 Nduyɛ, kpoloŋndaŋ ndaŋ la tuusu o chiee bɛndoo Aa ni, mi la bɔŋa o pɛŋgulaŋ a lɛŋnde Mowaabi leŋ.”
16 Okoŋ kɔɔli, ma kua o fonda nda veelu aa Biaa wo. Nduyɛ, mi Chɛhowa dimul Muuse a sooŋ mamɛŋ wa loŋ ndo okɔɔ aa: “Chuuŋgiaa waŋnda naapilɛ, le mi ke nda mɛŋndaŋ ma kol.”
17 A teleŋ koŋ, mi Isɔluɛiya soli chondei aa:
“Oo sooŋ mamɛŋndo, soli mɛŋndaŋ! La solul ndu chondei!
18 Sooŋ waŋ banaa a laŋgbaa kalla waŋnda tɛɛŋ tou wo,A tinda lemasaa nda tou ndu ni, a tindala ndalaŋ kpeekpei.”
Okoŋ, ma faŋaŋ o pollo niŋ ma kua Matanaa.
19 Mɛɛ nda chɛŋ Matanaa, ma kua Nahaliɛɛ. Chɔnɔŋndo Nahaliɛɛ, ma kua Bamɔti.
20 Mɛɛ nda chɛŋ Bamɔti, ma hiau lachi a kɔlaŋ o kpoloŋ cho o tanda* Mowaabi wo niŋndo. Ma hel o fondaŋ ŋpemboo Pisika, naa wana lo ma che Chɛsimɔŋ nda.*
21 Okoŋ kɔɔli, mi Isɔluɛiya viam waŋnda naa Saihɔŋ chua, masa Amɔluaitiiya, le ma dimul ndu aa:
22 “Chɛl naa miŋ keeku o lɛŋnde numndeŋ niŋ. Ŋ cho kei o chiɔɔŋ nyaŋ niŋ ɔɔ o kpelela nyala makilepiilaŋ niŋ te. Nduyɛ, ŋ cho mamɛŋ kolɔɔ o sooŋ kɛ kɛ niŋ te. O Nɛi Bɛndoo choo* naŋ cho wa kɔlaŋ ni haaa miŋ fula o tanda numndo niŋ.”
23 Kɛ Saihɔŋ chɛl le mi Isɔluɛiya keeku o tanda ndɔɔ niŋ te. Nduyɛ, mbo chuuŋgiaa wanaa nduaa kpou ma kuel Isɔluɛiya Chahasi o pollo ni, ma chiŋalaŋ nda a sɔŋgɔɔ.
24 Kɛ mi Isɔluɛiya yam ndu, nduyɛ ma diu wanaa nduaa a muɛi faŋnde. Okoŋ, ma hialu lɛŋnde ndɔleŋ chɔŋ Anɔŋ haaa Chabɔki, Amɔnaitiiya ikɛi. Kɛ a hiu Chasɛɛ le, kanifuule ndu cho o pɛŋgulaŋ a tanda Amɔnaitiiya ni.
25 Okoŋ mi Isɔluɛiya poondiaa chieeŋ bɛndoŋ muŋ kpou, nduyɛ ma kila chaltaŋ o chieeŋ bɛnduŋ Amɔluaitiiya niŋ kpou, o Hɛsibɔŋ niŋ vɛlɛ a chieeŋ balu ndu woŋ kpou.
26 Hɛsibɔŋ wa chiee bɛndu Saihɔŋ ndo ni, masa Amɔluaitiiya. Nduyɛ ndu ndoo sɔŋga a masaa le Mowaabi ni, mbo poonda ndu lɛŋnde ndɔleŋ kpou o ba, haaa o kpoloŋndo Anɔŋ.
27 Le saboo hoo nda soli suɛi mamɛi o tale niŋ ni aa:
“La huŋ Hɛsibɔŋ.
La huŋ taŋguluŋ chiee bɛndu masaa Saihɔŋ ndo, nduyɛ mbo miiŋgu o kala poŋ maa paandu.
28 Kanifuule, yiŋndeŋ le fula Hɛsibɔŋ. Yiŋnde wule wule leŋ le fula o chioo Saihɔŋ,
Mi le huŋ lom Aa o Mowaabi niŋ, a laŋgbaa kalla o fondaŋnda filioŋndaŋ Anɔŋ.
29 Oo Mowaabi, kpundɔɔ cho le num! Nya wanaa Kɛmɔɔsi wa, la cho tambei sɔla.
O tosa mi puaa nduaa saŋnuŋ, nduyɛ mi chuaa nduaa laanduaa kua o biyɔɔ niŋ Saihɔŋ o ba, masa Amɔluaitiiya.
30 La ŋ chiŋalaŋ nda a sɔŋgɔɔ.Hɛsibɔŋ cho tambei sɔla haaa Dibɔŋ.La ŋ tɛɛmbuŋ ndu haaa Nɔfaa.Yiŋndeŋ le cho pɛŋgɛlaŋ haaa Mɛdiba.”
31 Okoŋ, mi Isɔluɛiya kila chaltaŋ o lɛŋnde Amɔluaitiiya niŋ.
32 Mi Muuse viam suaŋsuaŋnda apum le ma kɔ mɛɛndaŋ Chasɛɛ. Ma bii chieeŋ balu ndu woŋ, nduyɛ ma soli Amɔluaitiiyaa wa loŋ nda.
33 Okoŋ, mi Isɔluɛiya muliŋ ma kua ba Baasiaŋ ndo. Nduyɛ mi Ɔku, masaa le Baasiaŋ huŋ a puaa nduaa chɔuwa kpou le Isɔluɛiya chiŋalaŋndo a sɔŋgɔɔ Ɛdului.
34 Mi Chɛhowa dimul Muuse aa: “Siooŋii bii num le ndu le, kanifuule I cho ndu a wanaa nduaa kpou, vɛlɛ a lɛŋnde ndɔleŋ num malɔɔ o ba. Nduyɛ, mɛɛ ŋ tosal Saihɔŋ, masa Amɔluaitiiya o wa Hɛsibɔŋ ndo yɛ, lende koni ŋ cho ndu tosal ni.”
35 Okoŋ mi Isɔluɛiya hiau lachi a sɔŋgaa a ndu, puaa nduaa, vɛlɛ a wanaa nduaa kpou. Ma lo nda diuwo haaa wana pilɛ bɛɛ lo yoomu le. Nduyɛ ma bii lɛŋnde ndɔleŋ.
Tɛɛsiaalaŋ
^ O sim, “Tɛɛmbuuwo.”
^ Hibuluiye, “beediiyo ɔɔ buloo.”
^ Ɔɔ “kapaa.”
^ Hibuluiye, “yondo.”
^ Ɔɔ naapum, “pollo wa.”
^ Hibuluiye, “Nɛi Masaa.”
