Nɔmbaa 22:1-41
22 Okoŋ mi Isɔluɛiya faŋaŋ loŋ, ma kɔ kila dɔɔŋgɔɔ o pollo niŋ Mowaabi, Chɔɔdaŋ ndaŋ leeloo, Chɛluiko ikɛi.
2 Nduyɛ mi Belaki, po Sipɔɔ wo tuɛi nyɛ o nyɛ Isɔluɛiya tosa a Amɔluaitiiya.
3 Mi siooŋii bɛnduei bii waŋnda Mowaabi le Isɔluɛiya, kanifuule a wa bɔɔ faŋga. A tonya, mi kɔltaŋ la yɔŋnuŋ nda pulaŋ pulaŋ a siooŋnde le Isɔluɛiya.
4 Okoŋ, mi waŋnda Mowaabi dimul waŋ banaa Midiaŋ aa: “Wanaa faŋga bɛnduaa haa cho tanda naa kpou tɛɛmbuu, mɛɛ nau towaa fuli nuaa billo yondoo niŋ yɛ.”
A teleŋ koŋ, Belaki, po Sipɔɔ wo wa masaa le Mowaabi ni.
5 Mbo viam waŋnda naa Belam chua, po Biyɔɔ wo o lɛŋnde ndɔleŋ niŋ Pɛtɔɔ. Pɛtɔɔ yɛ, o Pioo* ikɛi o cho ni. Mbo dimul nda le ma kɔ dimul Belam aa: “Waŋnda fula Ichipi, ma huŋ chal la ikɛi kpɛɛluŋ. Nduyɛ a cho a kuaŋnaŋ kɛ kɛ o lɛŋndeŋ niŋ.
6 Lelaŋ a yandii, huŋ ma hendul la nda sendioo choo, kanifuule a hiou ya kpaayaa poloŋ. Naapum dɔɔ mi yem nda, mi soli nda o lɛŋndeŋ niŋ. I sina kɛsɛ maa wana o wana ŋ dɔu pɛ sala, salaa wa ndu choo ni. Nduyɛ wana o wana ŋ handu pɛ sendioo choo, sendioo wa ndu choo ni.”
7 Le hei, mi waŋ banaa Mowaabi a waŋ banaa Midiaŋ mal ma kua naa Belam chua, ma kɔ dounuŋ ndu kona nyɛ Belaki dimi wo. Mɛɛ nda wa kɔlaŋ, ma chua nyɛ o ba le ma kɔ paawa* Belam le sendi o wa Isɔluɛiya handɔɔ choo wo.*
8 Okoŋ mbo dimul nda aa: “La lɔl nanuŋ. Nduyɛ nyɛ o nyɛ Chɛhowa dimul la pɛ, I cho nya dimul.” Okoŋ mi waŋ banaa Mowaabi lɔl Belam o bɛŋgu choo.
9 Mi Mɛlɛka huŋ naa Belam chua mbo nyuna ndu aa: “Puaa kuɛɛ cho yɛ haa a num latulu?”
10 Mi Belam mulul Mɛlɛka tonyaa aa: “Belaki, po Sipɔɔ wo, masaa le Mowaabi, vem nda a yooŋgoo naa ya chua ni aa,
11 ‘Waŋnda fula Ichipi ma huŋ nanuŋ, nduyɛ a cho a kuaŋnaŋ kɛ kɛ o lɛŋndeŋ niŋ. Lelaŋ a yandii, huŋ ma hendul la nda sendioo choo. Naapum dɔɔ mi tiuba le sɔŋgaa a nda, mi soli nda o lɛŋndeŋ niŋ.’”
12 Kɛ mi Mɛlɛka dimul Belam aa: “Tual nda kɔɔli mi la kuɛ le. Nduyɛ a nɔ ma handu wanaa kaŋ sendioo choo le, kanifuule salaa cho nda choo.”
13 Mɛɛ Belam chɛŋ idiiyo, mbo dimul waŋ banaa Belaki wa aa: “La miiŋgu o lɛŋnde nyaleŋ niŋ, kanifuule Chɛhowa kɛɛ le mi kuɛ a nya latulu.”
14 Okoŋ mi waŋ banaa Mowaabi mal, ma miiŋgu naa Belaki chua. Ma kɔ dimul ndu aa: “Belam kɛɛ le hunɔɔ a naa latulu.”
15 Kɛ mi Belaki soli vɛlɛ waŋ banaa cheleŋ kunda bɛndoo, mbo viam nda. Nduyɛ, ndaa nɔ tɔɔ hiouwɔɔ kunda tasoo poloŋ.
16 Ma kua naa Belam chua, ma dimul ndu aa: “Nyɛ Belaki, po Sipɔɔ wo dimi wo cho hoo ni, ‘A yandii, chɛl mi nyɛ o nyɛ kuuna num hunɔɔ o ya lo le.
17 Kanifuule, I cho tosa ma fula tɔɔ tau, nduyɛ nyɛ o nyɛ ŋ dimul la pɛ le tosaa, I cho tosa. Lelaŋ a yandii, huŋ ma hendul la waŋnda haa sendioo choo.’”
18 Kɛ mi Belam dimul wanaa Belaki vem nda aa: “O yɔŋ bɛɛ mi Belaki ke ya chiɛi ndɔɔ mbo wa o piaa cha a kaniŋ humboŋ vɛlɛ a kooliiyoŋ, I nɔla mi tosa nyɛ Chɛhowa Mɛlɛka nuu kuuna ya le tosaa wo le, o wa o pɔmbɔ, ɔɔ o wa o bɛndu.
19 Kɛ a yandii, nya bɛɛ la lɔl nanuŋ, okoŋ mi tuei vɛlɛ nyɛ Chɛhowa cho ya dimul lo.”
20 Ichɔllo, mi Mɛlɛka huŋ dimul Belam aa: “Te num puaa haa hiŋ kɔɔli ni, mɛɛ la kɔ latulu. Kɛ nyɛ ya dimul numndo kinɛi ŋ nɔ ni ma kɔ soo.”
21 Okoŋ mi Belam pena chɔnɔŋ idiiyo, mbo bɛɛndiaa sofɛlɛ* ndɔɔ, mbo kua nda waŋ banaa Mowaabi.
22 Kɛ mi Mɛlɛka duaunuŋ tumbe tau le mɛɛ o wa kɔlaŋ yɛ. Le hei, mi maalikɛinɔ Chɛhowa wo sim o nɛi le mbo hau nɛiyo. Belam wa kɔlaŋ o sofɛlɛ ndɔɔ choo, nduyɛ buɛiyaa nduaa a ŋiɔɔŋ wa a ndu latulu.
23 Mɛɛ sofɛlɔɔ che maalikɛinɔ Chɛhowa wo isisi o nɛi a muɛi faŋnde o ba, mi sofɛlɔɔ kindiŋ le seiyo yondoo niŋ. Kɛ mi Belam kandu ndu lɔɔ le mbo miŋgi ndu o nɛi.
24 Okoŋ, mi maalikɛinɔ Chɛhowa wo sim o nɛi sɔɔkɛnyɛɛ keeku o kpelela makilepiilaŋ la tiɔɔŋ tɛɛŋ ndo. Nduyɛ kpaki la pouwo wa o nɛiyo vellaa velle.
25 Mɛɛ sofɛlɔɔ che maalikɛinɔ Chɛhowa wo, mbo holnuŋ kpakioo le hiouwɔɔ. O lo hiouwɔɔ mbo susa Belam pelei o kpakioo, nduyɛ mi Belam kandu ndu vɛlɛ lɔɔ.
26 Mi maalikɛinɔ Chɛhowa wo kɔ sim vɛlɛ o fondaŋ sɔɔkɛnyɛɛ wo, naa sofɛlɔɔ ndoo nɔ lɛ nɛi o nɛi le hiouwɔɔ le wa.
27 Mɛɛ sofɛlɔɔ che maalikɛinɔ Chɛhowa wo, mbo bɛwa a Belam. Le hei, mi Belam duaunuŋ tumbe tau tau, okoŋ mbo kandu sofɛlɔɔ lɔɔ a tinda ndɔɔ.
28 O mɛɛlulaŋ kpɔŋ, mi Chɛhowa tosa mi sofɛlɔɔ suaa.* Mbo nyuna Belam aa: “Yɛɛnɛ ya tosal lɛ num ma luaa ya nuaa haaa bɛmbɔɔ le yaa?”
29 Mi Belam mulul ndu aa: “Kanifuule a siiŋguu ya diɔmndo. Te yaa nɔ pɛ muɛi faŋnde o ba nanuŋ, I wa num diyɔɔ!”
30 Okoŋ mi sofɛlɔɔ dimul Belam aa: “Ya cho sofɛlɛ numndo ni. Nduyɛ, ya bii niŋ balɔɔ a num ni haaa a paale hauleŋ ndeŋ. Kani bɛɛ I tosal num niŋ i waa nuaa?” Mbo muli aa: “Ɛ ɛ!”
31 Okoŋ mi Chɛhowa kumbi Belam hɔltaŋ, mbo cha maalikɛinɔ Chɛhowa wo isisi o nɛi a muɛi faŋnde o ba. O lepilɛ niŋ kpe, mbo baŋ wulaŋ, nduyɛ mbo fuuluu hɔlla lɛŋ.
32 Mi maalikɛinɔ Chɛhowa wo nyuna ndu aa: “Le yɛɛnɛ ŋ lɔɔ yɛ sofɛlɛ numndo nuaa haaa bɛmbɔɔ le yaa? Yaŋ ya nilaŋ! Yapila kɛsɛ huŋ sim num o nɛi ni, kanifuule kɔla ŋ cho laŋ ndaŋ la chɛlaŋ a hɛnaŋ nuu le.
33 Mɛɛ sofɛlɔɔ che ya, mbo kindiŋ le ya kpakpalaa haaa bɛmbɔɔ le yaa. Yiyaŋndɔ a nyɛ wa yɔŋnɔŋndo okɔɔ! Te ndoo kpakpala ya le, maa yaa dii num niŋ, mi sofɛlɔɔ ndoo lo yoomu.”
34 Mi Belam dimul maalikɛinɔ Chɛhowa wo aa: “I tosa hakioo, kanifuule I sina kposoŋ maa num te wa ya isisi lachi o nɛi le. Lelaŋ, te a hini kɔl a kɔla ya cho laŋ ndaŋ te, mɛɛ I cho miiŋgɔŋ.”
35 Kɛ mi maalikɛinɔ Chɛhowa wo dimul Belam aa: “La kɔ latulu nya ndaa. Kɛ nyɛ ya dimul numndo kinɛi ŋ nɔ ni ma soo.” Le hei, mi Belam hiau lachi a kɔlaŋ nda laŋgbaa Belaki vem nda.
36 Mɛɛ Belaki tuei maa Belam hiŋ, o lepilɛ niŋ kpe, mbo diam ndu o chiee bɛndu pilɛ niŋ Mowaabi. Chioo hoo cho o kpoloŋndo Anɔŋ ikɛi, o pɛŋgula lɛŋnde ndaleŋ.
37 Mi Belaki dimul Belam aa: “Mi yooŋgu le num, kɛ vɛ a hiŋ te? Baa num oo yiyaŋ ko maa I nɔla mi tosa ma fula tɔɔ le?”
38 Mi Belam dimul Belaki aa: “Awa, mɛɛ I hiŋ niko. Kɛ I tiuba mi dimi nyɛ o nyɛ a ba ni le. Diomnda Mɛlɛka dɔu ya o sondo laŋ kinɛi ya cho isɔɔ ni.”
39 Okoŋ, mi Belam nda Belaki kua latulu Kiliaati-husɔɔ.
40 Mi Belaki bii nauwa a saa mbo soli salaa. Nduyɛ, mbo ke Belam a waŋ banaa wa a ndu latulu wa visiŋ muŋ ŋ tiŋ.
41 Diimandɔɔ, mi Belaki chua Belam ma hel Bamɔti-baal. Nduyɛ ndoo lo loŋ mbo che Isɔluɛiya kpou.
Tɛɛsiaalaŋ
^ Koŋ cho ni, Yufiluaati.
^ Ɔɔ “sala.”
^ Ɔɔ “yawa o wa nda vim ndo.”
^ Hibuluiye, “sofɛlɛ laandoo.”
^ Hibuluiye, “mbo kumbi sofɛlɛ laandoo sondoo.”
