Nɔmbaa 24:1-25
24 Mɛɛ Belam che maa Chɛhowa hini kɔl* le mbo dɔu Isɔluɛiya sala, o kue lɛ ba o ba cheleŋ maa paandu le sinaa te suɛi wɔɔŋii cheleŋ nɔ le Isɔluɛiya komallo le,* kɛ mbo muli hɔlla ba pollo.
2 Mɛɛ Belam heelu hɔlla, mbo cha Isɔluɛiya o dɔɔŋgɔɔ niŋ a kaala ndalaŋ, mi nyina Mɛlɛkaa tual ndu choo.
3 Okoŋ, mbo kandu yooŋgu Mɛlɛkaa dimioo aa:
“Ya Belam, po Biyɔɔ wo, ya cho yooŋgoo hoo dimioo ni.Ya cho wana hɔltaŋ la kumbiŋ ndo ni.
4 Ya cho wana tuei yooŋgu fula Mɛlɛka o ba wo ni.Ya che yilaŋnde a Mɛlɛka Kpaaya Kpou Kpou Wo okɔɔ ni,Nduyɛ mi hini lɛŋ a hɔlla a kuumbaa kpu.
5 Oo Chekɔpu, nuawɔ se mɛɛ tɛndiila numndaŋ la naŋ yɛ!Oo Isɔluɛi, naa num aa chalaa naŋ bɔɔ!
6 Chalta numndaŋ la cho la kuaŋnaŋ kɛ kɛ maa lakpoloŋ,La cho ko maa kpelelaŋ o pioo daŋgala,Nduyɛ maa yɔmii aloo Chɛhowa tɔl le.La cho ko maa yɔmii sida ve o pioo kɔŋgɔ.
7 Mɛŋndaŋ ma cho wa fulaa teleŋ o teleŋ o nyɛm ndɔŋ laanduŋ muuŋ o wou mɛŋndaŋ ndoŋ niŋ.Nduyɛ, o cho kuluŋ ndɔŋ saŋɔɔ naa mɛŋndaŋ ma cho tau wa.
Masa ndɔɔ nɔ niŋ kpaayaa mbo hiou Masaa Akaki.Nduyɛ masale ndɔleŋ le wa niŋ masale kpaaya bɛndu.
8 Mɛlɛka soli nda o lɛŋnde Ichipi leŋ niŋ ni.O cho ko maa leela chiiyo le nda.
O cho kaala simul ndu laŋ tɛɛmbuu.O cho paala ndalaŋ yimi yimi, nduyɛ mbo tɛɛmbuu nda a chiŋɔma nduaŋ.
9 O bɛmnuŋ mbo hini maa kpɔkuŋ,*O nɛɛnɛ bii yɛ kɔllo mbo kpeŋa ndu?
Wanaa duau num sala wa, salaa cho nda choo.Nduyɛ wanaa handu num sendioo choo wa, sendioo cho nda choo.
10 Mi Belaki duaunuŋ tumbe tau tau a Belam. Okoŋ, mbo tiam balaŋ a tumboo, mbo dimul Belam aa: “I veelu num le ma handu yaamɔɔwaa niaa sendioo choo, kɛ a tosa keŋ te, ma duau nda sala haaa bɛmbɔɔ le yaa.
11 Lelaŋ, miiŋgu o numndo suŋ suŋ. Yaa yeema mi ke num bɛɛleŋ tau tau, kɛ Chɛhowa kuuna num bɛɛle leŋ sɔlaa.”
12 Mi Belam dimul Belaki aa: “Mi dimul wanaa ŋ vem ya kɔɔli wa aa,
13 “O yɔŋ bɛɛ mi Belaki ke ya chiɛi ndɔɔ a kaniŋ humboŋ vɛlɛ a kooliiyoŋ ŋ piaa leniŋ cha, I nɔla mi tosa nyɛ Chɛhowa Mɛlɛka nuu kuuna ya le tosaa wo le, o wa ikɛndɛ ɔɔ iwɔɔŋ. Nyɛ Chɛhowa cho ya dimul lo kinɛi ya cho isɔɔ ni.’
14 Lelaŋ, I cho miiŋgɔŋndo o wanaa niaa lo. Kɛ I chɔm ndɔ num nyɛ waŋnda haa cho hunɔɔ wanaa numnda tosal o chilaŋ niŋndo.”*
15 Okoŋ, mbo kandu yooŋgu Mɛlɛkaa dimioo aa:
“Ya Belam, po Biyɔɔ wo, ya cho yooŋgoo hoo dimioo ni.
Ya cho wana hɔltaŋ la kumbiŋ ndo ni.
16 Ya cho wana tuei yooŋgu fula Mɛlɛka o ba wo ni,
Ya cho wana sɔla kɔl kaloo Mɛlɛka Bɛndoo o ba wo ni.
Ya che yilaŋnde a Mɛlɛka Kpaaya Kpou Kpou Wo okɔɔ ni,
Teleŋ ya wa ihini lɛŋ a hɔlla a kuumbaa kpu wo.
17 I cho ndu hunɔɔ chɔ, kɛ o cho suŋ suŋ te.
I cho ndu hunɔɔ mɛɛndaŋ, kɛ o cho suŋ suŋ te.
Luei cho hunɔɔ fula o Chekɔpu niŋ,
Nduyɛ mi tinda lemasaa chɛŋ o Isɔluɛi niŋ.
O cho hunɔɔ Mowaabi tendei piɔlɔɔ,
Nduyɛ mbo pesi pesi kpokpola puaa lasɔŋguaa kpou.
18 Idɔm cho hunɔɔ simnɔŋ nyɛm kiɔɔŋ,
A tonya, Sɛyaa cho hunɔɔ simnɔŋ nyɛm kɛŋ yaamɔɔwaa nduaa.
Nduyɛ a teleŋ koŋ, Isɔluɛi cho hiouwɔɔ lachi a kɔl simulaa nɔɔ.
19 Waŋndo fula niŋ o pulale Chekɔpu leŋ choo mbo hiou lachi a yaamɔɔwaa nduaa yomɔɔ,
Nduyɛ, mbo tɛɛmbuu wana o wana cho lo yoomu o chiee koŋ niŋ.”
20 Mɛɛ Belam che Amalɛki, mbo hiau lachi a yooŋgu Mɛlɛkaa dimioo aa:
“Amalɛki wa kaale taseleŋ o kaalaŋ tɛɛŋ ni,
Kɛ o mɛɛlulaŋ kpɔŋ, o cho hunɔɔ tambei sɔla.”
21 Mɛɛ o che Kenaitiiya, mbo hiau lachi a yooŋgu Mɛlɛkaa dimioo aa:
“Chalta nyalaŋ la cho la kala kala, nduyɛ mi chiɛila nyalaŋ la wa o pouwo choo.
22 Kɛ waŋndo cho hunɔɔ Kenaitiiya* tɛɛmbuu.
Vɛɛ kpɛ teleŋndo lo yɛ niŋ le mi Asiiliaŋnda huŋ kɔ a nya o biyɔɔ niŋ?”
23 Mbo hiau lachi a yooŋgu Mɛlɛkaa dimioo aa:
“Kpokoo! O nɛɛnɛ lo yɛ niŋ yoomu te Mɛlɛka tosa hei pɛ?
24 Dɛndɛla mamɛŋndaŋ la cho chɔnɔŋ Kitim mi la hiŋ,
Nduyɛ mi la huŋ tusi Asiiliaa nyɛpalaa choo,
La cho hunɔɔ Iba nyɛpalaa tusi choo.
Kɛ ndu bɛɛ cho hunɔɔ tambei sɔla.”
25 Okoŋ, mi Belam chaŋ mbo miiŋguŋ o ndu lo. Nduyɛ, mi Belaki bɛɛ kuaŋnuŋ.
Tɛɛsiaalaŋ
^ Hibuluiye, “i wa ikɛndɛ ndu o hɔl.”
^ Hibuluiye, “vim lɛ yawa le.”
^ Ɔɔ “yalakana.”
^ Ɔɔ “o palɛi mɛɛlɛi niŋndo.”
^ Hibuluiye, “Keyaŋ.”
