Nɔmbaa 25:1-18
25 Boondii Isɔluɛiya wa ichali Sitim nde, mi waŋ piaanduaa Isɔluɛiya kandu kaa ihini nɔɔlɛiyo tosaa a waŋ laanduaa Mowabaitiiya.
2 Mi waŋ laanduaa haa kandu nda veeloo o salala mɛlɛkaa ndaa. Nduyɛ ma kandu nyɛdiaa lasalaa dioo, ma beŋ mɛlɛkaa ndaa wulaŋ.
3 Okoŋ, mi Isɔluɛiya sɔɔŋguu le Baal cho Piɔɔ wo sooluuwo, nduyɛ mi Chɛhowa duaunuŋ tumbe tau tau a waŋnda Isɔluɛi.
4 Mi Chɛhowa dimul Muuse aa: “Bii simlachiaa* waŋnda haa kpou, ma landu nda ya Chɛhowa o hɔl ipala deŋ,* le halikpeŋ mi tumbe ya Chɛhowa dɔɔnuŋ a Isɔluɛiya wo pɔlul.”
5 Okoŋ, mi Muuse dimul wanaa kialaa ŋyamaa o Isɔluɛi niŋ aa: “Wanaa cho nya o ba bɛŋgu, nduyɛ ma sɔɔŋguu le Baal cho Piɔɔ wo sooluuwo wa, la diu diu nda.”
6 A teleŋ koŋ kinɛi, po Isɔluɛinɔ pilɛ wa hunɔɔ a chua laandu Midianaitiinɔɔ o dɔɔŋgɔɔ niŋ, Muuse a Isɔluɛiyaa tuaa kpou o hɔl. A boondii keŋ, waŋnda wa chaŋndo tɛndii bɔŋaŋndo lachi.
7 Mɛɛ Finihaasi, po Ɛlieesa wo che hei, o lepilɛ niŋ kpe, mbo chaŋ waŋnda tɛɛŋ, mbo chua bal ndɔɔ. Nduyɛ Ɛlieesa yɛ, Elɔŋ wana soliaa lasalaa velu ndu ni.
8 Okoŋ, mbo kua po Isɔluɛinɔɔ kɔɔli o tɛndiiyo niŋ, mbo chuku nda ŋiɔɔŋ kpou a ballo. Mɛɛ o chuku po Isɔluɛinɔɔ, mbo chuku vɛlɛ chuaa labɛŋguniŋndo. Okoŋ kɔɔli, mi naa wɔɔŋ wa Isɔluɛiya diu diuwo wo pɔlul.
9 Wanaa vi a naa wɔɔŋ koŋ nda, a wa 24,000.
10 Mi Chɛhowa dimul Muuse aa:
11 “Finihaasi, po Ɛlieesa wo tosa mi tumbe yaa dɔunuŋ a Isɔluɛiya wo pɔlul, kanifuule o suŋgu le ya waŋnda tɛɛŋ. Le hei, I tɛɛmbuu lɛ Isɔluɛiya le, mi che bɛɛ I cho Mɛlɛka paŋalɛi. Nduyɛ Ɛlieesa yɛ, Elɔŋ wana soliaa lasalaa velu ndu ni.
12 Lelaŋ, dimul ndu maa, ‘I cho kpema kɔl nyuloo yii a ndu.
13 Kpema koŋ cho tosa le mi ndu a chuauwaa nduaa wa wanaa soliaa lasalaa le fɛɛŋ a fɛɛŋ. Kanifuule, o suŋgu le ya Mɛlɛka ndɔɔ, nduyɛ mbo tosa mi waŋnda Isɔluɛi sɔla malɔɔ hakioo.’”
14 Po Isɔluɛinɔ nda dii koŋ latulu a chua Midianaitiinɔɔ wo ndoo nɔ diolaŋ ni aa Simili, po Selu wo. Nduyɛ Simili yɛ, o wa bolle yuŋguleŋ le pilɛ o kaale Simiɔŋ ndeŋ choo.
15 Chua Midianaitiinɔ nda diiyo ndoo nɔ diolaŋ ni aa Kɔsibi, chua Sɔu wo. Nduyɛ Sɔu yɛ, yuŋgu lebollo o wa o Midiaŋ niŋ ni.
16 Okoŋ kɔɔli, mi Chɛhowa dimul Muuse aa:
17 “La kɔ del Midianaitiiya choo mi la diu diu nda.
18 Kanifuule, nda vɛɛlu nya ni ma tosal nya kaŋgalaa mi la muliŋ Baal cho Piɔɔ wo sooluuwo. Nduyɛ Kɔsibi, chua nda dii o paale naa wɔɔŋndo tol nya choo le Baal cho Piɔɔ wo sooluuwo wo nda soliŋ kpeku ni. Kɔsibi yɛ, yuŋgu lebollo finya ndɔ wa o Midiaŋ niŋ ni.”
