Nɔmbaa 29:1-40
29 “‘Paale taseleŋ o paŋgii ŋɔmmɛu ve niŋ, la nɔ mi la bii bɔŋaŋ diandaa, nduyɛ la nɔ mi la tosa wali kala kɛ kɛ le. O paale leŋ choo nya nɔ le bululaŋ hɔŋndo ni.
2 La nɔ mi la soli nau towa fɔŋndɔɔ, saa kondoo, a saa piaanduaa fɔŋnduaa chii wɔsioo o pilɛ wa a ŋɔmmɛu sala luamaa o ya Chɛhowa lo, le mi chuŋ kɛndɔɔ komal la. Nduyɛ nda kpou nɔ ma wa a kɛndɛ kɛndɛ.
3 Le nau towaa salaa solioo, la chua kpeyaŋ kɛndɛ kɛndɛ nda muuliaŋ a chuɛiyaŋ le sala ŋkullo wo kiloo le yaa, nduyɛ mi la chua kiloo le diiŋ le saa kondoo salaa solioo.
4 Le saa piaanduaa fɔŋnduaa ŋɔmmɛu wa o kɛ kɛ salaa solioo, la nɔ mi la chua kpeyaŋndo kiloo cha,
5 nduyɛ mi la soli chuiŋ fɔŋndɔ piaandoo sala hakioo, le mi hakila nyalaŋ la sɔla malnɔŋndo.
6 Sala luamaa nya soli ipaŋgu o ipaŋgu a sala ndɔ ŋkullo wo, vɛlɛ a sala luamaa nya soli teleŋ o teleŋ a sala ndɔ ŋkullo wo, latulu a salala mamuɛilaŋ nya nɔ ni mi la soli salaa hoo a mɛɛ kɛɛsiaa cho yɛ, le mi chuŋ kɛndɛ koŋ komal ya Chɛhowa.
7 “‘O paŋgii ŋɔmmɛu ve hei niŋ malɔ tɔ, la nɔ mi la bii bɔŋaŋ diandaa, nduyɛ mi la bii mɔnɛi.* La nɔ mi la tosa wali kɛ kɛ le.
8 Nyɛm nya nɔ mi la soli sala luamaa o ya Chɛhowa lo, le mi chuŋ kɛndɔɔ komal la wo cho muŋ ni: nau towa fɔŋndɔɔ o pilɛ, saa kondoo o pilɛ, a saa piaanduaa fɔŋnduaa chii wɔsioo o pilɛ wa a ŋɔmmɛu. Nduyɛ nda kpou nɔ ma wa a kɛndɛ kɛndɛ.
9 Te la wa pɛ nau towaa salaa solioo, la chua kpeyaŋ kɛndɛ kɛndɛ nda muuliaŋ a chuɛiyaŋ le sala ŋkullo wo kiloo le yaa, nduyɛ mi la chua kpeyaŋndo kiloo le diiŋ le saa kondoo.
10 Le saa piaanduaa fɔŋnduaa ŋɔmmɛu wa o kɛ kɛ salaa solioo, la nɔ mi la chua kpeyaŋndo kiloo cha.
11 O fulawɔ o sala malɔɔ lahakioo, a sala luamaa nya soli teleŋ o teleŋ latulu a sala ndɔ ŋkullo, vɛlɛ a sala ndɔ mamuɛiyo wo kɔɔli, la nɔ vɛlɛ mi la soli chuiŋ fɔŋndɔɔ sala hakioo.
12 “‘O paŋgii ŋɔmmɛu ve niŋ malɔ 15, la nɔ mi la bii bɔŋaŋ diandaa. La nɔ mi la tosa wali kala kɛ kɛ le, nduyɛ la nɔ mi la bii bɔŋaŋndo le palɛi i ŋɔmmɛu le Chɛhowa.
13 Nyɛm nya nɔ mi la soli sala luamaa o ya Chɛhowa lo le mi chuŋ kɛndɔɔ komal la wo cho muŋ ni: nauwaa towaa fɔŋnduaa 13, saa konduaa a 2, a saa piaanduaa fɔŋnduaa 14, a chii wɔsioo o pilɛ wa. Nduyɛ, nda kpou nɔ ma wa a kɛndɛ kɛndɛ.
14 Te la wa pɛ nauwaa towaa fɔŋnduaa 13 wa haa o kɛ kɛ salaa solioo, la nɔ mi la chua kpeyaŋ kɛndɛ kɛndɛ nda muuliaŋ a chuɛiyaŋ le sala ŋkullo wo kiloo le yaa, nduyɛ mi la chua kiloo le diiŋ le saa ŋiɔɔŋnda o kɛ kɛ salaa solioo.
15 La chua vɛlɛ kpeyaŋndo kiloo cha, le saa piaanduaa fɔŋnduaa 14 o kɛ kɛ salaa solioo.
16 O fulawɔ o sala luamaa nya soli teleŋ o teleŋ latulu a sala ndɔ ŋkullo, vɛlɛ a sala ndɔ mamuɛiyo wo kɔɔli, la nɔ vɛlɛ mi la soli chuiŋ fɔŋndɔɔ sala hakioo.
17 “‘Nduyɛ o paale diiŋ ndɔ leŋ choo, nauwaa towaa fɔŋnduaa 12, saa konduaa a 2, a saa piaanduaa fɔŋnduaa 14 a chii wɔsioo o pilɛ wa. Nduyɛ, nda kpou nɔ ma wa a kɛndɛ kɛndɛ.
18 Salala ŋkultaŋ a salala mamuɛilaŋ le nauwaa towaa, saa konduaa, a saa piaanduaa fɔŋnduaa mɛɛ nda cho kpou, la nɔ mi la wa mɛɛ kɛɛsiaa cho yɛ.
19 O fulawɔ o sala nya soli teleŋ o teleŋ latulu a sala ndɔ ŋkullo, vɛlɛ a salala ndala mamuɛilaŋ ndo kɔɔli, la nɔ vɛlɛ mi la soli chuiŋ fɔŋndɔɔ sala hakioo.
20 “‘O paale yaa ndɔ leŋ choo, nauwaa towaa 11, saa konduaa a 2, a saa piaanduaa fɔŋnduaa 14 a chii wɔsioo o pilɛ wa. Nduyɛ, nda kpou nɔ ma wa a kɛndɛ kɛndɛ.
21 Salala ŋkultaŋ a salala mamuɛilaŋ le nauwaa towaa, saa konduaa, a saa piaanduaa fɔŋnduaa mɛɛ nda cho kpou, la nɔ mi la wa mɛɛ kɛɛsiaa cho yɛ.
22 O fulawɔ o sala luamaa nya soli teleŋ o teleŋ latulu a sala ndɔ ŋkullo, vɛlɛ a sala ndɔ mamuɛiyo wo kɔɔli, la nɔ vɛlɛ mi la soli chuiŋ fɔŋndɔɔ sala hakioo.
23 “‘O paale hiɔɔlu leŋ choo, nauwaa towaa 10, saa konduaa a 2, a saa piaanduaa fɔŋnduaa 14 a chii wɔsioo o pilɛ wa. Nduyɛ, nda kpou nɔ ma wa a kɛndɛ kɛndɛ.
24 Salala ŋkultaŋ a salala mamuɛilaŋ le nauwaa towaa, saa konduaa, a saa piaanduaa fɔŋnduaa mɛɛ nda cho kpou, la nɔ mi la wa mɛɛ kɛɛsiaa cho yɛ.
25 O fulawɔ o sala luamaa nya soli teleŋ o teleŋ latulu a sala ndɔ ŋkullo, vɛlɛ a sala ndɔ mamuɛiyo wo kɔɔli, la nɔ vɛlɛ mi la soli chuiŋ fɔŋndɔɔ sala hakioo.
26 “‘O paale ŋuɛɛnu leŋ choo, nauwaa towaa a 9, saa konduaa a 2, a saa piaanduaa fɔŋnduaa 14 a chii wɔsioo o pilɛ wa. Nduyɛ, nda kpou nɔ ma wa a kɛndɛ kɛndɛ.
27 Salala ŋkultaŋ a salala mamuɛilaŋ le nauwaa towaa, saa konduaa, a saa piaanduaa fɔŋnduaa mɛɛ nda cho kpou, la nɔ mi la wa mɛɛ kɛɛsiaa cho yɛ.
28 O fulawɔ o sala luamaa nya soli teleŋ o teleŋ latulu a sala ndɔ ŋkullo, vɛlɛ a sala ndɔ mamuɛiyo wo kɔɔli, la nɔ vɛlɛ mi la soli chuiŋ fɔŋndɔɔ sala hakioo.
29 “‘O paale ŋɔmpum ndeŋ choo, nauwaa towaa a 8, saa konduaa a 2, a saa piaanduaa fɔŋnduaa 14 a chii wɔsioo o pilɛ wa. Nduyɛ, nda kpou nɔ ma wa a kɛndɛ kɛndɛ.
30 Salala ŋkultaŋ a salala mamuɛilaŋ le nauwaa towaa, saa konduaa, a saa piaanduaa fɔŋnduaa mɛɛ nda cho kpou, la nɔ mi la wa mɛɛ kɛɛsiaa cho yɛ.
31 O fulawɔ o sala luamaa nya soli teleŋ o teleŋ latulu a sala ndɔ ŋkullo, vɛlɛ a sala ndɔ mamuɛiyo wo kɔɔli, la nɔ vɛlɛ mi la soli chuiŋ fɔŋndɔɔ sala hakioo.
32 “‘O paale ŋɔmmɛu leŋ choo, nauwaa towaa a 7, saa konduaa a 2, a saa piaanduaa fɔŋnduaa 14, a chii wɔsioo o pilɛ wa. Nduyɛ, nda kpou nɔ ma wa a kɛndɛ kɛndɛ.
33 Salala ŋkultaŋ a salala mamuɛilaŋ le nauwaa towaa, saa konduaa, a saa piaanduaa fɔŋnduaa mɛɛ nda cho kpou, la nɔ mi la wa mɛɛ kɛɛsiaa cho yɛ.
34 O fulawɔ o sala luamaa nya soli teleŋ o teleŋ latulu a sala ndɔ ŋkullo, vɛlɛ a sala ndɔ mamuɛiyo wo kɔɔli, la nɔ vɛlɛ mi la soli chuiŋ fɔŋndɔɔ sala hakioo.
35 “‘O paale ŋɔmaa leŋ choo, la nɔ mi la bii bɔŋaŋ bɛndu bɛndoo. Nduyɛ, la nɔ mi la tosa wali kala kɛ kɛ le.
36 Nyɛm nya nɔ le sala luamaa solioo o ya Chɛhowa lo le mi chuŋ kɛndɛ koŋ komal la wo cho muŋ ni: nau towaa o pilɛ, saa kondoo o pilɛ, a saa piaanduaa fɔŋnduaa a ŋɔmmɛu a chii wɔsioo o pilɛ wa. Nda kpou, a nɔ ma wa a kɛndɛ kɛndɛ.
37 Salala ŋkultaŋ a salala mamuɛilaŋ le nau towaa, saa kondoo, a saa piaanduaa fɔŋnduaa mɛɛ nda cho kpou, la nɔ mi la wa mɛɛ kɛɛsiaa cho yɛ.
38 O fulawɔ o sala luamaa nya soli teleŋ o teleŋ latulu a sala ndɔ ŋkullo, vɛlɛ a sala ndɔ mamuɛiyo wo kɔɔli, la nɔ vɛlɛ mi la soli chuiŋ fɔŋndɔɔ sala hakioo.
39 “‘Salalaŋ ndaŋ nya nɔ ni mi la soli o ya Chɛhowa lo, boonduŋ nya cho wa bɔŋaŋnda nyalaŋ biyɔɔ woŋ. La nɔ mi la soli salalaŋ ndaŋ latulu a salala nya chua buŋgɛi laŋ, salala nya kɛɛsiaa le solioo maa salala luamaa laŋ, salala nyala ŋkultaŋ, salala nyala mamuɛilaŋ, vɛlɛ a salala nyala kɔl nyulu laŋ.’”
40 Mi Muuse dimul Isɔluɛiya nyɛ o nyɛ Chɛhowa dimul ndu.
Tɛɛsiaalaŋ
^ Ɔɔ “taunuŋ.” Diomndo hoo sim le sɔɔŋ bɔɔbɔɔ, mɛɛ sumndo biyɔɔ cho nuaa yɛ.
