Nɔmbaa 3:1-51
3 Teleŋ Chɛhowa soo naa Muuse chua o Pembii Sanai Ve choo wo, waŋnda haa wa o pulale Elɔŋ nda Muuse leŋ choo ni.
2 Diola puaa Elɔŋ nda la cho laŋ ni: Nadabi, po ndɔ tasoo, Abaihu, Ɛlieesa, a Itamaa.
3 Diola puaa Elɔŋ nda la cho laŋ ni, a nda pɔya ma siiŋguu nda wanaa soliaa lasaa wa.
4 Kɛ mi Chɛhowa dii Nadabi nda Abaihu o pollo niŋ Sanai, le mɛɛ nda soli sala* ndaa nɔ ma soli Chɛhowa lachi le wo yɛ. Nduyɛ nda ŋiɔɔŋ kpou, ndaa vilu ŋwaŋ piaandu le. Kɛ mi Ɛlieesa nda Itamaa hiau lachi a salalaŋ solioo nda Elɔŋ finya nda latulu.
5 Okoŋ mi Chɛhowa dimul Muuse aa:
6 “Huŋ a wanaa cho o kaale Livai leŋ choo wa, ma simi nda Elɔŋ wana soliaa lasalaa lachi, le ma mala ndu wallo.
7 A cho wa walta keŋnuŋ nda laŋ tosaa tɛndii bɔŋaŋndo lachi le Elɔŋ. Nduyɛ, ma wa vɛlɛ waltaŋ tosaa le Isɔluɛiyaa tuaa kpou tɛndiiyo hoo lachi.
8 Nyɛm laanduŋ cho o tɛndii bɔŋaŋndo niŋndoŋ kpou, nda nɔ ni ma wa muŋ hɔlteŋ. Wali kɛ kɛ cho le tosaa o tɛndiiyo niŋ, nda nɔ ni ma tosa ndu le Isɔluɛiya.
9 Huŋ a Livaiya naa Elɔŋ nda puaa nduaa chua, kanifuule nda Mɛlɛka hɛli Isɔluɛiya tɛɛŋ ni le ndu malaa.
10 Pɔya Elɔŋ nda puaa nduaa, le ma wa wali wanaa soliaa lasalaa tosaa. Te wana cheleŋ* sɔɔŋguu pɛ ikɛi, o nɔ mbo sɔla piɔmndo.”
11 Mi Chɛhowa dimul vɛlɛ Muuse aa:
12 “Ya hɛli Livaiya Isɔluɛiya tɛɛŋ ni sɔŋgɔ chuauwaa ndaa tasiaa* kpou, nduyɛ le ya Livaiya cho wa ni.
13 Kanifuule, le ya chuauwaa tasiaa kpou cho ni. Paale ya diu chuauwaa tasiaa kpou o lɛŋnde Ichipi leŋ niŋndeŋ, mi hɛli* chuauwaa tasiaa Isɔluɛiya tɛɛŋ le yapila, chɔŋ a waŋnda chieeya, mbo kɔ bii a chɔluaa. Le ya nda cho wa ni. Ya cho Chɛhowa ni.”
14 Mi Chɛhowa suaa vɛlɛ naa Muuse chua o pollo niŋ Sanai. Mbo dimul ndu aa:
15 “Poonyiaa puaa fula o yuŋgu Livai yo choo wa diolaŋ a yuŋgula ndala leboltaŋ, vɛlɛ a yuŋgula ndalaŋ kpɛ kpɛ. Poonyiaa waŋ piaanduaa kpou diolaŋ chɔŋ paŋgei i pilɛ kɔ kɛ.”
16 Mi Muuse poonyiaa nda diolaŋ mɛɛ Chɛhowa dimul ndu yɛ. Mbo tosa mɛɛ o dimul ndu yɛ.
17 Puaa Livai velu wa, diola ndalaŋ la cho laŋ ni: Kɛɛsiɔŋ, Kohati, a Meluali.
18 Puaa Kɛɛsiɔŋ velu wa, diola ndalaŋ la cho laŋ ni a yuŋgula ndalaŋ: Libini a Simɛi.
19 Puaa Kohati velu wa, diola ndalaŋ la cho laŋ ni a yuŋgula ndalaŋ: Amiluam, Isihaa, Hɛbulɔŋ, a Yuusiɛɛ.
20 Puaa Meluali velu wa, diola ndalaŋ la cho laŋ ni a yuŋgula ndalaŋ: Maali a Musai.
Yuŋgula Livai laŋ la cho laŋ ni a yuŋgula nda fula choo laŋ.
21 O pulale Kɛɛsiɔŋ ndeŋ choo yuŋgu Libini wo a yuŋgu Simɛi yo fula ni. Yuŋgulaŋ ndaŋ la fula o pulale Kɛɛsiɔŋ ndeŋ choo ni.
22 Puaa ndaa nda poonyiaa diolaŋ chɔŋ paŋgei i pilɛ kɔ kɛ wa, a wa kpou kpou 7,500.
23 Yuŋgula Kɛɛsiɔŋ ndaŋ la wa o tɛndiiyo amakɔɔ o dɔɔŋgɔɔ niŋ ba paaleŋ le del lo ni.
24 Iliaasafi, po Layɛɛ wo wa yuŋgu lebollo le yuŋgu Kɛɛsiɔŋ ndo ni.
25 Puaa Kɛɛsiɔŋ nda ndaa nɔ ni ma wa tɛndii bɔŋaŋndo hɔlteŋ, kola wa o kuumbaa lechoo wo, kola wa o landaa o dio le luɛiyɔɔ o tɛndiiyo niŋndo,
26 kolala wa la lɛɛndaa o luŋ tɛndiiyo laŋ, kola wa o landaa o dio le luɛiyɔɔ o luŋ balu tɛndiiyo a bandu luamaa lasalaa wo, yuei tɛndiiye, a wali kɛ kɛ wa a nyɔɔŋ muŋ okɔɔ.
27 Yuŋgula fula o pulale Kohati leŋ choo laŋ la cho laŋ ni: Yuŋgu Amiluam ndo, yuŋgu Isihaa wo, yuŋgu Hɛbulɔŋ ndo, a yuŋgu Yuusiɛɛ wo. Yuŋgulaŋ ndaŋ la fula o pulale Kohati leŋ choo ni.
28 Puaa wa o yuŋgu ndaa niŋ chɔŋ paŋgei i pilɛ kɔ kɛ wa, a wa kpou kpou 8,600. Nda ndaa nɔ kalaŋndo ni le fondaŋ diandaa waa hɔlteŋ.
29 Yuŋgula puaa Kohati laŋ la wa o dɔɔŋgɔɔ niŋ o tɛndiiyo ba tou wo ni.
30 Ɛlisafaŋ, po Yuusiɛɛ wo wa yuŋgu lebollo ni le yuŋgu Kohati wo.
31 Nda ndaa nɔ kalaŋndo ni le Kɔfoo waa hɔlteŋ, tibiiyo,* nyɛ kɛsiaa la lambuiyo, bandula luamaa lasalalaŋ, nyɛm laanduŋ ndaa soliŋ kpeku o fondaŋ diandaa woŋ, kola wa o landaa o tɛndiiyo niŋndo, a wali kɛ kɛ wa a nyɔɔŋ muŋ okɔɔ.
32 Elɔŋ wana soliaa lasalaa, Ɛlieesa po ndɔ wa yuŋgu lebollo ni le Livaiya. Ndu wa wanaa ndaa tosa wallo o fondaŋ diandaa wa chilaŋ ni.
33 Yuŋgu Maali wo a yuŋgu Musai yo fula o pulale Meluali leŋ choo ni. Yuŋgulaŋ ndaŋ la fula o pulale Meluali leŋ choo ni.
34 Puaa ndaa nda poonyiaa diolaŋ chɔŋ paŋgei i pilɛ kɔ kɛ wa, a wa kpou kpou 6,200.
35 Suluɛɛ, po Abihee wo wa yuŋgu lebollo ni le yuŋgula Meluali laŋ. Nda wa o dɔɔŋgɔɔ niŋ o tɛndiiyo ba luaŋ ndo ni.
36 Puaa Meluali wa ndaa nɔ kalaŋndo ni le wundɛila* wa o tɛndiiyo laŋ waa hɔlteŋ, kandula ndɔlaŋ, suŋgbuma nduaŋ, nyɛm nda simi suŋgbuaŋ leniŋ ndoŋ, nyɛm ndɔŋ laandoŋ kpou, a wali kɛ kɛ wa a muŋ okɔɔ.
37 Ndaa nɔ vɛlɛ ma wa suŋgbuma balu luŋ tɛndiiyo waŋ hɔlteŋ, nyɛm nda simi maŋ leniŋ ndoŋ, chiliŋuŋ siombu siombuŋ nda tuandu tɛndiiyo woŋ, a yuei tɛndiiye.
38 Muuse, Elɔŋ, a puaa nduaa wa o tɛndiiyo sondoo ni, o dɔɔŋgɔɔ niŋ ba paaleŋ le chaŋ ndo. Nda ndaa nɔ le tɛndii Mɛlɛkaa waa hɔlteŋ ni, le Isɔluɛiyaa tuaa kpou. Te wana cheleŋ* ndoo sɔɔŋguu pɛ ikɛi, o sɔla piɔmndo.
39 Mi Muuse nda Elɔŋ poonyiaa puaa Livaiya kpou diolaŋ chɔŋ paŋgei i pilɛ kɔ kɛ a yuŋgula ndalaŋ, a mɛɛ Chɛhowa dimul nda yɛ. A wa kpou kpou 22,000.
40 Okoŋ mi Chɛhowa dimul Muuse aa: “Poonyiaa puaa tasiaa o Isɔluɛi niŋ kpou diolaŋ chɔŋ paŋgei i pilɛ kɔ kɛ, nduyɛ ma chɔm mɛɛ nda cho bolle pilɛ yɛ.
41 La chua Livaiya ma wa le ya sɔŋgɔ puaa tasiaa Isɔluɛiya. Nduyɛ, mi la chua chɔluaa Livaiya sɔŋgɔ chɔluaa tasiaa Isɔluɛiya kpou. Ya cho Chɛhowa ni.”
42 Mi Muuse poonyiaa puaa tasiaa Isɔluɛiya kpou diolaŋ, a mɛɛ Chɛhowa dimul ndu yɛ.
43 Puaa tasiaa Isɔluɛiya a nda poonyiaa diolaŋ chɔŋ paŋgei i pilɛ kɔ kɛ wa, a wa kpou kpou 22,273.
44 Mi Chɛhowa dimul vɛlɛ Muuse aa:
45 “Chua Livaiya sɔŋgɔ puaa tasiaa Isɔluɛiya. Okoŋ, ma chua chɔluaa Livaiya sɔŋgɔ chɔluaa tasiaa Isɔluɛiya. Nduyɛ, le ya Livaiya cho wa ni. Ya cho Chɛhowa ni.
46 Puaa tasiaa Isɔluɛiya 273 hiou Livaiya ni. Lelaŋ, le nda baŋaa,
47 bii siɛkɛlloŋ ŋuɛɛnu* le wana o wana, a mɛɛ nda tuu siɛkɛlloŋ o fondaŋ diandaa yɛ. Siɛkɛlle i pilɛ, lusul ndɔɔ wa Kɛluaa woŋ 20.*
48 Ke Elɔŋ nda puaa nduaa kaniŋ* muŋ le puaa tasiaa hiou Livaiya wa baŋaa.
49 Okoŋ, mi Muuse bii kanioŋ le puaa tasiaa hiou Livaiya wa baŋaa.”
50 Kaniŋ o bii le puaa tasiaa Isɔluɛiya woŋ, ŋ wa kpou kpou siɛkɛlloŋ 1,365, a mɛɛ ndaa tuu siɛkɛlloŋ o fondaŋ diandaa yɛ.
51 Okoŋ, mi Muuse ke Elɔŋ nda puaa nduaa kaniŋ o bii le puaa tasiaa Isɔluɛiya baŋaa woŋ, a mɛɛ Chɛhowa dimul ndu yɛ. Mbo tosa mɛɛ Chɛhowa dimul ndu yɛ.
Tɛɛsiaalaŋ
^ Hibuluiye, “yiŋndeŋ.”
^ Hibuluiye, “miallo.” Koŋ cho ni, wana fula o yuŋgu Elɔŋ ndo choo le wo.
^ Hibuluiye, “hɔɔ kɛ kɛ tase fula o demboo niŋ.”
^ Ɔɔ “mi dindi.”
^ Ɔɔ “tabalioo.”
^ Ɔɔ “finɛtelela.”
^ Hibuluiye, “miallo.” Koŋ cho ni, wana cho Livainɔ le wo.
^ Tofa Tɛɛsiaa B14
^ Tofa Tɛɛsiaa B14.
^ Ɔɔ “woliŋ.”
