Nɔmbaa 31:1-54
31 Okoŋ, mi Chɛhowa dimul Muuse aa:
2 “Miŋgul Midianaitiiya maa le nyɛ nda tosal Isɔluɛiya wo. Okoŋ kɔɔli, a cho wu ma kumbu num maa finyaa num aa mamaa.”
3 Mi Muuse dimul Isɔluɛiya aa: “La bɛɛndiaa puaa nya tɛɛŋ le ma kɔ sɔŋga a Midianaitiiya, ma miŋgul nda maa a mɛɛ Chɛhowa dimi yɛ.
4 La hɛli puaa 1,000 o kaale kɛ kɛ choo o Isɔluɛi niŋ le chɔuwo.”
5 O wanaa wa o waalaŋ niŋ o Isɔluɛi niŋnda tɛɛŋ, mi kaale kɛ kɛ yɔŋgu waŋnda 1,000. Kpou kpou, puaa 12,000 nda bɛɛndiaa ni le chɔuwo.
6 Okoŋ, mi Muuse chua puaa 1,000 o kaale kɛ kɛ choo, mbo viam nda o chɔuwo. Nduyɛ mi Finihaasi, po Ɛlieesa wo, wana soliaa lasalaa kua a nda latulu. Ndu nyɛm laanduŋ diandaŋ a bulula chɔulaŋ la wa o ba ni.
7 Ma kɔ del Midianaitiiya choo a sɔŋgɔɔ a mɛɛ Chɛhowa dimul Muuse yɛ. Okoŋ, ma diu diu puaa kpou.
8 Masaa ŋuɛɛnuaa Midianaitiiya bɛɛ wa o wanaa nda diu wa tɛɛŋ. Nda cho haa ni: Ivi, Luɛkɛm, Sɔu, Hɔɔ, a Luɛba. Ma dii vɛlɛ Belam, po Biyɔɔ wo a muɛi faŋnde.
9 Okoŋ, mi Isɔluɛiya biu biu waŋ laanduaa a chuauwaa Midianaitiiya ma kuaŋnuŋ a nda. Ma biu biu vɛlɛ chɔluaa ndaa, nduyɛ ma chɔuviaa nyɛ o nyɛ ndaa nɔ, ma kuaŋnuŋ.
10 Ma luumuu chieeŋ ndaŋ bɛndoŋ a dɔɔŋgɔla ndalaŋ kpou.
11 Ma kuaŋnuŋ a nyɛm nda sɔla o chɔuwo woŋ kpou latulu a waŋnda chieeya vɛlɛ a chɔluaa.
12 Okoŋ, ma chua waŋnda chieeyaa nda biu biu wa, vɛlɛ a nyɛm nda sɔla woŋ, ma yoo Muuse, Ɛlieesa wana soliaa lasalaa, a waŋnda Isɔluɛi kpou. Nduyɛ, a wa o dɔɔŋgɔɔ niŋ o pollo niŋ Mowaabi o Pioo Chɔɔdaŋ, Chɛluiko ikɛi.
13 Okoŋ mi Muuse, Ɛlieesa wana soliaa lasalaa, a waŋ banaa Isɔluɛi kpou mal ma komal nda naa nda wa o dɔɔŋgɔɔ ikɛiya.
14 Kɛ mi Muuse duaunuŋ tumbe tau tau a puaa fula o chɔuwo wa. Puaa wa puaa chɔuwa bolleŋ nda, apum waŋnda waapilɛ wa nda o ba bɛŋgu ni, apum waŋnda kɛmɛ.
15 Mi Muuse nyuna nda aa: “Le yɛɛnɛ nya mɛi yɛ waŋ laanduaa kpou yoomu?
16 La yaŋ nilaŋ! Waŋ laanduaa haa tol nyɛ Belam dimi wo kɔɔli ni, ma vɛɛlu Isɔluɛiya, okoŋ ma mal Chɛhowa piɛiyo, ma muliŋ Baal cho Piɔɔ wo sooluuwo. Mi hei tosa mi Chɛhowa yɔŋ naa wɔɔŋndo wanaa nduaa choo.
17 Chuauwaa ndaa nya hiŋ nda kinɛi, la diu a piaanduaa kpou nda tɛɛŋ, nduyɛ mi la diu vɛlɛ wana lanɔ kɛ kɛ sina suɛi wana pɔnɔɔ.
18 Kɛ chuaa laanduaa sina wɔ suɛi wana pɔnɔ le wa kinɛi, la mɛi nda yoomu.
19 La nɔ mi la wa o dɔɔŋgɔɔ ikɛi le palɛi i ŋɔmmɛu. Nduyɛ nya ni, wanaa nya biu biu wa ni, wana o wana dii wanachioo, a wana o wana pilaŋ wana nda dii yo, o nɔ mbo dindiŋ o paale yaa ndɔ leŋ choo a o paale ŋɔmmɛu leŋ choo.
20 La nɔ mi la dindi nyɛla nyala chuɛiyaŋ ndaŋ kpou, nyɛ o nyɛ nda toosiaa a yaula visiaa, nyɛ o nyɛ nda toosiaa a yiiŋii chuiŋndo, vɛlɛ a nyɛ o nyɛ nda toosiaa a yɔmndo.”
21 Okoŋ, mi Ɛlieesa wana soliaa lasalaa dimul puaa kuɛ o chɔuwo wa aa: “Sawa Chɛhowa yɔŋgu sanaa a Muuse wo cho hoo ni,
22 ‘Nyɔɔŋ muŋ kinɛi, kooliiyoŋ, chiliŋii humbuei, chiliŋii siaŋɛi,* chiliŋnde, chiliŋii leemu leemuei, a liiye,
23 vɛlɛ a nyɛ o nyɛ nda kei o yiŋ, la nɔ mi la kei muŋ o yiŋ, okoŋ miŋ wa ŋ diandaa. Kɛ a koŋ kpou, la nɔ mi la dindi muŋ a mɛŋma dindiaŋ.* Nyɛ o nyɛ nda keeku pɛ o yiŋ mbo ŋue le, la nɔ mi la tɔɔ ndu a mɛŋndaŋ.
24 O paale ŋɔmmɛu leŋ choo, la nɔ mi la tɔɔ nyɛla nyalaŋ, nduyɛ mi la wa a diandaa, okoŋ mi la hiŋ o dɔɔŋgɔɔ niŋ.’”
25 Okoŋ kɔɔli, mi Chɛhowa dimul Muuse aa:
26 “Chɔm nyɛm waŋnda kɔ puŋga woŋ, wanaa nda biu biu wa, a chɔluaa kpou. Nduyɛ num, Ɛlieesa wana soliaa lasalaa, a yuŋgula leboltaŋ o Isɔluɛi niŋ kpou nɔ le hei tosaa ni.
27 La piɔu muŋ kundalaŋ la tiɔɔŋ. Kundaa o pilɛ cho wa le wanaa kuɛ o chɔuwo wa, mi kundaa o pilɔɔ wa le Isɔluɛiyaa tuaa kpou.
28 O kunda puaa kuɛ o chɔuwo wa cho sɔla wo choo, waŋnda chieeya ni, saa ni, sofɛliaa ni, vɛlɛ a chuiŋnda, la nɔ mi la faŋa o pilɛ o kunda 500 kɛ kɛ choo, mbo wa le ya Chɛhowa.
29 La faŋa ndu o kunda nda sɔla wo choo, mi la ke Ɛlieesa wana soliaa lasalaa, mbo wa le Chɛhowa.
30 O kunda Isɔluɛiyaa tuaa kpou cho sɔla wo choo, la nɔ mi la faŋa o pilɛ o kunda 50 kɛ kɛ choo, waŋnda chieeya ni, nauwa ni, sofɛliaa ni, saa ni, chuiŋnda ni, vɛlɛ a chɔlu kɛ kɛ cheleŋ mi la ke Livaiya, a cho wallo tosaa o tɛndii Chɛhowa wo wa.”
31 Okoŋ, mi Muuse nda Ɛlieesa wana soliaa lasalaa tosa mɛɛ Chɛhowa dimul Muuse yɛ.
32 Nyɛm puaa chɔuwa kɔ sɔla o chɔuwo woŋ, ŋ tɔŋ lo woŋ cho muŋ ni: kpou kpou saa 675,000,
33 nauwa 72,000,
34 a sofɛliaa 61,000.
35 Waŋ laanduaa ndaa sina wɔ suɛi wana pɔnɔ le wa, a wa kpou kpou 32,000.
36 Wanaa kuɛ o chɔuwo wa, saa nda sɔla wa, a wa kpou kpou 337,500.
37 Ma soli saa 675 le Chɛhowa.
38 Nauwaa nda sɔla wa, a wa kpou kpou 36,000. Ma soli nauwa 72 le Chɛhowa.
39 Sofɛliaa nda sɔla wa, a wa kpou kpou 30,500. Ma soli sofɛliaa 61 le Chɛhowa.
40 Waŋnda chieeyaa nda sɔla wa, a wa kpou kpou 16,000. Ma soli ŋwaŋ 32 le Chɛhowa.
41 Okoŋ, mi Muuse tosa mɛɛ Chɛhowa dimul ndu yɛ. Mbo chua nyɛm cho le Chɛhowa woŋ, mbo ke Ɛlieesa wana soliaa lasalaa.
42 Mɛɛ Muuse piɔu nyɛm puaa chɔuwa kɔ sɔla o chɔuwo woŋ tɛɛŋ, nyɛm Isɔluɛiyaa tuaa sɔla woŋ cho muŋ ni:
43 saa 337,500,
44 nauwa 36,000,
45 sofɛliaa 30,500,
46 a waŋnda chieeya 16,000.
47 Mi Muuse tosa mɛɛ Chɛhowa dimul ndu yɛ. Okoŋ, mbo faŋa o pilɛ o kunda 50 kɛ kɛ Isɔluɛiyaa tuaa sɔla wo choo, waŋnda chieeya a chɔluaa, mbo ke Livaiyaa wa wallo o chiɛi Chɛhowa wo wa.
48 Okoŋ, mi puaa wa puaa chɔuwaa kundala yɛ yɛlaŋ bolle wa, a puaa chɔuwa waapilɛ wa o ba bɛŋgu wa, a puaa chɔuwa kɛmɛ wa o ba bɛŋgu wa kua naa Muuse chua.
49 Ma dimul ndu aa: “Naa buɛiyaa numnda chɔm puaa chɔuwaa cho naa o ba bɛŋgu wa kpou, miŋ saaluŋ maa wana pilɛ bɛɛ luusiaŋ te.
50 Lelaŋ, ŋ yeema mi naa pilɛŋ pilɛŋnda yɔŋgu Chɛhowa nyɛm naŋ sɔla muŋ ndoŋ: Kooliiyoŋ, kelaŋ peloŋ, kelaŋ labaŋ, kelaŋ ŋsooŋ, kelaŋ lanioŋ, a nyɛm kɛvɛlɛŋ cheleŋ, le halikpeŋ mi Chɛhowa mal naa haki.”
51 Okoŋ, mi Muuse nda Ɛlieesa wana soliaa lasalaa bii nda kooliiyoŋ a nyɛm kɛvɛlɛŋ cheleŋ kpou o laba.
52 Puaa wa puaa chɔuwa bolle wa, a puaa chɔuwa waapilɛ wa o ba bɛŋgu wa, a puaa chɔuwa kɛmɛ wa o ba bɛŋgu wa, kooliŋ nda ke Chɛhowa woŋ, ŋ wa kpou kpou siɛkɛlloŋ 16,750.*
53 Mi puaa chɔuwa o kɛ kɛ sɔla nyɛm nda puŋga woŋ ŋ ndɔŋ.
54 Mi Muuse nda Ɛlieesa wana soliaa lasalaa bii kooliiyoŋ puaa wa puaa chɔuwa waapilɛ bolle wa, a wa puaa chɔuwa kɛmɛ bolle wa o laba, okoŋ ma kua a muŋ o tɛndii bɔŋaŋndo niŋ, le mi Isɔluɛiya wa loonɔŋndo a mɛɛ Chɛhowa mala nda yɛ.
Tɛɛsiaalaŋ
^ Ɔɔ “kapaa.”
^ Koŋ cho ni, mɛŋma tosa miŋ wa ŋ diandaa Mɛlɛka o hɔl laŋ.
^ Tofa Tɛɛsiaa B14.
