Nɔmbaa 32:1-42
-
Chaltaŋ o Chɔɔdaŋ ndaŋ ba paaleŋ le chaŋ ndo (1-42)
32 Yuŋgu Lubɛŋ ndo a yuŋgu Kaadi wo ndaa nɔ chɔluaa tau tau. Nduyɛ, ma cha maa tanda Chasɛɛ wo a tanda Kiliaadi wo cho fondaŋ kɛndɛ kɛndɛ le chɔluaa.
2 Okoŋ, mi yuŋgu Kaadi wo a yuŋgu Lubɛŋ ndo kua naa Muuse chua, Ɛlieesa wana soliaa lasalaa, a waŋ banaa o Isɔluɛi niŋ, ma dimul nda aa:
3 “Ŋ che tandaa Atalɔti, Dibɔŋ, Chasɛɛ, Nimilua, Hɛsibɔŋ, Ɛliaalɛɛ, Sibam, Nibɔ, a Biɔŋ.
4 Tandalaŋ ndaŋ Chɛhowa yem yaamɔɔwa Isɔluɛiya lachi ni, nduyɛ la naŋ bɔɔ le chɔluaa. Naa buɛiyaa numnda yɛ, ŋ nɔ chɔluaa tau tau.”
5 Ma chɔɔlu dimi aa: “Te ŋ cho pɛ wanaa sɔvɛ num o hɔl, mɛɛ ke naa buɛiyaa numnda lɛŋndeŋ ndeŋ mi le wa nyɛm kiɔɔŋ le naa. Tosa miŋ taŋ Chɔɔdaŋ ndaŋ te.”
6 Okoŋ, mi Muuse nyuna yuŋgu Kaadi wo a yuŋgu Lubɛŋ ndo aa: “Baa la yeema mi la mal puaapiliaa nyaa kɔlaŋ o chɔuwo, mi nya koma chalnuŋ nanuŋ?
7 Le yɛɛnɛ mi la dii waŋnda Isɔluɛi dialloŋ, ma kɛɛ taŋɔɔ o lɛŋnde Chɛhowa cho nda ke leŋ niŋ?
8 Nyɛ pilɛ koŋ kpe finyaa nyaa, a finyaa nyaa mamaa tosa ni, teleŋ naŋ wa Kedɛsi-baniaa, mi viam nda le ma kɔ mɛɛndaŋ lɛŋndeŋ ndo.
9 Mɛɛ nda kuɛ o Kpoloŋndo Ɛsikɔɔ ma cha lɛŋndeŋ, ma dii waŋnda Isɔluɛi dialloŋ le kɔlaŋ o lɛŋnde Chɛhowa ndoo nɔ le nda kioo leŋ niŋ.
10 Mi Chɛhowa duaunuŋ tumbe o kala kala a nda o paale leŋ choo, okoŋ mbo mɛnaŋ po aa:
11 ‘Puaa fula o lɛŋnde Ichipi leŋ niŋ chɔŋ wɔsilaŋ 20 kɔ kɛ wa, o pilɛ bɛɛ luei o lɛŋnde ya chua buŋgɛi le Ebilaham, Aase, a Chekɔpu kioo leŋ niŋ te, kanifuule a diikuŋ ya a kɔl ndaa kpou le.
12 Kelɛbi, po Chɛfunɛ wo, Kenɛsaitiinɔɔ, a Chɔɔsuaa, po Nuŋ ndo kinɛi cho luɛiyɔɔ ni, kanifuule nda diikuŋ ya Chɛhowa a kɔl ndaa kpou ni.’
13 Le hei, mi Chɛhowa duaunuŋ tumbe o kala kala a waŋnda Isɔluɛi. Nduyɛ mbo tosa ma wa heeloo a tuusoo o pollo niŋ le wɔsilaŋ 40. A lo loŋ haaa mi wanaa wa dɛnɛ wɔɔŋndo tosaa Chɛhowa o hɔl la chuu paku.
14 Suŋ suŋ niŋ, la miiŋgu o foofo finyaa nyaa a finyaa nyaa mamaa, mi la simnuŋ chuauwaa dɛnɛ wɔɔŋ bɛndu. Nduyɛ, la tosa mi Chɛhowa chɔɔlu tumbe dɔɔnɔŋ o kala kala a waŋnda Isɔluɛi.
15 Te la kɛɛ pɛ le ndu diikɔŋndo, o cho nda vɛlɛ malɔɔ o pollo hoo niŋ, mi la tosa mi waŋnda haa kpou sɔla tambei.”
16 Okoŋ kɔɔli, ma kɔ dimul Muuse aa: “Chɛl naa miŋ taŋgul fondaŋndaŋ nanuŋ a poutaŋ le chɔluaa naa, vɛlɛ a chieeŋ bɛndoŋ le chuauwaa naa.
17 Kɛ naapila cho wa a bɛɛndiaŋnda le chɔuwo. Nduyɛ ŋ cho lasisi Isɔluɛiya lachi, miŋ lo nda malaa haaa ma fuuluu o fondaŋ ndaa. Chuauwaa naa cho wa o chieeŋ bɛnduŋ nɔ kpakila kala kalalaŋ ndoŋ niŋ, naa waŋnda o lɛŋndeŋ ndeŋ niŋ yɔŋ nda nyɛ o nyɛ le wa.
18 Te o cho mi Isɔluɛinɔ kɛ kɛ sɔla lɛŋndeŋ le ndɔleŋ, mi le wa nyɛm kɛŋ ndɔ le, ŋ miiŋgu o chiɛila naalaŋ te.
19 Nduyɛ, ŋ cho lɛ nyɛm kɛŋ sɔla naa ndaa latulu Chɔɔdaŋ ndaŋ leeloo ɔɔ kɔɔli kɔɔli le, kanifuule ŋ chii nyɛm kiɔɔŋ ŋ naŋ sɔla Chɔɔdaŋ ndaŋ ba paaleŋ le chaŋ ndo.”
20 Mi Muuse dimul nda aa: “Te lende i cho ni, mɛɛ la chua nyɛm nyaŋ chɔuwoŋ Chɛhowa o hɔl le chɔuwo.
21 Te nya kpou chua pɛ nyɛm nyaŋ chɔuwoŋ mi la taŋ Chɔɔdaŋ ndaŋ Chɛhowa lachi, o cho lo kɔlaŋ a yaamɔɔwaa nduaa touwɔɔ ndu lachi,
22 haaa mi ndu Chɛhowa hɛlu nda lɛŋndeŋ o ba. Okoŋ kɔɔli, la tiuba mi la miiŋgu o nya lo, nduyɛ Chɛhowa a Isɔluɛiya bii lɛ nya tɔɔyaŋ te. Okoŋ, mi lɛŋndeŋ ndeŋ le simnuŋ nyɛm kɛŋ nya Chɛhowa o hɔl.
23 Kɛ te la tosa lende le, mɛɛ la cho hakioo kɔndɔŋ a Chɛhowa. O hei niŋ, nyɛpalaa cho nya tolɔɔ choo le haki nyaa.
24 La tiuba mi la taŋgul chieeŋ bɛndoŋ le chuauwaa nyaa a fondaŋndaŋ le chɔluaa nyaa. Kɛ, la nɔ mi la tosa nyɛ nya chua buŋgɛi yo.”
25 Mi yuŋgu Kaadi wo a yuŋgu Lubɛŋ ndo dimul Muuse aa: “Naa buɛiyaa numnda, ŋ cho tosa nyɛ ŋ dimul naa wo.
26 Chuauwaa naa, laandaa naa, a chɔluaa naa kpou cho wa o chieeŋ bɛndoŋ o Kiliaadi niŋ,
27 kɛ naa buɛiyaa numnda kpou cho wa a bɛɛndiaŋ miŋ taŋ le chɔuwo Chɛhowa o hɔl, a mɛɛ ŋ dimi yɛ.”
28 Okoŋ, mi Muuse suaa naa Ɛlieesa wana soliaa lasalaa chua, Chɔɔsuaa, po Nuŋ ndo, a o bolii layuŋguei o kaalaŋ Isɔluɛi lo a nda okɔɔ.
29 Mbo dimul nda aa: “Te yuŋgu Kaadi wo a yuŋgu Lubɛŋ ndo taŋ pɛ Chɔɔdaŋ ndaŋ a nya latulu, mi wana o wana wa o bɛɛndiaŋ le chɔuwo Chɛhowa lachi, nduyɛ mi la hɛlu lɛŋndeŋ, mɛɛ la nɔ mi la ke nda lɛŋnde Kiliaadi leŋ mi le wa nyɛm kɛŋ nda.
30 Kɛ te a chue nyɛm ndaŋ chɔuwoŋ ma taŋ a nya latulu le, mɛɛ la nɔ mi la wa nya ndaa o lɛŋnde Kenaŋ ndeŋ niŋ.”
31 Le hei, mi yuŋgu Kaadi wo a yuŋgu Lubɛŋ ndo dimi aa: “Nyɛ Chɛhowa dimul naa buɛiyaa numnda wo, ndu naŋ cho tosa ni.
32 Ŋ cho nyɛm naŋ chɔuwoŋ chua, miŋ taŋ Chɛhowa lachi o lɛŋnde Kenaŋ ndeŋ niŋ. Kɛ nyɛm kɛŋ naŋ nɔ le sɔlaa woŋ cho wa Chɔɔdaŋ ndaŋ kpeŋgei hei.”
33 Tanda wa Saihɔŋ, masa Amɔnaitiiya o ba bɛŋgu wo, a tanda wa Ɔku, masa Baasiaŋ nda o ba bɛŋgu wo, mi Muuse chua tandala laŋ, chieeŋ bɛndoŋ, vɛlɛ a sɔndɔkɔlta wa o tandala laŋ niŋndaŋ kpou, mbo ke yuŋgu Kaadi wo, yuŋgu Lubɛŋ ndo, a wanaa fula o yuŋgu Manaasɛ wo choo wa a tiŋ, po Choosɛ wo.
34 Mi yuŋgu Kaadi wo taŋgul* Dibɔŋ, Atalɔti, Aloya,
35 Atalɔti-siofaŋ, Chasɛɛ, Chokpɛhaa,
36 Bɛti-nimilua, a Bɛti-haluaŋ. Ma taŋgul muŋ a kpakila kala kalalaŋ, nduyɛ ma taŋgul fondaŋndaŋ a poutaŋ le chɔluaa.
37 Mi yuŋgu Lubɛŋ ndo taŋgul Hɛsibɔŋ, Ɛliaalɛɛ, Kiliaatim,
38 Nibɔ, a Baal-miɔŋ. Ma siŋga diola chieeŋ bɛnduŋ nda miŋgi muŋ taŋgul loŋ, okoŋ ma ke muŋ diola cheleŋ. Ma miŋgi vɛlɛ Sibima taŋgul.
39 Mi puaa Makaya wa, po Manaasɛ wo, kɔ del Kiliaadi choo a sɔŋgɔɔ, ma bii ndu. Okoŋ ma tuau Amɔluaitiiyaa wa loŋ nda.
40 Mi Muuse ke Makaya, po Manaasɛ wo lɛŋnde Kiliaadi leŋ, mbo kila chaltaŋ loŋ.
41 Okoŋ kɔɔli, mi Chaa, po Manaasɛ wo bɛɛ kɔ del sɔndɔkɔlta ndala nda taŋgul a tɛndiilaŋ ndaŋ choo, mbo bii laŋ. Okoŋ mbo ke laŋ diolaŋ aa Havɔti-chayɛɛ.*
42 Mi Nobaa bɛɛ kɔ chiŋalaŋ Kenati a sɔŋgɔɔ, mbo bii ndu a chieeŋ balu ndo woŋ. Okoŋ, mbo ke chiee koŋ diolaŋ aa Nobaa, diola ndɔla ndupila laŋ.
