Nɔmbaa 34:1-29
34 Mi Chɛhowa dimul vɛlɛ Muuse aa:
2 “Ke waŋnda Isɔluɛi nɛila chɔmaalaŋ ndaŋ, ma dimul nda aa: ‘Te la kuɛ pɛ o lɛŋnde Kenaŋ ndeŋ niŋ, lɛŋnde nya cho sɔla mi le wa nyɛm kɛŋ nya leŋ, pɛŋgula ndɔlaŋ la cho laŋ ni.
3 “‘Pɛŋgula nyalaŋ ba tou wo la cho chɔnɔŋ o pollo niŋ Siŋ, haaa Idɔm. Nduyɛ pɛŋgula nyalaŋ ba tou wo kpeŋgii ba paaleŋ le chaŋ ndo, la cho lakɔ haaa o Pee Mɛŋma Ihɛllo.*
4 Pɛŋgula nyalaŋ la cho tundɔŋ mi la kuɛ ba tou wo le helɔɔ Akilabim, nduyɛ mi la kuɛ Siŋ. Okoŋ, mi la kɔ mɛɛlu Kedɛsi-baniaa ba tou wo. La cho timbulaŋ a Hasaa-ada, haaa Asimɔŋ.
5 Pɛŋgulaŋ ndaŋ la cho tundɔŋ Asimɔŋ mi la kuɛ o Kpoloŋndo* Ichipi, nduyɛ mi la kɔ mɛɛlu o Pee Bɛndu Mɛŋma Ihɛllo.*
6 “‘Pee Bɛndu Mɛŋma Ihɛllo* a kɔŋgɔ ndɔɔ cho wa pɛŋgula nyalaŋ ba paaleŋ le del lo ni. Laŋ la cho wa pɛŋgula nyalaŋ ba paaleŋ le del lo ni.
7 “‘Pɛŋgula nyalaŋ ba luaŋ ndo la cho wa laŋ ni: La nɔ mi la handu laŋ chɔŋ o Pee Bɛndu Mɛŋma Ihɛllo haaa o Pembii Hɔli Ve.
8 Chɔŋ o Pembii Hɔli Ve, la nɔ mi la handu pɛŋgulaŋ haaa Lɛbo-Hamaati,* okoŋ mi la kɔ mɛɛlu Sɛdadi.
9 Pɛŋgulaŋ ndaŋ la cho timbulaŋ haaa Sifilɔŋ, nduyɛ mi la kɔ mɛɛlu Hasaa-ɛnaŋ. Pɛŋgula nyalaŋ ba luaŋ ndo la cho wa laŋ ni.
10 “‘Okoŋ mi la handu pɛŋgula nyalaŋ ba paaleŋ le chaŋ ndo, chɔŋ Hasaa-ɛnaŋ haaa Siɛfam.
11 Pɛŋgulaŋ ndaŋ la cho chɔnɔŋ Siɛfam, mi la timbulaŋ a Luibila, haaa Ayiŋ ba paaleŋ le chaŋ ndo. Nduyɛ, la cho tuusu mi la holnuŋ pemboŋ o Pee Mɛŋma Ihɛllo Kinɛluɛti, ba paaleŋ le chaŋ ndo.
12 Pɛŋgulaŋ ndaŋ la cho timbulaŋ haaa Chɔɔdaŋ mi la mɛɛlu o Pee Mɛŋma Ihɛllo. Lɛŋnde nyaleŋ le cho wa leŋ ni a pɛŋgula balu leŋ ndaŋ. ’”
13 Okoŋ mi Muuse ke Isɔluɛiya nɛila chɔmaalaŋ ndaŋ, mbo dimul nda aa: “Lɛŋndeŋ ndeŋ nya cho kooŋ wuu ni le leŋ piɔuwo mi wana o wana sɔla buŋgɛi i nduɛi, a mɛɛ Chɛhowa dimi yɛ. Kaalaŋ la ŋɔmahiɔɔlu a tɛndaa tɛɛŋ nɔ le leŋ sɔlaa ni.
14 Kanifuule, kaale Lubɛŋ ndeŋ a yuŋgula ndala leboltaŋ, kaale Kaadi leŋ a yuŋgula ndala leboltaŋ, a kaale Manaasɛ leŋ tɛndaa tɛɛŋ chii niŋ nyɛm kɛŋ ndaŋ sɔla.
15 Kaalaŋ la tiɔɔŋ a tɛndaa tɛɛŋ chii niŋ nyɛm kɛŋ ndaŋ sɔla o tanda Chɔɔdaŋ ndo niŋ, Chɛluiko ba paaleŋ le chaŋ ndo.”
16 Mi Chɛhowa dimul vɛlɛ Muuse aa:
17 “Wanaa nɔ le nya lɛŋndeŋ piɔuwo wa, diola ndalaŋ la cho laŋ ni: Ɛlieesa wana soliaa lasalaa, a Chɔɔsuaa, po Nuŋ ndo.
18 O kaale kɛ kɛ niŋ, la hɛli wana cho bolleŋ ndo le lɛŋndeŋ piɔuwo mi le wa nyɛm kɛŋ nya.
19 Puaa nda hɛli wa, diola ndalaŋ la cho laŋ ni: Kelɛbi, po Chɛfunɛ wo, fulaa o kaale Chuda leŋ choo.
20 Siɛmuɛɛ, po Amihudi wo, fulaa o kaale puaa Simiɔŋ nda choo.
21 Elaadai, po Chisilɔŋ ndo, fulaa o kaale Bɛŋjamiŋ ndeŋ choo.
22 Bukai, po Chɔkili wo, fulaa o kaale puaa Daŋ nda choo.
23 Haniɛɛ, po Ɛfɔdi wo, fulaa o kaale puaa Manaasɛ wa choo, po Choosɛ wo.
24 Kɛmuɛɛ, po Sifitaŋ ndo, fulaa o kaale puaa Ifiluem nda choo.
25 Ɛlisafaŋ, po Paanaki wo, fulaa o kaale puaa Sɛbulɔŋ nda choo.
26 Palitiɛɛ, po Asaŋ ndo, fulaa o kaale puaa Isaka wa choo.
27 Ahihudi, po Siɛlomi wo, fulaa o kaale puaa Asia wa choo.
28 Pɛdahɛɛ, po Amihudi wo, fulaa o kaale puaa Nafitalii wa choo.”
29 Puaa haa Chɛhowa hɛli ni le lɛŋnde Kenaŋ ndeŋ piɔuwo Isɔluɛiya tɛɛŋ.
Tɛɛsiaalaŋ
^ Koŋ cho ni, Pee Nyɛ Yoomaa Cho Leniŋ Te Wo.
^ Tofa Tɛɛsiaa.
^ Koŋ cho ni, Pee Bɛndu Mɛŋma Ihɛllo, Mɛditalueniaŋ ndaŋ.
^ Koŋ cho ni, Mɛditalueniaŋ ndaŋ
^ Ɔɔ “le luɛiyɔɔ Hamaati.”