Nɔmbaa 35:1-34
35 Mi Chɛhowa hiau lachi a suɛi naa Muuse chua o dɛŋgbɔɔ niŋ Mowaabi, o Pioo Chɔɔdaŋ, Chɛluiko ikɛi. Mbo dimul ndu aa:
2 “Dimul Isɔluɛiya maa a hɛli chieeŋ bɛndoŋ ŋ tiŋ o chieeŋ nda sɔla woŋ tɛɛŋ, ma ke Livaiya le ma wa leniŋ. Nduyɛ, a nɔ vɛlɛ ma ke Livaiya fondaŋndaŋ le chɔluaa diolaŋ o chieeŋ muŋ balɔɔ.
3 Livaiya cho wa o chieeŋ bɛnduŋ muŋ niŋ ni. Nduyɛ, fondaŋndaŋ le chɔluaa diolaŋ la cho wa le nyɛm ndaŋ kɛsioo, saa ndaa, chuiŋaa ndaa, a chɔluaa cheleŋnda kpou.
4 Fondaŋnda nya cho Livaiya ke o chieeŋ ndaŋ bɛndoŋ ikɛi le chɔluaa diolaŋ ndaŋ, la nɔ mi la wa nɛiyo 1,500,* chɔŋ o kpaki chioo balɔɔ silɔ kɔ kɛ.
5 La nɔ mi la tuu chioo kɔɔli kɔɔli ba paaleŋ le chaŋ ndo, nɛiyo 3,000, ba tou wo nɛiyo 3,000, ba paaleŋ le del lo nɛiyo 3,000, a ba luaŋ ndo nɛiyo 3,000, nduyɛ mi chioo wa tɛɛŋ. Fondaŋndaŋ le chɔluaa diolaŋ la cho wa laŋ ni le chieeŋ ndaŋ bɛndoŋ.
6 “La nɔ mi la hɛli chieeŋ bɛndoŋ 6 mi la ke Livaiya, le miŋ wa chieeŋ viaŋnaŋndoŋ. O hei niŋ, te sulɛi hɛluŋ pɛ waŋndo mbo dii wanachioo, o nyaanuŋ loŋ. Nduyɛ, mi la ke nda vɛlɛ chieeŋ bɛnduŋ cheleŋ 42.
7 Kpou kpou, la nɔ mi la ke Livaiya chieeŋ bɛndoŋ 48, latulu a fondaŋndaŋ le chɔluaa diolaŋ.
8 Chieeŋ bɛnduŋ nya cho Livaiya ke woŋ nɔ miŋ fula o nyɛm kɛŋ Isɔluɛiya sɔla woŋ tɛɛŋ. Te yuŋgoo wa pɛ tau, la faŋa tau. Kɛ te yuŋgoo ve o bɔɔ le, la faŋa nyɛɛmbɔ. Yuŋgu kɛ kɛ nɔ mbo faŋa chieeŋ ndɔŋ bɛndoŋ ŋ tiŋ mbo ke Livaiya, a mɛɛ kpɛ o sɔla nyɛm kiɔɔŋ yɛ.”
9 Mi Chɛhowa dimul vɛlɛ Muuse aa:
10 “Dimul Isɔluɛiya aa, ‘La cho hunɔɔ Chɔɔdaŋ ndaŋ taŋɔɔ le kɔlaŋ o lɛŋnde Kenaŋ ndeŋ niŋ.
11 La nɔ mi la hɛli chieeŋ bɛnduŋ nya yeema woŋ miŋ wa chieeŋ viaŋnaŋndoŋ. Okoŋ, te sulɛi hɛluŋ pɛ waŋndo mbo dii wanachioo, o nyaanuŋ loŋ.
12 Chieeŋ bɛndoŋ muŋ cho wa le mi wana sulɛi hɛluŋ ndo kɔ vioŋnuŋ loŋ, yɔŋii wana miŋgiaa maa* dii ndu. Nduyɛ, wana sulɛi hɛluŋ koŋ ndo nɔ mbo lo loŋ haaa ma kɔɔsa a ndu waŋnda kpou o hɔl.
13 Le saboo hoo chieeŋ viaŋnaŋ ŋɔmpum nya hɛli woŋ cho wa ni.
14 La nɔ mi la hɛli chieeŋ bɛndoŋ ŋgaa Chɔɔdaŋ ndaŋ leeloo nanuŋ, nduyɛ mi la hɛli chieeŋ bɛndoŋ ŋgaa o lɛŋnde Kenaŋ ndeŋ niŋ, le miŋ wa chieeŋ viaŋnaŋndoŋ.
15 Chieeŋ bɛnduŋ ŋɔmpum ndoŋ muŋ cho wa chieeŋ viaŋnaŋndoŋ le Isɔluɛiya, vɛlɛ a wanaa fula o fondaŋnda cheleŋ ma huŋ wa Isɔluɛiya tɛɛŋ nda. Wana o wana sulɛi hɛluŋ pɛ mbo dii waŋndo, loŋ o nɔ ni mbo nyaanuŋ.
16 “‘Kɛ te waŋndo lɔɔ pɛ chaaŋ ndɔ wanachioo a chiliŋnde mbo dii ndu, mɛɛ wana diyaa o cho ni. Ndu bɛɛ a nɔ ma dii ndu.
17 Te o yɔŋ pɛ maa a pouwo o vɛ chaaŋ ndɔ wanachioo ni mbo dii ndu, mɛɛ wana diyaa o cho ni. Ndu bɛɛ a nɔ ma dii ndu.
18 Nduyɛ te o yɔŋ pɛ maa a yɔmndo o lɔɔ chaaŋ ndɔ wanachioo ni mbo dii ndu, mɛɛ wana diyaa o cho ni. Ndu bɛɛ a nɔ ma dii ndu.
19 “‘Te o yɔŋ pɛ mi wana miŋgiaa maa saaluŋ wana dii koŋ chaaŋ ndɔ wanachioo wo, ndupila kpeekpei nɔ ni mbo dii ndu.
20 Te yɛleŋ ndoo tul ndu ni mbo nyindu ndu, ɔɔ mbo via ndu a nyɛ mbo wu le mɛɛ o tuunuŋ suɛi wɔɔŋnde o kɔl le ndu yɛ,*
21 ɔɔ mbo luaa ndu a ba mbo dii ndu le mɛɛ o tul ndu yɛleŋ yɛ, ndu bɛɛ a nɔ ma dii ndu, kanifuule wana diyaa o cho ni. Wana miŋgiaa maa nɔ ni mbo dii ndu te o saaluŋ ndu pɛ.
22 “‘Te o yɔŋ pɛ maa sulɛi hɛluŋ ndu ni mbo nyindu ndu ɔɔ mbo via ndu a nyɛ mbo dii ndu, kɛ o cho leyɛ le o tul ndu ɔɔ mbo tuunuŋ suɛi nduɛi wɔɔŋ o kɔl te,*
23 ɔɔ o chi ndu le mbo tosa mi pouwo kɔ del ndu choo mbo wu, kɛ nduyɛ o tul ndu leyɛ ɔɔ mbo wa lanɛi nuuviaa le ndu yɔŋul te,
24 waŋ banaa nɔ ma tol nɛila chɔmaalaŋ ndaŋ kɔɔli, okoŋ ma kelu yamɛi wana dii waŋndo wo tɛɛŋ nda wana miŋgiaa maa.
25 Waŋ banaa nɔ ma piŋi wana sulɛi hɛluŋ mbo dii waŋndo wo wana miŋgiaa maa o ba. Okoŋ, ma miŋgi ndu o chiee o nyaanuŋ mbo kɔ vioŋnuŋ ndo niŋ. Nduyɛ, o nɔ mbo lo loŋ haaa mi wana bɛndu wanaa soliaa lasala nda pɔya a chuɛima diandaŋ ndo vi.
26 “‘Kɛ te wana sulɛi hɛluŋ ndo hiou pɛ pɛŋgula chiee o kɔ vioŋnuŋ ndo,
27 okoŋ mi wana miŋgiaa maa saaluŋ ndu, nduyɛ mbo che maa o hiou pɛŋgula chiee o kɔ vioŋnuŋ ndo, o dii ndu bɛɛ, tɔɔyaŋ ve ndu choo le.
28 Kanifuule, o nɔ mbo wa o chiee o kɔ vioŋnuŋ ndo niŋ haaa mi wana bɛndu wanaa soliaa lasalaa vi. Te wana bɛndu wanaa soliaa lasalaa vi pɛ, wana sulɛi hɛluŋ mbo dii waŋndo wo nɔla mbo miiŋguŋ o ndu lo chiee.
29 Ba o ba nya wa pɛ, sawalaŋ ndaŋ nya nɔ ni mi la tol kɔɔli le yamaŋ kiolɔɔ teleŋ o teleŋ.
30 “‘Wana o wana dii waŋndo pɛ mi seiya wa, ndu bɛɛ la nɔ mi la dii ndu, kanifuule wana diyaa o cho ni. Kɛ te o yɔŋ pɛ maa seiyo ndu pilɛ kpe cho ni, la nɔ mi la dii ndu le.
31 Wana diyaa nɔ mbo sɔla piɔmndo wo, la bii nyɛ o nyɛ le yoomu ndɔɔ baŋaa le, kanifuule o nɔ mbo sɔla piɔmndo.
32 Te wana nyaanuŋ o chiee viaŋnaŋndo niŋndo ke nya pɛ nyɛ le mi la chɛl ndu mbo miiŋgu o ndu lo chiee tuupa mi wana bɛndu wanaa soliaa lasalaa vi, la bii le.
33 “‘La nɔɔliaa lɛŋnde nya cho ichali leniŋ ndeŋ te, kanifuule koowaŋ ma nɔɔliaa lɛŋndeŋ ni. Nduyɛ te koowaŋ ma talaŋ pɛ lɛŋ, le mi le sɔla diondɔɔ, mɛɛ mi wana tala maŋ ndo sɔla piɔmndo.
34 La nɔɔliaa lɛŋnde nya cho ichali leniŋ ndeŋ te. Kanifuule, ya Chɛhowa, I cho nya waŋnda Isɔluɛi tɛɛŋ.’”
Tɛɛsiaalaŋ
^ Tofa Tɛɛsiaa B14.
^ Ɔɔ “wanayɛi kpɛɛluŋ wana nda diiyo.”
^ Hibuluiye, “mbo kɔ vioŋnuŋ inɛ.”
^ Hibuluiye, “mbo kɔ vioŋnuŋ inɛ.”
